MATAYO 14

1Oko mugulu oyo Herode, omũta balĩ w'eGalĩlaya, mwowa engulu ya Yesu. 2Neryo Herode mwabwira abakulu buwe ati, Oyũ ni Yoane Mũbatĩsya. Abĩrĩlũbũka oko baholi; ekyo kyalekĩre amaka w'ebitiko-tiko aya iniakoleka omwisi wuwe. 3Kusangwa Herode iniabirihamba Yoane, n'erimuboha, n'erĩmũhĩra omo mũlĩkĩ. Akola atya busana na Herodĩa, muka mugala wabo ye Fĩlĩpo. 4Kusangwa Yoane abya akabwira Herode ati, Emigambo ĩkakũganaya erĩĩmya Herodĩa. 5Kandi Herode abya anzĩre erĩĩta Yoane, nĩkwa mubaha abandu, kusangwa abandu babya bakaganza Yoane nga mũmĩnyererĩ. 6Nĩkwa omugulu ekiro ky'eriibuka eributwa lya Herode kyahĩka, namwali wa Herodĩa mwasatira omo katĩkatĩ kabo, neryo mwatsemesya Herode. 7Neryo Herode mwalaga omwana-muto oyo n'erĩlahĩrya ati akandimuha ekindu ekyo akandimutswa. 8Neryo koyo w'omwana-muto oyo mwamuhana abũge ati, Umba hano h'oko kibindi, omutwe wa Yoane Mũbatĩsya! 9Neryo omwami Herode mwakwa engitsi, nĩkwa busana n'erĩlahĩrya liwe, kandi busana n'abagenĩ buwe ababya okw'irya eryo, mwahamula ati omwana-muto oyo ahabawe omutwe wa Yoane. 10Neryo mwatuma omundu erĩyatwa omutwe wa Yoane omo nyũmba y'omũlĩkĩ. 11Neryo omutwe wa Yoane mwaletwa oko kibindi, mwahabwa oko mwana-muto oyo, naye mwaleterago nyĩnya wuwe. 12Neryo abiga ba Yoane mobasa, mobatwala ekĩnda kya Yoane, mobatakyo; neryo mobayabwira Yesu. 13Nĩkwa omugulu Yesu owa omwatsi oyo, mwalũaho omo bwato, mwaya ĩyowene ehandi ahate bandu. Neryo omugulu esyondeko syowa ekyo, mosyalũa omo mĩyĩ, mobamukwama omo bisando. 14Neryo omugulu Yesu alũa omo bwato, mwalangira endeko nene, mwakwĩrabo bũlĩge, neryo mwalamya abakonĩ babo. 15Neryo bwabere bwasonda eribya ĩgolo-golo, abiga buwe mobamũhĩkako, bati, Eno ni mbwarara, kandi bwamahumbera; ulagane n'abandu bagende omo mĩyĩ n'eriyigulira kalyo. 16Nĩkwa Yesu mwabwirabo ati, Sibatolere erigenda; muhebo eby'erirya! 17Neryo abiga mobabwira Yesu bati, Tuwite hano h'uku mandu atanu masa, n'amahere abiri. 18Yesu mwabũga ati, Munyireterebyo hano. 19Nĩkwa Yesu mwahamula esyondeko ati bĩkale ahisi oko biti; neryo mwĩmya amandu atanu ayo n'amahere abiri, mwalalamira elubula, mwaha ewasĩngya uku Nyamuhanga. Neryo mwatsũtsanga amandu, mwahago abiga, n'abiga mobahago oko bandu ababya omo ndeko. 20Abosĩ mobalya, mobũgũta. Neryo mobasongya ebitahangukira ebyasaka, mobũsũlya ebitiri ĩkũmĩ na bibiri. 21Neryo abalume abalyabyo babya nga elfu ĩtanu (5000), abakalĩ n'abana bataganzĩre kubo. 22Neryo-neryo mwahatikana abiga ati bingire omo bwato, batsũke embere siwe eyisirya w'engetsi, omugulu abya akalagana n'esyondeko. 23Neryo abere abilagana n'esyondeko, mwaya oko kitwa ĩyowene eriyasaba. Neryo bwabere bwabya ĩgolo-golo, Yesu mwabyayo ĩyowene. 24Nĩkwa obwato bwabya omo ngetsi mo hali, n'ebisunda ĩbĩkayĩswĩraya oko bwato; kusangwa erihunga lyabya likabuhirira embere syabo. 25Neryo omo kĩsĩsĩmũko ky'akani ky'ekiro, Yesu mwahĩka kubo, iniakatandayira oko ngetsi. 26Nĩkwa omugulu abiga bamulangira iniakatandayira oko magetsi, mobubaha, bati, Nĩ kĩrĩmũ! Neryo mobalaka n'obuba. 27Nĩkwa neryo-neryo Yesu mwabũga nabo ati, Mũsĩkaye emitima! Nĩna ngye; simubahe. 28Neryo Petero mwamũsũbĩrya ati, Mukama, wamabya inina we, unyihamule nyiye aho uli oko magetsi. 29Neryo Yesu mwabũga ati, Wase! Neryo Petero mwalũa omo bwato, akatandayira oko magetsi erĩlolya ahali Yesu. 30Nĩkwa omugulu Petero alangira erihunga, mubaha, n'erĩtsũka eritobera mwalaka ati, Mukama, ũnyĩlamaye. 31Neryo-neryo Yesu mwasumba ebyala biwe mwamuhamba, mwamubwira ati, Uwe w'erĩkĩrĩrya lĩke, busana nakĩ uliatika-tika kwehĩ? 32Neryo omugulu bahĩka omo bwato, erihunga molyũmbya. 33Neryo ababya omo bwato mobaramya Yesu, bati, Kwenene uli Mugala wa Nyamuhanga! 34Neryo babere babisoka engetsi, mobahĩka oko kitaka ky'eGenezaretĩ. 35N'omugulu abandu b'eyo bamuminya, mobatuma omo kihugo kyosĩ ekyabya hakũhĩ n'eyo, mobaletera Yesu y'abakonĩ bosĩ. 36Neryo mobalemba-lemba Yesu bati, batũle oko mũsĩke musa w'olukimba luwe; n'abosĩ abatũla kulo, mobalamĩbwa.

will be added

X\