MATAYO 16

1Neryo Abafarĩsayo n'Abasadũkayo mobahĩka uku Yesu. Babya banzĩre erimulengako, mobamũbũlya bati akangayebo ekitiko-tiko ekĩkalũa elubula. 2Nĩkwa Yesu mwasũbĩryabo, ati, Omugulu w'erĩgolo-golo mũkabũga muti, Obũtũkũ bũkandĩsyowana, kusangwa ekyanya kĩhenĩrye. 3N'engyakya-ngyakya muti, Bukandibya mũlũmbĩ mũnabwĩre, kusangwa ekyanya kyamabya lukula-kula n'ebĩtũ byamahimba. Mũnasĩ eriminyerera omũsĩndo w'ekyanya, nĩkwa simulitoka eriminyerera ebiminyikalo by'emigulu kwehĩ? 4Abandu ba sesene ni babi, kandi sibawite Nyamuhanga, bakasonda-sonda ekitiko-tiko, nĩkwa sibendisyahabwa ekitiko-tiko kye n'ekitiko-tiko kya Yona. Neryo Yesu mwasĩganĩabo, mwalũaho. 5Neryo abiga babere babĩhĩka eyisirya w'engetsi mobibirirwa eriheka obundu. 6Neryo Yesu mwabwirabo ati, Mũlebaye, mũyĩtegaye busana n'ekĩhamya ky'Abafarĩsayo n'Abasadũkayo. 7Nĩkwa mobatsũka erĩkanĩrya omo katĩkatĩ kabo bati, akabũga atya kusangwa sitwetaheka bundu. 8Nĩkwa Yesu, ĩnĩanasĩ omwatsi oyo mwabũga ati, Ĩnywe bandu b'erĩkĩrĩrya ĩke, busana nakĩ mũkakanĩranaya muti simuwite bundu kwehĩ? 9Simulitaminya kwehĩ? Kutse simulyibuka amandu atanu w'amaelfu atanu (5000), n'ebitiri bingahi mwakumiramo kwehĩ? 10Kutse amandu alinda busana n'abandu elfu ĩnĩ (4000), n'ebitiri bingahi ebyo mwasongerayamo kwehĩ? 11Ko mukabula muti eriminya ngoko ndabũga nenyũ busana n'obundu kwenĩ? Mũyĩtegaye busana n'ekĩhamya ky'Abafarĩsayo n'Abasadũkayo! 12Neryo abiga mobaminya kw'atalyabwirabo erĩyĩteya busana n'ekĩhamya ky'obundu, nĩkwa busana n'erĩkangĩrĩrya ly'Abafarĩsayo n'Abasadũkayo. 13Nĩkwa omugulu Yesu ahĩka omo kihugo ky'eKaĩsarĩ-Fĩlĩpĩ, mwabũlya abiga buwe ati, Abandu bakabũga bati, Omugala w'Omundu yondi kwehĩ? 14Nabo mobasũbĩrya bati, Abandi bati, Yoane Mũbatĩsya; n'abandi bati, Elĩa; n'abandi bati, Yeremĩa, kutse omuguma g'oko bamĩnyererĩ. 15Nĩkwa Yesu mwabũlyabo ati, Nenyũ mũkabũga muti ĩngyendi kwehĩ? 16Sĩmonĩ Petero mwasũbĩrya ati, Uli Kristo, Mugala wa Nyamuhanga oyuliho. 17Yesu mwamũsũbĩrya ati, Uli n'obutseme, uwe Sĩmonĩ mugala wa Yona! Kusangwa sihali mundu wakũmĩnyĩsaya omwatsi oyũ, nĩkwa nina Tata wage oyuli elubula. 18Kandi ngakubwira k'uli Petero, n'oko lĩbwe erĩ nasyahĩmba ekanĩsa yage; kandi amaka w'oluholo siendĩsyakĩndayo na kera. 19Nasyakuha ebĩboholĩ by'Obwami bw'elubula, n'ekĩndũkĩ wasyaganĩa muna-kihugo, kyasyaganwa elubula, n'ekĩndũkĩ wasyalĩga muna-kihugo kyasyalĩgwa elubula. 20Neryo Yesu mwaganĩa abiga ati sibabwire mundu kw'ali Kristo. 21Erĩtsũka omugulu oyo Yesu Kristo mwatsũka erĩkangya abiga buwe kw'atolere eriya eYerũsalema, n'erĩagalĩbwa omo myatsi mingi n'abakulu, n'oko bahererĩ bakulu, n'abakangĩrĩrya b'Emigambo, n'erĩĩtwa, n'erĩlũbũkĩbwa enyũma w'ebiro bisatu. 22Neryo Petero mwatwala Yesu aho lutambi, mwatsũka erimukunga ati, Mukama, Nyamuhanga aganaye ekyo! Ekĩ sĩkĩkũhĩkeko na kera! 23Nĩkwa Yesu mwakeba mwabũga na Petero ati, Uwe Satanĩ, ubye enyũma kwĩngye! Uli ndwĩkale yage kusangwa amalengekanĩa wawe si wa Nyamuhanga nĩkwa ni w'abandu. 24Neryo Yesu mwabwira abiga buwe ati, Omundu amanza erinyikwama, ayigane, aheke omusalaba wuwe, anyikwame. 25Kusangwa omundu oyukasonda erĩlamya engebe yiwe asyatalyayo; nĩkwa omundu oyũkatalaya engebe yiwe busana nage, asyabanayo. 26Kusangwa omundu akabana endũndĩ yahi amatunda ekihugo kyosĩ, akalwĩka engehe y'omutima wuwe kwehĩ? Kutse omundu asyahĩnganĩakĩ busana n'engebe yiwe kwehĩ? 27Kusangwa Omugala w'Omundu asyasa n'abamalaĩka buwe omo lukengerwa lwa Tata wuwe; n'oko mugulu oyo asyahemba obuli mundu ng'emĩbĩrĩ yiwe kw'iri. 28Kwenene ngabũga nenyũ, hali abandi oko bimene hano abatendisyahola bate balangira Omugala w'Omundu akasa mo Mwami.

will be added

X\