LŨKA 4

1Yesu mwasubula akalũa eYorodanĩ, ĩnĩoswĩre n'Omũlĩmũ Abũyĩrĩre, neryo mwasondolwa n'Omũlĩmũ omo mbwarara. 2Neryo Satanĩ moyamulengako omo biro amakũmĩ ani. Kandi mwatalya kindu omo biro ebyo, kyaleka ĩnĩakwa enzala ebiro ebyo byabihwa. 3Neryo Satanĩ moyamubwira iti, Wamabya uli Mugala wa Nyamuhanga, ubwire erĩbwe erĩ ribye bundu. 4Yesu mwasũbĩryayo ati, Amasako akabũga ati, Omundu siendĩsyabyaho busana n'obundu ĩbobwene. 5Neryo Satanĩ moyamutwala endata, moyamũkangya amami gosĩ w'ekihũgo oko katambĩ kake ng'erĩkohya ly'erĩso. 6Neryo Satanĩ moyamubwira iti, Ngandikuha ehamũlĩ yosĩ n'olukengerwa lwago, kusangwa nabirihabwabyo, nage ngahabyo ukw'oyo nyanzĩre erimuha. 7Ebyosĩ ebĩ byasyabya byawe, wamanyĩramya. 8Yesu mwasũbĩryayo ati, Amasako ati, Wasyaramya Omukama Nyamuhanga wawe iwamukolera ĩyowene. 9Neryo Satanĩ moyamutwala, moyamuhĩra oko litungulu ly'eHekalũ neryo moyabũga naye iti, Wamabya uli Mugala wa Nyamuhanga, uyiguse ahisi, 10kusangwa Amasako ati, Nyamũhanga asyahamula abamalaĩka buwe erĩkũteya. 11Kandi, Basyakubagalira, Isiwahuma ekisando kyawe ky'okw'ĩbwe. 12Yesu mwasũbĩryayo ati, Amasako ati, Susyerenga oko Mukama Nyamuhanga wawe. 13Neryo omugulu Satanĩ yabuga erirenga lyosĩ, moyaleka Yesu eritaswalinda ogundi mugulu. 14Neryo Yesu mwasuba eGalĩlaya, n'obũtokĩ bw'Omũlĩmũ Abũyĩrĩre bwabya haguma naye. Engulu yiwe moyagenda-genda omo kihugo kyosĩ ekyo; 15Neryo mwakangĩrĩrya omo manyũmba wabo w'erĩhĩndanamo, iniakapipawa n'abandu bosĩ. 16Neryo Yesu mwaya eNazaretĩ aho akulira, n'oko kiro ky'eSabato mwaya omo nyũmba y'erĩhĩndanamo ng'emibere yiwe. Neryo mwahangana erisoma Amasako. 17Neryo mobamuha ekitabu ky'omũmĩnyererĩ Ĩsaya. Neryo mwalĩngola ekitabu ekyo, mwabana ahasakĩre hati, 18Omũlĩmũ w'Omukama ali kwĩngye, Kusangwa abĩrĩnyĩhakabya erĩtũla Engulu Yowene y'oko bera, Abĩrinyituma erĩtũlĩra obwĩranda oko banyegawa, N'eriswaha erilangira oko syondĩmatĩme, Eribohola abakanũbĩbawa, 19Erĩtũla omwatsi w'omwaka ogo Mukama asyalamya abandu buwe. 20Yesu mwalĩnga ekitabu ekyo, mwasũbyakyo oko mũteya wakyo, neryo mwĩkala ahisi. Ameso w'abosĩ ababya omo nyũmba y'erĩhĩndanamo mwamutungerera. 21Neryo mwatsũka eribwirabo ati, Mũnabwĩre Amasako aya amabererera ngoko mũkabĩowa. 22N'abandu bosĩ mobabũga ndeke busana naye, kandi mobasweka busana n'ebĩnywa bibuya abũga. Bati, Oyũ si mugala wa Yosefũ kwehĩ? 23Neryo Yesu mwabũga nabo ati, Nyĩnasĩ mukandimbwira omũsyo oyũ ati, Omunganga, ũyĩlamaye; kandi mwasyambwira muti, Ukole hano eka wenyũ, ebyo wakola eKapernaũmũ ngoko towa, ubikole n'ena wenyũ eno. 24Neryo Yesu ati, Kwenene ngababwira nyiti, Sihali omũmĩnyererĩ oyũkakokĩbawa omo kihugo kiwe. 25Nĩkwa ngababwira kwenene oko mugulu wa Elĩa, habya abakwakalĩ bangi eĨsraeli. Oko mugulu oyo sihabya embũla oko myaka ĩsatu n'emikera ndatu, n'enzala nene moyahĩka omo kihugo kyosĩ. 