MARĨKO 14

1Neryo enyũma w'ebiro bibiri mohabya Ebiro Bikulu by'Erikiruka n'Obundu Bute mo Kĩhamya. Abahererĩ bakulu n'abakangĩrĩrya b'Emigambo mobasonda-sonda enzira y'erihamba Yesu omo menge, n'erĩmwĩta. 2Kusangwa babũga bati, situkolekyo omo kiro kikulu, abandu hakasyatwa eyĩsesĩ. 3Yesu abya eBetanĩa omo nyũmba ya Sĩmonĩ omuhaga; neryo abere anĩkere okw'irya, mohahĩka omũkalĩ iniawite okw'ĩtambya ly'erĩbwe eryoswĩre mw'amagũta w'eNardo awakakumba ndeke aw'obũgũlĩ bunene. Omũkalĩ oyo mũtũla erĩtambya eryo mũtũlĩrago oko mutwe wa Yesu. 4Nĩkwa abandi bandu ababyaho mobahitana, mobakanĩa bati, Busana nakĩ amagũta aya amahera atya busa kwehĩ? 5Kusangwa amagũta awakakumba ndeke aya anganagũlĩbwe oko franka magana asatu, n'esyofranka esyo isyahabwa oko bera, kandi mobahayira omũkalĩ oyo yo kutsibu. 6Nĩkwa Yesu mwabũga ati, Mumuleke, mũkamwendereraya busana nakĩ kwehĩ? Abirinyikolera omũbĩrĩ owene. 7Kusangwa muh n'abera ebiro byosĩ, n'omugulũ mũkanza mukatoka erikolabo ndeke, nĩkwa ĩngye sindi haguma nenyũ biro byosĩ. 8Abirikola ngoko angatokĩre; abĩrĩhakabya amagũta awakakumba ndeke oko mubiri wage busana n'eritago. 9Kwenene ngabũga nenyũ, aho Engulu Yowene yasyatũlaganĩbwa omo kihugo kyosĩ, ekyo mũkalĩ oyũ akabikola kyasyatũlaganĩbwa busana n'erimwibuka. 10Neryo Yũda Ĩskarĩota, omuguma g'okw'ĩkũmĩ n'ababiri, mwaya oko bahererĩ bakulu busana n'erihotera Yesu yo kubo. 11Nabo mobatsema erĩowa ebyo, mobamulaga erimuha esyofranka. Neryo Yũda mwatsũka erisonda-sonda omwanya owene w'erihotera Yesu. 12Neryo oko kiro ky'erĩmbere ky'erirya Obundu Bute mo Kĩhamya, omugulu babya bakasĩnza ehyana hy'embũlĩ hy'Erikiruka, abiga ba Yesu mobamubwira bati, Wanzĩre uti tuye hahi erĩkũkokoterya aho wasyalira erirya ly'Erikiruka kwehĩ? 13Neryo Yesu mwatuma abiga buwe babiri ati, Muye oko mũyĩ, neryo omundu oyũhekĩre erĩrega ly'amagetsi akandĩhĩndana nenyũ, mumukwame. 14Neryo asyingira omo nyũmba. Neryo mubwire omwenye nyũmba muti, Omũkangĩrĩrya ati, Ekyumba kyage ky'abagenĩ kiri hahi aho nasyalira erirya ly'Erikiruka haguma n'abiga bage kwehĩ? 15Naye akandĩbakangya ekyumba kinene ekiri endata ekĩtegekanĩbwe, ekyabĩrĩkokotĩbwa, eyo mũtũkokoteraye. 16Neryo abiga abo mobahongoka mobaya oko mũyĩ oyo, mobeya iko bine ngoko Yesu abwirabo, neryo mobakokotya erirya ly'Erikiruka. 17Neryo bwabere bwabya ĩgolo-golo, Yesu mwasa haguma n'abiga ĩkũmĩ n'ababiri. 18Neryo babere bane oko mesa bakalya, Yesu mwabwirabo ati, Kwenene ngababwira nyiti, Omuguma w'ũkwĩnywe akandinyihotera, oyukalya haguma nage. 19Abiga mobatsũka erĩkwa obũlĩge n'erĩmũbũlya muguma muguma bati, Ĩkwa nĩ ĩngye kwehĩ? n'ogundi ati, Nĩ ĩngye kwehĩ? 20Neryo Yesu mwabwirabo ati, Ni muguma g'okw'ĩkũmĩ n'ababiri oyũkakoleraya haguma nage omo kibindi. 21Omugala w'Omundu asyahola ngoko kĩsakĩre busana naye; nĩkwa obũlĩge oko mundu oyukasyahotera Omugala w'Omundu! Kumbe ryowene busana n'omundu oyo nga siabutawa. 