LŨKA 6

1Yesu abere akalaba omo malima w'engano omo kiro ky'eSabato. Abiga buwe babya bakatwa amakũndĩ w'engano ĩbakanyũgũsũlago omo byala byabo ibanemulyayo. 2Nĩkwa abandi b'oko Bafarĩsayo mobabũga bati, Busana nakĩ mukakola ebyo Migambo ĩkaganaya erikola omo Sabato kwehĩ? 3Yesu mwasũbĩryabo ati, Simwetasoma ekyo Dawĩdĩ akola omugulu akwa enzala, iye n'abandu buwe? 4Mwingira omo nyũmba ya Nyamuhanga, kandi mwĩmya amandu awahigulawa busana na Nyamuhanga. Neryo mwalya kugo, kandi mwahago oko bandu buwe. Nĩkwa Emigambo ĩkaganaya abandu erirya kugo, ba n'abahererĩ basa. 5Neryo Yesu mwabwirabo ati, Omugala w'omundu ni Mukama w'eSabato. 6Oko yindi Sabato Yesu mwaya omo nyũmba y'erĩhĩndanamo mwakangĩrĩrya. N'eyo habya omundu oyũlehemĩre kw'ebyala biwe by'amali. 7Neryo abakangĩrĩrya b'Emigambo n'Abafarĩsayo mobalebya Yesu ng'akandĩlamya omo kiro ky'eSabato, ibatoka erimutsongera. 8Nĩkwa Yesu mwaminya obũlengekanĩa bwabo, neryo mwabwira omundu oyũlehemĩre kw'ebyala biwe ati, Uhangane, wimane embere eno. Neryo mwahangana, mwimanaho. 9Neryo Yesu mwabwirabo ati, Ngababũlaya nyiti, nga linatolere omo Migambo erikola ebibuya omo kiro ky'eSabato, kutse erikola nabi, erĩlamya engebe y'omundu, kutse erĩheryayo kwehĩ? 10Neryo Yesu mwatĩmbya ameso wuwe oko bosĩ, neryo mwabwira omundu oyo ati, Ulambule ebyala byawe, Neryo omundu oyo mwakola atya, n'ebyala biwe mobyalama. 11Nĩkwa mobahitana kutsibu, mobakanĩa haguma ebyo bangakola uku Yesu. 12Oko mugulu oyo Yesu mwaya oko kitwa eriyasabirayo, neryo mwasiba omo kiro kyosĩ erisaba Nyamuhanga. 13Neryo bwabere bwakya, mwabirikira abiga buwe, neryo mwayisoga ĩkũmĩ n'ababiri kubo, mwahulabo mo bakwenda. 14Ye Sĩmonĩ, oyo ahula mo Petero, na Anderea mugala wabo; Yakobo na Yoane; Fĩlĩpo na Bartolomayo; 15Matayo; na Toma; na Yakobo mugala wa Alufayo, na Sĩmonĩ oyo wahulawa mo Zelote; 16na Yũda Ĩskarĩota, oyo wamuhotera. 17Neryo Yesu mwandagala akalũa oko kitwa, neryo mwahangana ahabondere haguma n'endeko nene y'abiga buwe. Kandi endeko nene y'abandu yabyaho eyalũa eYũdea hosĩ, n'eYerũsalema, n'oko mũsĩke w'eTĩro n'eSĩdona, mobasa erimuhulikirira, n'erĩlamĩbwa kw'esyondwala syabo. 18N'abagalawa n'ebĩrĩmũ bibi, mobalamibwa. 19N'abandu bosĩ mobasonda-sonda erĩmũtũlako, kusangwa obũtokĩ bwabya bũkamũlũako n'erĩlamya abosĩ. 20N'erisamalira abiga buwe, Yesu mwatsũka erĩbũga ati, Obutseme buli nenyũ ĩnywe bera, kusangwa obwami bwa Nyamuhanga nĩ bwenyũ! 21Obutseme buli nenyũ ĩnywe mũkakwa enzala yo lino, Mwasyũgũtĩbwa! Obutseme buli nenyũ inywe mukalira lino, kusangwa mwasyaseka! 22Obutseme buli nenyũ omugulu abandu bakabakwa obusu, n'eribagana, n'eribatsuma, n'eribahula bati, Muli babi, busana n'Omugala w'Omundu! 23Mutseme ekiro ekyo, muyisumbe omo butseme, kusangwa, oluhembo lwenyũ ni lungi elubula; kusangwa aboso-kulu wabo mobakola abamĩnyererĩ bo batya. 24Nĩkwa obũlĩge kwĩnywe abateke, kusangwa mwabĩrĩkala mbolere! 25Obũlĩge kwĩnywe mwabĩrĩũgũta lino, kusangwa mwasyawira! Obũlĩge kwĩnywe mukaseka lino, kusangwa mwasyasũsũmana n'eririra! 26Obũlĩge kwĩnywe omugulu abandu bosĩ basyabahula ndeke, kusangwa aboso-kulu wabo mobakola abamĩnyererĩ b'amabehĩ bo batya. 