MARĨKO 15

1Neryo omo ngyakya-ngyakya, abahererĩ bakulu, n'abakulu, n'abakangĩrĩrya b'Emigambo, n'ab'omw'ĩbũgĩro bosĩ mobahĩndana omo mbĩta. Neryo mobaboha Yesu y'omo mahulula, mobamutwala eyiri Pilato. 2Neryo Pilato mwamũbũlya ati, Uli mwami w'Abayũda kwehĩ? Yesu mwamũsũbĩrya ati, Wamabũgakyo, 3Neryo abahererĩ bakulu mobamũhandĩkĩrĩrya emyatsi mingi. 4Kandi Pilato mwaswamũbũlya ati, Sũlĩsũbĩraya kwehĩ? Lebaya ngoko bakakũhandĩkĩrĩraya emyatsi mingi. 5Nĩkwa Yesu mwataswasũbĩryabo kĩnywa, kyaleka Pilato iniasweka. 6Nĩkwa oko Kiro Kikulu ekyo Pilato abya akaboholera bandu omundu muguma w'omũlĩkĩ oyo banzĩre. 7Neryo omundu oyo wabya akahulwa mo Baraba abya iniabiribohwa haguma n'abandu abaleta obwanĩse. 8N'endeko mobabũlya Pilato bati akole ekyo atula akakolerabo. 9Neryo Pilato mwasũbĩryabo ati, Mũnanzĩre inababoholera Omwami w'Abayũda kwehĩ? 10Kusangwa abya asĩ ngoko abahererĩ bakulu bamuhotera busana n'erimutsura. 11Nĩkwa abahererĩ bakulu mobatsotsererya endeko bati babũlaye Pilato ababoholere ye Baraba, butsira Yesu. 12Neryo Pilato mwaswabwira endeko ati, Ngandikolakĩ n'omundu oyo mukahula mo Mwami w'Abayũda kwehĩ? 13Nabo mobaswabũga kutsibu bati, Abambawe oko musalaba! 14Nĩkwa Pilato mwabũlyabo ati, Amakola kibi kyahi kwehĩ? Nĩkwa mobalabĩrĩrya emirenge yabo bati, Abambawe oko musalaba! 15Neryo Pilato iniakasonda erĩtsemesya endeko mwaboholerabo ye Baraba. Neryo mwahamula ati, Yesu aswĩrĩbawe emikoba, nĩkwa mwahereryabo Yesu ati abambawe oko musalaba. 16Neryo abasĩrĩkanĩ mobatwala Yesu omo muhana w'ekikali ky'omũtabalĩ mukulu, neryo mobabirikira omulondo gosĩ w'abasĩrĩkanĩ. 17Mobambalya Yesu y'olukimba lw'omunyama, kandi mobaluka embĩta y'amahwa, mobahĩrayo oko mutwe wuwe. 18Mobatsũka erĩmũbũkya bati, Ukote, uwe Mwami w'Abayũda! 19Kandi mobamũswĩrya ngendo-ngendo oko mutwe omo luseke, mobamũtwĩra kw'amatande, mobamũkũkamira n'erĩũnama embere siwe. 20Neryo babere babĩmũsekererya mobamwambula ekanzu y'omunyama, mobamwambalya esyongimba siwe. Neryo mobamusondola eriyamubamba oko musalaba. 21Nĩkwa omo nzira mobahamba Sĩmonĩ akalaba, ĩnĩakalũa omolĩ, mobamũhekya omusalaba wa Yesu, oyo abya Sĩmonĩ w'eKũrene, ĩse wa Alesandũro na Rũfũ. 22Neryo mobaleta Yesu y'ahakahulawa mo Golgota, kiti: Aherĩhanga. 23Neryo mobalenga erimuha ebĩnyũ ĩbĩnatũlũngene n'amane-mane, nĩkwa Yesu mwagana erĩpũlyabyo. 24Nĩkwa mobabamba Yesu oko musalaba, kandi mobagaba esyongimba siwe omo katĩkatĩ kabo, ibakakanga obukanga esyongimba nga sibye syandi. 25Nĩkwa omugulũ babamba Yesu yabya saa ĩsatu. 