MARĨKO 5

1Neryo mobahĩka eyisirya w'engetsi y'eGalĩlaya, omo kihugo ky'Abagerase. 2Nĩkwa abere anabĩlũa omo bwato, neryo-neryo mwahĩndana n'omundu oyo wabya kw'ekĩrĩmũ kibi akalũa eyiri amasinda. 3Omundu oyo abya ĩkere eyiri amasinda. Isihali mundu wangatoka erimuboha nomo angabya n'amahulula. 4Kusangwa esyongendo nyingi iniakabohawa oko bisando n'ebyala omo misege n'amahulula, nĩkwa ĩnĩakatwa mahulula n'erĩtsũtsanga emisege eyabya oko bisando biwe. Abya n'amaka manene, isihali mundu wangamutoka. 5Omo kiro n'omo musibo iniakalendera oko sisinda n'oko bitwa, iniakayibirikirako n'erĩyĩhũtangalya omo mabwe. 6Nĩkwa mwalangira Yesu iniakine hali, neryo mwanguha mwasa mwamũkũkamira, 7mwalaka n'omulenge munene ati, Indi na mwatsi wahi nawe, uwe Yesu, Mugala wa Nyamuhanga W'endata Kutsibu kwehĩ? Ngakulemba-lemba busana na Nyamuhanga sũnyagalaye! 8Abũga atya kusangwa Yesu iniakabwirakyo ati, Uwe kĩrĩmũ kibi, ũlũe oko mundu oyũ. 9Neryo Yesu mwabũlyakyo ati, Erĩna lyawe uwendi kwehĩ? Naye mwamũsũbĩrya ati, Erĩna lyage ĩngye Milondo; kusangwa tuli bangi. 10Kandi mwalemba-lemba Yesu ati, siahigebyo erĩlũsyabyo omo kihugo ekyo. 11Nĩkwa ekihangulo kinene ky'esyongulube kyabya hakũhĩ, isikalira aho h'oko kitwa. 12N'ebĩrĩmũ bibi ebyo mobyalemba-lemba Yesu biti, Ututume omo syongulube twingire musyo. 13Neryo mwalĩgĩrabyo. N'ebĩrĩmũ bibi ebyo mobyalũa omo mundu oyo, mobingira omo syongulube, n'ekihangulo kyosĩ mokyagaramukalira omo ngetsi, kandi syabya nga elfu ĩbĩrĩ, mosyasendera omo ngetsi. 14Neryo abalĩsya basyo mobatibita, mobayatũlago omo mũyĩ n'omo kihugo ekyo. Neryo abandu mobahĩka erĩyalebya ekyabere. 15Mobahĩka uku Yesu mobalebya omundu oyo wabya kw'esyombĩnga nyingi, ĩnĩanĩkere, inianambite, iniabiribya mundu w'obũlengekanĩa. Neryo abosĩ mobubaha. 16Neryo abandu abalangira ebyabya, mobabwirabo ebyahĩka oko mundu oyo wabya kw'esyombĩnga, n'omwatsi w'esyongulube. 17Neryo mobatsũka eriremba-lemba Yesu bati alũe omo kihugo kyabo. 18Neryo omugulu Yesu abya akingira omo bwato, omundu oyo wabya kw'esyombĩnga mwamulemba-lemba ati, Uleke nyigende haguma nawe! 19Nĩkwa Yesu mwatamũlĩgĩra, nĩkwa mwamubwira ati, Usube eka wawe n'oko b'ewenyũ, ubwirebo emyatsi minene eyo Mukama abirikukolera, kandi ngoko abirikuganyira. 20Neryo omundu oyo mwalũaho, mwalaba omo kihugo ky'eMĩyĩ Ĩkũmĩ, akatũlago busana n'emyatsi eyo Yesu amukolera; n'abosĩ abowa mobasweka. 