MARĨKO 9

1Neryo Yesu mwaswabũga ati, Kwenene ngabũga nenyũ nyiti, Hali abandi abimene hano abatendisyahola bate balangira Obwami bwa Nyamuhanga bũkahĩka n'obũtokĩ. 2Neryo habere hakya biro ndatu Yesu mwĩmya Petero na Yakobo na Yoane ĩbobene, mwatwalabo oko kitwa kiri-kiri. N'aho mwahĩndũkĩbwa embere syabo. 3Esyongimba siwe mosyakangabasanĩa, mosyabya nyeru-nyeru kutsibu, isihali oyo wangatoka erĩeryasyo atya. 4Neryo Elĩa na Musa mobabutukaho, ĩbakakanaya na Yesu. 5Neryo Petero mwabũga na Yesu ati, Mũkangĩrĩrya, lyowene eribya hano. Tũhĩmbe amahema asatu, enguma busana nawe, n'enguma busana na Musa, n'enguma busana na Elĩa. 6Kusangwa abya ĩsĩasĩ ekyo angabũga, iniabiriubaha kutsibu. 7Neryo ekĩtũ mokyahuluka mokyasũkũlĩryabo, n'omulenge mwalũa omo kĩtũ ati, Oyũ ni Mugala wage mwanze, mũmowe. 8Neryo-neryo mobakeba-keba, nĩkwa mobataswalangira ogundi mundu haguma nabo, inina Yesu ĩyowene. 9Neryo omugulu babya bakandagala bakalũa oko kitwa, Yesu mwaganĩabo ati, sibabwire mundu ebyo balialangira omo bũlĩme, erĩhĩka aho Mugala w'Omundu asyalũbũkĩbwa oko baholĩ. 10Neryo mobabika erĩhano eryo, nĩkwa mobakanĩranĩa omwatsi w'erĩlũbũka oko baholĩ nga nĩkĩ. 11Neryo mobabũlya Yesu bati, Busana nakĩ abakangĩrĩrya b'Emigambo bakabũga bati, Elĩa atolere ĩnĩatsũka erĩhĩka kwehĩ? 12Yesu mwasũbĩryabo ati, Elĩa akandĩsyatsũka erĩhĩka n'erĩsũbya emyatsi yosĩ, nĩkwa busana naki kĩsakĩre kiti, Omugala w'Omundu asyagalwa omo myatsi mingi n'eriganwa kwelu? 13Nĩkwa ngababwira nyiti, Elĩa abĩrĩhĩka, n'abandu mobamukola ngoko kĩsakĩre busana naye. 14Babere bahĩka eyiri abiga, mobalangira endeko nene ĩyĩnatĩmbĩre kubo. Kandi abakangĩrĩrya b'Emigambo babya ibakakuba nabo obuhaka. 15Neryo omugulu endeko eyo yalangira Yesu mobasweka kutsibu, mobatibita erĩyamũkerya. 16Neryo Yesu mwabũlya abiga buwe ati, Mukakuba nabo buhaka bwakĩ kwehĩ? 17Omundu muguma w'endeko mwamũsũbĩrya ati, Mũkangĩrĩrya, ngabikuletera mugala wage, kusangwa ali kw'ekĩrĩmũ kibi kandi isialitoka erĩbũga. 18N'aho kikamuhambira, kikamugusa ahisi, naye akaburura erĩhũlo n'erikeregeta ameno wuwe neryo iniakala. Mongabũlaya abiga bawe nyiti bahigire ekĩrĩmũ ekyo ky'eyĩhya, nĩkwa mobakataluka. 19Yesu mwasũbĩryabo ati, Ĩnywe lulengo lw'erĩtendĩkĩrĩrya, nasyĩkala nenyũ mugulu gungahi kwehĩ? Nasyababegerya mugulu gungahi kwehĩ? Munyiretere omũlwana oyo. 20Neryo mobamuletera omũlwana oyo. Omugulu ekĩrĩmũ ekyo kyalangira Yesu, mokyanyola-nyola omũlwana oyo, neryo mwawa ahisi oko kitaka mwayĩgala-galya ahisi, mwaburura erĩhũlo. 21Neryo Yesu mwabũlya ĩse w'omũlwana oyo ati, Amatabya atya oko biro bingahi kwehĩ? Naye mwamũsũbĩrya ati, Kyamũtsũka iniakine mulere. 22Engendo nyingi kyabirirenga erĩmwĩta, kikamugusa omo muliro n'omo magetsi. Ũtũkwĩre bũlĩge, ũtũwatĩkaye, wamabya wanganatoka! 23Neryo Yesu mwamubwira ati, Ũkabũga uti, wanganatoka! Emyatsi yosĩ ikatokekana busana n'omundu oyuwite erĩkĩrĩrya. 24Neryo ĩse w'omũlwana oyo mwabũga kutsibu ati, Namĩkĩrĩrya, ũwatĩkaye erĩtendĩkĩrĩrya lyage. 