MARĨKO 7

1Neryo Abafarĩsayo n'abandi b'oko bakangĩrĩrya b'Emigambo abalũa eYerũsalema, mobahĩndana hakũhĩ na Yesu. 2Mobalangira abiga buwe bakalya akalyo omo byala bĩtowene, ebĩtanabĩre. 3Kusangwa Abafarĩsayo n'Abayũda bosĩ siberya bate banabya ebyala byo kutsibu ibakakwama emitsye y'abakulu. 4Kandi omugulu bakalũa ekatale, isiberya bate banaba. Kandi hali eyindi mitsye mingi bakakwama eyo bakahabawa, ng'omwatsi w'erĩerya esyondehĩ, n'amalega, n'esyonyungu sy'emiringa, n'esyongyingo. 5Neryo Abafarĩsayo n'abakangĩrĩrya b'Emigambo mobamũbũlya bati, Busana nakĩ abiga bawe sibekwama emitsye y'abakulu nĩkwa bakalya omo byala bĩtowene kwehĩ? 6Yesu mwasũbĩryabo ati, Ĩsaya mwaminyerera ndeke busana nenyũ ĩnywe batebya, ngoko kĩsakĩre kiti, Abandu aba bakanyĩsĩkaya omo mĩnywa yabo, Nĩkwa emitima yabo yiri hali kwĩngye. 7Nĩkwa bakanyĩramaya buyira, Ĩbakakangĩrĩraya ebihano by'abandu ng'erĩkangĩrĩrya lya Nyamuhanga. 8Yesu mwabũga ati, Mũkasĩga ebihano bya Nyamuhanga, imwakwama emitsye y'abandu. 9Neryo Yesu mwaswabũga ati, Kwenene mukapona ndeke ekihano kya Nyamuhanga muti mũkategaya emitsye yenyũ! 10Kusangwa Musa mwabũga ati, Ũsĩkaye tata wawe na koyo wawe; kandi oyũkabũga nabi busana n'ĩse kutse koyo wuwe, ĩtawe. 11Nĩkwa inywe mũkabũga muti, Omundu amabwira ĩse kutse koyo ati, Endũndĩ eyo ngakuha erĩkũwatĩkya ni Korbanĩ, (eribindula liti, byabirihabwa uku Nyamuhanga); 12mukaleka ĩnĩatawatĩkya ise kutse nyĩnya. 13Mutya mukayira ekĩnywa kya Nyamuhanga mo buyira busana n'emitsye yenyũ eyo mukaha abandi. N'eyindi myatsi mingi eyiri ng'eyĩ mukakolayo. 14Neryo Yesu mwaswabirikira endeko, mwabwirabo ati, Mowe, ĩnywe bosĩ, muminye. 15Sihali kindu ekikaya omo mundu ekĩkalũa eyĩhya ekikatoka erĩtsandya omundu. Nĩkwa emyatsi eyĩkalũa omwisi w'omundu yo yĩkamũtsandaya. 16Omundu amabya awite amatwĩ, owe!] 17Omugulu Yesu asĩga endeko akingira omo nyũmba, abiga mobamũbũlya omwatsi w'omũsyo oyũ. 18Neryo Yesu mwabwirabo ati, Nenyũ nibya simuliminya kwehĩ? Sĩmwasĩ ko hate kindu ekikaya omwisi w'omundu ekĩkalũa eyĩhya ekyangatoka erĩmũtsandya. 19Kusangwa sikiriya omo mutima wuwe nĩkwa omo nda yiwe, neryo kikalaba n'eritwangana. (Erĩbũga litya Yesu mwabũga ati ebyalya byosĩ binatolere eriribwa.) 20Kandi Yesu mwabũga ati, Ekĩkalũa omo mundu kyo kĩkamũtsandaya. 21Kusangwa omo mutima w'omundu mo mukahuluka amalengekanĩa mabi, erĩsĩngĩra, erĩĩba, erĩĩta, amaragane, 22erirumwa, ebibi byosĩ, eriteba, esyongumbu nyibi, erĩso libi, eritsuma, emiyiheko, obũkĩrũ. 23Emyatsi mibi yosĩ eyĩ ĩkalũa omwisi w'omundu n'erĩmũtsandya. 24Neryo Yesu mwalũaho mwaya oko bihugo by'emĩyĩ y'eTĩro n'eSĩdona. Neryo mwingira omo nyũmba, ĩsĩanzĩre omundu akaminya kw'aliho, nĩkwa mwatatoka erĩbĩsama. 25Nĩkwa omũkalĩ muguma oyuwite mwali mulere oyuli kw'ekĩrĩmũ kibi, mwowa engulu ya Yesu, neryo mwasa lũba n'eriwa oko bisando biwe. 26Omũkalĩ oyo abya Mũgĩrĩkĩ w'ekihanda ky'eSĩrĩfoĩnĩke. Neryo mwasaba Yesu ati ahiyire embĩnga eyo y'eyĩhya uku mwali wuwe. 27Nĩkwa Yesu mwamũsũbĩrya ati, Abana batsũke erĩũgũta, kusangwa sĩryowene erĩĩmya kalyo k'abana n'erigusako oko syombwa. 28Nĩkwa mwasũbĩrya ati, Ega Mukama, nĩkwa esyombwa esiri omwisi w'emesa sikanalya ebitahangukira by'abana. 29Neryo Yesu mwamubwira ati, Kusangwa wamasũbya utya, ugende ewenyũ, embĩnga yabĩrĩlũa uku mwali wawe. 30Neryo omũkalĩ oyo mwasuba ewabo mweya omwana wuwe inianagotsere oko ngyingo; n'embĩnga iyabĩrĩmũlũako. 31Neryo kandi mwalũa omo kihugo ky'eTĩro, neryo mwatwangana eSĩdona mwahĩka oko ngetsi y'eGalĩlaya, iniakalaba omo nzira y'ekihugo ky'eMĩyĩ Ĩkũmĩ. 32Neryo abandu mobamuletera omutsiha kandi isialitoka erĩbũga ndeke. N'abandu abo mobasaba Yesu bati ahĩre ebyala biwe by'oko mundu oyo. 33Neryo Yesu mwatwala omundu oyo ahate bandu ahayĩhengekĩre, neryo mwahĩra eminwe y'omo matwĩ wuwe, neryo mwatwa amatande, mwatũla oko lulimi l'omundu oyo. 34Neryo Yesu mwalalamira elubula, mwahumulikana, neryo mwabwira omundu oyo ati, Efafata, eribindula liti, Lĩbũkala. 35N'amatwĩ wuwe mwalĩbũkala, n'olulimi luwe molwagobokala, neryo mwatsũka erĩbũga ndeke. 36Neryo Yesu mwaganĩabo ati, Sibabwire mundu n'omuguma y'omwatsi oyũ. Nĩkwa nomo anaganayabo atya, mobatũlago kutsibu. 37N'abandu bosĩ abowa omwatsi oyo mobasweka kutsibu. Mobabũga bati, Akakola emyatsi yosĩ yo ndeke kutsibu. Akowĩsaya abatsiha, kandi akaleka esyomũmũ ĩsyabũga.

will be added

X\