MATAYO 12

1Oko mugulu oyo Yesu abya akalaba omo malima w'engano oko kiro ky'eSabato. Neryo abiga buwe babya bakwĩre enzala, neryo mobatsũka erĩtwa amakũndĩ w'engano n'eriryago. 2Nĩkwa omugnlu Abafarĩsayo balangira ekyo, mobabwira Yesu bati, Lebaya, abiga bawe bakakola ebyo Migambo ĩkaganaya erikola omo Sabato! 3Nĩkwa Yesu mwabwirabo ati, Simwetasoma ekyo Dawĩdĩ akola, omugulu akwa enzala, iye n'abandu buwe kwehĩ? 4Ngoko ingira omo nyumba ya Nyamuhanga, kandi iye n'abandu buwe mobalya amandu awahigulawa busana'na Nyamuhanga. Nĩkwa Emigambo ĩkaganaya abandu erirya kugo, nĩkwa ba n'abahererĩ basa. 5Kutse simulitasoma omo Migambo ya Musa kwehĩ, ngoko abahererĩ omo Hekalũ oko kiro ky'eSabaro, bakaketa omugambo w'eSabato, isibali na musango. 6Nikwa ngababwira nyiti, Hano hali oyũlabĩre eHekalũ. 7Kumbe mwabya mwasĩ amasako aya awakabũga ati, Nyanzĩre eriganyira, sĩnyanzĩre amahere w'esyonyama, kumbe simwangatswera abandu abate na mũsango. 8Kusangwa Omugala w'Omundu ni Mukama w'eSabato. 9Neryo Yesu mwalũaho, mwaya omo nyũmba yabo y'erĩhĩndanamo. 10Neryo lebaya, habya omundu w'ebyala bĩlehemĩre. Kandi habya abandu ababũlaya Yesu bati, Linatolere omo Migambo erĩlamya omundu omo kiro ky'eSabato kwehĩ? Kusangwa basonda erĩhandĩkĩrĩrya Yesu. 11Neryo Yesu mwabwirabo ati, Ko ni mundu wahi omo katĩkatĩ kenyu oyuwite embũlĩ nguma yamatogera omo buhya omo kiro ky'eSabato, isyendisyahambayo n'erisumbirayo eyĩbya kwehĩ? 12Omundu alabĩre enzwere y'embũlĩ yo kutsibu kw'aho! Neryo kitolere omo Migambo erikola ebibuya omo kĩro ky'eSabato. 13Neryo Yesu mwabwira omundu oyo ati, Lambula ebyala byawe! Naye mwalambulabyo, nabyo mobyasuba, n'erilama ndeke ng'ebindi byala. 14Nĩkwa Abafarĩsayo mobahuluka, mobaya mbĩta nga bangĩta Yesu yo bati. 15Neryo omugulu Yesu aminyakyo, mwalũa eyo. Nĩkwa abandu bangi mobamukwama, naye mwalamya abosĩ. 16Kandi mwahanabo ati sĩbamũkũmayĩraye, 17busana n'erĩberererya ebyo mũmĩnyererĩ Ĩsaya abũga ati, 18Lebaya, Omugombe wage oyo nabiriyisoga; Omwanze wage, omutima wage amatsemesĩbwa busana naye. Nasyamũhĩra k'Omũlĩmũ wage, Naye asyakanganĩa erĩbanza oko bandu bosĩ. 19Siendisyanegena, kutse erĩbũya lukanda; Kutse siendisyasumba omulenge wuwe omo syombalu. 20Siendĩsyatwa oluseke lũbũnĩkĩre, Kandi siendisyahũmberya embũmba eyĩkatũmba. Erĩhĩka aho asyalekera erĩbanza ĩryakĩnda. 21N'omo lĩna liwe Ebihanda byasyabana amaha. 22Neryo abandu mobaletera Yesu y'omundu oyuli kw'embĩnga kandi abya ndĩmatĩme n'emũmũ. Neryo Yesu mwalamya omundu oyo n'emũmũ eyo moyatoka erĩbũga n'erilangira. 23N'esyondeko syosĩ mosyasweka. Kandi mobabũlya bati, Omundu oyo anganabya mugala wa Dawĩdĩ kwehĩ? 24Nĩkwa omugulu Abafarĩsayo bowa, mobabũga bati, Omundu oyo akahigira esyombĩnga sy'eyĩhya kusangwa Belzebũlĩ omũtabalĩ w'esyombĩnga yukamuha maka w'erihigasyo. 25Yesu mwaminya amalengekanĩa wabo, neryo mwabwirabo ati, Obuli bwami obũkayĩrwanaya bukabya kĩhũma. N'obuli mũyĩ kutse nyũmba ebĩkayĩrwanaya sibyendisyahangana. 26Kandi Satanĩ yamahiga Satanĩ, iyamayĩrwanĩa, neryo obwami bwayo ibwasyahangana buti kwehĩ!? 27Nage namabya ngahigira esyombĩnga sy'eyĩhya omo maka wa Belzebũlĩ, abana benyũ bakahigirasyo eyĩhya omo maka wandi kwehĩ? Neryo abana benyũ basyabya batswerĩ benyũ. 