MATAYO 18

1Oko mugulu oyo abiga mobahĩka uku Yesu bati, Nindi yo mukulu oko bosĩ omo Bwami bw'elubula kwehĩ? 2Neryo Yesu mwabirikira omwana mulere mwamwĩmanĩa omo katĩkatĩ kabo, 3mwabũga ati, Kwenene ngabũga nenyũ, mwamatendibinduka n'eribya ng'abana balere, simwendisyingira omo Bwami bw'elubula. 4Omukulu oko bosĩ omo Bwami bw'elubula yo yũkayĩkehaya ng'omwana oyũ. 5Kandi oyũkakokaya omwana ng'oyũ omo lĩna lyage akanyĩkokaya. 6Nĩkwa oyukaleka omuguma g'oko bana balere aba, abakanyĩkĩrĩraya, akanyĩlũako lyowene kumbe omundu oyo angasengerwako luso lunene oko bĩkya biwe, kandi ĩnĩasendĩbwa omw'ĩrĩba ly'engetsi. 7Obũlĩge oko kihugo busana n'emyatsi eyikaleka bandu ibatswa! Nĩkwa emyatsi eyĩ ikandisyakolwa, nĩkwa obũlĩge oko mundu oyukaleka bandu ibatswa batya! 8Ebyala byawe kutse ekisando kyawe byamaleka iwatswa, ũtwebyo ugusebyo. Lyowene ndeke busana nawe eriingira omo ngebe iwabirirehema kutse ĩwabĩrĩsĩndogera, kwilaba eribya n'ebyala bibiri kutse ebisando bibiri n'eriguswa omo muliro wa kera na kera. 9Kandi erĩso lyawe lyamaleka ukatswa, ukuleryo, uguseryo; lyowene ndeke busana nawe eriingira omo ngebe n'erĩso liguma kwilaba eriguswa omo Kũlĩmũ y'omuliro n'ameso abiri. 10Mũlebaye isimwapona omuguma g'oko bana balere aba. Kusangwa ngababwira nyiti, abamalaĩka babo, omo lubula bakalola oko bũsũ bwa Tata wage oyuli elubula ebiro byosĩ. 11Kusangwa Omugala w'Omundu mwasa erĩlamya abatere.] 12Mũkaganĩrayakĩ kwehĩ? Omundu amabya awite esyombũlĩ ĩgana, n'enguma ya kusyo yamatala, akandĩsĩganĩa esyombũlĩ makũmĩ mwenda n'omwenda oko bitwa, n'eriyasonda-sonda embũlĩ eyiriatala. 13Neryo amabanayo, kwenene ngabũga nenyũ, akatsemerayo kwilaba amakũmĩ mwenda n'omwenda esitetatala. 14Litya Tata wage oyuli elubula sĩanzĩre omuguma g'oko bana balere aba akahera. 15Kandi mũlĩkyenyũ amakukola nabi, ugende umukunge, uwe naye ĩnywebene. Amakowa, iwamabiswabana mũlĩkyenyũ. 16Amatendĩkowa, utwale mundu muguma kutse babiri haguma nawe, ngoko kĩsakĩre kiti, Obuli kĩnywa kitoke erihangana busana n'erĩtũlago ly'abalangĩrĩ babiri kutse basatu. 17Nĩkwa amagana erĩowabo, iwabwira ekamsa ebyosĩ. Kandi amagana erĩowa ekanĩsa, umuganze ng'omundu w'ebindi bihanda kutse ng'omũsolesya. 18Kwenene ngabũga nenyũ, ekĩndũkĩ mũkaganaya muna-kihugo, kyasyaganwa elubula; n'ekĩndũki ekyo mwasyalĩga muna-kihugo kyasyalĩgwa elubula. 19Kandi ngabũga nenyũ, ababiri b'ũkw'ĩnywe bamĩkĩrĩranĩa omo kihugo busana n'ekĩndũkĩ basyasabira, Tata wage oyuli elubula asyabakolerakyo. 20Kusangwa aho bandu babiri kutse basatu bahĩndene omo lĩna lyage, nyineho omo katĩkatĩ kabo. 21Neryo Petero mwasa uku Yesu akamũbũlya ati, Mukama, esyongendo singahi mũlĩkyetu amanyikola nabi, nage inamubuyira kwehĩ? Esyongendo sirinda kwehĩ? 22Yesu mwamubwira ati, Sinditakubwira nyiti ngendo sirinda, nĩkwa esyongendo makũmĩ alinda ngendo sirinda. 23Busana n'omwatsi oyũ, Obwami bw'elubula buli ng'omwami muguma oyo wabya anzĩre eribuga eriganza ly'abagombe buwe. 24Neryo omugulu atsũka eriganzirabo, mobamuletera omugombe muguma oyo wabya n'omwĩnda wuwe w'esyongunza sy'esyofranka sy'amagetsi singanabi. 25Nĩkwa omugombe oyo mwabula ebindu by'erimuliha. Neryo omukama wuwe mwahamula ambu agũlĩbawe ng'omugombe haguma n'omũkalĩ wuwe n'abana buwe n'ebyosĩ abya awite, omwĩnda wuwe atũhawe. 26Neryo omugombe oyo mwawa oko marwĩ wuwe embere sy'omukama wuwe ati, Undindirire, nasyakũtũha ebyosĩ. 27Neryo omukama w'omugombe oyo mwamũkwĩra obũlĩge, mwamubohola, mwamubuyira omwĩnda oyo. 28Nĩkwa omugombe oyo mwahuluka mwahĩndana n'ogundi mugombe mũlĩkyabo oyo wabya n'omwĩnda wuwe w'esyofranka ĩgana. Neryo mugombe oyo mwatsimba mũlĩkyabo oyo y'omo bĩkya, mwatsũka erĩmũnĩga ati, Ũnyĩtũhe omwmda wage! 29Nĩkwa omugombe mũlĩkyabo oyo mwawa ahisi, mwamulemba-lemba ati, Undindirire nasyakũtũha ebyosĩ. 30Nĩkwa mwagana, mwayamugusa omo nyũmba y'omũlĩkĩ erĩhĩka aho asyatũhĩra omwĩnda. 31Neryo abagombe balĩkyabo babere balangira omwatsi oyo, mobabya n'obũlĩge bunene mobayatũlĩrago mukama wabo ebyosĩ ebyabere. 32Neryo omukama wuwe mwamubirikira, mwamubwira ati, Uwe mugombe mubi! Nyiriakubuyira omwĩnda gosĩ oyo kusangwa wanyiremba-lemba. 33Nawe sĩwangaganyĩre omugombe mũlĩkyenyũ, ngoko nyiriakuganyira kwehĩ? 34Neryo omukama wuwe mwahitana, mwamuha oko bakagalaya erĩhĩka aho asyatũhĩra omwĩnda wuwe gosĩ. 35Neryo Yesu mwabũga ati, Tata wage oyuli omo lubula asyabakola atya mwamatindabuyira obuli mundu mũlĩkyabo omo mitima yenyũ.

will be added

X\