LŨKA 5

1Neryo omugulu esyondeko syabya sikamũhatatanĩa bati bowe ekĩnywa kya Nyamuhanga, Yesu abya ahangene hakũhĩ n'engetsi y'eGenezaretĩ. 2Neryo Yesu mwalangira amato abiri iniane hakũhĩ n'omũsĩke w'engetsi; nĩkwa abasohĩ ĩbabĩrĩlũa omo mato ayo, n'erĩerya ebĩsohĩ byabo. 3Neryo Yesu mwingira omo bwato buguma obwabya bwa Sĩmonĩ, neryo mwamũbũlya ati asegerayebo omo ngetsi mo hake. Neryo Yesu mwĩkala omo bwato obo mwatsũka erĩkangĩrĩrya esyondeko, iniane omo bwato obo. 4Neryo Yesu abere abibuga erĩbũga, mwabwira Petero ati, Muye ahali omutobero, mũtogerayeho ebĩsohĩ byenyũ, musohe. 5Neryo Sĩmonĩ mwamũsũbĩrya ati, Mukama, bukere tukayitsinga kutsibu, neryo sĩtwetabanakĩ! Nĩkwa busana n'ekĩnywa kyawe ngandĩtogerya mw'ebĩsohĩ. 6Neryo babere babikola batya mobahamba amahere mangi n'ebĩsohĩ mobyasonda erĩtwĩka. 7Mobakoherya abalĩkyabo omo bundi bwato bati base bawatĩkayebo. Neryo mobasa mobũsũlya amato abiri mw'amahere, kyaleka amato iniasonda eritobera. 8Nĩkwa omugulu Sĩmonĩ Petero alangira ebyo, mwawa oko bisando bya Yesu ati, Mukama ũlũe hakũhĩ nage, kusangwa indi mundu mubi. 9Kusangwa mwasweka haguma n'abalĩkyabo bosĩ busana n'erihamba amahere ayo. 10Na Yakobo na Yoane, abagala ba Zebedayo, abasangira haguma nabo mobasweka nibya. Neryo Yesu mwabwira Sĩmonĩ ati, Sigubahe, erĩtsũka lino mukandisyasoha abandu. 11Neryo babere babireta amato wabo oko mũsĩke, mobasĩganĩa ebyosĩ. mobakwama Yesu. 12Neryo omugulu Yesu abya oko mũyĩ muguma, habya omundu oyũkwĩre ebihaga byo kutsibu; neryo abere alangira Yesu, mwalambama ahisi oko bũsũ buwe, mwamulemba-lemba ati, Mukama, wamabya, ũnanzĩre wangatoka erĩnyĩlamya. 13Neryo Yesu mwakakya ebyala biwe mwamũtũlako ati, Nyĩnanzĩre; ũlamĩbawe, neryo-neryo ebihaga biwe mobyamũlũako. 14Neryo Yesu mwamuhana ati, Sigubwire mundu, nĩkwa ugende ũyĩkanganaye oko mũhererĩ, kandi uhere obuhere bw'erĩyerya ngoko Musa ategeka, busana n'erĩmĩnyĩsyabo ko wabirilama. 15Nĩkwa engulu ya Yesu moyagenda-genda kutsibu, n'esyondeko nene mosyahĩndana erĩmowa n'erĩlamĩbwa oko syondwala syabo. 16Nĩkwa Yesu mwabya akagenda ahate bandu eriyasaba. 17Neryo ekiro kiguma Yesu abya akakangĩrĩrya, mohabya Abafarĩsayo n'abakangĩrĩrya b'Emigambo ĩbĩkereho, ĩbakalũa omo buli mũyĩ w'eGalĩlaya n'eYũdea n'eYerũsalema. Kandi obũtokĩ bw'Omukama bwabya haguma na Yesu erĩlamyabo. 18Neryo abandu mobaheka omundu oko ngyingo iniabiribasa. Neryo mobasonda-sonda erimuleta n'erĩmũhĩra emuliro wa Yesu. 19Neryo busana n'endeko, mobabula enzira y'erĩmwĩngĩryamo. Neryo mobasamba oko lutwe, mobahigula ebĩkayĩ, neryo mobamwandagalya omo katĩkatĩ embere sya Yesu iniane oko ngyingo yiwe. 20Neryo Yesu abere alangira erĩkĩrĩrya lyabo mwabũga ati, Mwĩra wage, ebibi byawe byamabibuyirwa. 