27Nĩkwa ngabũga nenyũ ĩnywe mũkanyowa nyiti, Mwanze esyonzĩgũ syenyũ, abakabakwa obusu mukolerebo ndeke. 28Mutsumule abakabatakira, musabire abakabakola nabi n'epono. 29Oyũkakũswĩraya okw'ĩtema, ũmũbĩndũkĩraye n'erindi; n'oyũkakũhũnga kw'erĩkotĩ ryawe, ũleke aheke n'ekanzu yawe nibya. 30Uhe obuli mundu oyũkakũbũlaya ekindu, n'oyũkakũhũnga kw'ebyawe, sũmũbũlayebyo kandi. 31Ngoko mwanzĩre abandu ibabakolera, nenyũ ko munakolerebo mutya. 32Kandi mwamanza ababanzĩre, ĩmwamowanĩa kyahĩ kwehĩ? Kusangwa abakola-nabi nabo bakakola barya. 33Kandi mwamakola ndeke abakabayira ndeke, ĩmwamowanĩa kyahi kwehĩ? Kusangwa abakola nabi nabo bakakola batya. 34Kandi mwamabweka abandu imune n'amaha w'erĩswatũhwa, ĩmwamowanĩa kyahi kwehĩ? Abakola-nabi nabo bakabweka oko bakola-nabi ĩbaswatũhwa ebiringene nabyo. 35Nĩkwa mwanze esyonzĩgũ syenyũ, mukolerebo ebibuya, mubweke, simusonde eribwekulwa. N'oluhembo lwenyũ lwasyabya lungi, kandi nenyũ mwasyabya bagala b'Owendata Kutsibu; kusangwa ni mwenge oko batesĩma n'abandu babi. 36Mubye n'eriganyira ngoko Tata wenyũ ali n'eriganyira. 37Simutswere abandi, na Nyamuhanga siendisyabatswera; sĩmũhĩre abandu b'omo musango, neryo Nyamuhanga siendisyabahĩra omo musango; mubuyire, neryo Nyamuhanga asyababuyira. 38Mũhĩtaye, na Nyamuhanga asyabaha, mwasyabagalira olulengo lowene, olũsokĩre, olũtsĩngĩre, oluli kw'omutswago. Kusangwa olulengo olo mukalengamo, mwasyalengerwalo. 39Neryo Yesu mwatwĩrabo omũsyo ati, Endĩmatĩme yanganatoka erisondola eyindi ndĩmatĩme kwehĩ? Ababiri sibendisyatogera omo kyũna kwehĩ? 40Omwiga sĩalengĩre omũkangĩrĩrya wuwe; nĩkwa obuli mundu ukiga amabibuga erĩĩgĩsĩbwa asyabya ng'omũkangĩrĩrya wuwe. 41Kandi busana nakĩ ukasamalira akati akali omo lĩso lya mũlĩkyenyũ, nĩkwa sulilangira ekĩtĩka ekiri omo lĩso lyawe kwehĩ? 42Kutse wangatoka eribwira mũlĩkyenyũ uti kwehĩ? Uti, Mũlĩkyetu, uleke nyilole akati akali omo lĩso lyawe, nawe isulilangira ekĩtĩka ekiri omo lĩso lyawe. Uwe mũtebya, ũtsũke erilola ekĩtĩka ekiri omo lĩso lyawe, neryo wasyalangira ndeke erilola akati akali omo lĩso lya mũlĩkyenyũ. 43Kusangwa sihali omuti owene owakaheta kw'ebĩgũma bibi, kandi omuti mubi owakaheta kw'ebĩgũma byowene. 44Obuli muti akaminyikala busana n'ebĩgũma byago. Kusangwa abandu sibalioha ebĩgũma by'emĩtĩnĩ oko muti w'emisakisaki, kandi sibalioha ebĩgũma by'ebĩnyũ oko kisaka ky'amahwa. 45Omundu mubuya akahũlũkaya ebibuya by'omo kigona ky'emyatsi mibuya Y'omutima wuwe; n'omundu mubi akahũlũkaya emyatsi mibi omo kigona ky'emyatsi mibi y'omutima wuwe. Kusangwa obuno bũkabũga ebyoswĩre omo mutima. 46Busana nakĩ mukanyahula mo Mukama, Mukama, isimulikola ebyo ngababwira kwehĩ? 47Obuli mundu oyukasa kwĩngye, kandi akowa ebĩnywa byage n'erikolabyo ngandĩbakangya kw'asosĩre. 48Asosĩre ng'omundu wahĩmba enyũmba: mwatakula omwisi mo hali neryo mwahĩra ekibanza okw'ĩbwe. Neryo omugulu erigunga ly'amagetsi lyasa, olũsĩ molwayĩswĩrya oko nyũmba eyo neryo molutatoka erĩsũka-sũkanĩayo, kusangwa yabya yĩhĩmbĩre ndeke-ndeke. 49Nĩkwa omundu oyũkowa ebĩnywa byage atekolabyo, asosĩre omundu oyo wahĩmba enyũmba y'oko kitaka ahate kibanza; n'olũsĩ molwayĩswĩrya kuyo, neryo-neryo moyatera, n'erihera ly'enyũmba eyo molyabya ĩnene.

will be added

X\