LŨKA 7

1Neryo Yesu abere abibuga eribwira abandu emyatsi yosĩ eyĩ, mwingira eKapernaũmũ. 2Neryo habya omukulu w'abasĩrĩkanĩ b'Abaroma oyuwite omugombe wuwe mwanze. Neryo omugombe oyo inialwere hakũhĩ n'erihola. 3Omugulu omukulu oyo owa engulu ya Yesu, mwatuma abakulu b'Abayũda uku Yesu erĩmũbũlya ati ase alamaye omugombe wuwe. 4Abakulu abo mobahĩka uku Yesu, mobamulemba-lemba kutsibu bati, Omundu oyũ atolere ĩwamũwatĩkya. 5Anzĩre ekihanda kyetu, kandi abĩrĩtũhĩmbĩra enyũmba yetu y'erĩhĩndanamo. 6Neryo Yesu mwagenda nabo. Abere ahĩka hakũhĩ n'enyũmba, omukulu w'abasĩrĩkanĩ mwamutumira abĩra buwe ati. Mukama, sũyĩlũhaye, kusangwa sinyitolere ukingira omo nyũmba yage; 7kandi nage sĩnyĩyĩganzĩre nga nyitolere erĩkũhĩkako. Nĩkwa ũbũge kĩnywa kiguma, n'omugombe wage asyalamĩbwa. 8Kusangwa nage ngwite abakanyihamula, kandi nyiwite abasĩrĩkanĩ bage, ngabũga n'oyũ nyiti, Ugende, iniagenda; n'oko gundi nyiti, Wase, iniasa; kandi ngabwira omukobe wage nyiti, Kola ekĩ, iniakolakyo. 9Neryo omugulu Yesu owa ebĩ mwaswekera omukulu oyũ, neryo mwakebera endeko eyamukwama ati, Ngababwira nyiti, Sinditabana erĩkĩrĩrya ĩnene ng'erĩ, kutse omo Baĩsraelĩ. 10Abakwenda abo mobasuba omo nyũmba y'omukulu oyo, neryo mobeya omugombe oyo iniabirilama. 11Neryo enyũma w'aho akatambĩ kake Yesu mwaya oko mũyĩ owakahulawa mo Naĩna. Kandi abiga buwe n'abandu bangi mobagenda haguma naye. 12Neryo abere ahĩka hakũhĩ n'olũkyo lw'omũyĩ oyo, mweya bakaheka ekĩnda ky'omundu. Oyo abya abũtĩrwe ĩyowene na nyĩnya wuwe. Kandi nyĩnya abya mũkwakalĩ, n'endeko nene y'omũyĩ oyo yabya haguma naye. 13Neryo mugulu Omukama amulolako, mwamuganyira, mwamubwira ati, Sulire. 14Neryo Yesu mwahĩkaho mwatũla okw'ĩsandũkũ eriri mw'ekĩnda, n'abandu abahekĩreryo mobimana. Nĩkwa Yesu mwabũga ati, Mũlwana, ngakubwira nyiti, Hangana! 15N'omũholĩ oyo mwĩkala, mwatsũka erĩbũga, neryo Yesu mwamũhererya nyĩnya wuwe. 16Neryo abosĩ mobubaha, mobatsũka eripipa Nyamuhanga, bati, Omũmĩnyererĩ mukulu abirihangana omo katĩkatĩ ketu! Kandi, Nyamuhanga abĩrĩhĩka erĩwatĩkya abandu buwe. 17Nĩkwa engulu eyĩ moyagenda-genda eYũdea hosĩ, n'omo bihugo byosĩ ebĩhererenĩe naho. 18Nĩkwa abiga ba Yoane mobamubwira emyatsi yosĩ eyĩ. 19Neryo Yoane mwabirikira abiga buwe babiri, mwatumabo oko Mukama ati, Nina we oyukasa, kutse tulindirire gundi kwehĩ? 20N'omugulu bahĩka uku Yesu, mobabũga bati, Yoane Mũbatĩsya amatutuma uk'uwe ati, Nina we oyukasa, kutse tulindirire gundi kwehĩ? 21N'oko ndambĩ eyo nyisa-nyisa Yesu mwalamya bandu bangi kw'amakonĩ wabo, n'esyondwala, n'ebĩrĩmũ bibi; kandi mwaha esyondĩmatĩme nyingi erilangira. 22Neryo Yesu mwasũbĩrya abakwenda abo ati, Mugende, mubwire Yoane, ebyo mwabirilangira n'ebyo mwabĩrĩowa, muti, esyondĩmatĩme sirimulangira, n'ebirema birimugenda, abahaga bakalamĩbawa, abatsiha balĩmowa, abaholĩ balĩmũlũbũkĩbwa, n'Engulu Yowene ĩkatũlawa oko bera. 23N'obutseme buli oko yutehũkahũkaya omutima busana nage. 24Neryo abakwenda ba Yoane babere babigenda, Yesu mwatsũka erĩbũga n'esyondeko busana na Yoane ati, Mwaya omo mbwarara eriyalola m'ũkũkĩ kwehĩ? Mwayalangira ekibingu ekikatengatenganĩbawa n'erihunga kwehĩ? 25Nĩkwa mwayayo erilangirakĩ kwehĩ? Muti, Omundu oyo wambite esyongimba nyolo-nyolo kwehĩ? Mũlebaye, abambite esyongimba sĩkangabasenĩe n'abakalya ebisi-bisi bali omo manyũmba w'abami. 