MARĨKO 1

1Erĩtsũka ly'Engulu Yowene ya Yesu Kristo Mugala wa Nyamuhanga. 2Ngoko mũmĩnyererĩ Ĩsaya asaka, ati, Nyamuhanga ati, Omukwenda wage yoyũ. Nasyamutuma embere syawe, erĩyakokotya enzira busana nawe. 3Ni mulenge w'oyukabirikirira omo mbwarara, ati, Mowanaye enzira y'Omukama, Mũtũngananaye esyombalu siwe. 4Yoane Mũbatĩsya mwahulukira omo mbwarara, ĩnĩakatũlaganaya omwatsi ati, Mubindule emitima yenyũ erireka ebibi, mũbatĩsĩbawe, Nyamuhanga ababuyire ebibi byenyũ. 5Neryo abandu bosĩ b'ekihugo ky'eYũdea, n'ab'omũyĩ w'eYerũsalema mobahĩka ukũ Yoane. Mobakangya ebibi byabo, neryo Yoane mwabatĩsyabo omo lũsĩ lw'eYorodanĩ. 6Neryo Yoane abya ambite esyongimba sy'obweya bw'engamia, iniakambala n'omukoba w'ekihu omo mbindi yiwe; kandi iniakalya esyongĩke; n'obuki b'omolĩ. 7Yoane mwabwira abandu ati, Oyo wasyasa enyũma syage anyĩrengĩrye maka, kandi ĩngye sinyitolere erĩũnama n'erĩkũndũla emikoba y'esyongendero sy'ebisando biwe. 8Ĩngye ngababatĩsaya omo magetsi, nĩkwa iye asyababatĩsya omo Mũlĩmũ Abũyĩrĩre. 9Omo biro ebyo Yesu mwalũa eNazaretĩ omo kihugo ky'eGalĩlaya, na Yoane mwamũbatĩsya omo Yorodanĩ. 10Neryo-neryo Yesu abere abĩlũa omo magetsi, mwalangira olubula molwakingukala, n'Omũlĩmũ iniakamwandagalirako ng'akalĩkũkũ. 11N'omulenge mwalũa elubula ati, Uli Mugala wage mwanze, namakutsemera ndeke. 12Neryo-neryo Omũlĩmũ mwamũlolya omo mbwarara. 13Neryo Yesu mwabya eyo omo mbwarara ebiro makũmĩ ani, nĩkwa eSatanĩ moyamulengako. Yesu mwabya eyo haguma n'esyonyama sy'omolĩ, n'abamalaĩka mobasa n'erimũkolera. 14Neryo Yoane abere abĩhĩrwa omo mũlĩkĩ, Yesu mwaya eGalĩlaya, mwatũlaganĩa Engulu Yowene eyĩkalũa ewa Nyamuhanga. 15Ati, Omugulu abiribererera, n'Obwami bwa Nyamuhanga buli hakũhĩ! Mubinduke, erireka ebibĩ byenyũ, mwĩkĩrĩraye Engulu Yowene. 16Kandi omugulu Yesu abya akalendera hakũhĩ n'engetsi y'eGalĩlaya, mwalangira Sĩmonĩ na mugala wabo ye Anderea, bakagusa ekĩsohĩ ky'omo ngetsi kusangwa babya basohĩ. 17Neryo Yesu mwabwirabo ati, Munyikwame, nage nasyabayira mo basohĩ b'abandu. 18Neryo-neryo mobasĩga ebĩsohĩ byabo, mobamukwama. 19Kandi mwagenda embere yo hake mwalangira Yakobo mugala wa Zebedayo, na mugala wabo ye Yoane, ibane omo bwato bakalanda ebĩsohĩ. 20Neryo-neryo Yesu mwabirikirabo; nabo mobasĩga ĩse wabo ye Zebedayo omo bwato haguma n'abagombe babo, neryo mobakwama Yesu. 21Neryo mobaya oko mũyĩ w'eKapernaũmũ. N'oko kiro ky'eSabato, Yesu mwingira omo nyũmba y'erĩhĩndanamo, mwatsũka erĩkangĩrĩrya. 