26N'erihandika ly'erimuhandikirira lyabya lĩsakĩre endata oko musalaba liti, OMWAMI W'ABAYŨDA 27Kandi mobabamba abanyeyĩ babiri oko misalaba kuguma na Yesu, omuguma oko luhande lw'amali, n'ogundi oko luhande lw'amalembe. [ 28N'Amasako mwabererera awakabũga ati, Mwaganzwa haguma n'abakola-nabi.] 29Kandi abandu ababya bakalaba mobamutsuma, mobatsingatsingya emitwe yabo bati, Si haho! Wamabya ũkandĩsyahĩmbũla eHekalũ n'erĩswahĩmbayo omo biro bisatu. 30Ũyĩlamaye, ũkĩme oko musalaba! 31Nibya abahererĩ bakulu haguma n'abakangĩrĩrya b'Emigambo mobasekererya Yesũ batya omo katĩkatĩ kabo bati, mwalamya abandi, nĩkwa sialitoka erĩyĩlamya. 32Muleke Kristo, Omwami wa Ĩsraelĩ, akĩme lino alũe oko musalaba, tulangire kandi twĩkĩrĩraye! Kandi ababambawa kuguma naye mobamutsuma. 33Neryo esaa ndatu yabere yahĩka, omwĩrĩmya mwabya oko kihugo kyosĩ erĩhĩka oko saa mwenda. 34Neryo oko saa mwenda Yesu mwayilakira n'omulenge munene ati, Eloĩ, Eloĩ. Lama Sabaktanĩ? kiti, Nyamuhanga wage, Nyamuhanga wage, busana nakĩ ũkanyĩsĩganaya kwehĩ? 35Abandi bandu ababya bimeneho bakahulikirira, mobabũga bati, Lebaya, akabirikira Elĩa! 36Neryo omundu muguma mwatibita mũsũlya embũhũma omo pada, neryo mwah'ĩrayo oko luseke; Neryo mwahayo Yesu erĩpũlyayo ati, Tulinde! Tũlebaye Elĩa ng'akandiasa n'erimuhanula! 37Neryo Yesu mwabirikira n'omulenge munene, neryo mwalekula. 38Neryo olukimba olũkasũkũlĩraya ol'omo Hekalũ molwasatĩbwa mo bihande bibiri erĩtsũka endata erĩhĩka ahisi. 39Neryo omugulu omukulu w'abasĩrĩkanĩ oyo wabya ahangene hakũhĩ na Yesu, alangira ngoko Yesu abirikira n'erihola, mwabũga ati, Kwenene, omundu oyũ alwe Mugala wa Nyamuhanga! 40Abakalĩ babyaho nibya, ĩbakalebaya ibali hali. Marĩa Magdalene abya nabo, na Marĩa nyĩnya wa Yakobo mulere, na Yose, na Salome. 41Babya bakakwama Yesu n'erimukolera omugulu abya eGalĩlaya; kandi habya abandi bakalĩ bangi abahetukira eYerũsalema haguma na Yesu. 42Neryo bwabya ĩgolo-golo omugulu Yosefũ w'eArĩmatea ahĩka. 43Yosefũ abya mundu ũkengenĩe omw'ĩbũgĩro iniakalinda Obwami bwa Nyamuhanga. Ekiro ekyo kyabya kiro Ky'erĩkokotya busana n'eSabato. Neryo Yosefũ mwahanda omutima mwaya eyiri Pilato erĩbũlya omubiri wa Yesũ. 44Neryo Pilato mwasweka erĩowa ko Yesu abirihola. Neryo mwabirikira omukulu w'abasĩrĩkanĩ mwabũlya ati Yesu ng' abirihola. 45Neryo Pilato abere abĩowa ebĩnywa by'omukulu w'abasĩrĩkanĩ oyo, mwaha Yosefũ y'omubiri wa Yesu. 46Neryo Yosefũ mwayagula olukimba lw'ekĩtanĩ, neryo mwalũsya Yesu y'oko musalaba, mwamũlĩngĩra omo lukimba lw'ekĩtanĩ olo, neryo mwamũhĩra omo yisinda eyabatsawa omw'ĩbwe. Neryo mwakũmbagalĩrya erĩbwe rinene oko lũkyo lw'eyisinda. 47Ye Marĩa Magdalene na Marĩa nyĩnya wa Yose, babya bakalebya aho Yesu ahĩrawa.

will be added

X\