LŨKA 9

1Neryo Yesu mwabirikira abiga ĩkũmĩ n'ababiri bo haguma, mwahabo obũtokĩ n'ehamũlĩ y'erihiga esyombĩnga syosĩ, n'erĩlamya abakonĩ. 2Neryo mwatumabo erĩtũla omwatsi w'obwami bwa Nyamuhanga n'erĩlamya abakonĩ. 3Kandi mwabwirabo ati, Simutwale kindu busana n'olugendo lwenyũ, kutse omũtso, kutse engunza, kutse akalyo, kutse franka, kutse esyokanzu ĩbĩrĩ. 4N'omo nyũmba eyo bakabakokayamo, mwĩkalemo erĩhĩka aho mwasyalũĩra oko mũyi oyo. 5N'aho abandu bakagana erĩbakokya, omugulu mũkalũa oko mũyĩ oyo imwakunguta olũtũtũ oluli oko bisando byenyũ, busana n'erĩmĩnyĩsyabo. 6Neryo abiga mobahongoka n'erigenda omo mĩyĩ yosĩ, erĩtũla Engulu Yowene, n'erĩlamya abandu ehosĩ. 7Herode, omũtabalĩ w'eGalĩlaya, mowa emyatsi yosĩ eyabere, neryo mwahanga-hangya omutima, kusangwa abandi bandu bati, Yoane Mũbatĩsya abĩrĩlũbũka oko baholĩ! 8Abandi bati, Elĩa abiriswahuluka, n'abandi bati, Omuguma g'oko bamĩnyererĩ ba kera abirisuba. 9Herode ati, Yoane monamũtwa k'omutwe, omundu oyo nindi oyo ngowa kw'emyatsi eyĩ kwehĩ? Neryo Herode mwasonda-sonda erilola uku Yesu. 10Neryo abakwenda babere babisubula, mobabwira Yesu emyatsi yosĩ bakola. Neryo Yesu mwatwalabo oko mũyĩ owakahulawa mo Betesaĩda. 11N'esyondeko syabere syaminya, mosyamukwama. Naye mwakokyabo, iniakabwirabo omwatsi w'obwami bwa Nyamuhanga, neryo mwalamya ababya n'obwaga bw'erĩlamĩbwa. 12Neryo bwabere bwasonda erihumbera, abiga erĩkũmĩ n'ababiri mobamũhikako bati, Ulagane n'endeko batoke eriya omo mĩyĩ n'amalima ebĩhererenĩe, batoke eriyagotserayo n'eribana eby'erirya; kusangwa tuli eno y'omo mbwarara. 13Nĩkwa Yesu mwabwirabo ati, Nenyũ muhebo ak'erirya. Nabo mobabũga bati, Situwite bindi, wa n'amandu atanu n'amahere abiri. Wanzĩre itwayagula ebyalya busana n'abandu bosĩ aba kwehĩ? 14Abalume ababyaho babya nga elfu ĩtanu (5000). Neryo Yesu mwabwira abiga buwe ati, Mwĩkalaye abandu mo ndeko-ndeko y'amakũmĩ atanuatanu. 15Neryo abiga mobakola batya, mobĩkalya abandu bosĩ b'ahisi. 16Neryo Yesu mwĩmya amandu atanu n'amahere abiri, mwalalamira endata elubula, neryo mwatsumula kalyo ako, neryo mwatsũtsangago mwahabyo oko biga ati bahĩrebyo embere sy'abandu omo ndeko. 17Abosĩ mobalya, mobũgũta. Neryo abiga mobasonga-songya ebyasaka, ebitiri ĩkũmĩ n'ebibiri by'ebitahangukira. 18Omugulu Yesu abya akasaba ĩyowene, abiga mobamũhĩkako, neryo Yesu mwabũlyabo ati, Esyondeko sĩkabũga siti nyirindi kwehĩ? 19Mobamũsũbĩrya bati, Abandi bati uli Yoane Mũbatĩsya, nĩkwa abandi bati uli Elĩa, n'abandi bati, omuguma g'oko bamĩnyererĩ ba kera oyo wabĩrĩlũbũka. 20Neryo Yesu mwabũlyabo ati, Nenyũ, mũkabũga muti nyirindi kwehĩ? Petero mwamũsũbĩrya ati, Uli Kristo wa Nyamuhanga. 