LŨKA 23

1Neryo endeko yosĩ eyo moyahangana mobatwala Yesu embere sya Pilato. 2Neryo mobatsũka erĩhandĩkĩrĩrya Yesu bati, Motweya omundu oyũ ĩnĩakatalaya ekihanda kyetu, n'eritukaga erisolera Kaĩsarĩ. Kandi akabũga ati iye ni Kristo yo mwami. 3Pilato mwamũbũlya ati, Uli mwami w'Abayũda kwehĩ? Yesu mwamũsũbĩrya ati, Wamabũgakyo. 4Neryo Pilato mwabwira abahererĩ bakulu n'esyondeko ati, Sinditabana oko mundu oyũ ko musango. 5Nĩkwa mobahatikana kutsibu bati, Akakola-kolaya bandu, ĩnĩakakangĩrĩraya eYũdea hosĩ, erĩtsũka eGalĩlaya erĩhĩka n'eno. 6Nĩkwa Pilato abere owa ekĩ, mwabũlya Yesu nga ni Munya Galĩlaya. 7Neryo abere abiminya ko Yesu abya w'ehamũlĩ ya Herode, mwamutuma uku Herode, kusangwa Herode abya eYerũsalema omo biro ebyo. 8Neryo Herode mwatsema kutsibu abere alangira Yesu; kusangwa erĩtsũka kera abya akasonda erimulolako, kandi kusangwa abya akowa engulu yiwe, kandi ĩnĩabĩrĩhĩra amaha w'erilola oko kitiko-tiko ekyo akakola. 9Neryo Herode mwabũlya Yesu emyatsi mingi, nĩkwa Yesu mwatamũsũbĩryakĩ. 10N'abahererĩ bakulu n'abakangĩrĩrya b'Emigambo babya bimeneho bakahandĩkĩrĩrya Yesu yo kutsibu. 11Neryo Herode n'abasĩrĩkanĩ buwe, mobasekererya Yesu n'erimupona. Neryo mobambalya Yesu olukimba lũkangabasenĩe, mobamũsũbya eyiri Pilato. 12Oko kiro ekyo Herode na Pilato mobaswabya bwĩra oko bwĩra, kusangwa embere w'aho ibali n'obũyĩgũ omo katĩkatĩ kabo. 13Neryo Pilato mwabirikirira haguma abahererĩ bakulu, n'abatabalĩ b'abandu, 14mwabwirabo ati, Mwamandetera omundu oyũ muti, akatalaya abandu. Nabĩrĩmũtondesya embere syenyũ, sinditamubana ko musango omo myatsi eyo mukamũhandĩkĩrĩraya. 15Kandi Herode mwatamubana ko musango, kusangwa amamũsũbya ũkw'ĩtwe, neryo, lebaya, sialitakola mwatsi owatolere erĩĩtwa. 16Neryo ngandimusuyira n'erimubohola. [ 17Oko buli Biro Bikulu by'Erikiruka kyabya kitolere akabohola busana nabo omundu muguma w'omũlĩkĩ.] 18Nĩkwa endeko yosĩ moyabirikira haguma bati, Omundu oyo akwe, utoboholere Baraba! 19Baraba abya oyo wagusawa omo mũlĩkĩ busana n'obwanĩse omo mũyĩ na busana n'erĩĩta abandu. 20Pilato abya anzĩre eribohola Yesu, neryo mwaswabũlya endeko eyo. 21Nĩkwa mobabirikira kutsibu bati, Umubambe oko musalaba! Umubambe oko musalaba! 22Neryo Pilato mwabũga nabo engendo y'akasatu ati, Omundu oyũ abirikola kibi kyahi kwehĩ? Sinditabana omwatsi owangaleka ĩnĩakwa. Ngandimusuyira n'erimubohola. 23Nĩkwa endeko moyahatikana n'emirenge minene bati ĩtawe oko musalaba! Neryo emirenge yabo moyasĩnga. 24Neryo Pilato mwatwa omwatsi ati, ekyo bakabũlaya kikolawe. 25Neryo mwabohola omundu oyo basonda, oyo wagusawa omo mũlĩkĩ busana n'obwanĩse n'erĩĩta abandu, nĩkwa mwahererya Yesu yo kubo ati bakole ngoko banzĩre. 26Neryo babere bakatwala Yesu, mobahamba Sĩmonĩ w'eKũrene oyo wabya akalũa omolĩ, neryo mobamũhekya omusalaba bati ahekego enyũma wa Yesu. 27N'endeko nene y'abandu moyakwama Yesu, n'abakalĩ abamulirirako n'erĩmũsũsũmanira. 28Nĩkwa Yesu mwakeberabo ati, Ĩnywe bakalĩ b'eYerũsalema! Simulire busana nage, nĩkwa mulire busana nenyũ n'abana benyũ. 