21Neryo abakangĩrĩrya b'Emigambo n'Abafarĩsayo mobatsũka erĩganĩrya bati, Omundu oyukatsuma nindi kwehĩ? Sihali mundu oyukatoka eribuyira ebibi nina Nyamuhanga ĩyowene! 22Nĩkwa Yesu mwaminya amalengekanĩa wabo, neryo mwabwirabo ati, Busana nakĩ mũkaganĩraya emyatsi eyĩ y'omo mitima yenyũ kwehĩ? 23Ekyolo ni kyahi, erĩbũga, nyiti, Ebibi byawe byamabuyirwa, kutse erĩbũga nyiti, Hangana ugende, kwehĩ? 24Nĩkwa mutoke eriminya ngoko Mugala w'omundu ali n'ehamũlĩ muna-kihugo kino busana n'eribuyira ebibi, neryo mwabwira omundu oyũbasĩre ati, Ngakubwira nyiti, Hangana, wĩmaye engyingo yawe ugende eka wenyũ. 25Neryo-neryo mwahangana embere syabo, mwaheka engyingo abya agotsereko, mwaya eka wabo, inianemupipa Nyamuhanga. 26Neryo abosĩ mobasweka, mobatsũka eripipa Nyamuhanga; kandi mobubaha bati, Twamalangira emyatsi y'eriswekera mũnabwĩre. 27Enyũma w'emyatsi eyĩ, Yesu mwahuluka mwalangira omũsolesya oyukahulawa mo Lawĩ ĩnĩanĩkere aho bakasoleseraya. Neryo mwamubwira ati, Unyikwame 28Neryo Lawĩ mwahangana, mwasĩganĩa ebyosĩ, mwakwama Yesu. 29Neryo Lawĩ mwakokotya erirya ĩnene omo nyũmba yiwe busana na Yesu. Neryo mohabya endeko nene y'abasolesya n'abandi bandu ababya bakalira haguma nabo. 30Neryo Abafarĩsayo n'abakangĩrĩrya b'Emigambo babo mobayikuna oko biga buwe, bati, Busana nakĩ mukalya n'erĩpũlya haguma n'abasolesya n'abakola-nabi kwehĩ? 31Yesu mwasũbĩryabo ati, Abakalĩre sibali n'obwaga bw'omunganga, nĩkwa abalwere. 32Mondasa eribirikira abandu batunganene, nĩkwa eribirikira abakola-nabi, babindule emitima yabo erireka ebibi. 33Neryo mobabwira Yesu bati, Abiga ba Yoane, bakatsira akalyo engendo nyingi, n'erisaba; n'abiga b'Abafarĩsayo bakakola batya nibya; nĩkwa abiga bawe bakalya, bakapũlaya. 34Neryo Yesu mwabwirabo ati, Mwanganatoka erĩtsĩrĩsya akalyo oko bĩra b'ĩba w'omũherũkĩ omugulu akine nabo kwehĩ? 35Nĩkwa ebiro byasyasa omugulu ĩba w'omũherũkĩ asyalũsĩbwa kubo, neryo oko mugulu oyo basyatsira akalyo. 36Kandi Yesu mwatwĩrabo omũsyo ati, Sihali mundu oyũkatwa ekitomeko ky'olukimba luhya-luhya, n'erĩhĩrakyo oko lukimba lwa kera.. Amayira atya akandĩtsandya olukimba luhya-luhya. Kandi ekitomeko ky'oluhya-luhya sĩkyendĩsyowana omo lukimba lwa kera. 37Kandi sihali mundu oyũkũtũlĩra ebĩnyũ bihya-bihya omo bihu bikulu-kulu by'ebĩnyũ. Amayira atya, ebĩnyũ bihya-bihya bikatula ebihu ĩbyũtĩka, n'ebihu ibyatsanda. 38Nĩkwa ebĩnyũ bihya-bihya bitolere ĩbyahĩrwa omo bihu bihya-bihya by'ebĩnyũ. 39Kandi sihali omundu amabĩpũlya ebĩnyũ bya kera oyukaswasonda ebihya-bihya; ati, Ebya kera byo byowene.

will be added

X\