LŨKA 24

1Nĩkwa oko kiro ky'erĩtsũka eyenga, omugulu kyatsũka erikya, abakalĩ mobahĩka oko yisinda, bakaleta amanũkato ago bakokotaya. 2Neryo mobeya erĩbwe ĩryabĩrĩkũmbagalĩbwa lĩkalũa okw'isinda. 3Neryo mobingiramo, nĩkwa mobatabana m'omubiri w'Omukama Yesu. 4Neryo omugulu batika-tika busana n'omwatsi oyũ, lebaya, abandu babiri abambite esyongimba sĩkangabasenĩe mobabutukiraho hakũhĩ nabo. 5Abakalĩ abo mobubaha mobatũlama ahisi. Neryo abandu abo mobabũlyabo bati, Busana nakĩ mukasonda-sondera oyuliho omo katĩkatĩ k'abaholĩre kwehĩ? 6Siali hano, abĩrĩlũbũka. Mwibuke ngoko ababwira iniakine eGalĩlaya, 7ati, Omugala, w'Omundu atolere erihoterwa oko bandu b'ebibi, n'eribambwa oko musalaba neryo enyũma w'ebiro bisatu ĩnĩalũbũka. 8Neryo abakalĩ abo mobibuka ebĩnywa biwe, 9mobasubula bakalũa okw'isinda, mobabwira abiga ĩkũmĩ n'omuguma n'abandi bosĩ emyatsi yosĩ eyĩ. 10Abakalĩ abo babya Marĩa Magdalene, na Yoana, na Marĩa, nya Yakobo, n'abandi bakalĩ haguma nabo, mobabwira abakwenda b'emyatsi eyĩ. 11Nĩkwa abakwenda mobaganĩrya ebĩnywa ebyo abakalĩ batũla nga buyira, mobatĩkĩrĩryabo. 12Nĩkwa Petero mwahangana, mwatibita okw'isinda; neryo Petero mũnama mwakengemereramo, mwalangira esyongimba sy'ekĩtanĩ nyisa. Neryo mwasuba ewuwe akaswekera ebyabere. 13Neryo oko kiro ekyo ababiri ba kubo babya bakagenda oko kayĩ akakahulawa mo Emaũ, olugendo lw'ebilometre ĩkũmĩ na kiguma erĩlũa eYerũsalema. 14Nĩkwa babya bakakanĩa haguma emyatsi yosĩ eyabere. 15Neryo babere banemũkanĩa n'erĩbũlanĩa Yesu ĩyowene mwasegera hakũhĩ nabo mwatsũka erĩgendanĩa haguma nabo. 16Nĩkwa ameso wabo mwabya omo bũlĩme mobataswamuminya. 17Yesu mwabũlyabo ati, Ko nĩ bĩnywa byahĩ ebyo mũkakanaya n'erĩbũlanĩa omugulu mukagenda kwehĩ? Nabo mobimana ĩbanakwĩre engitsi. 18Omuguma wa kubo oyukahulawa mo Kleopa mwamũsũbĩrya ati, Kwe nina we wowene ukabungira eYerũsalema ũtasĩ ebyabere eno omo biro ebĩ kwehĩ? 19Neryo Yesu mwabũlyabo ati, Ni myatsi yahi kwehĩ? Nabo bati, Emyatsi ya Yesu Mũnazaretĩ oyo wabya mũmĩnyererĩ w'amaka manene omo mĩbĩrĩ n'omo bĩnywa omo meso wa Nyamuhanga n'abandu bosĩ. 20Nĩkwa abahererĩ bakulu n'abatabalĩ betu mobamuhotera bati atswerawe okw'ihola, neryo mobamũbambĩre oko musalaba. 21Nĩkwa ĩtwe twabya n'amaha tuti yũkandĩtongolya Ĩsraelĩ. Kandi, hamatakya biro bisatu enyũma w'emyatsi eyĩ. 22Kandi abakalĩ b'omo ndeko yetu babĩrĩtũswekya. Mobakaya okw'isinda omo ngyakya-ngyakya. 23Nĩkwa mobatiteyamo omubiri wuwe. Neryo mobakasubula bati bamalola oko bamalaĩka omo bũlĩme abalyabwirabo bati aneho. 24Neryo abandi b'endeko yetu mobakaya okw'isinda mobakegaya iko bine ngoko abakalĩ balĩabũga, nĩkwa mobatetamulolako. 25Neryo Yesu mwabwirabo ati, Ĩnywe muli bakĩrũ, muli bolo omo mitima okw'ĩkĩrĩrya ebyosĩ abamĩnyererĩ babĩrĩbũga! 