MARĨKO 4

1Kandi Yesu mwatsũka erĩswakangĩrĩrya oko mũsĩke w'engetsi. Neryo endeko eyahĩndana hakũhĩ naye yabya nene kutsibu, kyaleka inĩngira omo bwato n'erĩĩkala mubo. Obwato obo bwabya omo ngetsi nĩkwa endeko yabya yimene oko mũsĩke w'engetsi. 2Yesu mwakangĩrĩryabo emyatsi mingi omo mĩsyo, neryo omw'ĩkangĩrĩrya liwe mwabwirabo ati, 3Muhulikirire! Omũbĩbĩ mwayabiba embuto. 4N'omugulu abiba, esindi mbuto mosyatogera oko mũsĩke w'enzira, n'esyonyonyũ mosyasa n'eritomengerasyo. 5Esindi mosyatogera oko kitaka ky'amabwe, ahate mukungu mungi. Esyombuto esyo mosyalasa lũba, kusangwa omutaka si mungi. 6Neryo eryuba lyabere lyakola, molyahĩsyasyo, neryo kusangwa emĩrĩhĩ yabya mike-mike, mosyuma. 7Esindi mbuto mosyatogera omo mahwa, n'amahwa ayo mwalasa mwakũsyasyo, mositasohola. 8Nĩkwa esindi mbuto mosyatogera omo kitaka kyowene mosyalasa, mosyaboga-boga mosyasohola, Esindi mosyabuta embuto ngendo makũmĩ asatu, n'esindi amakũmĩ ndatu, n'esindi ngendo ĩgana. 9Nĩkwa Yesu mwabũga ati, Oyuwite amatwĩ w'erĩowa, owe. 10Kandi omugulu Yesu abya ĩyowene, abamukwama haguma n'abiga buwe ĩkũmĩ n'ababiri mobamũhĩkako bakamũbũlya busana n'emĩsyo eyo. 11Yesu mwasũbĩryabo ati, Ĩnywe mwabirihabwa eriminya erĩkũmbo ly'Obwami bwa Nyamuhanga, nĩkwa abandi, abate netu, bakowa emyatsi yosĩ mo mĩsyo. 12Litya, Ibatoka erilangira, nĩkwa sĩbalangĩre, Ibatoka erĩowa kandi, n'erĩowa sibaminye, Bakayabindukira Nyamuhanga, Naye iniabuyirabo. 13Neryo Yesu mwabũlyabo ati, Simwetaminya omũsyo oyũ kwehĩ? Neryo mwasyaminya emĩsyo yosĩ yo muti kwehĩ? 14Omũbĩbĩ akabiba ekĩnywa kya Nyamuhanga. 15Abandi bandu bali ng'ekĩnywa kikabibawa oko na nzira; n'omugulu bakowakyo, Satanĩ ĩkahĩka n'erĩlũsya ekĩnywa ekyabiribibwa omwisi wabo. 16Abandi bandu bali ng'esyombuto esyatogera oko kitaka ky'amabwe. Omugulu bakowa ekĩnywa bakalĩgakyo n'obutseme. 17Nĩkwa sikiribya omwisi wabo mo hali ng'omũlĩhĩ, neryo kikabya mo katambĩ kake. Neryo omugulu obũlĩge kutse erĩendererya bĩkahĩka busana n'ekĩnywa ekyo, bakakireka lũba! 18Abandi bandu bali ng'esyombuto esyabibawa omo mahwa. Abo bakowa ekĩnywa ekyo, 19nĩkwa amagalĩ w'ekihugo n'amatebo w'ebindu, n'esyongumbu sy'ebindi bindu bikingira ĩbyakũsya ekĩnywa, neryo ikitasohola. 20Nĩkwa abandi bandu bali ng'embuto eyabibawa oko kitaka kyowene. Bakowa ekĩnywa ekyo n'erĩrĩgakyo ĩberya esyombuto; eyindi mbuto ngendo makũmĩ asatu, eyindi ngendo makũmĩ ndatu, eyindi engendo erĩgana. 