MARĨKO 16

1Neryo eSabato yabere yabilaba, Marĩa Magdalene, na Marĩa nyĩnya wa Yakobo, na Salome, mobagula Amanũkato ibatoka erĩhakabya omubiri wa Yesu. 2N'omo ngyakya-ngyakya oko kiro ky'erĩtsũka eyenga, mobaya okw'isinda eryuba iryamabihuluka. 3Babya bakabũlanĩa bati, Nindi oyũkandĩkũmbagalya erĩbwe busana netu, eriri oko lũkyo lw'eyisinda kwehĩ? 4Neryo babere basumba ameso, mobalangira erĩbwe ĩryabĩrĩkũmbagalĩbwa, nomo lyanabya lĩnene kutsibu 5Neryo mobingira omw'isinda, mobalangira omũlwana ĩnĩanĩkere oko luhande lw'amali, iniambite ekanzu nyeru-nyeru, neryo mobasweka. 6Omũlwana oyo mwabũga nabo ati, Simusweke! Mukasonda-sonda Yesu w'eNazaretĩ, oyo wabambawa oko musalaba. Abĩrĩlũbũka; siakiri hano! Mũlebaye hano ho bamũhĩra. 7Nĩkwa mugende, mubwire abiga buwe na Petero, muti, Akabatanga eGalĩlaya. Eyo yo mwasyamulolerako, ngoko ababwira. 8Nabo mobahuluka mobatibita bakalũa eyiri eyisinda, kusangwa babya bakatitimana n'erisweka; kandi mobatabwira mundu ekĩnywa kusangwa babya bakubaha. 9Neryo Yesu abere abĩlũbũka, omo ngyakya-ngyakya oko kiro ky'erĩtsũka eyenga, mwatsũka eributukira uku Marĩa Magdalene, oyo ahiga kw'esyombĩnga sirinda. 10Neryo mwayatũlĩrago ababya bakatamba naye, omugulu babya bakalira n'erĩtogongya emĩsonĩa. 11Nabo omugulu bowa kw'aneho, kandi kw'abirilolwako naye, mobagana erĩkĩrĩrya. 12N'enyũma w'aho, Yesu mwabutukira ababiri ba kubo ĩnĩasosĩre gundi mũsĩndo, omugulu babya bakagenda oko lugendo. lwabo ehandi omo kihugo. 13Neryo mobasubula, mobatũlĩrago abandi, nĩkwa mobatĩkĩrĩryabo nibya. 14N'enyũma w'aho Yesu mwabutukira abiga erĩkũmĩ n'omuguma omugulu babya bakalya. Neryo mwahayirabo busana n'erĩtendĩkĩrĩrya lyabo n'erikala ly'emitima yabo, kusangwa ĩsĩbetĩkĩrĩrya abamulolako anabĩlũbũka. 15Neryo Yesu mwabwirabo ati, Muye omo kihugo kyosĩ, mũtũlaganaye Engulu Yowene oko bandu bosĩ. 16Oyũkĩkĩrĩraya kandi iniabiribatĩsĩbwa asyalamĩbwa; nĩkwa oyũtĩkĩrĩraya asyasĩngwa. 17Neryo ababĩrĩkĩrĩrya basyahabwa ebiminyikalo ebĩ: basyahigira esyombĩnga sy'eyĩhya omo lĩna lyage, kandi basyabũga omo mĩbũge mihya-mihya; 18kandi basyatola esyonzoka, kutse basyapũlya obuti obũkĩta, sibyendĩsyĩtabokĩ; basyahĩra ebyala oko bakonĩ, nabo basyalama. 19Neryo Omukama Yesu abere abĩbũga nabo, mwatwalwa elubula, mwĩkala oko byala by'amali bya Nyamuhanga. 20Neryo abiga nabo mobahuluka n'erĩyarũlaganĩa ehosĩ, n'Omukama inianemukola haguma nabo ĩnĩakaberereraya ekĩnywa omo biminyikalo ebyakwamabo.

will be added

X\