26Sikyabya kitolere Kristo iniagalwa omo myatsi eyĩ n'eriingira omo lukengerwa luwe kwehi? 27Neryo Yesu mwakanĩryabo emyatsi yiwe eyiri omo Masako erĩtsũka omo bitabu bya Musa n'amasako w'abamĩnyererĩ bosĩ. 28Neryo mobahĩka hakũhĩ n'akayĩ ako babya bakayako, neryo Yesu mwabya ng'akalabira embere. 29Nĩkwa mobahatikana Yesu bati, Wĩkale netu kusangwa bukahumbera, n'omwĩrĩmya ali hakũhĩ. Neryo Yesu mwingira erĩĩkala nabo. 30Neryo abere ĩkala oko mesa haguma nabo, mwĩmya obundu mwatsumulabo, mwatsũtsangabo, mwahabobo. 31N'ameso wabo mwalĩbũkala neryo mobamuminya, neryo Yesu mwabulirana omo meso wabo. 32Nabo mobabwirana bati, Emitima yetu moyĩtetahũhana omwisi wetu akakanĩa netu omo nzira, n'omugulu alyatũkanĩraya Amasako kwehĩ? 33Neryo mobahangana oko ndambĩ eyo mobasuba eYerũsalema, mobeya abiga erĩkũmĩ n'omuguma ĩbama bĩhĩndana haguma n'abandi ababya haguma nabo, 34bati, Omukama abĩrĩlũbũka kwenene, kandi abiributukira Sĩmonĩ. 35Neryo ababiri abo mobakanĩryabo ebyabere omo nzira, kandi ngoko bamuminyerera akatsũtsanga obundu. 36Neryo omugulu babya bakabwirabo emyatsi eyĩ, Yesu ĩyowene mwahangana omo katĩkatĩ kabo, mwabwirabo ati, Obuholo bubye nenyũ! 37Nĩkwa mobasĩsĩra, mobubaha, mobaganĩrya bati bamalangira kĩrĩmũ. 38Nĩkwa mwabũlyabo ati, Busana nakĩ mũkahahũkaya emitima kwehĩ? Kandi busana nakĩ mukatika-tika omo mitima yenyũ kwehĩ? 39Mulangire ebyala byage n'ebisando byage, kw'indi ĩnĩna ngye. Mũnyĩtũleko mulangire, kusangwa ekĩrĩmũ sikiwite omũnyokũ n'amakũha ngoko mukalangira inyinawitebyo. 40Neryo abere abĩbũga ebĩ, mwakangyabo ebyala biwe n'ebisando biwe. 41Neryo omugulu babya bakine bũtĩkĩrĩrya busana n'obutseme n'erisweka, Yesu mwabũga nabo ati, Munawite eky'erirya hano kwehĩ? 42Nabo mobamuha ekitswe ky'erĩhere ekĩhũkĩre. 43Yesu mwĩmyalyo, mwalyalyo embere syabo. 44Neryo Yesu mwabwirabo ati, Ebĩ bye bĩnywa nababwira nyikine haguma nenyũ; emyatsi yosĩ eyasakawa busana nage omo Migambo ya Musa n'ebitabu by'abamĩnyererĩ n'omo Syonyimbo, yabya itolere iyabererera. 45Neryo mwalĩbũla amalengekanĩa wabo eriminya Amasako. 46Kandi Yesu mwabwirabo ati, Kĩsakĩre kiti, Kristo atolere eriagalwa n'erĩlũbũka enyũma w'ebiro bisatu. 47Kandi kiti, Omo lĩna liwe omwatsi w'eribindula omutima n'erireka ebibi, n'eribuyira ly'ebibi litolere ĩbyatũlaganĩbwa oko bihanda byosĩ, erĩtsũka eYerũsalema. 48Ĩnywe muli abalangĩrĩ b'emyatsi eyĩ. 49Neryo mũlebaye, ngabatumira erilaga lya Tata wage; nĩkwa mulinde omo mũyĩ erĩhĩka aho obũtokĩ bũkalũa endata, bwasyabandagalirako. 50Neryo mwasondolabo eyĩhya oko mũyĩ erĩhĩka eBetanĩa, neryo mwasumbira ebyala biwe by'endata n'eritsumulabo. 51Neryo abere akatsumulabo mwayigabula kubo mwatwalwa elubula. 52Neryo mobamũramya mobasuba eYerũsalema n'obutseme bunene. 53Kandi mobasiba omugulu gosĩ omo Hekalũ n'eripipa Nyamuhanga.

will be added

X\