22N'omugulu babya bakalya, Yesu mwĩmya obundu, neryo mwatsumulabo, mwatsũtsangabo, neryo mwahabobo, ati, Mwĩmayebo, oyũ ni mubiri wage. 23Neryo mwĩmya olũtehĩ, neryo abere abiha ewasĩngya mwahalo oko biga buwe, n'abosĩ mobapũlya kulo. 24Neryo Yesu mwabwirabo ati, Oyũ ni musasi wage w'endagane owakũtawa busana n'abandu bangi. 25Kwenene ngabũga nenyũ nyiti, Sindiendisyaswapũlya oko bĩgũma by'ebĩnyũ erĩhĩka ekiro nasyapũlya ebihya-bihya omo Bwami bwa Nyamuhanga. 26Neryo babere babiimba olwimbo, mobaya oko kitwa ky'eMĩzeĩtũnĩ. 27Nĩkwa Yesu mwabwirabo ati, Ĩnywe bosĩ mwasyanyitswako, kusangwa kyabirisakwa kiti, Nasyaswĩrya Omũlĩsya n'esyombũlĩ syasyapanzikana. 28Nĩkwa enyũma w'erĩlũbũka lyage, nasyabatanga eriya eGalĩlaya. 29Petero mwamũsũbĩrya ati, Nomo abosĩ bangakutswako, ĩngye iyihi. 30Yesu mwamubwira ati, Kwenene ngakubwira nyiti, Oko kiro ekĩ engoko-lume ite yabika kabiri, ukandinyigana ngendo ĩsatu. 31Nĩkwa Petero mwayitsinga kutsibu ati, Kyamabya kitolere ngahola haguma nawe, sindiendikugana. N'abandi bosĩ mobabũga batya. 32Neryo mobahĩka ahakahulawa mo Getesemane, na Yesu mwabwira abiga buwe ati, Mwĩkale hano omugulu ngasaba. 33Neryo mwatwala Petero, na Yakobo na Yoane, neryo mwatsũka eriagalwa n'erĩhahũkya omutima. 34Neryo mwabwirabo ati, Omutima wage ali n'obũlĩge bunene, bukasonda erĩnyĩta; mũsĩgale hano, mũtegaye. 35Neryo mwasegera emuliro yo hake, mwawa oko kitaka, mwasaba ati, kyamatokekana akatambĩ ako kamulabeko. 36Neryo mwasaba ati, Tata! Tata! Emyatsi yosĩ ikatokekana uk'uwe. Ũnyĩlũsaye kw'olũtehĩ olũ. Nĩkwa butsira ekyo nyanzĩre, nĩkwa ekyo wanzĩre. 37Neryo mwasa mweya abiga basatu abo ibanagotsere, neryo mwabũga na Petero ati, Sĩmonĩ. wayĩreto kwehĩ? Sulitatoka erĩteya esaa nguma kwehĩ? 38Neryo mwabwirabo ati, Mũtegaye, musabe, isimwingira omw'irengwako. Omutima anzĩre, nĩkwa omubiri ni molo. 39Neryo mwalũaho kandi mwasaba, mwasuba omo bĩnywa ebyo. 40Kandi mwasa mweyabo ibaneto, kusangwa ameso wabo ĩnĩasĩkerere. Nabo mobabula nga bangamũsũbĩryakĩ. 41Kandi mwasa engendo y'akasatu, neryo mwabũlyabo ati, Mukinagotsere n'eriluhuka kwehĩ? Bingaho. Endambĩ yamahĩka. Lebaya! Omugala w'Omundu akahoterawa omo byala by'abakola-nabi. 42Muhangane, tugende, Mũlebaye! Omũhoterĩ wage amahĩka! 43Neryo omugulu Yesu abya akĩnabũga, Yũda, omuguma g'okw'ĩkũmĩ n'ababiri mwahĩka. N'endeko eyĩhekĩre emĩyalĩ n'esyongonĩ yabya haguma naye, ibakatumawa n'abahererĩ bakulu, n'abakangĩrĩrya b'Emigambo, n'abakulu. 44Nĩkwa omũhoterĩ oyo iniabiriha abandu abo ekiminyikalo ati, Omundu oyo nasyalyatsirira iyo mundu oyo; mumuhambe, mumutwale n'erĩmũteya kutsibu. 45Neryo Yũda abere ahĩka, mwaya hakũhĩ na Yesu ati, Mũkangĩrĩrya! Neryo mwamulyatsirira. 46Neryo mobahamba Yesu, mobamuwatako kutsibu. 47Nĩkwa omuguma oko babya bahangeneho mwakula omũyalĩ wuwe, mwabanda omukobe w'Omũhererĩ Mukulu mwatwa okũtũ kuwe. 48Neryo Yesu mwasũbĩryabo ati, Mwabĩrĩhĩka n'emĩyalĩ n'esyongonĩ muti mukanyihamba ng'omũrahĩ kwehĩ? 49Obuli kiro nabya haguma nenyũ omo Hekalũ ngakangĩrĩrya, momutanyihamba; nĩkwa Amasako atolere eribererera. 