MARĨKO 2

1Enyũma w'ebindi biro Yesu mwaswahĩka eKapernaũmũ, neryo abandu mobowa engulu yiwe kw'ali omo nyũmba mw'eka. 2Neryo abandu bangi mobahĩndanaho isihakiri mwanya, kutse n'ahakũhĩ n'olũyĩ. Neryo Yesu mwakangĩrĩryabo. 3Neryo abandu bani mobamuletera omundu oyũbasĩre. 4N'omugulu bataluka erĩkolya omundu oyo y'uku Yesu busana n'endeko, mobatobola olutwe lw'endata aho Yesu abya. Neryo babere babitula h'omwanya, mobandagalya h'omundu oyũbasĩre iniane oko ngyingo. 5Neryo Yesu, omugulu alangira erĩkĩrĩrya lyabo, mwabwira omundu oyũbasĩre ati, Mwana wage, ebibi byawe byamabibuyirwa. 6Nĩkwa abandi b'oko bakangĩrĩrya b'Emigambo ababya bĩkereho mobaganĩrya omo mitima yabo bati, 7Ko mundu oyũ akabũga atya busana nakĩ? Akatsuma? nindi wangatoka eribuyira ebibi ate Nyamuhanga ĩyowene kwehĩ? 8Neryo-neryo Yesu ĩnĩanasĩ omo mutima wuwe amalengekanĩa wabo mwabũlyabo ati, Ko busana nakĩ mũkaganĩraya emyatsi eyĩ y'omo mitima yenyũ kwehĩ? 9Kwe kyolo ni kyahi, eribwira omundu oyũbasĩre nyiti, Ebibi byawe byamabibuyirwa, kutse erĩbũga nyiti, Hangana, wĩmaye engyingo yawe, ugende? 10Nĩkwa mutoke eriminya ngoko Mugala w'Omundu awite ehamũlĩ muna-kihugo eribuyira ebibi, neryo mwabwira omundu oyũbasĩre ati, 11Ngakubwira nyiti, Hangana, wĩmaye engyingo yawe ugende eka wenyũ! 12Neryo-neryo omundu oyo mwahangana, mwĩmya engyingo yiwe, mwahuluka omo meso wabo abosĩ. Neryo abosĩ mobasweka kutsibu, mobapipa Nyamuhanga bati, Sitwetwatalangira ekiri ng'ekĩ na kera. 13Neryo Yesu mwasuba oko mũsĩke w'engetsi y'eGalĩlaya. Nĩkwa endeko moyamũhĩkako, naye mwatsũka erĩkangĩrĩryabo. 14Neryo Yesu abere akalaba, mwalangira omũsolesya, ye Lawĩ, mugala wa Alufayo, ĩnĩanĩkere aho bakasoleseraya. Neryo Yesu mwamubwira ati, Unyikwame. Neryo Lawĩ mwahangana, mwamukwama. 15N'enyũma w'aho Yesu mwabya akalira omo nyũmba ya Lawĩ. N'abasolesya bangi n'abakola-nabi babya bakalya haguma na Yesu n'abiga buwe, kusangwa abakamukwama babya bangi. 16N'omugulu abakangĩrĩrya b'Emigambo b'Abafarĩsayo balangira ko Yesu akalya haguma n'abasolesya n'abakola-nabi, mobabũlya abiga buwe bati, Busana nakĩ akalya haguma n'abasolesya n'abakola-nabi kwehĩ? 17Neryo Yesu abere owa, mwasũbĩryabo ati, Abakalĩre sibali n'obwaga bw'omunganga, nĩkwa abalwere basa. Sinasa eribirikira abatunganene, nĩkwa abakola-nabi. 18Neryo abiga ba Yoane Mũbatĩsya n'Abafarĩsayo babya bakatsira akalyo. Neryo abandu mobahĩka uku Yesu, mobamũbũlya bati, Abiga ba Yoane Mũbatĩsya, n'abiga b'Abafarĩsayo bakatsira akalyo, nĩkwa abiga bawe sibetsira kalyo busana nakĩ kwehĩ? 19Neryo Yesu mwasũbĩryabo ati, Kw'abĩra b'ĩba w'omũherũkĩ banganatoka eritsira akalyo omugulu ali nabo kwehĩ? Iyihi. Nĩkwa omugulu ĩba w'omũherũkĩ akine nabo sibetoka eritsira akalyo. 20Nĩkwa ebiro byasyahĩka omugulu ĩba g'omũherũkĩ asyalũsĩbwa kubo; neryo oko mugulu oyo basyatsira akalyo. 21Sihali mundu oyukalandira ekitomeko kihya-kihya oko lukimba lwa kera; amayira atya, ekitomeko kikatahuka oko lukimba lwa kera, ilwatulika kwilaba erĩmbere. 22Kutse sihali mundu oyũkũtũlĩra ebĩnyũ bihya-bihya by'omo bihu bikulu-kulu by'ebĩnyũ. Amayira atya, ebĩnyũ bikatula ebihu, n'ebĩnyũ haguma n'ebihu ibyatsanda. Nĩkwa ebĩnyũ bihya-bihya bĩkahĩrawa omo bihu bihya-bihya by'ebĩnyũ. 23Yesu abere akalaba omo malima w'engano oko kiro ky'eSabato. Abiga buwe babya haguma naye, neryo mobatsũka erĩtwa amakũndĩ w'engano. 24Neryo Abafarĩsayo mobabwira Yesu bati, Lebaya, abiga bawe bakakola ebyo Migambo ĩkaganaya erikola omo Sabato. 25Yesu mwasũbĩryabo ati, Simwetasoma ekyo Dawĩdĩ n'abandu buwe bakola omugulu abya n'obwaga n'erĩkwa enzala kwehĩ? 26Ngoko ingira omo nyũmba ya Nyamuhanga n'erirya oko mandu awahigulawa busana na Nyamuhanga. Emigambo ĩkaganaya abandu erirya kugo, ba n'abahererĩ basa. Nĩkwa Dawĩdĩ mwalyago, kandi mwahago oko bandu buwe nibya. Dawĩdĩ akola atya oko mugulu wa Abĩatarĩ omũhererĩ mukulu oko bahererĩ bosĩ. 27Neryo Yesu mwabũga ati, eSabato yahĩrawa busana n'erĩwatĩkya abandu. Abandu mobatayirwa busana n'eSabato. 28Litya Omugala w'Omundu ni Mukama w'eSabato.

will be added

X\