MARĨKO 12

1Neryo Yesu mwatsũka erĩbũga nabo omo mĩsyo ati, Habya omundu oyo wahera eririma ly'ebĩnyũ, mwatĩmbya kulyo kw'ekĩyĩte, neryo mwatakula endindo ey'erikamiramo ebĩnyũ, kandi mwahĩmbaho enyũmba eyĩsũngũlĩkĩre. Neryo mwasĩgĩralyo abalĩmĩ, neryo mwaya omo kindi kihugo. 2Omugulu w'eriera ly'ebĩnyũ abere ahĩka, mwatuma omugombe oko balĩmĩ abo erienda oko bĩgũma by'eririma ly'ebĩnyũ. 3Nĩkwa abalĩmĩ abo mobahamba omugombe oyo mobamũswĩrya n'erĩmũsũbũlya byala bisa. 4Neryo omwenye eririma mwaswatuma ogundi mugombe; abalĩmĩ abo mobamũhũtalya oko mutwe, n'erimuhemula. 5Kandi omwenyeryo mwaswatuma ogundi mugombe, neryo mobamwĩta; kandi mobakola bandi bagombe bo batya, erĩswĩrya abandi n'erĩĩta abandi. 6Omwenye eririma oyo abya isiakiri n'ogundi mundu w'eriswatuma, yo n'omugala mwanze. Neryo mwasala atuma omugala wuwe oyo oko balĩmĩ abo. Mwabũga ati, Basyasĩkya mugala wage. 7Nĩkwa abalĩmĩ abo mobabwirana bati, Oyũ ni mugala w'omwenye eririma. Mwase, tũmwĩte, n'eririma lyasyabya lyetu! 8Neryo mobahamba mugala mobamwĩta, n'erimukurira eyĩhya w'eririma ly'ebĩnyũ. 9Yesu mwabũlya ati, Omwenye eririma ly'ebĩnyũ asyayira ati kwehĩ? Asyasa n'erĩherya abalĩmĩ abo, asyaha eririma eryo ly'ebĩnyũ ly'oko bandi balĩmĩ. 10Simwetasoma Amasako aya ati, Erĩbwe eryo abahĩmbĩ bagana, Erĩ molyabya ĩbwe ly'esondo; 11Omwatsi oyũ Omukama mwakolago, Ni w'eriswekera omo meso wetu. 12Abasondolĩ b'Abayũda mobasonda-sonda erihamba Yesu, kusangwa mobaminya kw'akatwa omũsyo oyo busana nabo. Nĩkwa mobubaha endeko, neryo mobamũsĩgaho mobagenda. 13Abandi b'oko Bafarĩsayo n'Abanyaherode mobatumwa eritega Yesu omo bĩnywa. 14Neryo mobasa eyiri Yesu mobamũbũlya bati, Mũkangĩrĩrya, tũnasĩ k'uli w'ekwenene, sulitsomana amalengekanĩa w'abandu, kandi sulisombola ebitaga n'ebite bitaga, nĩkwa ũkakangĩrĩraya enzira ya Nyamuhanga omo kwenene. Emigambo ĩkatũlĩgĩra erisolera Kaĩsarĩ kutse iyihi kwehĩ? Tumulihe kutse iyihi kwehĩ? 15Nĩkwa Yesu mwaminya amatebo wabo, neryo mwabwirabo ati, Busana nakĩ mukanyirengako kwehĩ? Munyiretere edĩnarĩ nyĩrebayeyo. 16Neryo mobamuleterayo, naye mwabũlyabo ati, Ekĩsosekanĩo n'amasako aya ni byandi kwehĩ? Nabo mobamũsũbĩrya bati, Ni bya Kaĩsarĩ. 17Neryo Yesu mwabwirabo ati, Mulihe Kaĩsarĩ ebindu bya Kaĩsarĩ, mulihe na Nyamuhanga ebindu bya Nyamuhanga. Nabo mobamuswekera kutsibu. 18Neryo Abasadũkayo mobahĩka uku Yesu. Aba bakabũga bati, Sihali erĩlũbũka oko baholĩ. 19Mobamũbũlya bati, Mũkangĩrĩrya, Musa mwatusakira ati, Omugala wabo mundu amahola akasiga omũkalĩ, atawite mwana, omugala wabo mundu oyo ĩnĩasĩgalya omũkalĩ oyo iniabutira mugala wabo y'abana. 20Mohabya bagala babo balinda; ow'erĩmbere mwahĩkya, neryo mwahola isialitabuta mwana. 21Neryo omugala wabo mundu oyo mwasĩgalya omũkalĩ oyo. Neryo mugala wabo w'akasatu mwakola atya. 22Neryo abagala babo bosĩ balinda mobahola batya isibalitabuta mwana. Neryo enyũma w'abosĩ omũkalĩ oyo mwahola. 23Neryo, oko kiro ky'erĩlũbũka omugulu abaholĩ basyalũbũka, omũkalĩ oyo asyabya wandi kwehĩ? Kusangwa abalinda bosĩ babya ĩbabĩrĩmwĩmya. 