MATAYO 11

1Omugulu Yesu abuga eritegeka abiga buwe ĩkũmĩ n'ababiri, mwalũaho, mwayakangĩrĩrya n'erĩtũlanganĩa omo mĩyĩ eyabya hakũhĩ n'eyo. 2Neryo omugulu Yoane owĩra omo mũlĩkĩ emĩbĩrĩ ya Kristo, mwamutumira abiga buwe, 3erĩbũlya Yesu, ati, Nina we oyukasa, kutse tulindirire ogundi kwehĩ? 4Yesu mwasũbĩryabo ati, Mugende, mubwire Yoane emyatsi eyo mwamowa n'ebyo mwamalangira. 5Esyondĩmatĩme sirimulangira, n'ebirema birimugenda, abahaga bakalamĩbawa n'abatsiha balĩmowa, n'abaholĩ banemũlũbũkĩbwa, n'Engulu Yowene ĩrĩmũtũlaganĩbwa oko bera. 6Kandi obutseme buli oko yũtehũkahũkaya omutima busana nage! 7Neryo abiga ba Yoane babere bakasubula, Yesu mwatsũka erĩbũga n'esyondeko busana na Yoane ati, Mwaya omo mbwarara eriyalola m'ũkũkĩ kwehĩ? Mwayalangira ekibingu ekikatengatenganĩbawa n'erihunga kwehĩ? 8Nĩkwa mwayayo eriyalangirakĩ kwehĩ? Muti, omundu oyo wambite esyongimba nyolo-nyolo kwehĩ? Mũlebaye abambite esyongimba esĩkangabasenĩe bali omo manyũmba w'abami. 9Nĩkwa mwayayo busana nakĩ kwehĩ? Mwayalangira omũmĩnyererĩ kwehĩ? Ega, ngababwira mwabirilangira oyũlengĩre omũmĩnyererĩ. 10Kusangwa Yoane yoyo amasako ahula ati, Lebaya, ngatuma omukwenda wage embere syenyũ, Oyo wasyowanĩa enzira yawe embere syawe. 11Kwenene ngabũga nenyũ nyiti, Yoane Mũbatĩsya ni mukulu kwilaba abandu bosĩ ababutawa. Nĩkwa oyuli muke kutsibu omo Bwami bw'elubula, amũlengĩre. 12Kandi erĩtsũka oko biro bya Yoane Mũbatĩsya, erĩhĩka na lino Obwami bw'elubula bukalwiriranawa, n'abandu b'omwaga bakalenga erihamba obwami obo. 13Kusangwa amasako w'abamĩnyererĩ bosĩ, n'Emigambo ya Musa mobyaminyerera omwatsi w'Obwami erĩhĩka oko mugulu wa Yoane. 14Kandi wamanza erĩrĩga omwatsi wabo, Yoane nĩ Elĩa oyo wasyasa. 15Oyuwite amatwĩ, owe! 16Nĩkwa nasyalĩngĩrĩranĩa abandu ba sesene bo nakĩ kwehĩ? Bali ng'abana abĩkere omo katale abakabirikirana, 17bati, Twabiribabuhira amalenga, neryo momutetasata; motwimba olwimbo lw'erita omundu, nenyũ momutetalira. 18Kusangwa Yoane mwasa, isialirya kutse erĩpũlya, neryo bakabũga bati, Ali ko mbinga! 19Omugala w'Omundu mwasa akalya n'erĩpũlya, neryo bakabũga bati, Lebaya omundu oyũ! Ni w'omururu n'omũkũndĩrya, omwĩra w'abasolesya n'abakola-nabi. Nĩkwa amenge wa Nyamuhanga akaminyikala omo mĩbĩrĩ yago. 20Neryo Yesu mwatsũka erihayira emĩyĩ eyo akolera mw'ebitiko-tiko biwe bingi, kusangwa mobatabindula emitima erireka ebibi. 21Obũlĩge uk'uwe Korazĩnĩ! Obũlĩge uk'uwe Betesaĩda! Kusangwa kumbe ebitiko-tiko ebyakolawa omwisi wenyũ, bialikolawa eTĩro n'eSĩdonĩ, kumbe babiribindula emitima n'erireka ebibi byo kera, ibanambite emisarandwe n'erĩĩkala omw'ĩbũ. 22Nĩkwa ngababwira nyiti, Oko kiro ky'eritswera, olubanza lw'eTĩro n'eSĩdonĩ lwasyabya luke oko lwenyũ. 23Nawe Kapernaũmũ! Wabya wanzĩre erĩhamĩbwa elubula kwehĩ? Wasyaguswa omo Lĩfero. Kusangwa kumbe ebitiko-tiko ebyakolawa omo katĩkatĩ kenyũ, byalikolawa eSodomo, eSodomo ng'ikmeho erĩhĩka na lino. 24Nĩkwa ngababwira nyiti, Oko kiro ky'eritswera, olubanza lw'ekihugo ky'eSodomo lwasyabya luke oko lwawe. 25Oko mugulu oyo Yesu mwasũbĩrya ati, Ngakupipa uwe Tata, Omukama w'olubula n'ekihugo! Kandi wabĩrĩbĩsa emyatsi eyĩ oko b'amenge n'ab'eriminya, nĩkwa wabĩrĩbĩsũlĩrayo oko bana balere. 26Ega, Tata, kusangwa ko byakũtsemesaya bitya omo meso wawe. 27Tata wage abirimba emyatsi yosĩ. Sihali oyo wasĩ Omugala nina Tata, kandi sihali oyo wasĩ Tata nina Mugala, n'omundu oyo Mugala anzĩre erĩmũbĩsũlĩra. 28Mwase ũkw'ĩngye, ĩnywe bosĩ ko mukanuba n'eriheka ebĩrĩtohĩre, ngandibalũhũkya. 29Mwĩmaye engomo yage, muhekeyo, mwigire ũkw'ĩngye, kusangwa indi molo-molo n'ow'omutima ahehere; nenyũ mwasyabana eriluhuka omo mitima yenyũ. 30Kusangwa engomo yage ni nyibuya, n'omuheke wage angũhĩrĩre.

will be added

X\