MARĨKO 13

1Neryo omugulu Yesu abya akalũa omo Hekalũ, omuguma g'oko biga buwe mwabũga ati, Mũkangĩrĩrya, lebaya! Amabwe angaha n'amanyũmba angaha w'eriswekera. 2Neryo Yesu mwamũsũbĩrya ati, Wanamalangira amanyũmba manene aya kwehĩ? Sihendisyasĩgala erĩbwe n'eriguma endata oko lindi, eritendisyasambulirwa ahisi. 3Yesu abya ĩkere oko kitwa ky'eMĩzeĩtũnĩ ahisirya oko Hekalũ. Neryo Petero, na Yakobo, na Yoane, na Anderea, mobamũhĩkako bakamũbũlĩrya ahate bandu, bati, 4Utubwĩre emyatsi eyĩ nga yasyabererera mugulu wahi, kandi utubwire ekiminyikalo nga ni kyahi ekikandisyabya omugulu emyatsi yosĩ eyĩ ikandisyabererera. 5Neryo Yesu mwabwirabo ati, Mũtegaye, sihabye mundu ũkabatalaya. 6Abandu bangi basyasa omo lĩna lyage bati, Ĩngye indi ye! bakandĩsyatalya bandu bangi. 7N'omugulu mũkowa engulu y'amalwa n'olombĩ lw'amalwa simubahe; emyatsi eyĩ itolere ĩyahĩka; nĩkwa endũlĩ isiriyaberwa. 8Kusangwa ekihanda kyasyalwa n'ekindi kihanda, n'obwami bugũma bwasyalwa n'obundi bwami. Hasyabya emĩsĩkĩ ehandi n'ehandi, kandi hasyabya esyonzala. Emyatsi eyĩ iri ng'erĩtsũka ly'erikunda ly'omũkalĩ. 9Nĩkwa mũyĩtegaye ! Kusangwa abandu basyabahotera omw'ĩbũgĩro. Mwasyahũnzĩrwa omo manyũmba w'erĩhĩndanamo, mwasyahangana embere w'abatabalĩ bakulu n'abami busana nage, busana n'erĩtũlĩrabo omwatsi wage. 10Engulu Yowene itolere ĩyatũlaganĩbwa oko bihanda byosĩ. 11N'omugulu bakabahamba n'eribatwala eribahotera, sĩmũhahũkaye emitima erĩmbere ngamwasyabũgakĩ, nĩkwa mũbũge ebyo mwasyahabwa oko ndambĩ eyo. Kusangwa ĩnywe mutendisyabũga, nĩkwa Omũlĩmũ Abũyĩrĩre asyabaha ebĩnywa by'erĩbũga. 12Abandu basyahotera abagala babo bĩtawe, n'ĩse w'omwana asyahotera omwana wuwe, n'abana basyalwa n'ababũtĩ babo ĩbĩtĩsyabo. 13N'abandu bosĩ basyabakwa obusu busana n'erĩna lyage. Nĩkwa oyo wasyayĩyĩnĩa erĩhĩka oko ndũlĩ yo wasyalamĩbwa. 14Nĩkwa omugulu mwasyalangira ekitsibu ikihangene oko kitatolere, Oyukasoma aminye ndeke. Neryo abali eYũdea basagire oko bitwa. 15Omundu oyuli endata oko nyũmba sĩakĩme, kutse eriingiramo ati akaheka kindu ekiri omo nyũmba yiwe. 16N'omundu oyuli omw'irima siasubire olukimba luwe omo nyũmba yiwe. 17Nĩkwa obũlĩge oko bakule n'oko bakalĩ abakaha abana babo b'amabere, oko biro ebyo. 18Nĩkwa musabe Nyamuhanga, omwatsi oyũ sĩahĩke oko mugulu w'eritsukũ ! 19Kusangwa obũlĩge bw'ebiro ebyo bwasyabya ĩbũkalĩre isibwebwatabya erĩtsũka ekiro Nyamuhanga ahangika ekihugo, erĩswahĩka na lino, kandi sibwendisyaswabya butya na kera. 20Nĩkwa Omukama abirikũhĩhya ebiro ebyo; kumbe atalikola atya erĩkũhĩhya ebiro ebyo nga sihali mundu wangalamĩbwa Nĩkwa abĩrĩkũhĩhyabyo busana n'abayisogawa buwe. 21Neryo omundu amababwira ati, Lebaya, hano ho Kristo ali; kutse ati, Langira, yolya halya! Sĩmũlĩge! 22Kusangwa Abokristo b'amabehĩ n'abamĩnyererĩ b'amabehĩ basyahuluka. Basyakangya ebĩmĩnyĩsyo n'eby'eriswekera busana n'erĩtalya abayisogawa ba Nyamuhanga, kyamatokekana. 23Nĩkwa mũtegaye! Mũlebaye, nabiribabwira emyatsi yosĩ erĩmbere. 24Nĩkwa oko biro ebyo; enyũma w'omugulu w'obuligo oyo, eryuba lyasyabya mwĩrĩmya, n'omukera siendisyaswakola, 25n'esyongũnũnũ syasyatogonga erĩlũa elubula, n'eby'obũtokĩ obuli omo kyanya bwasyatenga-tenganĩbwa. 26Neryo basyalangira Omugala w'Omundu akasa omo bĩrũ, n'obũtokĩ bunene, n'olukengerwa. 27Neryo asyatuma abamalaĩka erĩhĩndanĩa abayisogawa ba Nyamuhanga erĩlũa oko mahunga ani, erĩlũa oko syondũlĩ sy'ekihugo n'erĩnĩka oko syondũlĩ sy'ekyanya. 28Lino wige omũsyo w'omuti w'omũtĩnĩ. Omugulu akatohaya emitahi yago, ikabya myolo-myolo, neryo ĩkalasaya ebikoma byago, ukaminya ngoko omugulu w'omwisi ali hakũhĩ. 29Lirya nenyũ nibya, omugulu mukalangira emyatsi eyĩ ĩkahĩka, muminye omugulu kw'ali hakũhĩ, oko lũkyo. 30Kwenene ngabũga nenyũ, olulengo olũ silwendisyahwaho emyatsi eyĩ ite yabererera. 31Ekyanya n'ekihugo byasyahwaho, nĩkwa ebĩnywa byage sibyendisyahwaho. 32Nĩkwa sihali mundu oyo wasĩ erĩhĩka ly'ekiro ekyo kutse endambĩ eyo-- nomo bangabya bamalaĩka omo lubula, kutse Omugala, nina Tata yũnasĩ ĩyowene. 33Mũtegaye, mũlebaye, kusangwa sĩmwasĩ omugulu oyo nga ni wahi. 34Ali ng'omundu oyuli oko lugendo lw'ekindi kihugo omugulu akalũa eka, akasĩgĩra abagombe buwe obuli mundu omũbĩrĩ wuwe, akategeka omũteya w'olũyĩ ategaye, 35Neryo mũtegaye, kusangwa sĩmwasĩ omugulu omukama w'enyũmba asyasa---kutse omw'ĩgolo-golo, kutse omo katĩ-kanene kutse engoko yahasabo, kutse bwasesukala. 36Akasyababũlĩkĩranĩa, akeya imuneto. 37N'ebyo ngabũga nenyũ; ngabũga n'abosĩ nyiti, Mũtegaye!

will be added

X\