24Yesu mwasũbĩryabo ati, Simukatala kusangwa sĩmwasĩ Amasako kutse obũtokĩ bwa Nyamuhanga. 25Kusangwa omugulu bakalũbũka oko baholĩ, sĩbehĩkaya kutse sĩbehĩkĩbawa, nĩkwa bali ng'abamalaĩka omo lubula. 26Nĩkwa oko mwatsi w'erĩlũbũka ly'abaholĩ, simwetasoma omo kitabu kya Musa oko mulondo owakahula ekisaka ekyaka kwehĩ? Ngoko Nyamuhanga abũga na Musa, ati, Ĩngye indi Nyamuhanga wa Abrahamũ, na Nyamuhanga wa Ĩsaka, na Nyamuhanga wa Yakobo. 27Nyamuhanga si Nyamuhanga w'abaholĩre, nĩkwa ni Nyamuhanga w'abaliho. Mwabiritala kutsibu! 28Omũkangĩrĩrya muguma w'Emigambo abyaho iniakahulikirira erĩkanĩa lyabo. Neryo omũkangĩrĩrya w'Emigambo oyo mwaminya ngoko Yesu abĩrĩsũbĩryabo ndeke, neryo mwabũlya Yesu ati, Ekihano ekĩlabĩre ebindi bihano ni kyahi kwehĩ? 29Yesu mwamũsũbĩrya ati, Ekihano kikulu kyekĩ: Uwe Ĩsraelĩ, hulikirira; Omukama Nyamuhanga wetu ni Mukama ĩyowene. 30Wanze Omukama Nyamuhanga wawe n'omutima wawe gosĩ, n'ekĩrĩmũ kyawe kyosĩ, n'obũlengekanĩa bwawe bosĩ, n'amaka wawe gosĩ. 31Ekihano ky'akabiri kiti, Wanze mũlĩkyenyũ ngoko ũyanzĩre. Sihali kindi kihano kikulu ũkw'ebĩ. 32Neryo omũkangĩrĩrya w'Emigambo oyo mwabwira Yesu ati, Mũkangĩrĩrya, utya! Wamabũga kwenene uti, Omukama ni Nyamuhanga ĩyowene kandi ko hate gundi nyamuhanga nina ye. 33N'erianza Nyamuhanga n'omutima gosĩ, n'obũlengekanĩa bosĩ, n'amaka gosĩ, n'erianza mũlĩkyabo ngoko ayanzĩre, bĩlabĩre amahere gosĩ w'erĩokererya, n'esyohongo syosĩ. 34Neryo omugulu Yesu aminya kw'asũbĩraya ndeke mwamubwira ati, Suli hali oko Bwami bwa Nyamuhanga. Enyũma w'aho mohatasyabya mundu oyo wangalenga erĩswabũlya Yesu eyindi myatsi. 35Omugulu abya akakangĩrĩrya omo Hekalũ, Yesu mwabũlya ati, Abakangĩrĩrya b'Emigambo bakabũga bati, Kristo ni mugala wa Dawĩdĩ ati kwehĩ? 36Omũlĩmũ Abũyĩrĩre asondola Dawĩdĩ abũge ati, Omukama mwabwira Omukama wage ati, Wĩkale oko byala byage by'amali, Erĩhĩka aho nasyahĩrĩra esyonzĩgũ syawe eyĩkwa oko bisando byawe. 37Dawĩdĩ mwamwahula mo Mukama: neryo Kristo angatoka eribya mugala wa Dawĩdĩ ati kwehĩ? Endeko nene eyo moyatsema erĩowa Yesu. 38Neryo omugulu abya akakangĩrĩryabo mwabũga ati, Mũyĩtegaye busana n'abakangĩrĩrya b'Emigambo abakanza erirendera ibanambite esyokanzu syabo nyiri-nyiri, ĩbanzĩre erĩkerĩbwa omo hitale; 39ibakayisoga ebĩtũmbĩ by'embere omo manyũmba w'erĩhĩndanamo, n'ah'erĩsĩkĩbwa okw'irya. 40Bo bakanũbaya abakwakalĩ n'erinyega amanyũmba wabo, neryo busana n'erilolwako n'abandu bakasaba erisaba liri-liri. Aba basyasũyĩrwa kutsibu kw'aho. 41Yesu mwĩkala hakũhĩ n'ekĩbo ky'eribika esyofranka omo Hekalũ, neryo mwabya akalebya ngoko endeko yabya ĩkahĩra esyofranka syabo omo kĩbo ekyo. Kandi abandu b'ebindu bingi mobahĩramo esyofranka nyingi. 42Neryo omũkwakalĩ mwera mwahĩka kukyo mwahĩra esyosentĩ ĩbĩrĩ, ini sengĩ nguma. 43Neryo Yesu mwabirikira abiga buwe haguma, mwabwirabo ati, Kwenene ngababwira nyiti, Omũkwakalĩ oyũ amahĩra omo kĩbo mo bingi kwilaba abandi bosĩ. 44Kusangwa abandi bosĩ mobakahĩramo busana n'ebindu byabo bingi, nĩkwa iye omo bwera buwe mwakahĩramo ebyosĩ awite, mwakaha ebyosĩ alwe awite ebyo angalĩre.

will be added

X\