21Kandi Yesu mwabwirabo ati, Etala ikaletawa busana n'erihĩrayo omwisi w'ekitiri kutse eyĩkwa oko ngyingo kwehĩ? Omundu sialĩhĩrayo oko mbaniko kwehĩ? 22Kusangwa sihali ekĩbĩsamĩre ekitendisyamĩnyĩkalĩbwa, kutse sihali erĩkũmbo eritendisyakũmbũlwa. 23Omundu amabya awite amatwĩ w'erĩowa, owe. 24Kandi mwabũga nabo ati, Muyirenge busana n'ebyo mũkowa. Olulengo olo mukalengamo, lo Nyamuhanga asyabalengeramo. Kandi asyakola kwilaba aho. 25Omundu oyuwite ekindu asyahabwa ebindi; n'omundu oyutawitekĩ, asyasagulwa n'ekyo alwe awite. 26Yesu mwabũga ati, Obwami bwa Nyamuhanga bulingene n'omundu oyukabiba embuto y'omw'irima liwe. 27Akagotsera omo kiro, kandi iniabuka engyakya, nĩkwa esyombuto esyo sikalasa n'erikula. Nĩkwa sĩasĩ nga sikakula siti. 28Ekitaka kikaleka emyaka eyo iyalasa n'eriera. Erĩmbere emigera ikahuluka, enyũma w'aho ikasohola, n'enyũma w'aho amakũndĩ awerĩre. 29Omugulu engano ikera omundu akatsũka erigesa, kusangwa obugese bwamahĩka. 30Neryo Yesu mwabũlya ati, Twangalĩngĩrĩranĩa Obwami bwa Nyamuhanga bo nakĩ kwehĩ? Kutse tũswetwa mũsyo wahi busana n'erĩkũmbũlabo kwehĩ? 31Bulingene n'embuto y'eharadalĩ eyo mundu abiba omo kitaka kandi ni inge kwilaba esyombuto syosĩ sya muna-kihugo. 32Neryo ikalasa iyabya nene kwilaba emyaka yosĩ. Ĩkalasaya emitahi minene-minene n'esyonyonyũ sy'omo kyanya sikatoka erĩhĩmba esyonyutu syasyo sy'omo kĩtsũtsũ kyayo. 33Yesu mwakangĩrĩrya bandu b'ekĩnywa ekyo, iniakagusa emĩsyo mingi eyiri ng'eyĩ. Mwatũlĩrabo ekĩnywa ekyo ngoko batoka erĩowakyo. 34Kandi mwatabũga nabo atetwĩrabo mũsyo; nĩkwa omugulu abya n'abiga buwe, mwakũmbũlĩrabo emyatsi yosĩ. 35Oko kiro ekyo omw'ĩgolo-golo Yesu mwabwira abiga buwe ati, Tusokere eyisirya w'engetsi. 36Neryo mobasĩga endeko, n'abiga mobingira omo bwato obo Yesu abyamo, mobamutwala haguma nabo. N'awandi mato abyaho nibya. 37Neryo erigunga ĩnene ly'ekihunga molyahĩka n'ebisunda mobyayikuba omo bwato, n'obwato mobwasonda erĩũsũla. 38Nĩkwa Yesu abya enyũma omo bwato ĩnĩayĩreto oko kisegemero. Abiga mobamũbũkya bati, Mũkangĩrĩrya, sigututsomene ko tukahwa kwehĩ? 39Neryo Yesu mwahangana mwakunga ekihunga, kandi mwabwira engetsi ati, Huna, ubye bũkũtũ! N'ekihunga mokyũmbya, mohahita esĩsyerere. 40Neryo Yesu mwabwirabo ati, Mukubaha busana nakĩ kwehĩ? Busana nakĩ simuwite erĩkĩrĩrya kwehĩ? 41Nĩkwa mobubaha kutsibu ibakabwirana bati, Omundu oyũ nindi kwehĩ? Eki hunga n'engetsi bikamukenga!

will be added

X\