MARĨKO 10

1Neryo Yesu mwalũa aho, mwaya omo kihugo ky'eYũdea, neryo mwasoka olũsĩ lw'eYorodanĩ. Kandi esyondeko mosyahĩndana haguma na Yesu, naye mwakangĩrĩrya ngoko anatula akakola. 2Abafarĩsayo mobamũhĩkako, ibakalenga erimutega. Bati, Emigambo ĩkalĩga omundu erihiga mũkalĩ wuwe kwehĩ? 3Yesu mwasũbĩryabo ati, Musa mwabahana ati kwehĩ? 4Mobamũsũbĩrya bati, Musa mwalĩgĩra omundu erisakira omũkalĩ y'ebarua y'erimukomola, n'erimuhiga. 5Yesu mwabwirabo ati, Musa abasakira ekihano ekĩ busana n'erikala ly'emitima yenyũ. 6Nĩkwa okw'ĩtsũka oko mugulu w'erihangika, Nyamuhanga mwahangikabo omulume n'omũkalĩ. 7Busana n'omwatsi oyo, omundu asyasĩga ĩse na nyĩnya wuwe, inialanda oko mũkalĩ wuwe, 8n'ababiri basyabya mubiri muguma. Litya sibakiri babiri, nĩkwa mubiri muguma. 9Neryo abo Nyamuhanga abĩrĩmatanĩa haguma, sihabye mundu oyukagabulabo. 10Neryo babere babisuba omo nyũmba, abiga mobabũlya Yesu busana n'omwatsi oyo. 11Naye mwabũga nabo ati, Omundu oyukahiga omũkalĩ wuwe akahĩkya ogundi mũkalĩ iniakasĩngĩra. 12Kandi omũkalĩ oyũkalũa kw'ĩba wuwe akahĩkĩbwa n'ogundi mulume iniakasĩngĩra. 13Neryo abandu mobaletera Yesu y'abana balere bati atsumulebo, nĩkwa abiga mobakunga abandu abo. 14Nĩkwa omugulu Yesu alangira ebyo, mwahitana neryo mwabwira abiga buwe ati, Muleke abana balere base kwĩngye! Sĩmũkakĩrayebo, kusangwa Obwami bwa Nyamuhanga ni bw'abali ng'aba. 15Kwenene ngabũga nenyũ nyiti, Oyutiangirira Obwami bwa Nyamuhanga ng'omwana mulere siendisyingira mubo n'ahake. 16Neryo mwahambabo omo byala biwe, mwahĩra kubo kw'ebyala, mwatsumulabo. 17Neryo omugulu Yesu atsũka olugendo luwe, omundu mwatibita aho ali, mwakũkama embere siwe, mwamũbũlya ati, Mũkangĩrĩrya mubuya, nyikolekĩ eribana engebe y'erikota kwehĩ? 18Yesu mwamũbũlya ati, Busana nakĩ ukanyahula mo mubuya kwehĩ? Sihali mubuya nina Nyamuhanga ĩyowene. 19Ũnasĩ ebihano; biti, Ĩsĩwĩta; isiwasĩngĩra; ĩsĩwĩba; isiwabihira bandi; isiwateba; ũsĩkaye tata wawe na koyo wawe. 20Neryo omundu oyo mwabũga ati, Mũkangĩrĩrya, Ebyosĩ ebyo nabirikolabyo erĩtsũka omo bwana bwage. 21Yesu mwamusamalira n'erimwanza, mwamubwira ati, Ũkĩsĩya mwatsi muguma. Ugende, ũgũlaye ebyosĩ ebyo uwite, uhe by'oko bera, nawe wasyabya n'ebindu elubula; neryo wase, unyikwame. 22Omundu oyo abere owa ebĩnywa ebyo, obũsũ buwe mobwasunza, mwalũaho n'obũlĩge, kusangwa abya awite bindu bingi kutsibu. 23Yesu mwatĩmbya ameso g'oko biga buwe neryo mwabwirabo ati, Monzo lĩkalĩre busana n'abandu abawite ebindu bingi eriingira omo Bwami bwa Nyamuhanga! 24Neryo abiga buwe mobaswekera ebĩnywa biwe. Nĩkwa Yesu mwabwirabo kandi ati, Abana, monzo lĩkalĩre busana n'abandu abakayiketera ebindu bingi eriingira omo bwami bwa Nyamuhanga! 25Ni ryolo busana n'engamia erilaba omo kyũna ky'esĩndanĩ kwilaba omundu w'ebindu bingi eriingira omo Bwami bwa Nyamuhanga. 26Neryo abiga mobasweka kutsibu, n'erimubwira bati, Ko nindi wasyatoka erĩlamĩbwa kwehĩ? 27Yesu mwatungererabo mwabwirabo ati, Ekĩ sikiritokekana oko bandu, nĩkwa uku Nyamuhanga. Kusangwa emyatsi yosĩ ikatokekana uku Nyamuhanga. 28Neryo Petero mwatsũka erĩbũga naye ati, ĩtwe ka twabĩrĩsiga ebyosĩ n'erikukwama. 