21Neryo Yesu mwaganĩabo n'erihanabo ati sibabwire omwatsi oyũ go mundu, 22ati, Omugala w'Omundu atolere iniagalwa kutsibu, n'eriganwa n'abakulu, n'abahererĩ bakulu, n'abakangĩrĩrya b'Emigambo n'akandi ĩnĩĩtwa, neryo enyũma w'ebiro bisatu ĩnĩalũbũkĩbwa. 23Neryo Yesu mwabwira abosĩ ati, Omundu amanza erinyikwama, ayigane, aheke omusalaba wuwe obuli kiro, anyikwame. 24Kusangwa omundu oyukasonda erĩlamya engebe yiwe asyatalyayo; n'omundu oyũkatalaya engebe yiwe busana nage asyalamyayo. 25Omundu akabana endũndĩ yahi; amatunda ekihugo kyosĩ nĩkwa akatalya engebe yiwe kwehĩ? 26Nĩkwa omundu amanyĩkwa esĩsonĩ, n'eripona ebĩnywa byage, Omugala w'Omundu asyamũkwa esĩsonĩ omugulu asyasa omo lukengerwa luwe, n'olwa Tata wuwe, n'olw'abamalaĩka babũyĩrĩre. 27Nĩkwa ngababwira kwenene nyiti, Hali abandu abimene hano, abatendisyahola bate balangira Obwami bwa Nyamuhanga. 28Neryo enyũma w'erĩbũga emyatsi eyĩ, nga biro munani, Yesu mwĩmya Petero na Yakobo na Yoane haguma naye, mobaya oko kitwa eriyasabirayo. 29Neryo abere anemusaba, erisosa ly'obũsũ buwe molyahinduka, n'esyongimba siwe mosyahenĩa n'erĩkangabasanĩa. 30Neryo lebaya, abandu babiri babya bakakanĩa naye; babya Musa na Elĩa. 31Ibakabutuka omw'ĩkangabasanĩa ly'elubula, ĩbakakanaya omwatsi w'oluholo luwe olo akasyaholera eYerũsalema. 32Nĩkwa Petero n'ababya naye mobayitsingirako n'otũgotserĩ; nĩkwa babere babuka, mobalangira erĩkangabasanĩa liwe n'abandu babiri ibanahangene haguma naye. 33Neryo abandu abo omugulu basonda erigenda, Petero mwabũga na Yesu ati, Mukama, lyowene ko tuli hano; tũhĩmbe amahema asatu, enguma busana nawe, n'enguma busana na Musa, n'enguma busana na Elĩa, ĩsĩasĩ ng'akabũgakĩ. 34Abere anemũbũga ebĩ, ekĩtũ mokyahuluka mokyasũkũlĩryabo; nabo mobubaha omugulu ekĩtũ kyasũkũlĩrayabo. 35Neryo omulenge mwalũa omo kĩtũ ati, Oyũ ni Mugala wage, Omusombolwa wage; mũmowe! 36Neryo omulenge abere abĩũmbya, Yesu mwabanikaho ĩyowene. Abiga mobabya bũkũtũ, mobatabwira mundu omo biro ebyo emyatsi eyo balialangira. 37Neryo engyakya mobandagala bakalũa oko kitwa, n'endeko nene moyahĩndana na Yesu. 38Neryo 'omundu oyo wabya omo ndeko mwabũga n'omulenge munene ati, Mũkangĩrĩrya! ngakũlemba-lemba nyitĩ Ulebaye omwana wage oyo nyĩbũtĩre, ĩyowene mũsa! 39Neryo akahambawa n'ekĩrĩmũ, neryo inialaka, kandi kĩkamũsala-salaya, iniaburura erĩhũlo, kandi kĩkamũhũnzanga, sikirimuleka lũba. 40Monalemba-lembĩre abiga bawe nyiti bakiguse eyĩhya, nĩkwa mobatalũkĩre. 