MATAYO 15

1Neryo abandi b'oko Bafarĩsayo n'abakangĩrĩrya b'Emigambo mobahĩka uku Yesu bakalũa eYerũsalema, bati, 2Busana nakĩ abiga bawe bakaketa emitsye y'abakulu kwehĩ? Kusangwa sibenaba oko byala omugulu bakalya akalyo. 3Yesu mwasũbĩryabo ati, Nenyũ, busana nakĩ mukaketa ekihano kya Nyamuhanga busana n'emitsye yenyũ kwehĩ? 4Kusangwa Nyamuhanga mwabũga ati, Ũsĩkaye tata wawe na koyo wawe, kandi, Oyukahula tata wuwe kutse koyo wuwe yo nabi, ĩtawe. 5Nĩkwa ĩnywe mũkabũga muti, Oyo wasyabũga na tata kutse nyĩnya ati, Ekĩndũkĩ kyage kyangakũwatĩkĩrye kyabirihabwa Nyamuhanga. 6Muti, siasĩkaye tata wuwe kutse koyo wuwe. Neryo litya, mukapona ekĩnywa kya Nyamuhanga busana n'erikwama emitsye yenyũ. 7Ĩnywe batebya! Omũmĩnyererĩ Ĩsaya mwaminyerera ndeke busana nenyũ, ati, 8Abandu aba bakanyĩsĩkaya omo mĩnywa yabo, Nĩkwa emitima yabo iri hali kwĩngye. 9Nĩkwa bakanyĩramaya buyira. Kusangwa bakakangĩrĩraya amahano w'abandu nga ni mahamulo wa Nyamuhanga. 10Neryo Yesu mwabirikira endeko ukw'iye mwabwirabo ati, Mwowe, muminye. 11Si kye kindu ekikaya omo buno bw'omundu kyo kikamũtsandaya, nĩkwa kye kindu ekĩkalũa omo buno, kyo kĩkatsandaya omundu. 12Neryo abiga mobahĩka uku Yesu mobamubwira bati, Ũnasĩ kw'Abafarĩsayo mobagalirwa omugulu bowa ebĩnywa ebĩ kwehĩ? 13Yesu mwasũbĩryabo ati, Obuli mbuto eyo Tata wage w'elubula atahera yasyakulangwa. 14Mulekebo, ni basondolĩ ndĩmatĩme b'abandu ndĩmatĩme. Omundu ndĩmatĩme amasondola ogundi mundu ndĩmatĩme, ababiri bosĩbasyatogera omo buhya. 15Neryo Petero mwabũga na Yesu ati, Ũtũkũmbũlĩre omũsyo oyo. 16Neryo Yesu mwabũga ati, Nenyũ mukine butaminya kwehĩ? 17Sĩmwasĩ ekikaya omo buno ko kikalaba omo nda, neryo ikyatwangana kwehĩ? 18Nĩkwa emyatsi eyĩkalũa omo buno ĩkalũa omo mutima yo yĩkatsandaya omundu. 19Kusangwa omo mutima w'omundu mukahuluka amalengekanĩa mabi, erĩĩta, erĩsĩngĩra, amaragane, erĩĩba, eribihira bandi, n'ebĩtsũmĩ. 20Eyĩ ye myatsi eyĩkatsandaya omundu. Nĩkwa erirya omo byala bĩtanabĩre sĩbyetsandaya mundu. 21Neryo Yesu mwalũaho mwaya omo bihugo by'emĩyĩ y'eTĩro n'eSĩdonĩ. 22Neryo mũkalĩ, Omukanana oyo wabya ĩkere omo kihugo ekyo, mwasa uku Yesu, mwabirikira ati, Uwe Mukama, mugala wa Dawĩdĩ, unyiganyire. Mwali wage ali ko mbĩnga ĩkamwagalaya kutsibu. 23Nĩkwa Yesu mwatamũsũbĩrya kĩnywa n'ekiguma. Abiga buwe mobahĩka n'erimubwira bati, Umuhige agende, kusangwa akatũkwamaya olukanda. 24Nĩkwa Yesu mwasũbĩrya ati, Natumawa oko syombũlĩ esĩherĩre sy'enyũmba ya Ĩsraelĩ nyisa. 25Nĩkwa omũkalĩ oyo mwasa, mũnama embere sya Yesu, ati, Mukama, ũnyĩwatĩkaye! 26Yesu mwasũbĩrya ati, Sĩryowene erĩĩmya akalyo k'abana n'erigusako oko syombwa. 27Nĩkwa omũkalĩ oyo mwabũga ati, Kwenene, Mukama, nĩkwa esyombwa nasyo sikalya ebitahangukira ebikalagala oko mesa ya mwenyesyo. 28Neryo Yesu mwasũbĩrya ati, Uwe mũkalĩ, erĩkĩrĩrya lyawe nĩ rĩnene! Ebyo wanzĩre bikolawe busana nawe. Neryo mwali wuwe mwalamĩbwa oko ndambĩ eyo. 29Neryo Yesu mwalũa eyo, mwalaba oko mũsĩke w'engetsi y'eGalĩlaya. Neryo abere ahetukira oko kitwa, mwĩkalaho. 30N'esyondeko mosyamũhĩkako, ibakamuletera abakasĩndogera, n'ebirema n'esyondĩmatĩme, n'esyomũmũ, n'abandi bangi abalwere, mobahĩrabo hakũhĩ n'ebisando bya Yesu, naye mwalamyabo. 31Kyaleka endeko iyasweka omugulu balangira esyomũmũ sĩkabũga, n'ebirema ibyabirilama, n'abakasĩndogera ibalimugenda, n'esyondĩmatĩme isirimulangira, neryo mobapipa Nyamuhanga wa Ĩsraelĩ. 32Neryo Yesu mwabirikira abiga buwe, ati, Namakwĩra endeko y'obũlĩge, kusangwa bamasiba nage lino biro bisatu, isibawite eby'erirya. Kandi sinyanzĩre eritumabo bakagenda batalĩre, bakasyalemberera omo nzira. 33Neryo abiga mobamũbũlya bati, Tukandibana amandu angaha go hahi omo mbwarara erĩũgũtya endeko yingana n'eyĩ kwehĩ? 34Neryo Yesu mwabũlyabo ati, Muwite uku mandu angahi kwehĩ? Nabo mobabũga bati, Alinda, n'ehihere hike. 35Neryo Yesu mwategeka ati endeko bĩkale ahisi. 36Nĩkwa Yesu mwĩmya amandu alinda ayo n'amahere, mwaha ewasĩngya uku Nyamuhanga, neryo mwatsũtsangago mwahago oko biga buwe, n'abiga nabo mobahago oko bandu ababya omo ndeko. 37Abosĩ mobalya, mobũgũta. Neryo abiga mobasongya-songya ebitiri birinda ebyoswĩre mw'ebitahangukira ebyasaka. 38Neryo abalume abalya babya elfu ĩnĩ (4000), abakalĩ n'abana bataganzĩrwe kubo. 39Neryo Yesu mwalagana n'endeko ati bagende. Neryo mwingira omo bwato, mwaya omo kihugo ky'eMagadanĩ.

will be added

X\