LŨKA 8

1Enyũma w'aho Yesu mwatsũka erilaba ehosĩ omo mĩyĩ n'omo hĩyĩ, ĩnĩakatũlaganaya Engulu Yowene n'erĩtũla omwatsi w'obwami bwa Nyamuhanga. Abiga erĩkũmĩ n'ababiri mobagenda haguma naye, 2n'abakalĩ nibya abalamĩbawa kw'ebĩrĩmũ bibi n'esyondwala. Ye Marĩa oyukahulawa mo Magdalene, oyo walũsĩbawa kw'esyombĩnga sirinda, 3na Yoana, muka Kũza, omũbĩkĩ w'ebindu bya Herode, na Susana, n'abandi bakalĩ bangi ababya bakawatĩkya Yesu n'abiga buwe omo bindu byabo. 4Abandu mobahĩka uku Yesu bakalũa oko mĩyĩ mingi; n'omugulu endeko nene yahĩndana haguma, Yesu mwatwa omũsyo ati, 5Omundu mwayabiba esyombuto siwe. Neryo omugulu abibasyo esindi mosyatogera oko mũsĩke w'enzira; mosyalyatangirirwa, n'esyonyonyũ sy'omo kyanya mosyatomengerasyo. 6N'esindi mosyatogera oko kitaka ky'amabwe, n'omugulu syalasa mosyuma kusangwa mosyabula amagetsi. 7N'esindi mbuto mosyatogera omo mahwa; n'amahwa mwalasa haguma nasyo, mwakũsyasyo. 8N'esindi mbuto mosyatogera oko kitaka kyowene, Mosyalasa, mosyasohola esyombuto ĩgana. Omugulu Yesu abya akabũga emyatsi eyĩ, mwabya akabirikira ati, Oyuwite amatwĩ w'erĩowa, owe! 9Neryo abiga mobabũlya Yesu enzumwa y'omũsyo oyũ. 10Neryo Yesu mwasũbĩrya ati, Mwabirihabwa eriminya erĩkũmbo ly'obwami bwa Nyamunanga; nĩkwa abandi bakahabawa omo mĩsyo; neryo erilangira sibalangire, n'erĩowa, sibaminye. 11Nĩkwa enzumwa y'omũsyo yeyĩ: embuto kye kĩnywa kya Nyamuhanga. 12Esyombuto esyatogera oko mũsĩke w'enzira ni bandu abakowa; nĩkwa Satanĩ yĩkahĩka n'erĩlũsya omwatsi g'omo mitima yabo, ibatatoka erĩkĩrĩrya n'erĩlamĩbwa. 13Esyombuto esyatogera oko kitaka ky'amabwe ba bandu abakowa ekĩnywa n'eriangirirakyo n'obutseme. Nĩkwa ekĩnywa ekyo sikiribana emĩrĩhĩ; bakĩkĩrĩraya katambĩ kake, neryo oko mugulu w'erirengwako, bakatswa. 14N'esyombuto esyatogera omo mahwa ni bandu abakowa; nĩkwa amaganĩryo n'ebindu n'erĩyĩtsemesya ly'engebe y'eno, bĩkakũsaya ekĩnywa ekyo, neryo ikitera ndeke. 15Esyombuto esyatogera oko kitaka kyowene ba bandu abakowa ekĩnywa ekyo omo mutima ogowene w'ekwenene, ibakahambakyo ndeke omo mutima, neryo ibakahatikana, n'erĩerya esyombuto sy'ekĩnywa kya Nyamuhanga. 16Nĩkwa sihali mundu oyũkakaya etala n'erĩkũnĩngĩrayo omo kibindi, kutse erĩhĩrayo eyĩkwa oko ngyingo, nĩkwa akahĩrayo oko mbaniko, neryo abandu abakahĩkamo batoke erilangira etala. 17Kusangwa sihali ekĩbĩsamĩre ekitendisyamĩnyĩkalĩbwa, kutse erĩkũmbo eritendisyakũmbũlwa. 18Muyirenge busana n'ebyo mũkowa! Kusangwa omundu oyuwite kindu, asyahabwa ebindi, n'omundu oyutawitekĩ asyasagulwa n'ekyo alwe aganĩrye ati awite. 