41Yesu mwasũbĩrya ati, Ĩnywe lulengo lw'erĩtendĩkĩrĩrya n'olw'obuhaka, nasyĩkala nenyũ omo mugulu gungahi, nasyababegerya mugulu gungahi kwehĩ? Ulete mugala wawe yo hano. 42Neryo 'abere anemwasa embĩnga eyo moyamugũsa ahisi, moyamũgala-galya. Nĩkwa Yesu mwakunga ekĩrĩmũ kibi ekyo, mwalamya omwana, neryo mwamũsũbya ũkw'ĩse wuwe. 43Nĩkwa abandu bosĩ mobasweka kutsibu busana n'obũtokĩ bunene bwa Nyamuhanga. 44Nĩkwa omugulu abandu bosĩ babya bakaswekera emĩbĩrĩ Yesu abya akakola, Yesu mwabwira abiga buwe ati, Muhulikirire ebĩnywa ebĩ, kusangwa Omũgala w'Omundu asyahoterwa oko bandu. 45Nĩkwa mobataminya ekĩnywa ekĩ, kandi mokyabĩswa kubo, sibaminyekyo, kandi babya bakubaha erĩmũbũlya enzumwa y'omwatsi oyũ. 46Neryo mohabya obuhaka omo katĩ-katĩ kabo nindi nga yo mukulu. 47Nĩkwa Yesu mwaminya ebyo babya bakaganĩrya omo mitima yabo, neryo mwĩmya omwana mulere mwamũhanganĩa hakũhĩ naye, 48neryo mwabwirabo ati, Omundu oyũkakokaya omwana mulere ng'oyũ omo lĩna lyage akanyĩkokaya; n'oyũkanyĩkokaya, akakokaya oyo wanyituma. Kusangwa oyuli muke omo katĩkatĩ kenyũ yo mukulu. 49Neryo Yoane mwasũbĩrya ati, Mukama motwalangira omundu akahiga esyombĩnga omo lĩna lyawe; neryo motwalenga erĩmũkakĩrya kusangwa isiali oko ndeko yetu. 50Nĩkwa Yesu mwamubwira ati, Sĩmũmũkakĩraye, kũsangwa oyute nzĩgũ yenyũ iniali oko luhande lwenyũ. 51Neryo ebiro bya Yesu by'eritwalwa elubula byabere byasonda erĩhĩka hakũhĩ, mwahĩra omutima wuwe oko lugendo lw'eriya eYerũsalema. 52Neryo mwatuma abakwenda embere siwe. Nabo mobahongoka, mobingira omo mũyĩ w'Abanya Samarĩa, erĩkokotya aho angahĩkĩra. 53Nĩkwa abandu bayo mobatamũkokya kusangwa ĩnĩabĩrĩhĩra omutima wuwe eriya eYerũsalema. 54Neryo omugulu abiga buwe, ye Yakobo na Yoane balangira omwatsi oyũ, mobabũga bati, Mukama, wanzĩre itwabirikira omuliro alũe elubula n'eribugabo kwehĩ? 55Nĩkwa Yesu mwakeberabo, mwakungabo ati, Sĩmwasĩ omũsĩndo w'ekĩrĩmu muliko. 56Kusangwa Omugala w'Omundu mwatasa erĩherya esyongebe sy'abandu, nĩkwa busana n'erĩlamyasyo. Neryo mobaya oko gundi mũyĩ. 57Neryo babere banemugenda omo nzira, omundu muguma mwabwira Yesu ati, Ngandikukwama ehosĩ ukandiya. 58Yesu mwamubwira ati, Esyoboha sinawite ebyũna, n'esyonyonyũ sy'omo kyanya esyonyutu; nĩkwa Omugala w'Omundu siawite aho angagotserya omutwe wuwe. 59Neryo Yesu mwabwira ogundi mundu ati, Unyikwame; nĩkwa mwabũga ati, Mukama, uleke nyĩtsũke eriyata tata wage. 60Nĩkwa Yesu mwamubwira ati, Uleke abaholĩ bate abaholĩ babo. Nĩkwa uwe ugende ehosĩ ũtũle omwatsi w'obwami bwa Nyamuhanga. 61Ogundi mundu mwabũga ati, Mũkama, ngandisyakukwama, nĩkwa uleke ngayalagana n'ab'ewetu. 62Yesu mwamubwira ati, Sihali oyukawata okw'ĩsũka neryo akakebera enyũma, akatolera obwami bwa Nyamuhanga.

will be added

X\