26Nĩkwa Elĩa mwatatumwa kubo, ko n'oko mũkwakalĩ w'eZarepata, omo kihugo ky'eSĩdona. 27Kandi habya abahaga bangi eĨsraelĩ oko mugulu w'omũmĩnyererĩ Elĩsa; nĩkwa sihali oyo walamĩbawa, nina Namanĩ Omũsũrĩa. 28Abandu bosĩ ababya omo nyũmba y'erĩhindanamo omugulu bowa emyatsi eyĩ mobahitana kutsibu. 29Neryo mobahangana mobakurira Yesu y'ekyaswa, mobamutwala oko ngwangwa y'ekitwa aho mũyĩ wabo abya ahĩmbĩrwe, bati bakamugusa omo kikwangwa. 30Nĩkwa Yesu mwalaba omo katĩkatĩ kabo mwagenda omo nzira yiwe. 31Neryo Yesu mwandagalira eKapernaũmũ, omũyĩ w'eGalĩlaya. N'eyo abya akakangĩrĩrya bandũ omo kiro ky'eSabato. 32Abosĩ mobaswekera erĩkangĩrĩrya liwe, kusangwa ebĩnywa biwe byabya n'ehamũlĩ. 33Neryo habya mundu omo nyũmba y'erĩhĩndanamo oyuli kw'embĩnga y'ekĩrĩmũ kibi, iniakalaka kutsibu ati, 34Ĩlolo! Tuli na mwatsi wahi nawe uwe Yesu w'eNazaretĩ, kwehĩ? Wamasa erĩtũherya kwehĩ? Nyĩnakwasĩ, ni iwe Mũbũyĩrĩre wa Nyamuhanga! 35Neryo Yesu mwakungayo ati, Ubye bũkũtũ, ũmũlwĩke! N'embĩnga moyamulunda ahisi omo katĩkatĩ kabo, moyamũlũako isiritamukola nabi. 36N'abosĩ mobasweka, kandi mobatsũka erĩkanĩa haguma bati, Ekĩnywa ekĩ nĩkĩ kwehĩ? Kusangwa n'ehamũlĩ n'obũtokĩ omundu oyũ akahamula ebĩrĩmũ bibi, nabyo ĩbyalũamo. 37N'engulu yiwe moyatsungana ehosĩ omo kihugo ekyo. 38Neryo Yesu mwahangana mwalũa omo nyũmba y'erĩhĩndanamo, mwaya omo nyũmba ya Sĩmonĩ. Nĩkwa nyĩnyĩ-byala wa Sĩmonĩ abya alwere endwala y'erĩhũhana kutsibu, neryo mwalembalemba Yesu busana naye. 39Neryo Yesu mwaya hakũhĩ n'engyingo y'omũkonĩ, neryo mwakunga erĩhũhana eryo, nalyo molyamũlũako; neryo omũkonĩ mwahangana lũba, mwakolerabo. 40Nĩkwa eryuba lyabere lyalenga, abandu bosĩ ababya bawite abakonĩ b'esyondwala sy'emĩsĩndo-mĩsĩndo mobaletabo uku Yesu; naye mwahĩra ebyala biwe oko buli mũkonĩ mwalamyabo. 41N'esyombĩnga mosyalũa oko bandu bangi, sikalaka-laka kutsibu siti, Uli Mugala wa Nyamuhanga. Neryo Yesu mwakungasyo, kandi mwakagasyo erĩbũga kĩnywa, kusangwa syabya ĩsĩnasĩ kw'ali Kristo. 42Neryo bwabere bwabikya Yesu mwalũa oko mũyĩ oyo mwaya ahate bandu. Neryo esyondeko mosyamusonda-sonda neryo babere babimubana, mobalenga erĩmũkakĩrya bati sĩalũe kubo. 43Nĩkwa mwabwirabo ati, Litolere ĩnatũla Engulu Yowene y'obwami bwa Nyamuhanga oko yindi mĩyĩ nibya, kusangwa Nyamuhanga mwanyituma erikola omwatsi oyũ. 44Neryo Yesu mwatũla Engulu Yowene omo manyũmba w'erĩhĩndanamo eYũdea.

will be added

X\