MARĨKO 6

1Neryo Yesu mwalũayo mwasuba eka wabo eyo akulira; n'abiga buwe mobamukwama. 2N'oko kiro ky'eSabato mwatsũka erĩkangĩrĩrya omo nyũmba y'erĩhĩndanamo. Neryo habya abandu bangi, n'omugulu bamuhulikirira mobasweka abosĩ, bati, Omundu oyũ abana emyatsi yosĩ eyĩ yo hahi kwehĩ? Kandi mwabana n'amenge aya wo ati kwehĩ? Kandi akakola ebitiko-tiko ebĩ byo ati kwehĩ? 3Oyũ si yo mũbatsĩ w'esyombago, mugala wa Marĩa, na mugala wabo Yakobo, na Yose, na Yũda, na Sĩmonĩ kwehĩ? N'abali babo sĩbĩkere haguma netu eno kwehĩ? Neryo mobamugana batya. 4Neryo Yesu mwabwirabo ati, Omũmĩnyererĩ sialibula erĩsĩkĩbwa imo n'omo kihugo kiwe, n'ab'ekihanda kiwe, n'ab'ekĩtũnga kiwe. 5Neryo mwatatoka erikolerayo ebitiko-tiko. Nĩkwa Yesu mwahĩra ebyala biwe by'oko bakonĩ bake mwalamyabo. 6Nĩkwa Yesu mwasweka kutsibu busana n'erĩtendĩkĩrĩrya lyabo. Neryo Yesu mwalendera omo mĩyĩ yosĩ akakangĩrĩrya abandu. 7Neryo Yesu mwabirikira abiga ĩkũmĩ n'ababiri neryo mwatsũka eritumabo mo babiri-babiri. Kandi mwahabo ehamũlĩ oko bĩrĩmũ bibi. 8Neryo mwalayirabo ati, Simutwale kindu busana n'olugendo olo, go n'omũtso musa. Simutwale bundu, kutse ngunza, kutse franka omo matũsĩ wenyũ. 9Nĩkwa mwambale esyongendero; kandi simwambale esyokanzu ĩbĩrĩ. 10Kandi mwabwirabo ati, Aho basyabakokya omo nyũmba, mwĩkalemo erĩhĩka oko kiro mwasyalũĩra omo mũyĩ oyo. 11Mwamahĩka aho bakagana erĩbakokya kutse bakagana eribahulikirira, omugulu mũkalũaho, imwakunguta olũtũtũ oluli omo bisando byenyũ. Ekĩ kyasyakangĩrĩryabo. 12Neryo mobayatũlaganĩa bati abandu babindule emitima yabo erireka ebibi byabo. 13Neryo mobahigira sy'eyĩhya esyombĩnga nyingi kandi mobahaka magũta g'oko bakonĩ bangi n'erĩlamyabo. 14Nĩkwa omwami Herode mowa omwatsi oyũ, kusangwa engulu ya Yesu iyabĩrĩhĩka ehosĩ. Abandi bandu mobabũga bati, Yoane Mũbatĩsya abĩrĩlũbũka oko baholĩ kikaleka obũtokĩ bw'ebitiko-tiko obũ ibwakoleka busana naye! 15Nĩkwa abandi bati nĩ Elĩa. Abandi bati nĩ mũmĩnyererĩ, omuguma g'oko bamĩnyererĩ ba kera. 16Neryo omugulu Herode owago, mwabũga ati, Nĩ Yoane Mũbatĩsya oyo natwa k'omutwe, nĩkwa abirisuba. 17Herode oyo iniabirihamula ati, Yoane abohawe n'erĩhĩrwa omo mũlĩkĩ busana na Herodĩa, mũkalĩ w'omugala wabo Herode, ye Fĩlĩpo, nĩkwa Herode abya ĩnĩabĩrĩhĩkya Herodĩa. 18Neryo Yoane Mũbatĩsya abya iniakabwira Herode ati, Emigambo ĩkakũganaya erĩĩmya omũkalĩ wa mugala wenyũ ye Fĩlĩpo. 19Herodĩa kw'akwa Yoane y'atya obusu n'erisonda erĩmwĩta, nĩkwa mwatatoka. 20Kusangwa Herode abya akubaha Yoane, ĩnĩanasĩ ngoko Yoane abya mundu mutunganene n'oyũbũyĩrĩre, neryo mwamũteya ndeke. Nĩkwa Herode mwanza erimuhulikirira nĩkwa mwaganga-ganga busana n'ebĩnywa biwe. 21Neryo Herodĩa mwabana embanga. Herode mwayira erirya ĩnene ry'ekiro ky'eributwa liwe. Neryo mwabirikira abakama buwe n'abakulu b'emilondo y'abasĩrĩkanĩ buwe, n'abandu bakulu b'eGalĩlaya okw'irya eryo. 22Neryo mwali wa Herodĩa mwingira, mwasatirabo, mwatsemesya Herode n'abagenĩ buwe. Neryo omwami mwabũlya omwanamuto oyo ati, Wanganzakĩ kwehĩ? Ngandikuha ekyo wanzĩre. 23Kandi mwamũlahĩrĩrya ati, Ngalahĩraya nyiti nasyakuha ekĩndũkĩ wanzĩre, nomo kyangabya oluhande lw'obwami bwage. 24Neryo omwana-muto oyo mwayabũlya nyĩnya ati, Nyĩbũlayekĩ kwehĩ? Naye mwamũsũbĩrya ati, Omutwe wa Yoane Mũbatĩsya. 25Neryo-neryo omwana-muto oyo mwaswahĩkamo lũba mwabũlya omwami ati, Nyanzĩre iwamba lino omũtwe wa Yoane Mũbatĩsya g'oko kibindi. 26Neryo omwami mwakwa engitsi, nĩkwa busana n'erĩlahĩrya liwe kandi busana n'abagenĩ buwe, mwatasonda erĩmũganĩa. 