28Nĩkwa ĩngye namahiga esyombĩnga omo maka w'Omũlĩmũ wa Nyamuhanga, kundi Obwami bwa Nyamuhanga bwabĩrĩbahĩkako. 29Kutse omundu angatoka eritula enyũmba y'omundu w'amaka yo ati, n'erĩhũnga ebindu biwe, amatindatsũka eriboha omundu w'amaka oyo kwehĩ? Neryo iniatoka erĩhũnga enyũmba yiwe. 30Oyute haguma nage, ĩnĩ nzĩgũ yage; n'oyutekuma-kuma haguma nage, akapanza-panza. 31Neryo ngababwira nyiti abandu bangabuyira obuli bibi n'obuli bĩtsũmĩ, nĩkwa oyukatsuma Omũlĩmũ Abũyĩrĩre siendisyabuyirwa. 32Omundundi oyo wasyabũga ekĩnywa ky'obũyĩgũ oko Mugala w'Omundu asyabuyirwa, nĩkwa omundundi oyo wasyabũga ekĩnywa ky'obũyĩgũ oko Mũlĩmũ Abũyĩrĩre, siendisyabuyirwa oko mugulu ono, kutse oko mugulu owakandisyasa. 33Muyire omuti mo muti mubuya, n'ebĩgũma byago mo bibuya; kutse muyire omuti mo mubi n'ebĩgũma byago mo bibi; kusangwa omuti akaminyikala busana n'ebĩgũma byago. 34Ĩnywe bana b'esyonzoka! Mwangatoka muti kwehĩ erĩbũga ebĩnywa bibuya imune babi kwehĩ? Kusangwa obuno bũkabũga ebyoswĩre omo mutima. 35Omundu mubuya akahũlũkaya emyatsi mibuya eyĩkalũa omo kigona kiwe ky'emyatsi mibuya, n'omundu mubi akahũlũkaya emyatsi mibi eyĩkalũa omo kigona kiwe ky'emyatsi mibi. 36Kandi ngabũga nenyũ nyiti, Oko kiro ky'eritswera abandu basyakanganĩa obuli kĩnywa kitya-kitya ekyo bakabũga. 37Kusangwa busana n'ebĩnywa byawe wasyasĩngana, kandi busana n'ebĩnywa byawe wasyatswerwa. 38Neryo abandi b'oko bakangĩrĩrya b'emigambo n'Abafarĩsayo, mobasũbĩrya Yesu bati, Mũkangĩrĩrya, twanzĩre erilangira k'ukakola ekitiko-tiko. 39Nĩkwa Yesu mwasũbĩryabo ati, Abandu ba sesene ni babi, kandi sibawite Nyamuhanga, bakasonda-sonda ekitiko-tiko; nĩkwa sibendihabwa ekitiko-tiko, kye n'ekitiko-tiko ky'omũmĩnyererĩ Yona. 40Kusangwa ngoko Yona abya omo nda y'enyama nene y'omo ngetsi emisibo ĩsatu n'ebiro bisatu, na litya Omugala w'Omundu asyabya omo kitaka emisibo isatu n'ebiro bisatu. 41Oko kiro ky'eritswera, abandu b'eNĩnawe basyahangana haguma n'abandu b'olulengo luno n'erĩsĩngabo, kusangwa mobabindula emitima erireka ebibi okw'ĩtũlago lya Yona; neryo lebaya, oyũlengĩre Yona ane hano. 42Oko Kiro Ky'eritswera, Omwami w'obũkalĩ w'eLutambi lw'eYĩkwa asyahangana haguma n'abandu b'olulengo luno, n'erĩsĩngabo kusangwa alũa oko ndũlĩ sy'ekihugo erĩowa amenge wa Solomono; neryo lebaya, oyũlengĩre Solomono ane hano! 43Omugulu ekĩrĩmũ kibi kĩkalũa omo mundu, kikalendera ikyalaba ahate magetsi, kikasonda-sonda ah'eriluhukira, kikabulaho. 44Neryo kikayibwira kiti, Ngandisuba omo nyũmba yage eyo nasĩga; neryo omugulu kĩkahĩkamo, kĩkeya enyũmba eyo iri busa ĩnĩnabĩrĩrye, ĩnĩnakomĩre. 45Neryo kikahuluka, ikyaleta ebindi bĩrĩmũ birinda bibi kwilabakyo, neryo ibyingiramo; n'endũlĩ y'omundu oyo ikabya nyibi kwilaba erĩmbere. Ko bikandisyabya bitya oko bandu babi b'omugulu ono. 46Yesu abere akĩnabũga n'esyondeko, nyinya, n'abagala babo mobahĩka. Moba-hangana eyĩhya ibakasonda-sonda erĩbũga naye. 47Neryo omundu muguma mwabwira Yesu ati, Lebaya, koyo wawe n'abagala benyũ banimene eyĩhya, bakasonda-sonda erĩkanĩa nawe. 48Yesu mwasũbĩrya ati, Koyo nindi, n'abagala betu ni bahi kwehĩ? 49Neryo mwakanganĩa abiga buwe ati, Lebaya, koyo wage n'abagala betu! 50Kusangwa omundu oyo wasyakola erisonda lya Tata wage oyuli elubula, yo mugala wetu, na mwali wetu, na koyo.

will be added

X\