MARĨKO 11

1Neryo babere bakasonda erĩhĩka eYerũsalema, oko mĩyĩ y'eBetefage n'eBetanĩa mobahĩka oko kitwa ky'eMĩzeĩtũnĩ. Neryo Yesu mwatuma abiga buwe babiri embere, 2ati, Muye oko kayĩ akali embere kwĩnywe. Mwamabĩhĩkayo mũkandĩeya ekyana ky'epunda ĩkĩnahangĩre ekitekyataheka mundu okw'ĩtsũka na kera. Mukihangule, mukirete eno. 3Omundu amabũga nenyũ ati, Mukakola mutya busana nakĩ, mumubwire muti, Omukama yuli n'obwaga bwakyo, n'omwenyekyo asyakituma eno yo lũba. 4Neryo mobagenda mobeya ekyana ky'epunda omo nzira ĩkĩhangĩre oko lũkyo lw'enyũmba. Neryo mobahangulakyo. 5Neryo ababya bimene hakũhĩ mobabũlya abiga abo bati, Mukahangulira ekyana ky'epunda ekyo kyokĩ? 6Abiga abo mobasũbĩryabo ngoko Yesu anabwirabo, neryo abandu abo mobahamulabo bati bagende. 7Neryo mobaleta ekyana ky'epunda uku Yesu, neryo mobĩkĩrya kukyo kw'esyongimba syabo, na Yesu mwĩkala kukyo. 8Neryo abandu bangi mobasanza esyongimba syabo omo nzira, n'abandi mobatwa ebisanza omolĩ neryo mobasanzabyo omo nzira. 9Neryo abandu ababya embere n'abakwamĩrebo enyũma, mobatsũka eribirikira bati, Nyamuhanga apipawe! Nyamuhanga atsumule oyukasa omo lĩna ly'Omukama! 10Nyamuhanga atsumule obwami bwa tata wetu Dawĩdĩ obukasa! Nyamuhanga W'endata Kutsibu apipawe. 11Neryo Yesu mwingira omo mũyĩ w'eYerũsalema, mwingira n'omo Hekalũ mwatungerera ebyosĩ byabyamo. Nĩkwa bwabere bwasonda erihumbera, mwaya eBetanĩa haguma n'abiga ĩkũmi n'ababiri. 12N'engyakya, omugulu balũa eBetanĩa, Yesu mwakwa enzala. 13Neryo mwalangira omuti w'omũtĩnĩ iniane hali, omuti oyo abya ahũtĩre kutsibu. Neryo mwayasonda-sonda ebĩgũma byo kugo; nĩkwa abere ahĩka kugo, mwabana ebikoma bisa, kusangwa sikyabya kirimo ky'emĩtĩnĩ. 14Yesu mwabwira omuti w'omũtĩnĩ oyo ati, Sihabye omundu wasyalya ebĩgũma uk'uwe na kera. N'abiga buwe mobowa. 15Omugulu bahĩka eYerũsalema, Yesu mwingira omo Hekalũ neryo mwatsũka erihigira eyĩhya abosĩ ababya bakagula n'erĩgũlĩrya omo Hekalũ. Mwaku bula ehimesa hy'abakahĩnganaya esyofranka n'ebĩtũmbi by'abagũlaya ehĩrĩkũkũ, 16kandi mwatalĩga omundu akaheka kindu akalaba omo Hekalũ. 17Neryo mwakangĩrĩrya bandu ati, Sĩkĩsakĩre kiti, Enyũmba yage yasyahulwa mo nyũmba y'erisabiramo busana n'ebihanda byosĩ kwehĩ? Nĩkwa ĩnywe mwabiriyirayo mo bwĩkalo bw'abanyeyĩ. 18Abahererĩ bakulu n'abakangĩrĩrya b'Emigambo mobowa ebyo, neryo mobatsũka erisonda-sonda enzira y'erĩĩta Yesu. Nĩkwa mobamubaha kusangwa endeko yosĩ mobasweka busana n'erĩkangĩrĩrya liwe. 19Neryo bwabere bwasonda erihumbera, Yesu n'abiga buwe mobalũa omo mũyĩ. 20N'omo ngyakya-ngyakya omugulu babya bakalaba omo nzira, mobalangira omuti w'omũtĩnĩ. Omuti oyo iniabiriuma erĩtsũka oko mĩrĩhĩ. 21Neryo Petero mwibuka omwatsi w'omũtĩnĩ, neryo mwabwira Yesu ati, Mũkangĩrĩrya, lebaya, omuti w'omũtĩnĩ ogo watakira, abiriuma! 22Yesu mwasũbĩryabo ati, Mubye n'erĩkĩrĩrya uku Nyamuhanga. 23Kwenene ngabũga nenyũ nyiti, Oyũkabũga n'ekitwa ekĩ ati, Ukulike, ugusawe omo ngetsi, isialitika-tika omo mutima wuwe, nĩkwa akĩkĩrĩraya ekyo akabũga ko kikandisyabererera, kyasyakoleka busana naye. 24Kikaleka inababwira nyiti, Ebyosĩ ebyo mukasaba n'erĩbũlya, mwĩkĩrĩraye ko mwabiribanabyo, nenyũ mwasyahabwabyo. 25N'omugulu muka-hangana mukasaba, mwamabya n'omwatsi oko mundu mumubuyire. Tata wenyũ oyuli elubula, atoke eribabuyira amalolo wenyũ. 26Nĩkwa mwamatindabuyira abandi, Tata wenyũ oyuli elubula, siendisyababuyira amalolo wenyũ.] 27Neryo mobaswahĩka eYerũsalema. Omugulu Yesu abya akalendera omo Hekalũ, abahererĩ bakulu n'abakangĩrĩrya b'Emigambo, n'abakulu mobamũhĩkako, 28mobamũbũlya bati, Ukakola emyatsi eyĩ omo hamũlĩ yahi kwehĩ? Kutse nindi yo wakuha ehamũlĩ erikola emyatsi eyĩ kwehĩ? 29Yesu mwasũbĩryabo ati, Ngandĩbabũlya omwatsi muguma, nenyũ mũnyĩsũbĩraye, nage ngandibabwira nga nĩ hamũlĩ yahi ikaleka inakola emyatsi eyĩ. 30Erĩbatĩsya lya Yoane lyalũa ewa Nyamuhanga kutse oko bandu kwehĩ? Mũnyĩsũbĩraye. 31Nabo mobatsũka erĩkanĩrya omo katĩkatĩ kabo bati, Twamabũga tuti, Lyalũa elubula, asyabũga ati, Busana nakĩ momũtĩkĩrĩrya Yoane kwehĩ? 32Nĩkwa twamabũga tuti, Lyalũa oko bandu, mobubaha endeko, kusangwa abosĩ mobaganza Yoane bati nĩ mũmĩnyererĩ. 33Neryo mobasũbĩrya Yesu bati, Sĩtwasĩ. Neryo Yesu mwabũga nabo ati, Nage sindiendibabwira nga ni hamũlĩ yahi ikaleka inakola emyatsi eyĩ.

will be added

X\