25Neryo omugulu Yesu alangira endeko ĩkahĩndana, mwahayira ekĩrĩmũ kibi ekyo, ati, Uwe kĩrĩmũ kitsiha ekĩtebũga, ngakuhana nyiti, Ũlũe omo mũlwana oyũ, kandi susyesyamũhĩkako. 26Neryo ekĩrĩmũ ekyo mokyalaka kutsibu n'erimunyola-nyola neryo mokyamũlũako. Omũlwana oyo mwabya ng'ekĩnda, kyaleka abandu bosĩ ibubaha bati, Abirihola. 27Nĩkwa Yesu mwahamba ebyala by'omũlwana mwamũhanganĩa; neryo mwahangana. 28Yesu abere abingira omo nyũmba, abiga buwe mobamũbũlya bũbĩso-bĩso bati, Twataluka erihigira ekĩrĩmũ ekyo ky'eyĩhya busana nakĩ kwehĩ? 29Yesu mwasũbĩryabo ati, Erisaba lisa lyo likatoka erihiga omũsĩndo oyũ. 30Neryo mobalũa eyo, mobalenderera eGalĩlaya. Nĩkwa Yesu mwatanza abandu bakaminya ng'ali hahi, kusangwa abya akakangĩrĩrya abiga buwe. 31Neryo Yesu mwabwira abiga buwe ati, Omugala w'Omundu asyahoterwa oko bandu, nabo basyamwĩta; neryo enyũma w'ebiro bisatu asyalũbũka. 32Nĩkwa mobataminya ekĩnywa ekyo, ibakubaha erĩmũbũlya. 33Neryo mobahĩka eKapernaũmũ, neryo babere bahĩka omo nyũmba, Yesu mwabũlyabo ati, Mulyakuba buhakakĩ omo nzira kwehĩ? 34Nĩkwa mobabya bũkũtũ kusangwa omo nzira babya ĩbakakanaya omukulu kubo nga nindi. 35Neryo Yesu mwĩkala ahisi, mwabirikira abiga ĩkũmĩ n'ababiri mwabwirabo ati, Omundu amanza eribya w'erĩmbere, abye w'enyũma oko bosĩ, kandi abye mugombe w'abosĩ. 36Neryo Yesu mwĩmya omwana mulere mwamũhanganĩa omo katĩkatĩ kabo. Kandi mwĩmya omwana oyo omo byala biwe, mwabũga ati, 37Omundu oyũkakokaya omwana mulere ng'oyũ omo lĩna lyage akanyĩkokaya; n'oyũkanyĩkokaya, akakokaya oyo wanyituma. 38Yoane mwabũga naye ati, Mũkangĩrĩrya, motwalangira omundu oyo wabya akahigira esyombĩnga sy'eyĩhya omo lĩna lyawe, nĩkwa motwamũkũngĩre kusangwa sĩ g'ũkw'ĩtwe. 39Nĩkwa Yesu mwabũga ati, Simumukunge, kusangwa sihali mundu oyukakola ekitiko-tiko omo lĩna lyage oyo wangabũga nabi lũba busana nage. 40Kusangwa oyute nzĩgũ yetu iniali oko luhande lwetu. 41Kusangwa oyukabaha olũtehĩ lw'amagetsi w'erĩpũlya, kusangwa muli bandu ba Kristo siendisyabula oluhembo luwe n'ahake. 42N'oyo wasyaleka omuguma g'oko bana balere aba, abakanyĩkĩrĩraya, akanyĩlũako, lyowene kumbe omundu oyo angasengerwako oluso lunene oko bĩkya biwe, iniaguswa omo ngetsi. 43Ebyala byawe byamaleka ukatoga, ĩwatwabyo. Lyowene busana nawe eriingira omo ngebe iwabirirehema kwilaba eriya omo Lĩfero haguma n'ebyala bibiri omo muliro owatetoka erĩhũmberĩbwa. 44Aho mihuka yabo itehola, n'omuliro syalihumbera.] 45N'ekisando kyawe kyamaleka ukatoga, ũtwekyo. Lyowene busana nawe eriingira omo ngebe iwabirirehema kwilaba eriguswa n'ebisando bibiri omo Lĩfero. [ 46Aho mihuka yabo itehola, n'omuliro syalihumbera.] 47N'erĩso lyawe lyamaleka ukatoga, uloleryo. Lyowene busana nawe eriingira omo Bwami bwa Nyamuhanga n'erĩso liguma, kwilaba eriguswa omo Lĩfero n'ameso abiri. 48Aho mihuka yabo itehola, n'omuliro syalihumbera. 49Kusangwa abandu bosĩ basyalengwako omo muliro ng'omũnyũ. 50Omũnyũ owene, Nĩkwa amatalya obusi bwago, wasyaswasĩhyago ũmũkĩ kwehĩ? Mubye n'omũnyũ omwisi wenyũ, kandi mubye n'obuholo omo katĩkatĩ kenyũ.

will be added

X\