19Neryo nyĩnya n'abagala babo Yesu mobahĩka, nĩkwa mobataluka erĩhĩka hakũhĩ naye busana n'endeko. 20Neryo omundu mwabwira Yesu ati, Koyo wawe n'abagala benyũ banimene eyĩhya, bakasonda erikulolako. 21Nĩkwa Yesu mwasũbĩryabo ati, Koyo wage; n'abagala betu ba bakowa ekĩnywa kya Nyamuhanga, n'erikolakyo. 22Neryo ekiro kiguma Yesu mwingira omo bwato haguma n'abiga buwe, neryo mwabwirabo ati, Tusokere eyisirya w'engetsi. Neryo mobahongoka. 23Babere bakahongola obwato, Yesu mwayato. Neryo ekihunga mokyandagalira omo ngetsi, n'obwato mobwasonda erĩũsũla mw'amagetsi, mobabya omo bwĩko. 24Neryo abiga mobahĩka uku Yesu, mobamũbũkya bati, Mukama, Mukama, tukahwa! Neryo Yesu mwahangana, mwakunga ekihunga, n'erikarama ly'ebisunda, nabyo mobyatekana mohahita esĩsyerere. 25Neryo Yesu mwabwira abiga ati, Erĩkĩrĩrya lyenyũ liri hahi kwehĩ? Nabo mobubaha, mobasweka, ibakabwirana bati, Omundu oyũ nindi oyukahana ebihunga n'amagetsi, ibyamukenga kwehĩ? 26Neryo mobahongola obwato eriya oko kihugo ky'Abagerase ekiri eyisirya kw'eGalĩlaya. 27Neryo Yesu abere ahĩka oko mũsĩke w'engetsi oko kitaka, omundu muguma mwahĩndana naye ĩnĩakalũa omo mũyĩ. Omundu oyo abya kw'esyombinga, kandi isialiambala esyongimba oko biro binene, ĩsĩalĩkala omo nyũmba, nĩkwa omo katĩkatĩ k'esisinda, 28Abere alola uku Yesu, neryo mwalaka, mwawa ahisi embere sĩwe, neryo mwabũga n'omulenge munene ati, indi n'omwatsi wahi nawe, uwe Yesu, Mugala wa Nyamuhanga W'endata Kutsibu, ngakulemba-lemba nyiti sũnyagalaye. 29Kusangwa Yesu iniabirihana ekĩrĩmũ kibi ekyo ati kĩlũe omo mundu oyo. Esyongendo nyingi ikyabirimuhamba; kandi abya iniabiribohwa omo mahulula n'emisege, n'erĩteyĩbwa, nĩkwa mwabya akatwa amahulula wuwe iniakatwalawa n'embĩnga omo mbwarara. 30Neryo Yesu mwabũlyayo ati, Uwendi kwehĩ? Nayo moyasũbĩrya yiti, Erĩna lyage ni ndeko, kusangwa esyombĩnga nyingi isyabirimũhĩkako. 31N'esyombĩnga esyo mosyalemba-lemba Yesu siti siahanesyo eriya omo kũlĩmũ. 32Nĩkwa ekihangulo kinene ky'esyongulube kyabya ikikalira oko kitwa, n'esyombĩnga mosyalemba-lemba Yesu siti alĩgĩresyo eriingira omo syongulube. Neryo mwalĩgĩrasyo. 33Neryo esyombĩnga mosyalũa oko mundu oyo, mosyingira omo syongulube; n'ekihangulo kyosĩ ekyo mokyatibita eyĩkwa ahasenzere erĩhĩka omo ngetsi, neryo mosyasenda. 34Neryo omugulu abalĩsya basyo balangira ebyamabya, mobatibita mobayatũla omwatsi oyũ omo mũyĩ n'omo kihugo ekyo. 35Neryo abandu mobayalebya ebyabere; mobahĩka uku Yesu, mobeya omundu oyo wabya kw'esyombĩnga ĩsyabĩrĩmũlũako ĩnĩanĩkere oko bisando bya Yesu, iniambite esyongimba, iniabiribya mundu w'obũlengekanĩa, neryo abosĩ mobubaha. 