LŨKA 3

1Neryo omo mwaka w'erĩkũmĩ n'eyĩtanu w'eritabala ly'Omukulu ye Tĩberĩo Kaĩsarĩ, Pontĩo Pilato abya mũtabalĩ w'eYũdea, na Herode abya mwami w'eGalĩlaya, na mugala wabo ye Fĩlĩpo abya mwami w'ekihugo ky'eĨtũrĩa n'eTerakonĩtĩ, na Lĩsanĩa abya mwami w'eAbĩlene, 2na Ana na Kayafa babya bahererĩ bakulu oko bahererĩ bosĩ. Oko mugulu oyũ ekĩnywa kya Nyamuhanga mokyahĩka uku Yoane mugala wa Zakarĩa, omo mbwarara. 3Neryo Yoane mwaya omo kihugo kyosĩ ky'olũsĩ lw'eYorodanĩ ĩnĩakatũlaganaya omwatsi, ati, Mubindule emitima yenyũ erireka ebibi, mũbatĩsĩbawe, na Nyamuhanga ababuyire ebibi byenyũ. 4Ngoko kĩsakĩre omo kitabu ky'omũmĩnyererĩ Ĩsaya kiti, Omulenge w'oyukabirikirira omo mbwarara, ati, Mowanaye enzira y'Omukama, Mũtũngananaye esyombalu siwe. 5Obuli musya asyosũlĩbwa, Obuli kitwa n'obuli katwa byasyabondererĩbwa; N'ebĩhengemĩre byasyatũngananĩbwa; N'esyonzira sĩtahalĩre syasyalĩngĩrĩra nĩbwa; 6N'abandu bosĩ basyalangira omulamo wa Nyamuhanga. 7Abandu bangi mobaya uku Yoane busana n'erĩbatĩsĩbwa. Nĩkwa mwabwirabo, ati, Ĩnywe bana b'esyonzoka! Nindi yo wababwira ati musage erihitana lya Nyamuhanga erikandisyasa kwehĩ? 8Neryo mukole emĩbĩrĩ eyikaleka abandu ibaminya ko mwabiribindula emitima yenyũ erireka ebibi. Sĩmũtsũke eriyibwira muti, Tuwite Abrahamũ mo tata wetu. Ngababwira nyiti, Nyamuhanga angatoka erĩhanganĩa amabwe aya mo bana busana na Abrahamũ. 9Na lino embasa ĩnĩkĩrye oko mĩrĩhĩ y'omuti, obuli muti owatehetaya ebĩgũma byowene akakondawa n'eriguswa omo muliro. 10Neryo abandu mobamũbũlya bati, Netu tũkolekĩ kwehĩ? 11Naye mwasũbĩryabo ati, Oyuwite ehisomeko hibiri, ahe akaguma oko yutawiteko, n'oyuwite akalyo ahe kuko kw'abandi 12Abandi basolesya mobahĩka erĩbatĩsĩbwa, mobamũbũlya bati, Mũkangĩrĩrya, netu tũkolekĩ kwehĩ? 13Neryo mwabwirabo ati, Sĩmwĩmaye ebĩlabĩre ebikahamulawa. 14Kandi abasĩrĩkanĩ mobamũbũlya bati, Netu, tũkolekĩ kwehĩ? Neryo mwabwirabo ati, Sĩmũhũnge esyofranka, kutse sĩmũsĩngĩsĩraye omundu n'erimulega, kandi mũsĩme ebihembo byenyũ. 15Neryo omugulu abandu babya bakaganĩrya omo mitima yabo ĩbakahĩra amaha uku Yoane ng'anganabya ini Kristo, 16Yoane mwabwirabo ati, Ngababatĩsaya omo magetsi, nĩkwa oyukasa anyĩrengĩrye amaka, nage sinyitolere erĩkũndũla emikoba y'oko ngendero siwe. Iye asyababatĩsya omo Mũlĩmũ Abũyĩrĩre n'omo muliro. 17Olugale luwe luli omo byala biwe, erĩgũlũkya engano omo kibuga kiwe, n'erĩhĩra engano omo kigona kiwe; nĩkwa asyahĩsya omusunga omo muliro owatehumbera. 18Neryo Yoane mwakanĩrya abandu b'Engulu Yowene omo mĩsĩndo mingi y'erihana. 19Nĩkwa Yoane mwakunga Herode omũtabalĩ w'eGalĩlaya, kusangwa abya ĩnĩabĩrĩherũkya Herodĩa, muka mugala wabo, kandi mwamukunga busana n'ebibi byosĩ akola. 20Neryo Herode mwakola ekitsibu kw'aho, mwahĩra Yoane y'omo mũlĩkĩ. 21Neryo abandu bosĩ babere babĩbatĩsĩbwa, Yesu naye nibya mwabatĩsĩbwa. Neryo omugulu abya akasaba olubula molwakingukala,. 22n'Omũlĩmũ Abũyĩrĩre mwamwandagalirako omw'isosa ly'omubiri w'akalĩkũkũ. Neryo omulenge mwalũa elubula ati, Uli Mugala wage mwanze, namakutsemera ndeke. 23Omugulu Yesu atsũka omũbĩrĩ wuwe, abya w'emyaka makũmĩ asatu; abandu mobaganĩrya, ambu ni mugala wa Yosefũ, oyo wabya mugala wa Helĩ, 24omugala wa Matatĩ, omugala wa Lawĩ, omugala wa Melkĩ, omugala wa Yanaĩ, omugala wa Yosefũ, 25omugala wa Matatĩa, omugala wa Amosĩ, omugala wa Nahũmũ, omugala wa Eslĩ, omugala wa Nage, 26omugala wa Matĩ, omugala wa Matatĩa, omugala wa Sĩmeĩ, omugala wa Yoseke, omugala wa Joda, 27omugala wa Yohana, omugala wa Resa, omugala wa Zerũbabelĩ, omugala wa Salatĩelĩ, omugala wa Nerĩ, 28omugala wa Melkĩ, omugala wa Adĩ, omugala wa Kosamũ omugala wa Elmadamu, omugala wa Erĩ, 29omugala wa Yose, omugala wa Elĩezerĩ, omugala wa Yorĩmũ, omugala wa Matatĩ, omugala wa Lawĩ, 30omugala wa Sĩmeonĩ, omugala wa Yũda, omugala wa Yosefũ, omugala wa Yonamũ, omugala wa Elĩakĩmũ, 31omugala wa Mela, omugala wa Menana, omugala wa Matata, omugala wa Natanĩ, omugala wa Dawĩdĩ, 32omugala wa Yese, omugala wa Obedĩ, omugala wa Boazĩ, omugala wa Salmonĩ, omugala wa Nasonĩ, 33omugala wa Amĩnadabu, omugala wa Ramũ, omugala wa Hesĩronĩ, omugala wa Peresĩ, omugala wa Yũda, 34omugala wa Yakobo, omugala wa Ĩsaka, omugala wa Abrahamũ, omugala wa Tera, omugala wa Nahorĩ, 35omugala wa Serũgũ, omugala wa Reũ, omugala wa Pelegĩ, omugala wa Ĩberĩ, omugala wa Sela, 36omugala wa Kaĩnana, omugala wa Arpakĩsadĩ, omugala wa Semũ, omugala wa Noa, omugala wa Lameke, 37omugala wa Metũsela, omugala wa Enoka, omugala wa Yeredĩ, omugala wa Mahalalelĩ, omugala wa Kaĩnana, 38omugala wa Enosĩ, omugala wa Setĩ, omugala wa Adamu, omugala wa Nyamuhanga.

will be added

X\