MATAYO 17

1N'enyũma w'ebiro ndatu, Yesu mwatwala Petero na Yakobo, na Yoane mugala wabo Yakobo. Neryo mwatwalabo ĩbobene oko kitwa kiri-kiri. 2Neryo Yesu mwahĩndũkĩbwa embere syabo, n'obũsũ buwe mobwakangabasanĩa ng'eryuba, n'esyongimba siwe mosyabya nyeru-nyeru ng'ekyakakala. 3Neryo lebaya, Musa na Elĩa mobabutukira kubo ĩbakakanaya na Yesu. 4Neryo Petero mwasũbĩrya mwabũga na Yesu ati, Mukama, lyowene busana netu eribya hano; wamanza, ngandĩhĩmba hano h'amahema asatu, enguma busana nawe, n'enguma busana na Musa, n'enguma busana na Elĩa. 5Abere akĩnabũga, ekĩtũ ekĩkangabasenĩe mokyasũkũlĩryabo; neryo, omulenge mwalũa omo kĩtũ ati, Oyũ ni Mugala wage mwanze, namamutsemera ndeke; mũmwowe! 6Omugulu abiga bowa ekĩ, mobawa ahisi mobubaha kutsibu. 7Neryo Yesu mwasa mwatũla kubo ati, Muhangane, simubahe. 8Nabo babere basumba ameso wabo, mobatalangira ho mundu, inina Yesu ĩyowene. 9Neryo babere bakandagala oko kitwa, Yesu mwaganĩabo ati, Simubwire mundu ebyo mwamalolako omo bũlĩme, erĩhĩka aho Omugala w'Omundu asyalũbũkĩra erĩlũa oko baholĩ. 10Kandi abiga ba Yesu mobamũbũlya bati, Busana nakĩ abakangĩrĩrya b'Emigambo bakabũga bati Elĩa atolere inĩatsũka erĩhĩka, kwehĩ? 11Yesu mwasũbĩryabo ati, Elĩa akandisyasa, ĩnĩasũbya emyatsi yosĩ. 12Nĩkwa ngababwira nyiti, Elĩa abĩrĩhĩka, nabo sibetamuminyerera, nĩkwa mobamukola ngoko banzĩre. Litya Omugala w'Omundu asyagalwa omo byala byabo. 13Neryo abiga mobaminya kw'akanaya nabo busana na Yoane Mũbatĩsya. 14Kandi omugulu bahĩka oko ndeko, omundu mwahĩka uku Yesu, mwamũkũkamira ati, 15Omukama, uganyire mugala wage; kusangwa nĩ mũtũtsa, kandi alwere kutsibu; kusangwa ngendo nyingi akawa omo lĩko, n'engendo nyingi omo magetsi. 16Kandi monamuletere abiga bawe, nabo mobatalũkĩre erĩmũlamya. 17Yesu mwasũbĩryabo ati, Inywe lulengo lw'erĩtendĩkirĩrya n'ol'obuhaka! Nasĩkala nenyũ omo mugulu ungahi kwehĩ? Nasyababegerya omugulu ungahi kwehĩ? Munyiretere ye hano. 18Neryo Yesu mwakunga embĩnga, neryo moyamũlũako, n'omũlwana oyo mwalamĩbwa neryo-neryo. 19Neryo abiga mobahĩka uku Yesu ahate bandu bati, Busana nakĩ twataluka erihigira embĩnga eyo y'eyĩhya kwehĩ? 20Yesu mwasũbĩryabo ati, Ni busana n'erĩkĩrĩrya lyenyũ lĩke. Kusangwa kwenene ngababwira nyiti, Mwamabya n'erĩkĩrĩrya ng'embuto y'eharadalĩ, mwasyabwira ekitwa ekĩ muti, ũhũmĩre erya, nakyo kyasyahũma; kandi sihali kindu kyasyabalema. [ 21Nĩkwa omuhanda oyũ sialĩlũamo lite erisaba n'eritsira kalyo.] 22Omugulu babya bakalendera haguma eGalĩlaya, neryo Yesu mwabwira abiga ati, Omugala w'Omundu akandisyahoterwa oko bandu, 23abakandĩsyamwĩta, kandi asyalũbũkĩbwa enyũma w'ebiro bisatu. Neryo mobakwa bũlĩge bo kutsibu. 24Kandi babere bahĩka eKapernaũmũ, abasolesya b'epalata y'eHekalũ mobahĩka uku Petero, bati, Omũkangĩrĩrya wenyũ sialisola epalata y'eHekalũ kwehĩ? 25Petero ati, Ega. Neryo abere ahĩka omo nyũmba, Yesu mwatsũka erĩmũbũlya ati, Sĩmonĩ, ũkaganĩraya ũtĩkĩ kwehĩ? Nindi yukasola kutse eririha engemu oko bami b'ekihugo kwehĩ? Ni bana babo, kutse ba bagenĩ kwehĩ? 26Petero mwamũsũbĩrya ati, Nĩ bagenĩ. Neryo Yesu mwamubwira ati, Neryo abana siberiha. 27Nĩkwa tũkasyagalyabo, ugende oko ngetsi, uguse oburobo, wĩmaye erĩhere erĩkatsũka erihuluka, neryo wamabĩkũmbũla obuno bwalyo, ũkandĩeya mw'ekĩtsĩpa, wĩmayekyo utusolere, tũnawe.

will be added

X\