MARĨKO 3

1Neryo Yesu mwaswaya omo nyũmba y'erĩhĩndanamo. N'omundu w'ebyala bĩlehemĩre abyaho. 2Kandi abandu mobatungerera Yesu ng'akandĩmũlamya omo kiro ky'eSabato kusangwa babya banzĩre erimutsongera nabi. 3Neryo Yesu mwabwira omundu w'ebyala bĩlehemĩre ati, Hangana wase emuliro eno. 4Neryo mwabũlya abandu ati, Omo Migambo yetu linatolere omo Sabato erikola ebibuya kutse erikola nabi kwehĩ? Erĩlamya engebe y'omundu kutse erĩheryayo kwehĩ? Nĩkwa mobabya bũkũtũ. 5Neryo Yesu mwasamalirabo, mwatĩmbya ameso wuwe go kubo iniahitene, iniakagalawa busana n'obutsibu, bw'emitima yabo. Neryo mwabũga n'omundu oyo ati, Lambula ebyala byawe. Naye mwalambula ebyala biwe, neryo mobyalama ndeke. 6N'Abafarĩsayo mobahũluka, mobaya embĩta haguma n'Abaherode, ngoko bangĩta Yesu. 7Nĩkwa Yesu n'abiga buwe mobaya oko ngetsi y'eGalĩlaya; n'endeko nene moyamukwama. Endeko eyo yalũa eGalĩlaya, n'eYũdea, 8n'eYerũsalema, n'ekihugo ky'eĨdũmea, n'ekihugo ky'eyisirya w'eYorodanĩ, n'ekihugo kĩhererenĩe n'emĩyĩ y'eTĩro n'eSĩdona. Endeko nene eyo moyahĩka uku Yesu kusangwa bowa emyatsi abya akakola. 9N'endeko eyĩ yabya nene kutsibu, kyaleka Yesu iniabwira abiga buwe ati babane obwato busana naye, abandu bakasyamũhatatanĩa. 10Kusangwa Yesu abya akalamya abandu bangi, n'abakonĩ bangi mobayĩlabĩrĩrya ukw'iye bati banamatamũtũlako. 11N'omugulu abandu ababya kw'ebĩrĩmũ bibi bamulolako, mobawa ahisi embere siwe ibakalaka bati, Uli Mugala wa Nyamuhanga. 12Neryo Yesu mwahanabo kutsibu ati sĩbamũkũmayĩraye. 13Neryo Yesu mwahetukira oko kitwa, mwabirikira abandu abo abya anzĩre, nabo mobaya aho ali. 14Neryo mwayisoga bandu ĩkũmĩ n'ababiri batoke eribya haguma naye, kandi atoke eritumabo erĩyatũlaganĩa omwatsi, 15kandi babye n'ehamũlĩ y'erihiga esyombĩnga. 16Erĩkũmĩ n'ababiri abo Yesu ayisoga nĩ Sĩmonĩ, (oyo Yesu ahula mo Petero); 17na Yakobo n'omugala wabo ye Yoane, abagala ba Zebedayo, (Yesu mwahabo erĩna Boanerge, eribindula liti, Abagala b'omũlũmo); 18na Anderea, na Fĩlipo, na Bartolomayo, na Matayo, na Toma, na Yakobo mugala wa Alufayo, na Tadeo; na Sĩmonĩ Mukanana, 19na Yũda Ĩskarĩota, oyo wamuhotera. 20Neryo Yesu mwaya eka. Kandi endeko nene moyahĩndana, kyaleka Yesu n'abiga buwe ibabula endambĩ y'erirya. 21Neryo omugulu ab'ekĩtũnga kiwe bowa omwatsi oyũ mobayamuhamba kusangwa abandu bati, Abiribya mũsĩre. 22Kandi abakangĩrĩrya b'Emigambo abalũa eYerũsalema babya bakabũga bati, Ali ko Belzebũlĩ. Abandi bati, Omukulu w'esyombĩnga yukamuha amaka w'erihiga esyombĩnga. 23Neryo Yesu mwabirikira abandu hakũhĩ naye, neryo mwabũga nabo omo mĩsyo ati, Kw'eSatanĩ yangatoka erihiga eSatanĩ yiti kwehĩ? 24Kandi obwami bwamayĩrwanĩa, obwami obo sibwangatoka erihangana. 25Ekĩtũnga ky'abandu kyamayĩrwanĩa, ekĩtũnga ekyo sikyangahangana. 26Kandi eSatanĩ yamayĩrwanĩa, nayo siyangatoka erihangana, nĩkwa yasyahwa. 27Sihali mundu oyo wangatoka eriingira omo nyũmba y'omundu w'amaka n'erĩhũnga ebindu biwe atalyatsũka erimuboha; neryo iniatoka erĩhũnga enyũmba yiwe. 28Kwenene ngababwira nyiti, Abandu basyabuyirwa ebibi byabo byosĩ, n'ebĩtsũmĩ byosĩ bakatsuma. 29Nĩkwa oyukatsuma Omũlĩmũ Abũyĩrĩre, siendisyabuyirwa na kera, nĩkwa iniabiribya oko musango w'ebibi by'erikota. 30Kusangwa babya bakabũga bati, Ali ko kĩrĩmũ kibi. 31Neryo abagala babo Yesũ na nyĩnya wuwe mobahĩka. Mobahangana eyĩhya, mobamutumirako, bakamubirikira. 32Neryo endeko yabya ĩtekĩre hakũhĩ na Yesu, neryo mobamubwira bati, Lebaya, koyo wawe n'abagala benyũ bali eyĩhya banemukusonda-sonda. 33Yesu mwasũbĩryabo ati, Koyo nindi, n'abagala betu ni bahi kwehĩ? 34Neryo mwasamalira abandu abĩkere ababya bamũtĩmbĩreko ati, Lebaya! Hano ho hali koyo wage n'abagala betu! 35Kusangwa omundu oyukakola erisonda lya Nyamuhanga, yo mugala wetu, na mwali wetu, na koyo.

will be added

X\