MARĨKO 8

1Enyũma w'ebiro ebyo, eyindi ndeko nene moyahĩndana. Kandi isibawite eby'erirya. Neryo Yesu mwabirikira abiga buwe mwabwirabo ati, 2Namakwĩra endeko y'obũlĩge, kusangwa bamasiba nage lino ebiro bisatu, isibawite eby'erirya. 3Bamasuba ewabo batalĩre ibakandiremberera omo nzira, kusangwa abandi ni ba hali. 4Abiga buwe mobamũsũbĩrya bati, Hano h'omo mbwarara amandu angabanika hayi busana n'erĩũgũtya abandu bangaha aba kwehĩ? 5Yesu mwabũlyabo ati, Muwite uku mandu angahi kwehĩ? Nabo bati, Alinda. 6Neryo mwabwira abandu abo ati bĩkale ahisi. Neryo Yesu mwĩmya amandu alinda ayo, mwaha ewasĩngya uku Nyamuhanga, neryo mwatsũtsangago, mwahago abiga buwe ati bagabirego oko bandu ababya omo ndeko; neryo abiga mobagabago batya. 7Kandi ibawite otuhere tuke. Nĩkwa Yesu mwaha ewasĩngya busana nato, neryo mwabwira abiga ati batwalehyo, bagabehyo. 8Neryo abosĩ mobalya mobũgũta. Babya nga bandu elfu ĩnĩ (4000). 9Neryo abiga mobasongya ebitahangukira ebyasaka, mobyũsũlya ebitiri birinda. Neryo Yesu mwalagana n'endeko ati bagende. 10Kandi Yesu mwingira omo bwato haguma n'abiga buwe, mobaya omo kihugo ky'eDalmanũta. 11Nĩkwa Abafarĩsayo mobahuluka mobatsũka erĩkũbĩsanĩa Yesu y'obuhaka, ibakasonda ekitiko-tiko kĩkalũa elubula, ibakamulengako. 12Neryo Yesu mwahumulikana mwasweka omo mutima wuwe ati, Olulengo olũ lukasonda-sonda ekitiko-tiko busana nakĩ kwehĩ? Kwenene ngabũga nenyũ nyiti, Olulengo olũ silwendisyahabwa ekitiko-tiko. 13Neryo mwasĩgabo, mwasuba omo bwato, mwasokera eyisirya w'engetsi. 14Neryo abiga mobibirirwa eriheka obundu ibawite uku mbiga nguma nyisa omo bwato. 15Yesu mwahanabo ati, Mũlebaye, mũyĩtegaye busana n'ekĩhamya ky'Abafarĩsayo, n'ekĩhamya kya Herode. 16Nabo mobakanĩranĩa omo katĩ-katĩ kabo omwatsi oyo bati, Kusangwa situwite obundu. 17Yesu mwaminya ebyo bakanayako kyaleka ĩnĩabũlyabo ati, Busana nakĩ mũkakanĩranaya muti simuwite obundu kwehĩ? Sĩmwasĩ kutse eriminya kwehĩ? Emitima yenyũ ĩkĩnakalakalĩre itya kwehĩ? 18Muwite ameso, simwelangira kwebĩ? Muwite amatwĩ, sĩmũlĩowa kwehĩ? Simulibuka, 19omugulu natsũtsanga amandu atanu busana n'abandu elfu ĩtanu kwehĩ? (5000). Momwasongya ebitiri bingahi by'ebitahangukira ebyasaka kwehĩ? Mobasũbĩrya bati, Erĩkũmĩ n'ebibiri. 20N'omugulu natsũtsanga amandũ alinda busana n'abandu elfu ĩnĩ, momwasongya bitiri bingahi by'ebitahangukira ebyasaka kwehĩ? Mobasũbĩrya bati, Birinda. 21Neryo Yesu mwabũlyabo ati, Simuli mwanaminya kwehĩ? 22Neryo mobahĩka eBetesaĩda, n'eyo mobaleta endĩmatĩme uku Yesu ibakamusaba bati amũtũleko. 23Neryo Yesu mwawata oko byala by'endĩmatĩme, mwamutwala ekyaswa ky'omũyĩ. Abere abĩtwĩra amatande g'oko meso wuwe, Yesũ mwamũhĩra kw'ebyala neryo mwamũbũlya ati, Wanamalangira kindu kwehĩ? 24N'omundu oyo mwasumba ameso mwabũga ati, Namalangira abandu, nĩkwa bali ng'emiti eyikagenda. 25Kandi Yesu mwaswahĩra ebyala biwe oko meso w'omundu oyo. Neryo omundu oyo mwasamalira ndeke-ndeke, n'ameso wuwe mwalangira ebindu byosĩ byo ndeke, 26Nĩkwa Yesu mwamutuma ewabo ati, Susube omo mũyĩ oyo. 27Neryo Yesu n'abiga buwe mobaya oko mĩyĩ y'eKaĩsarĩFĩlĩpĩ. Omo nzira Yesu mwabũlya abiga buwe ati, Abandu bati nyirindi kwehĩ? 28Mobamũsũbĩrya bati, Abandi bati, Ũli Yoane Mũbatĩsya; abandi bati, Uli Elĩa; kandi abandi bati, Uli muguma g'oko bamĩnyererĩ. 29Kandi Yesu mwabũlyabo ati, Nenyũ mũtĩkĩ kwehĩ? Ĩnywe muti nyirindi kwehĩ? Petero mwasũbĩrya ati, Uli Kristo. 30Neryo Yesu mwaganĩabo ati, Simubwire mundu busana nage. 31Neryo Yesu mwatsũka erĩkangĩrĩrya abiga buwe ati, Omugala w'Omundu atolere iniagalwa kutsibu, n'eriganwa n'abakulu, n'abahererĩ bakulu, n'abakangĩrĩrya b'Emigambo. Kandi asyĩtwa, n'enyũma w'ebiro bisatu ĩnĩalũbũkĩbwa. 32Yesu mwabwirabo omwatsi oyo ndeke-ndeke. Neryo Petero mwatwala Yesu aho lutambi, mwatsũka erimukunga. 33Nĩkwa Yesu mwabinduka mwasamalira abiga buwe, neryo mwakunga Petero ati, Uwe Satanĩ, ubye enyũma kwĩngye. Amalengekanĩa wawe si wa Nyamuhanga nĩkwa ni w'abandu. 34Neryo Yesu mwabirikira endeko haguma n'abiga buwe, neryo mwabwirabo ati, Omundu amanza erinyikwama ayigane, aheke omusalaba wuwe, anyikwame. 35Kusangwa omundu oyukasonda erĩlamya engebe yiwe asyatalyayo; n'omundu oyũkatalaya engebe yiwe busana nage na busana n'Engulu Yowene asyalamyayo. 36Ko mundu akabana ndũndĩ yahi amatunda ekihugo kyosĩ, nĩkwa akatalya engebe yiwe kwehĩ? 37Omundu asyahĩnganĩakĩ busana n'engebe yiwe kwehĩ? 38Kusangwa omundu amakwa esĩsonĩ busana nage, kandi busana n'ebĩnywa byage omo lulengo lubi olũ l'oluteto olutekenga Nyamuhanga, Omugala w'Omundu asyamũkwa esĩsonĩ omugulu asyasa omo lukengerwa lwa Tata wuwe haguma n'abamalaĩka buwe babũyĩtĩre.

will be added

X\