MATAYO 19

1Nĩkwa Yesu abere abibuga emyatsi eyĩ, mwalũa eGalĩlaya, mwaya omo kihugo ky'eYũdea eyisirya w'olũsĩ lw'eYorodanĩ. 2N'esyondeko nene mosyamukwama, naye mwalamyabo eyo. 3Abandi Bafarĩsayo mobahĩka uku Yesu bakamulengako bati, Emigambo ĩkalĩga omundu akahiga mũkalĩwe busana n'emyatsi mitya-mitya kwehĩ? 4Yesu mwasũbĩryabo ati, Simwetasoma amasako aya kwehĩ? Ati, Oyo wahangikabo erĩmbere mwahangikabo, omulume n'omũkalĩ, 5ati, Busana n'omwatsi oyũ, omundu asyasĩga ĩse wuwe na nyĩnya wuwe, inialanda uku mũkalĩ wuwe, n'ababiri basyabya mubiri muguma. 6Neryo litya sibakiri babiri, nĩkwa mubiri muguma. Neryo abo Nyamuhanga abiriamatanĩa haguma, sihabye mundu oyukagabulabo. 7Neryo Abafarĩsayo mobamũbũlya bati, Busana nakĩ Musa mwategeka eriha omũkalĩ y'ebarua y'erimukomola n'erimuhiga kwehĩ? 8Yesu mwabwirabo ati, Musa mwabalĩgĩra erikomola abakalĩ benyũ busana n'erikala ly'emitima yenyũ; nĩkwa okw'ĩtsũka ly'erihangika sibyabya bitya. 9Nage ngababwira nyiti, Omundundi oyukakomola omũkalĩ wuwe, bite busana n'erĩsĩngĩra, akahĩkya ogundi mũkalĩ, iniakasĩngĩra, n'oyũkahĩkaya omũkalĩ oyulyakomolawa akasĩngĩra nibya. 10Neryo abiga mobamũbũlya bati, Omwatsi w'omulume n'omũkalĩ amabya atya, siritolere erĩhĩkya. 11Nĩkwa Yesu mwabwirabo ati, Abandu bosĩ sibetoka erĩrĩga ekĩnywa ekĩ, ba n'abahabawakyo. 12Hali myatsi mĩsĩndo-mĩsĩndo eyikaleka abandu ibatatoka erĩhĩkya. Abandi kusangwa babutawa batya; abandi kusangwa bandu bayirabo batya; n'abandi sĩbehĩkaya busana n'obwami bw'elubula. Oyukatoka erĩrĩga omwatsi oyũ alĩgego. 13Neryo abandi bandu mobaletera Yesu y'abana balere bati, ahĩre kubo kw'ebyala biwe, n'erisaba, nĩkwa abiga mobakunga abandu abo. 14Nĩkwa Yesu mwabũga ati, Muleke abana base kwĩngye. Sĩmũkakĩrayebo, kusangwa Obwami bw'elubula ni bw'abandu abali ng'aba. 15Neryo Yesu abere abĩhĩra kubo kw'ebyala biwe, mwalũayo. 16Neryo omundu muguma mwahĩka uku Yesu ati, Mũkangĩrĩrya, nangakola mũbĩrĩ wahi mubuya, inabana engebe y'erikota kwehĩ? 17Nĩkwa Yesu mwamubwira ati, Busana nakĩ ukanyĩbũlaya busana n'ebibuya kwehĩ? Hali Muguma musa yona mubuya; nĩkwa wamanza eriingira omo ngebe, ũtegaye ebihano. 18Neryo mundu oyo mwamũbũlya ati, Ko ni bihano byahi kwehĩ? Yesu mwamũsũbĩrya ati, Isĩwĩta, isiwasingĩra, ĩsĩwĩba, isiwabihira abandi; 19ũsĩkaye tata wawe na koyo wawe; kandi wanze mũlĩkyenyũ ngoko ũyanzĩre. 20Omũlwana oyo mwamubwira ati, Ebihano byosĩ ebyo nabirikolabyo, nyĩkĩsĩya kyahi kwehĩ? 21Yesu mwamubwira ati, Wamanza erĩhĩkana ndeke, ugende, ũgũlaye ebindu byawe, uhe by'oko bera, nawe wasyabya n'ebindu elubula; kandi wase unyikwame. 22Nĩkwa omugulu omũlwana oyo owa ebyo, mwalũaho n'obũlĩge; kusangwa abya awite bindu bingi kutsibu. 23Neryo Yesu mwabwira abiga buwe ati, Kwenene ngabũga nenyũ nyiti, rĩkalĩre busana n'omundu w'ebindu eriingira omo Bwami bw'elubula. 24Kandi ngababwira nyiti, Ni ryolo busana n'engamia erilaba omo kyũna ky'esĩndanĩ kwilaba omundu w'ebindu eriingira omo Bwami bwa Nyamuhanga. 25Omugulu abiga bowa ebĩ mobasweka kutsibu bati, Nĩkwa nindi wangatoka erĩlamĩbwa kwehĩ? 26Yesu mwatungererabo, mwabwirabo ati, Oko bandu ekĩ sikyangatokekana, nĩkwa uku Nyamuhanga emyatsi yosĩ ikatokekana. 27Neryo Petero mwamũsũbĩrya ati, Lebaya, ĩtwe twabĩrĩsĩga ebyosĩ twamakukwama, nĩkwa twasyabanakĩ kwehĩ? 28Neryo Yesu mwabwirabo ati, Kwenene ngabũga nenyũ, nyiti, Omugulu Omugala w'Omundu asyĩkala oko kĩtũmbĩ ky'obwami omo lukengerwa luwe, omo mugulu muhya-muhya, ĩnywe ĩkũmĩ n'ababiri mwabirinyikwama, mwasyĩkala oko bĩtũmbĩ by'obwami erĩkũmĩ n'ebibiri, imukatswera ebinanda erĩkũmĩ n'ebibiri bya Ĩsraelĩ. 29N'obuli mundu oyo wabĩrĩsĩga manyũmba, kutse bagala babo, kutse bali babo, kutse rse, kutse nyĩnya, kutse abana, kutse ebitaka busana nage, asyabanabyo ngendo ĩgana, kandi asyahabwa engebe y'erikota. 30Nĩkwa abangi b'erĩmbere lino basyabya b'enyũma, n'abangi b'enyũma lino, basyabya b'erĩmbere.

will be added

X\