MATAYO 2

1Neryo Yesu mwabutwa omo mũyĩ w'eBetelehemũ, omo kihugo ky'eYũdea oko mugulu Herode abya mwami. Neryo lebaya, abandu b'amenge mobalũa eyo eryuba likahulukira, mobahĩka eYerũsalema, bati, 2Ali hahi oyo wabutawa mo mwami w'Abayũda kwehĩ? Kusangwa twabirilola oko ngũnũnũ yiwe eyo eryuba likahulukira, neryo twabĩrĩhĩka erĩmũramya. 3Omugulu omwami Herode owa ekĩ, mwahanga-hangya, n'abandu bosĩ b'eYerũsalema mobabya batya. 4Neryo Herode mwahĩndanĩa abahererĩ bakulu bosĩ n'abakangĩrĩrya b'emigambo, neryo mwabũlyabo Kristo ng'angabutirwahi. 5Mobamũsũbĩrya bati, Omo mũyĩ w'eBetelehemũ y'eYũdea, kusangwa kĩsakĩre n'omũmĩnyererĩ ati, 6Uwe Betelehemũ omo kihugo ky'e Yũda, Suli muke n'ahake omo katĩkatĩ k'abakulu b'eYũda; Kusangwa omũtabalĩ asyalũa ewawe, Oyo wasyateya abandu bage Ĩsraelĩ. 7Neryo omwami Herode mwabirikira ab'amenge bo bũbĩso-bĩso, mwabũlyabo engũnũnũ eyo nga yahuluka mugulu wahi. 8Neryo Herode mwatumabo eBetelehemũ, ati, Mugende mukwese ndeke busana n'omwana oyo; neryo mwamabimubana mwasyambwira, nage inayayo n'erĩmũramya. 9Neryo babere babĩowa ebyo mwami Herode abũga, mobagenda, neryo lebaya engũnũnũ eyo balangira eyo eryuba likahulukira, moyagenda embere syabo erĩhĩka aho yahangana endata w'aho mwana oyo abya. 10Neryo omugulu balangira engũnũnũ eyo mobatsema kutsibu n'obutseme bunene. 11Neryo mobingira omo nyũmba, mobalola oko mwana oyo haguma na nyĩnya wuwe ye Marĩa. Mobakũkama ahisi n'erĩmũramya; kandi mobasengula ebindu byabo mobamuha olũsũnzo lw'esyofranka sy'amagetsi, n'obukwa n'amanemane. 12Neryo Nyamuhanga mwahanabo omw'ilota sibasube ew'omwami Herode; neryo mobasuba ewabo omo yindi nzira. 13Neryo ab'amenge babere babigenda, omũlaĩka w'Omukama mwabutukira uku Yosefũ omo nzolĩ ati, Hangana, wĩmaye omwana na nyĩnya wuwe, musagire eMĩsĩrĩ, ubyeyo erĩhĩka aho nasyakubwirira. Herode akandisonda-sonda omwana erĩmwĩta. 14Neryo Yosefũ mwahangana, mwĩmya omwana na nyĩnya wuwe, mwagenda eMĩsĩrĩ omo kiro. 15Neryo mwĩkalayo erĩhĩka okw'ihola lya Herode. Ebĩ byakolawa erĩberererya ebyo Mukama abũgĩra omo mũmĩnyererĩ ati, Monabirikira Mugala wage erĩlũa eMĩsĩrĩ. 16Neryo omugulu omwami Herode aminya abandu b'amenge ko babirimuteba mwahitana kutsibu. Neryo mwahamula erĩĩta abana bosĩ b'obulume ababya eBetelehemũ n'ababya hakũhĩ n'eBetelehemũ, ababya b'emyaka ĩbĩrĩ n'abalere kw'aho, iniakaganza omugulu aminya oko b'amenge abo 17Neryo mokyabererera ekyabũgawa n'omũmĩnyererĩ Yeremĩa ati, 18Omulenge akogũbawa eRama, Eririra n'erĩsũsũmana ĩnene, Rakelĩ akalira busana n'abana buwe, Rakelĩ akagana erĩkĩranĩbwa, Kusangwa abosĩ babirihola. 19Nĩkwa omwami Herode abere abihola, lebaya, omũlaĩka w'Omukama mwabutukira uku Yosefũ omo nzolĩ eMĩsĩrĩ, ati, 20Hangana, wĩmaye omwana na nyĩnya, usube omo kihugo ky'eĨsraelĩ, kusangwa abasonda erĩĩta omwana babirihola. 21Neryo Yosefũ mwahangana, mwĩmya omwana na nymya, mobasuba omo kihugo ky'eĨsraelĩ. 22Nĩkwa omugulu Yosefũ owa ko Arkelayo akatabala eYũdea omo mwanya wa Herode ĩse wuwe, Yosefũ mubaha erisubayo. Kandi Nyamuhanga mwamuhana omo nzolĩ, kyaleka iniaya omo bihugo by'eGalĩlaya. 23Nĩkwa mwahĩka oko mũyĩ w'eNazaretĩ neryo mwĩkalayo, erĩberererya ebyo bamĩnyererĩ babũga bati, Asyahulwa mo Mũnazaretĩ.

will be added

X\