29Kusangwa ebiro byasyasa omugulu basyabũga bati, Obutseme buli oko bagumba, n'esyonda esitalitaheka makule na kera, n'amabere awatalibawako na kera! 30Neryo abandu basyatsũka erĩbũga n'ebitwa bati, Mututerereko! n'oko hitwa, Mũtũbĩse! 31Kusangwa emyatsi ng'eyĩ yamakolwa oko muti mubisi, yasyabya yiti oko muti ogũmĩre kwehĩ? 32Kandi mobahamba abandi babiri, abakola-nabi, erĩĩtabo haguma na Yesu. 33Neryo babere bahĩka aho ahakahulawa mo Aherĩhanga, mobabamba Yesu y'oko musalaba n'abakola-nabi abo, omuguma oko luhande lw'amali, n'ogundi oko luhande lw'amalembe. 34Nĩkwa Yesu mwabũga ati, Tata ubuyirebo kusangwa sĩbasĩ ekyo bakakola! Kandi mobakanga obukanga, erigaba esyongimba siwe omo katĩkatĩ kabo. 35Abandu nabo mobahanganaho bakasamalira. N'abatabalĩ nabo mobasekererya Yesu bati, Mwalamya abandi; naye ayĩlamaye amabya ini Kristo oyo wayisogawa na Nyamuhanga. 36N'abasĩrĩkanĩ mobamũsekererya, ĩbakamũhĩkako n'erimuha epada, 37bati, Wamabya uli Mwami w'Abayũda, ũyĩlamaye! 38Neryo endata oko musalaba habya hasakĩrwe amasako aya ati, OYO NI MWAMI W'ABAYŨDA. 39Kandi omuguma g'oko bakola-nabi abahanikawaho mwatsuma Yesu ati, Suli Kristo kwehĩ? Ũyĩlamaye iwe netu! 40Nĩkwa ogundi mukola-nabi mwamũsũbĩrya, mwamukunga ati, Suliubaha Nyamuhanga kwehĩ? Kusangwa nawe uli k'omusango owali ng'oyũ. 41Omusango wetu atunganene, kusangwa ĩtwe tukabana oluhembo olutolere emĩbĩrĩ yetu; nĩkwa omundu oyũ sialitakola ekibi. 42Neryo mwabwira Yesu ati, Yesu unyibuke omugulu ukasa omo bwami bwawe! 43Neryo Yesu mwamubwira ati, Kwenene ngabũga nawe, mũnabwĩre ukandibya haguma nage omo Paradĩso. 44Neryo yabya nga saa ndatu, n'omwĩrĩmya mwabya omo kihugo kyosĩ erĩhĩka oko saa mwenda. 45Neryo ekyakakala ky'eryuba mokyabula; n'olukimba olũkasũkũlĩraya ol'omo Hekalũ molwasatĩbwa mo bihande bibiri. 46Neryo Yesu mwabirikira n'omulenge munene ati, Tata, ngahĩra ekĩrĩmũ kyage omo byala byawe! Neryo abere abĩbũga ebĩ, mwalekula. 47Nĩkwa omugulu omukulu w'abasĩrĩkanĩ alangira emyatsi eyĩ, mwapipa Nyamuhanga ati, Kwenene omundu oyũ alwe mundu utunganene. 48N'esyondeko syosĩ esyahĩndana busana n'erilangira ekitsibu ekĩ, babere babilangira emyatsi eyĩ mobasuba ewabo, ibanemuhumanga oko bĩkũba byabo. 49N'abosĩ ababya basĩ Yesu, n'abakalĩ abamukwama bakalũa eGalĩlaya, mobahangana hali hake; bakalangira emyatsi eyĩ. 50Nĩkwa habya omundu oyukahulawa mo Yosefũ w'eArĩmatea, omũyĩ w'Abayũda. Yosefũ abya mundu mubuya, n'oyutunganene ini mundu w'omw'ĩbũgĩro. 51Iye mwatalĩga embĩta yabo n'erikola lyabo. Kandi abya akalinda obwami bwa Nyamuhanga. 52Yosefũ oyũ mwaya uku Pilato, mwamusaba omubiri wa Yesu. 53Neryo mwakĩmya omubiri wa Yesu, mwamũlĩngĩrako olukimba lw'ekĩtanĩ, neryo mwamũhĩra omw'isinda eyabatsawa omw'ĩbwe, eyite yatatabwamo mundu. 54Ekyo kyabya kiro ky'erĩkokotya, n'eSabato yabya ikasonda erikya. 55Nĩkwa abakalĩ abasa na Yesu bakalũa eGalĩlaya mobakwama Yosefũ, mobalangira eyisinda, kandi mobalangira ngoko mubiri wa Yesu ahĩrawamo. 56Neryo abakalĩ abo mobasuba eka mobakokotya amanũkato n'amagũta awakakumba ndeke busana n'omubiri wuwe. N'oko Sabato mobaluhuka ng'Emigambo ko yikahana.

will be added

X\