36Neryo abandu abalangira omwatsi oyo, mobabwira abandu ngoko oyo wabya kw'esyombĩnga kw'alamĩbawa. 37Neryo abandu bosĩ b'ekihugo ky'Abagerase n'ekindi kihugo kyayo, mobabũlya Yesu bati alũe kubo, kusangwa mobubaha kutsibu. Neryo Yesu mwingira omo bwato, mwasubula. 38Neryo omundu oyo walũa kw'esyombĩnga mwalemba-lemba Yesu eribya haguma naye. Nĩkwa Yesu mwamutuma ati, 39Usube eka wawe, ubwirebo emyatsi minene eyo Nyamuhanga abirikukolera. Neryo omundu oyo mwayatũlago omo mũyĩ gosĩ emyatsi minene eyo Yesu amukolera. 40Neryo omugulu Yesu asubula, endeko moyamũkokya, kusangwa abosĩ babya ibakamulindirira. 41Neryo omundu oyukahulawa mo Yaĩro mwasa. Iye abya mũtabalĩ w'enyũmba y'erĩhĩndanamo, neryo mwawa oko bisando bya Yesu n'erimulemba-lemba ati ahĩke omo nyũmba yiwe. 42Kusangwa abya awite mwali muguma musa, w'emyaka ĩkũmĩ n'ĩbĩrĩ, neryo abya hakũhĩ n'erihola. Nĩkwa omugulu Yesu abya akayayo, esyondeko mosyamũhatatanĩa. 43Neryo omũkalĩ muguma abyaho oyo wabya akwĩre obũkonĩ bw'erĩlũsya omusasi oko myaka ĩkũmĩ n'ĩbĩrĩ. Kandi abya iniabiribugira ebindu biwe byosĩ oko banganga, kandi sihabya mundu watoka erĩmũlamya. 44Omũkalĩ oyo mwasa omo ndeko enyũma uku Yesu, mwatũla oko mũsĩke w'olukimba luwe, neryo-neryo erisenda ly'omusasi wuwe molyũmbya. 45Yesu mwabũlya ati, Nindi yo wamanyĩtũlako kwehĩ? Neryo abosĩ mobayigana. Petero mwabũga ati, Mukama, esyondeko sĩkakũkũna n'erĩkũhatatanĩa! 46Nĩkwa Yesu mwabũga ati, Omundu amanyĩtũlako, kusangwa namaminya k'obũtokĩ bwamanyĩlũako. 47Neryo omũkalĩ abere alangira kw'ate angatoka erĩbĩsama, mwahĩka n'erititimana, mwawa ahisi embere sya Yesu, neryo mwatũlago embere sy'abandu bosĩ ekirialeka ĩnĩamũtũlako, kandi ngoko alamĩbawa neryo-neryo. 48Nĩkwa Yesu mwamubwira ati, Mwali wage, erĩkĩrĩrya lyawe lyamabĩkũlamya; ugende buholo. 49Kandi omugulu Yesu abya akĩnabũga, omundu mwahĩkaho ĩnĩakalũa omo nyũmba y'omũtabalĩ w'enyũmba y'erĩhĩndanamo. Ati, Mwali wawe abirihola; sũswelũhaya Omũkangĩrĩrya. 50Nĩkwa omugulu Yesu owa ebyo, mwabwira Yaĩro ati, Sigubahe wĩkĩrĩraye lisa. Akandilama. 51Neryo abere ahĩka omo nyũmba, Yesu mwatalĩga mundu akayamo haguma naye, nina Petero, na Yoane, na Yakobo, n'ĩse na nyĩnya b'omwana oyo. 52Abandu bosĩ babya bakalira n'erĩsũsũmana. Nĩkwa Yesu mwabũga ati, Muleke eririra, kusangwa sĩaholĩre, nĩkwa alito. 53Nabo mobamuseka, kusangwa ĩbanasĩ kw'aholĩre. 54Nĩkwa Yesu mwahamba ebyala biwe, mwabirikira ati, Iwe mwana, hangana! 55N'ekĩrĩmũ kiwe mokyamusubako, neryo mwahangana lũba. Yesu mwabũga ati bamuhe eby'erirya. 56Neryo abamubuta mobasweka; nĩkwa Yesu mwahanabo ati, Sibabwire mundu ebyabere.

will be added

X\