50Neryo abiga mobamutswako, mobatibita abosĩ. 51Neryo habya omũlwana muguma oyo wabya akakwama Yesu, iniambite olukimba lw'omusohe lusa, neryo mobalenga erimuhamba. 52Nĩkwa mwasĩganĩa olukimba luwe l'omusohe, mwatibita ndũmbũ. 53Neryo mobatwala Yesu y'omo nyũmba y'Omũhererĩ Mukulu oko bahererĩ bosĩ. N'abahererĩ bakulu bosĩ, n'abakulu, n'abakangĩrĩrya b'Emigambo mobahĩndanaho. 54Nĩkwa Petero mwamukwama inianayikengeherere, neryo mwahĩka omo muhana w'enyũmba y'Omũhererĩ Mukulu oko bahererĩ bosĩ. Neryo mwĩkala haguma n'abateya, iniakota oko muliro. 55Nĩkwa abahererĩ bakulu n'ab'omw'ĩbũgĩro bosĩ mobasonda-sonda omwatsi w'erĩhandĩkĩrĩrya Yesu n'amabehĩ ibatoka erĩmwĩta, nĩkwa mobatabanago. 56Kusangwa abandu bangi mobamũhandĩkĩrĩrya omo mabehĩ, nĩkwa erĩtũlago lyabo molĩtahĩkana. 57Neryo abandi bandu mobahangana mobahandĩkĩrĩrya Yesu omo mabehĩ bati, 58Motũkowa akabũga ati, Nasyasambula eHekalũ eyo abandu bahĩmba, kandi enyũma w'ebiro bisatu nasyahĩmba eyindi Hekalũ eyitehĩmbawa n'abandu 59Kutse omo mwatsi oyũ nibya erĩtũlago lyabo molĩtahĩkana. 60Neryo Omũhererĩ Mukulu oko bahererĩ bosĩ mwahangana omo katĩkatĩ kabo, neryo mwabũlya Yesu ati, Sũlĩsũbĩraya kwehĩ? Ni byahi ebyo bandu aba bakakũhandĩkĩrĩraya kwehĩ? 61Nĩkwa Yesu mwabya bũkũtũ mwatamũsũbĩrya. Kandi Omũhererĩ Mukulu oko bahererĩ bosĩ mwamũbũlya ati, Uli Kristo, Omugala wa Nyamuhanga w'omũyĩsa kwehĩ? 62Neryo Yesu mwabũga ati, Indi ye, kandi mwasyalangira Omugala w'Omundu ĩnĩanĩkere oko byala by'amali by'Obũtokĩ, iniakasa n'ebĩtũ by'omo kyanya. 63Neryo Omũhererĩ Mukulu oko bahererĩ bosĩ mwatulanga ekanzu yiwe ati, Tukine n'obwaga bw'abalangĩrĩ kwehĩ? 64Mwabĩrĩowa eritsuma liwe, mũtĩkĩ kwehĩ? Neryo abosĩ mobamutswera bati atolere oluholo! 65Neryo abandi mobatsũka erĩtwĩra uku Yesu kw'amatande, mobaswika obũsũ buwe, n'erĩmũswĩrya ebĩkũndĩ, ibakamubwira bati, Minyerera oyo wamakũswĩrya! N'abateya mobamuhamba mobamũswĩrya esyongũmbe. 66Nĩkwa Petero mwabya eyĩkwa omo muhana, neryo omuguma w'oko bana-bato abagombe b'Omũhererĩ Mukulu oko bahererĩ bosĩ, mwahĩkaho. 67Neryo omwana-muto oyo mwalangira Petero iniakota oko muliro, neryo mwamutungerera ati, Nawe nibya wabya haguma na Yesu Omunya Nazaretĩ, 68Nĩkwa Petero mwagana ati, Sĩnyasĩ, kutse sinditaminya ekyo ũkabũga, neryo mwaya eyĩhya omo bũsekũ bw'enyũmba. Neryo engoko-lume moyabika. 69Neryo omwana-muto oyo mwamulangirayo, neryo mwaswabwira ababya bahangeneho ati, Oyũ ni muguma wa kubo. 70Nĩkwa kandi Petero mwaswagana. N'enyũma w'akatambĩ kake ababya bahangeneho mobaswabwira Petero bati, Kwenene-kwenene uli muguma wa kubo, kusangwa uli Mũgalĩlaya nibya. 71Nĩkwa Petero mwatsũka eritsuma n'erĩlahĩrya ati, Sĩnyasĩ omundu oyo mukahula. 72Neryo-neryo engoko-lume moyabika engendo y'akabiri. Neryo Petero mwibuka ngoko Yesu amubwira ati, Engoko-lume ite yabika kabiri, wasyanyigana esyongendo ĩsatu. Neryo mwatsũka eririra kutsibu.

will be added

X\