29Yesu mwabwirabo ati, Kwenene ngababwira nyiti, Sihali oyũkasĩga enyũmba, kutse bagala babo, kutse bali babo, na koyo, n'ĩse, kutse abana, kutse ebitaka, busana nage, na busana n'Engulu Yowene, 30oyutendisyasũbũlĩrĩbwa ngendo ĩgana oko mugulu ono, amanyũmba n'abagala babo, n'abali babo, n'abokoyo, n'abana, n'ebitaka, haguma n'erĩendererĩbwa; n'engebe y'erikota oko mugulu owakandisyasa. 31Nĩkwa abangi abali embere lino basyabya b'enyũma, n'abangi abali enyũma lino basyabya b'embere. 32Neryo babya omo nzira bakahetukira eYerũsalema. Yesu abya akagenda embere sy'abiga buwe. Nabo ĩbakayĩkwĩra buba. N'abandu abakamukwama enyũma mobubaha. Kandi mwatwala erĩkũmĩ n'ababĩri elutambi, mwabwi rabo emyatsi eyĩkandĩsyamũhĩkako. 33Yesu mwabwirabo ati, Lebaya, tukahetukira eYerũsalema. Eyo Omugala w'Omundu asyahoterwa oko bahererĩ bakulu n'abakangĩrĩrya b'Emigambo. Basyamutswera bati akwe, n'erimuhotera oko Bihanda. 34Nabo basyamũsekererya, n'erimũ twĩrako amatande, n'erĩmũswĩrya emikoba, n'erĩmwĩta. Kandi enyũma w'ebiro bisatu asyalũbũka. 35Neryo Yakobo na Yoane, abagala ba Zebedayo mobahĩka uku Yesu bati, Mũkangĩrĩrya, tukasonda iwatukolera ekyo tũkabũlaya. 36Neryo Yesu mwabũlyabo ati, Mukasonda inabakolerakĩ kwehĩ? 37Nabo mobamũsũbĩrya bati, Omugulu wasyĩkala oko kĩtũmbĩ kyawe ky'Obwami bw'olukengerwa, tuti, utuhe erĩĩkala haguma nawe, omuguma oko byala by'amali, n'omuguma oko malembe. 38Yesu mwabwirabo ati, Sĩmwasĩ ekyo mũkabũlaya, ko mwanganatoka erĩpũlya oko lũtehĩ olo ngapũlĩrayako kwehĩ? Kutse erĩbatĩsĩbwa omo lũbatĩso olo ngabatĩsĩbawamo kwehĩ? 39Nabo mobamũsũbĩrya bati, Twanganatoka. Yesũ mwabwirabo ati, Mwasyapũlya oko lũtehĩ olo ngapũlĩrayako; kandi mwasyabatĩsĩbwa omo lũbatĩso olo ngabatĩsĩbawamo. 40Nĩkwa erĩĩkala oko mali wage n'oko malembe wage, sindi na hamũlĩ eribabalyo. Ni Nyamuhanga yo wasyaha emyanya eyo oko abo abĩrĩkokoteryayo. 41Nĩkwa omugulu abandi biga ĩkũmĩ bowa omwatsi oyo, mobahitana uku Yakobo na Yoane. 42Neryo Yesu mwabirikira abosĩ haguma, neryo mwabwirabo ati, Mũnasĩ ngoko abandu abakaganzawa ng'abatabalĩ b'Ebihanda ko bakatabalira abandu babo n'abakulu babo bakahamulabo. 43Nĩkwa ko bite bitya omo katĩkatĩ kenyũ. Oyo wanzĩre eribya mukulu omo katĩkatĩ kenyũ asyabya mũsũbĩ wenyũ; 44n'oyo wanzĩre eribya w'erĩmbere omo katĩkatĩ kenyũ asyabya mukobe w'abosĩ. 45Kusangwa Omugala w'Omundu mwatasa erikolerwa; nĩkwa mwasa erikola, n'eriha engebe yiwe mo bũgũlĩ busana n'abandu bangi. 46Neryo mobahĩka eYerĩko. N'omugulu abya akalũa eYerĩko haguma n'abiga buwe n'endeko nene, endĩmatĩme oyukahulawa mo Baratĩmayo, abya ĩkere oko mũsĩke w'enzira akasabĩrĩrya ebihembo. 47Abere owa kw'ali Yesu w'eNazaretĩ, neryo mwatsũka erilaka kutsibu ati, Yesu, Mugala wa Dawĩdĩ, unyiganyire! 48Neryo abandu bangi mobamukunga bati abye bũkũtũ, nĩkwa mwabirikira kutsibu kw'aho ati, Mugala wa Dawĩdĩ, unyiganyire! 49Neryo Yesu mwahangana, neryo mwabũga ati, Mumubirikire. Neryo mobabirikira endĩmatĩme eyo bati, Ũsĩkaye omutima. Ũhangane, amakubirikira. 50Neryo mwagusa ekanzu yiwe, mwahangana, mwahĩka uku Yesu. 51Neryo Yesu mwamũbũlya ati, Ukasonda inakukolerakĩ kwehĩ? Endĩmatĩme eyo moyamũsũbĩrya iti, Mukama wage, nyanzĩre eriswalangira. 52Yesu mwamubwira ati, Uyigendere, erĩkĩrĩrya lyawe lyamakũlamya. Neryo-neryo mwabana erilangira, neryo mwakwama Yesu omo nzira.

will be added

X\