22Neryo abandu mobaswekera erĩkangĩrĩrya liwe, kusangwa mwabya akakangĩrĩryabo n'ehamũlĩ, isiali ng'abakangĩrĩrya b'Emigambo. 23N'oko mugulu oyo omo nyũmba y'erĩhĩndanamo mwabya omundu oyuli kw'ekĩrĩmũ kibi iniakalaka kutsibu ati, 24Uwe, Yesu w'eNazaretĩ tuli na mwatsi wahi nawe kwehĩ? Wamasa erĩtũherya kwehĩ? Nyĩnakwasĩ, uli Oyũbũyĩrĩre wa Nyamuhanga! 25Neryo Yesu mwakunga embĩnga eyo ati, Ubye bũkũtũ, ũlũe oko mundu oyũ! 26N'ekĩrĩmũ kibi ekyo mokyamũsũkya-sũkya, kandi mokyalaka kutsibu, mokyamũlũako. 27Neryo abandu bosĩ mobasweka. Mokyaleka ĩbabũlanĩa bati, Kw'ekĩ nĩkĩ? Nĩ 'kangĩrĩrya lihya-lihya kwehĩ? Akahana ebĩrĩmũ bibi n'ehamũlĩ, nabyo ĩbyamowa. 28Neryo engulu ya Yesu moyatsungana ehosĩ omo kihugo ky'eGalĩlaya. 29Neryo mobalũa omo nyũmba y'erĩhĩndanamo, mobaya omo nyũmba ya Sĩmonĩ na Anderea; kandi Yakobo na Yoane mobagenda haguma nabo. 30Neryo nyĩnyĩ-byala wa Sĩmonĩ abya alwere ekĩhũhanĩ. Nĩkwa mobabwira Yesu bati kw'alwere atya. 31Neryo Yesu mwahĩkaho, mwamuwata oko byala, mwamũhanganĩa. Neryo erĩhũhana molyamũlũako, neryo mwatsũka erikolerabo. 32Neryo bwabere bwabya ĩgolo-golo, eryuba lyabirenga, abandu mobaletera Yesu y'abakonĩ bosĩ n'ababya kw'esyombĩnga. 33Neryo abandu bosĩ b'omũyĩ mobahĩndana embere w'enyũmba. 34Kandi Yesu mwalamya abangi ababya balwere emĩsĩndo yosĩ y'esyondwala, kandi mwahiga esyombĩnga nyingi. Mwatalĩga esyombĩnga sĩkabũga mwatsi, kusangwa syabya ĩsĩnamwasĩ. 35Omo ngyakya-ngyakya isibulibwakya, Yesu mwabuka mwalũa eka, mwaya ahate bandu, mwasabiraho. 36Nĩkwa Sĩmonĩ n'abalĩkyabo mobamusonda-sonda. 37N'omugulu bamubana mobabũga bati abandu bosĩ bakakusonda-sonda. 38Nĩkwa Yesu mwabwirabo ati, Tugende ehandi oko yindi mĩyĩ, eyiri hakũhĩ, inatoka erĩkangĩrĩryayo nibya, kusangwa ekyo kyo nasira. 39Kw'alendera atya ehosĩ eGalĩlaya, ĩnĩakatũla Engulu Yowene omo manyũmba w'erĩhĩndanamo, n'erihiga esyombĩnga. 40N'omuhaga mwahĩka uku Yesu iniakamuhatikana n'erĩmũkũkamira ati, Wamabya ũnanzĩre, wangatoka erĩnyĩlamya. 41Yesu mwamũkwĩra bũlĩge neryo mwakakya ebyala biwe mwamũtũlako ati, Nyanzĩre, ũlamĩbawe! 42Neryo-neryo ebihaga mobyamũlũako, mwalama. 43Neryo Yesu mwamuhana kutsibu, mwamutuma 44ati, Subwire omundu omwatsi oyũ. Nĩkwa ugende ũyĩkanganaye oko mũhererĩ, uhere obuhere obo Musa ategeka busana n'erilama lyawe, erĩmĩnyĩsya abandu bosĩ ngoko wabĩrĩlamĩbwa. 45Nĩkwa omundu oyo mwahuluka, mwatsũka erĩtũlago ehosĩ n'erĩtũlaganĩa engulu eyo. Kyaleka Yesu iniatatoka erĩhĩka oko mũyĩ, nĩkwa mwĩkala ahate bandu, nĩkwa abandu mobasa eyo ali bakalũa ehosĩ.

will be added

X\