MATAYO 10

1Yesu mwabirikira abiga buwe ĩkũmĩ n'ababiri, neryo mwahabo ehamũlĩ oko bĩrĩmũ bibi, erihigirabyo eyĩhya, n'erĩlamya obuli mũsĩndo w'erilwala, n'obuli mũsĩndo w'amakonĩ. 2Aya ni mena w'abakwenda ĩkũmĩ n'ababiri: ow'erĩtsũka, Sĩmonĩ, oyukahulawa mo Petero, na mugala wabo Anderea; na Yakobo, mugala wa Zebedayo na mugala wabo Yoane; 3Fĩlĩpo, na Bartolomayo; Toma na Matayo mũsolesya; Yakobo mugala wa Alufayo, na Tadeo; 4Sĩmonĩ Mukanana, na Yũda Ĩskarĩota, oyo wamuhotera. 5Yesu mwatuma abakwenda ĩkũmĩ n'ababiri abihanabo, ati, Simuye oko kihugo ky'Ebihanda, kandi simwingire omo mũyi w'Abasamarĩa. 6Nĩkwa muye oko mbũlĩ sitere sy'ekihanda kya Ĩsraelĩ. 7N'omugulu mukagenda, mũtũlego muti, Obwami bw'elubula buli hakũhĩ. 8Mũlamaye abakonĩ, mũlũbũkaye abaholĩ, mũlamaye abahaga, muhigire esyombĩnga sy'eyĩhya. Mwabiryangirira butsira eririha, muhe abandi butsira erĩrĩhĩsya. 9Sĩmũsondaye esyamagetsi, kutse ebĩtsĩpa, kutse esy'emiringa sy'omo matũsĩ wenyũ; 10kutse engunza busana n'olugendo lwenyũ, kutse esyokanzu ĩbĩrĩ, kutse esyongendero, kutse mũtso; kusangwa omũhĩngĩ anatolere ebyo angalya. 11Omugulu mũkahĩka oko mũyĩ kutse oko kayĩ, mwingire, mũbũlaye nga hane mundu oyo wangabakokya, neryo imwĩkala omuwe, erĩhĩka aho mwasyalũĩraho. 12Kandi omugulu mukingira omo nyũmba eyo, mũkerayebo. 13Neryo abandu b'enyũmba eyo bamabakokya, obuholo bwenyũ bubye kubo; nĩkwa bamatendĩbakokya, obuholo bwenyũ ibwabasubako. 14N'omundundi oyutebakokaya, kutse erĩowa ebĩnywa byenyũ, omugulu mũkalũa omo nyũmba eyo kutse omo mũyĩ oyo, mukungute olũtũtũ l'oko bisando byenyũ. 15Kwenene ngabũga nenyũ nyiti, Oko kiro ky'eritswera, olubanza lw'ekihugo ky'emĩyĩ y'eSodomo n'eGomora lwasyabya luke oko l'omũyĩ oyo. 16Lebaya, ngabatuma ng'esyombũlĩ omo katĩkatĩ k'esyombwa sy'omolĩ. Neryo mubye n'amenge ng'esyonzoka, kandi mubye bandu bolo ng'ehĩrĩkũkũ. 17Nĩkwa mũyĩtegaye busana n'abandu; kusangwa basyabahotera omo h'erĩbũgĩro, n'erĩbaswĩrĩrya omo manyũmba wabo w'erĩhĩndanamo. 18Kandi, mwasyakurirwa embere sy'abatabalĩ bakulu, n'embere w'abami busana nage, busana n'erĩtũla Engulu Yowene kubo, n'oko bandu b'Ebihanda. 19Nĩkwa omugulu basyabahotera, sĩmũhahũkaye emitima nga mwasyabũgakĩ kutse nga mwasyabũga muti. Kusangwa oko ndambĩ eyo mwasyahabwa ebyo mwasyabũga. 20Kusangwa ebĩnywa mũkabũga sĩ byenyũ; byasyalũa oko Mũlĩmũ wa Tata wenyũ oyũkabũgĩra omwisi wenyũ. 21Omundu asyahotera mugala wabo erĩĩtwa, n'abotata basyahotera abana babo batya; n'abana basyalwa n'ababũtĩ babo n'erĩĩtĩsyabo. 