21Neryo Yesu mwasuba eyisirya w'engetsi. N'eyo oko mũsĩke w'engetsi endeko nene moyahĩndana hakũhĩ naye. 22Yaĩro, omukulu muguma w'enyũmba y'erĩhĩndanamo, mwahĩkaho. N'omugulu alangira Yesu, mwatũlama ahisi oko bisando biwe, 23neryo mwamulemba-lemba kutsibu ati, Mwali wage mulere alwere kutsibu-tsibu, kumbe wamasa n'erĩhĩra ebyala byawe ukw'iye, atoke erilama n'eribyaho! 24Neryo Yesu mwagenda haguma naye. Nĩkwa endeko nene moyamukwama n'erĩmũhatatanĩa. 25Kandi habya omũkalĩ oyo wabya akwĩre obũkonĩ bw'erĩlũsya omusasi emyaka ĩkũmĩ n'eyĩbĩrĩ, 26iniabiriagalwa oko basaki bangi. Kandi iniabiribuga ebindu biwe byosĩ, isialitalama, nĩkwa iniakatoha. 27Nĩkwa mowa engulu ya Yesu, neryo mwasa omo ndeko eyabya enyũma kwiye. 28Kusangwa abũga ati, Namatũla oko lukimba luwe lusa ngandĩlamĩbwa. 29Neryo mwatũla oko lukimba luwe, neryo-neryo erisenda ly'omusasi wuwe molyuma; neryo mwaminya omo mubiri wuwe kw'abĩrĩlamĩbwa oko ndwala yiwe. 30Nĩkwa Yesu mwaminya lũba k'obũtokĩ bwabirimuhulukako, neryo mwabinduka omo ndeko mwabũga ati, Nindi wamatũla oko ngimba syage kwehĩ? 31Nĩkwa abiga buwe mobamũsũbĩrya bati, Unemulangira kw'endeko ĩkakũhatatanaya, kandi ũkabũga uti, Nindi wamanyĩtũlako kwehĩ? 32Nĩkwa Yesu mwatĩmbya ameso wuwe erĩsondya oyo wakola atya. 33Nĩkwa omũkalĩ oyo iniabiriminya ekyabĩrĩmũhĩkako, mwasa iniakatitimana n'eriubaha, mwawa embere siwe, neryo mwamubwira ebyosĩ byo kwenene. 34Yesu mwamubwira ati, Mwali wage, erĩkĩrĩrya lyawe lyamakũlamya. Ugende buholo, ũlamĩbawe kw'endwala yawe. 35Omugulu Yesu abya akĩnabũga ebĩ abakwenda b'enyũmba ya Yaĩro, omukulu w'enyũmba y'erĩhĩndanamo, mobahĩka erimubwira bati, Mwali wawe abirihola. Ũkĩnaswalũhaya Omũkangĩrĩrya yo busana nakĩ kwehĩ? 36Nĩkwa Yesu mowa ebyabũgawa, mwabwira omũtabalĩ w'enyũmba y'erĩhĩndanamo ati, Sigubahe, nĩkwa wĩkĩrĩraye lisa. 37Neryo Yesu mwatalĩga mundu akagenda naye nina Petero na Yakobo, na Yoane mugala wabo Yakobo. 38Neryo babere bahĩka oko nyũmba y'omũtabalĩ w'enyũmba y'erĩhĩndanamo, Yesu mwalangira ko hali olukanda, kandi mowa eririra, n'erĩsũsũmana kutsibu. 39Neryo mwingira omo nyũmba mwabwirabo ati, Busana nakĩ mũkabũgaya olukanda n'eririra kwehĩ? Omwana sĩaholĩre, nĩkwa alito! 40Nabo mobamuseka. Nĩkwa Yesu mwahigira abosĩ b'eyĩhya, neryo mwĩmya ĩse w'omwana na nyĩnya w'omwana, n'abiga buwe basatu, neryo mwingira omo nyũmba aho mwana abya agotsere. 41Neryo Yesu mwahamba oko byala by'omwana, mwamubwira ati, Talĩta kũmĩ, kiti, Mwana-muto, ngakubwira nyiti, Hangana. 42Neryo-neryo omwana-muto mwahangana, mwatsũka erigenda. Kusangwa abya w'emyaka ĩkũmĩ n'eyĩbĩrĩ. Neryo mobasweka n'erisweka ĩnene. 43Nĩkwa Yesu mwaganiabo kutsibu ati, Sibabwire mundu; neryo mwabũga ati, Mumuhe eby'erirya.

will be added

X\