27Neryo mwahamula omũsĩrĩkanĩ wuwe muguma alete omutwe wa Yoane. Neryo omũsĩrĩkanĩ oyo mwaya omo nyũmba y'omũlĩkĩ, mwatwa omutwe wa Yoane. 28Neryo mwaletago oko kibindi, mwahago omwana-muto oyo, naye mwahago nyĩnya wuwe. 29Neryo omugulu abiga ba Yoane bowa omwatsi oyo, mobasa mobaheka ekĩnda kiwe, mobahĩrakyo omw'isinda. 30Neryo abakwenda mobasubula mobahĩndana ahali Yesu, mobamubwira ebyosĩ ebyo bakola n'emyatsi eyo bakangĩrĩraya. 31Neryo Yesu mwabũga nabo ati, Mwase ĩnywebene ahate bandu, muluhuke hake. Kusangwa habya bandu bangi bakalaba-laba, neryo Yesu n'abiga buwe isibawite ndambĩ y'erirya. 32Neryo mobagenda omo bwato, eriya ahate bandu ĩbobene. 33Abandu bangi mobalangirabo bakagenda mobaminyererabo, neryo abandu abo mobalũa omo mĩyĩ yosĩ, mobatĩmba omo bisando n'eritanga Yesu n'abiga buwe. 34Nĩkwa omugulu Yesu alũa omo bwato mwalola oko ndeko nene eyo. Neryo mwakwĩrabo bũlĩge kusangwa babya ng'esyombũlĩ esitawite mũlĩsya. Neryo mwatsũka erĩkangĩrĩryabo emyatsi mingi. 35N'omugulu bwasonda erihumbera, abiga buwe mobamũhĩkako bati, Eno ni mbwarara, kandi bwamahumbera. 36Ulagane n'abandu bayayigulire eby'erirya omo malima n'omo mĩyĩ eyĩhererenĩe. 37Yesu mwasũbĩryabo ati, Nenyũ muhebo eby'erirya. Nabo mobabũlya Yesu bati, Wanzĩre itwayagula amandu w'esyofranka magana abiri n'erihabo eby'erirya kwehĩ? 38Neryo Yesu mwabũlyabo ati, Muwite uku mandu angahi kwehĩ? Mugende mũlebaye. Nabo babere babĩrebya mobamubwira bati, Ni mandu atanu n'amahere abiri. 39Neryo Yesu mwahana abiga buwe ati bĩkalaye abandu mo ndeko-ndeko oko biti kw'ahisi. 40Neryo abandu mobĩkala mo milondo-milondo, omo ndeko, abandu ĩgana, n'omo yindi ndeko abandu makũmĩ atanu. 41Neryo Yesu mwĩmya amandu atanu ayo n'amahere abiri, neryo mwalalamira endata elubula, neryo mwaha ewasĩngya uku Nyamuhanga. Neryo mwatsũtsangago, mwahago abiga buwe ati bahĩrego embere sy'abandu. Kandi mwagaba amahere abiri ayo n'erĩtsũnganĩago oko bosĩ. 42Abosĩ mobalya, mobũgũta. 43Neryo abiga mobasonga-songya ebihande-bihande ebyatahanguka mobyũsũlya ebitiri ĩkũmĩ n'ebibiri, n'eby'amahere nibya. 44Abalume abalya amandu ayo babya elfu ĩtanu ( 5000 ). 45Neryo-neryo Yesu mwahatikana abiga buwe ati bingire omo bwato babye bakabya embere erĩlolya eBetesaĩda, eyisirya w'engetsi, omugulu akalagana n'endeko. 46Neryo Yesu abere abituma endeko yo mbolere, mwaya oko kitwa akayasaba. 47Kandi bwabere bwabya ĩgolo-golo, obwato obo bwabya omo ngetsi mo hali, na Yesu iniane ĩyowene oko kitaka. 48Neryo mwalangira abiga bakataluka erigoya obwato kusangwa erihunga lyabya likabuhirira embere syabo. N'oko kĩsĩsĩmũko ky'akani ky'ekiro, Yesu mwahĩka kubo iniakatandayira oko ngetsi k'omo bisando. Neryo mwasonda eritwangana kubo. 49Nĩkwa mobamulolako akatandayira oko magetsi. Mobaganĩrya bati nĩ kĩrĩmũ, mobalaka. 50Kusangwa abosĩ mobamulolako, mobubaha. Yesu mwabwirabo lũba ati, Mũsĩkaye emitima! Nĩna ngye! Simubahe! 51Neryo mwingira omo bwato babyamo, n'erihunga molyũmbya. N'abiga nabo mobasweka kutsibu. 52Kusangwa mobataminya enzumwa y'esyombiga sy'amandu, nĩkwa emitima yabo iyabirikala. 53Neryo mobasoka engetsi n'erĩhĩka oko kihugo ky'eGenesaretĩ, mobakoma obwato oko mũsĩke w'engetsi. 54Nĩkwa babere banabĩlũa omo bwato, abandu mobaminya Yesu yo lũba. 55Neryo mobatibita omo kihugo kyosĩ, bakayaheka abakonĩ oko syongyingo syabo, bakatwalabo uku Yesu. 56N'ehosĩ eyo Yesu aya oko hĩyĩ, kutse oko mĩyĩ kutse omo malima, abandu mobatwala abakonĩ babo omo hitale, ibanemulemba-lemba Yesu bati aleke abakonĩ batũle oko mũsĩke musa w'olukimba luwe. N'abosĩ abatũla kulo mobalamĩbwa.

will be added

X\