26Nĩkwa momwayayo eriyalola kũkĩ kwehĩ? Muti, Omũmĩnyererĩ kwehĩ? Ega, ngababwira nyiti, Mwabirilangira oyũlengĩre omũmĩnyererĩ. 27Yoyo Masako akahula ati, Lebaya, ngatuma omukwenda wage embere syenyũ, Oyo wasyowanĩa enzira yawe embere syawe. 28Kandi Yesu mwabũga ati, Ngababwira nyiti, Yoane ni mukulu kwilaba abandu bosĩ abakabutawa; nĩkwa omuke kutsibu omo bwami bwa Nyamuhanga amũlengĩre. 29Neryo omugulu abandu bosĩ n'abasolesya bowa ebĩnywa ebĩ, mobaganza Nyamuhanga kw'ali w'erĩbanza, kusangwa mobabatĩsĩbwa na Yoane. 30Nĩkwa Abafarĩsayo n'abakangĩrĩrya b'Emigambo mobagana erisonda lya Nyamuhanga busana nabo, isibetabatĩsĩbwa na Yoane. 31Neryo Yesu ati, Nasyalĩngĩrĩranĩa abandu ba sesene bo nakĩ kwehĩ? Kandi basosĩre ngakĩ kwehĩ? 32Bali ng'abana abĩkere omo katale ibakabirikirana bati, Twabiribabuhira amalenga, neryo momutetasata; motwimba olwimbo lw'erita omundu, nenyũ momutetalira. 33Kusangwa Yoane Mũbatĩsya mwasa iniakatsira akalyo, n'erĩtendĩpũlya ebĩnyũ; nenyũ muti, Ali ko mbĩnga. 34Omugala w'Omundu abĩrĩhĩka, iniakalya n'erĩpũlya; nenyũ muti, Lebaya, ow'omururu, n'omũkũndĩrya, omwĩra w'abasolesya n'abakola-nabi. 35Abandu bosĩ abakalĩga amenge wa Nyamuhanga bakakangaya kw'amenge ayo ni w'ekwenene. 36Neryo Omũfarĩsayo muguma mwabirikira Yesu erirya haguma naye. Neryo mwaya omo nyũmba y'Omũfarĩsayo oyo, neryo mwĩkala okw'irya. 37Neryo oko mũyĩ oyo habya omũkalĩ mukola-nabi. Neryo abere aminya ko Yesu abya akalira omo nyũmba y'Omũfarĩsayo oyo, neryo mwaleta erĩtambya ly'erĩbwe lyowenenga ly'amagũta awakakumba ndeke kutsibu. 38Neryo mwimana enyũma wa Yesu hakũhĩ n'ebisando biwe, iniakalira n'erĩtsapya ebisando bya Yesu omo mĩsonĩa yiwe. Neryo mwasangula ebisando bya Yesu omo nzwiri sy'omutwe wuwe, n'eriryatsirirabyo, neryo mũrũlĩra amagũta ayo awakakumba ndeke kutsibu oko bisando biwe. 39Neryo omugulu Omũfarĩsayo oyo wabirikira Yesu alangira ekyo, mwayibwira omwisi wuwe ati, Kumbe omundu oyũ nga nĩ mũmĩnyererĩ, kumbe angaminyerera omũkalĩ oyũkamũtũlako, n'omũsĩndo wuwe kw'ali mukola-nabi. 40Neryo Yesu mwabwira Sĩmonĩ ati, Sĩmonĩ nyiwite eky'erikubwira. Naye ati, Mũkangĩrĩrya, ũtũlego. 41Neryo Yesu mwabũga ati, Mohabya omũbwekĩ muguma w'esyofranka oyo wabweka abandu babiri. Abandu aba babya k'omwĩnda, omuguma w'esyofranka magana atanu, n'ogundi amakũmĩ atanu. 42Babere babula eby'erĩmũtũha, omũbwekĩ oyũ mwabuyira ababiri bosĩ. Nĩkwa nindi wa kubo yo wasyamwanza kwilaba kwehĩ? 43Sĩmonĩ mwamũsũbĩrya ati, Mbino oyo abuyira bingi. Neryo Yesu mwamubwira ati, Wamatswera ndeke. 44Neryo mwakebera omũkalĩ oyo, mwabwira Sĩmonĩ ati, Wamalangira omũkalĩ oyũ kwehĩ? Mongingira omo nyũmba yawe; mutetamba amagetsi busana n'ebisando byage, nĩkwa iye abĩrĩtsapya ebisando byage omo mĩsonĩa yiwe n'erisangulabyo omo nzwiri siwe. 45Mũtetanyĩkokya n'erinyiryatsirira; nĩkwa iye erĩtsũka omugulu indingira sĩalĩtũmbya eriryatsirira ebisando byage. 46Mutetahakabya omutwe wage w'amagũta, nĩkwa iye abĩrĩhakabya ebisando byage omo magũta awakakumba ndeke kutsibu. 47Kikaleka inakubwira nyiti, Ebibi biwe bingi byabiribuyirwa, kusangwa abirianza kutsibu; nĩkwa oyukabuyirawa bike, akanza hake. 48Neryo Yesu mwabwira omũkalĩ oyo ati, Ebibi byawe byamabibuyirwa. 49Neryo ababya okw'irya haguma naye, mobatsũka erĩbũga bati, Oyũ nindi oyukabuyira ebibi kwehĩ? 50Neryo Yesu mwabwira omũkalĩ ati, Erĩkĩrĩrya lyawe lyamakũlamya; ugende buholo.

will be added

X\