22Kandi abandu bosĩ basyabakwa obusu busana n'erĩna lyage. Nĩkwa oyo wasyayĩyinĩa erĩhĩka oko ndũlĩ yo wasyalamĩbwa. 23Nĩkwa omugulu bakabendereraya omo mũyĩ muguma imwatibita oko gundi mũyĩ. Kwenene ngabũga nenyũ nyiti, Simwendisyalaba omo mĩyĩ yosĩ ya Israelĩ, Omugala w'Omundu ate ahĩka. 24Omwiga sialengĩre omũkangĩrĩrya wuwe, kutse omukobe sialengĩre omukama wuwe. 25Omwiga angatsema eribya ng'omũkangĩrĩrya wuwe, n'omugombe angatsema eribya ng'omukama wuwe. Bamahula omukulu w'enyũmba mo Belzebũlĩ, basyahula abandu b'enyũmba yiwe b'omo mena mabi kw'aho! 26Neryo simubahe abandu. Kusangwa sihali ekĩkũnĩngĩre ekitendisyabĩsũlwa, kutse ekĩbĩsamĩre ekitendisyamĩnyĩkalĩbwa. 27Ebyo ngababwira omo mwĩrĩmya, mũbũgebyo omo kyakakala; n'ebyo mũkowa omo bihwehwe mũrũlaganayebyo oko lutwe lw'enyũmba. 28Kandi simubahe abakĩta omubiri, nĩkwa sibetoka erĩĩta omutima; nĩkwa kumbe mwangubaha Nyamuhanga oyukatoka erĩherya omutima n'omubiri omo Kũlĩmũ. 29Ebiswiri bibiri sibyegũlĩbawa oko sengĩ nguma kwehĩ? Kandi sihali n'akaguma akakatogera ahisi lite erisonda lya Tata wenyũ. 30Nĩkwa esyonzwiri sy'oko mitwe yenyũ sĩganzĩrwe esyosĩ. 31Neryo simubahe, muli b'obũgũlĩ bunene kwilaba obũgũlĩ bw'ebiswiri bingi! 32Obuli mundu oyũkanyĩkanganaya embere sy'abandu, nage nasyamũkanganĩa embere sya Tata wage oyuli elubula. 33Nĩkwa oyukanyigana embere sy'abandu, neryo nage nibya nasyamugana embere sya Tata wage oyuli elubula. 34Sĩmũganĩraye muti nasa n'erireta obuholo omo kihugo; mondasa erireta obuholo, nĩkwa omũyalĩ. 35Kusangwa nasa n'erĩkatĩsanĩa omundu n'ĩse, n'omwali na nyĩnya wuwe, na mwalĩana na nyĩnyĩ-byala wuwe. 36N'esyonzĩgũ sy'omundu basyabya iba n'ab'omo kĩtũnga kiwe. 37Oyo wanzĩre ĩse kutse nyĩnya kwilaba ngye sianyitolere; n'oyo wanzĩre mugala kutse mwali kwilaba ngye, sianyitolere. 38N'omundu oyuteheka omusalaba wuwe n'erinyikwama sianyitolere. 39Oyukalenga eribana engebe yiwe, asyatalyayo, n'oyũkatalaya engebe yiwe busana nage asyabanayo. 40Omundundi oyũkabakokaya akanyĩkokaya; n'oyũkanyĩkokaya akakokaya oyo wanyituma. 41Oyũkakokaya omũmĩnyererĩ wa Nyamuhanga kusangwa nĩ mũmĩnyererĩ asyĩmya oluhembo lw'omũmĩnyererĩ; n'oyũkakokaya omundu utunganene kusangwa atunganene, asyĩmya oluhembo lw'omundu utunganene. 42N'omundundi oyo wasyaha olũtehĩ lw'amagetsi mũhũ omo lĩna ly'omwiga oko muguma w'abake-bake aba ati apũlayego, kwenene ngabũga nyiti, siendisyabula oluhembo luwe n'ahake.

will be added

X\