LŨKA 22

1Neryo omugulu w'Ebiro Bikulu by'erirya Obundu Obute mo Kĩhamya, ebikahulawa mw'Ikiruka, byabya hakũhĩ. 2Neryo abahererĩ bakulu n'abakangĩrĩrya b'Emigambo babya bakasonda-sonda enzira y'erĩĩta Yesu; kusangwa babya bakubaha abandu. 3Neryo Satanĩ nayo moyingira umu Yũda; oyukahulawa mo Ĩskarĩota, oyo waganzirawa okw'ĩkũmĩ n'ababiri. 4Neryo Yũda mwayakanĩa n'abahererĩ bakulu n'abakulu babateya b'eHekalũ ngoko angahotera Yesu kubo. 5Nabo mobatsema, mobaliga erimuha esyofranka. 6Neryo Yũda mwalagana nabo, mwasonda-sonda omwanya w'erihotera Yesu yo kubo ahate ndeko. 7Neryo Ebiro Bikulu by'erirya Obundu Obute mo Kĩhamya mobyahĩka. Oko kiro ekyo ĩbakasĩnza ehyana hy'embũlĩ busana n'Erikiruka. 8Neryo Yesu mwatuma Petero na Yoane ati, Mugende, mũtũkokoteraye Erikiruka tulyeryo. 9Neryo mobamũbũlya bati, Ukasonda tũkokoterayeryo hahi kwehĩ? 10Naye mwabwirabo ati, Lebaya, omugulu mũkandingira omo mũyĩ, omundu oyũhekĩre erĩrega ly'amagetsi akandĩhindana nenyũ. Mumukwame omo nyũmba eyo akandingiramo. 11Neryo mukandibwira omwenye nyũmba muti, Omũkangĩrĩrya akakũbũlaya ati, Ekyumba ky'abagenĩ kirĩ hahi aho nasyalira Erikĩruka haguma n'abiga bage kwehĩ? 12Naye akandĩbakangya ekyumba kinene ky'endata, ekĩtegekanĩbwe; eyo yo mũkokoterayeryo. 13Neryo mobayayo mobeya ebyosĩ ngoko Yesu aliabwirabo, neryo mobakokotya erirya ly'Erikiruka. 14Neryo endambĩ yabere yabĩhĩka, Yesu mwĩkala oko mesa haguma n'abakwenda. 15Neryo Yesu mwabwirabo ati, Nabirisonda kutsibu-tsibu erirya Erikiruka erĩ haguma nenyũ nde nagalwa! 16Kusangwa ngababwira nyiti, Sindiendisyaswalyalyo erĩhĩka aho lyasyabererera omo Bwami bwa Nyamuhanga. 17Neryo Yesu mwĩmya olũtehĩ, abere abiha ewasĩngya uku Nyamuhanga, ati, Mwĩmaye olũtehĩ mugabelo omo katĩkatĩ kenyũ. 18Ngababwira nyiti, Sindiendisyaswapũlya ebĩnyũ erĩhĩka aho Bwami bwa Nyamuhanga bwasyasira. 19Neryo mwĩmya obundu, mwaha ewasĩngya uku Nyamuhanga, mwatsũtsangabo, mwahabobo, ati, Oyũ ni mubiri wage owakahabawa busana nenyũ. Mukole mutya erinyibuka. 20Kandi Yesu mwĩmya olũtehĩ atya enyũma babirya, ati, Olũtehĩ olũ ni 'lagana lihya-lihya omo musasi wage, owakũtawa busana nenyũ. 21Nĩkwa mũlebaye! Oyukanyihotera ali haguma nage oko mesa ko hano. 22Kusangwa kwenene Omugala w'Omundu akandisyahola ngoko Nyamuhanga abirisoha; nĩkwa obũlĩge oko mundu oyukamuhotera! 23Neryo mobatsũka erĩbũlanĩa omo katĩ-katĩ kabo oyo wasyakola omwatsi oyo nga nindi. 24Neryo obuhaka mobwahuluka omo katĩkatĩ k'abiga nga nindi yo wasyahulwa mo mukulu. 25Neryo Yesu mwabwirabo ati, Abami b'ekihugo kino bakatabalira abandu babo; n'abawite ehamũlĩ kubo bakahulawa mo Bĩra b'Abandu. 26Nĩkwa ko bite bitya omo katĩkatĩ kenyũ; nĩkwa omukulu omo katĩkatĩ kenyũ abye ng'omulere, n'omũsondolĩ abye ng'omugombe. 27Nindi yo mukulu, oyo wĩkere okw'irya, kutse oyukamukolera kwehĩ? Si yoyo wĩkere oko mesa kwehĩ? Nĩkwa ĩngye indi omo katĩkatĩ kenyũ ng'oyukakolera abandi. 28Ĩnywe muli ababirinyi-hanganira omw'irengwako lyage. 29Kandi ngoko Tata wage abirimba obwami, nage ngabaha 30erirya n'erĩpũlya oko mesa yage omo bwami bwage. Mwasyĩkala oko bĩtũmbĩ by'Obwami eritswera ebihanda ĩkũmĩ n'ebibiri bya Ĩsraelĩ. 31Sĩmonĩ! Sĩmonĩ! Lebaya! Satanĩ yabĩrĩbũlya ehamũlĩ eribayungira ng'engano. 32Nĩkwa ĩngye nabirikusabira, uwe Sĩmonĩ, erĩkĩrĩrya lyawe sĩryũmbaye. Kandi wamaswabinduka, uhane abagala benyũ. 33Neryo Petero mwamubwira ati, Mukama, nyĩsĩkĩre erigenda nawe omo mũlĩkĩ, n'omw'ihola. 34Yesu mwamũsũbĩrya ati, Petero, ngakubwira nyiti, Mũnabwĩre engoko-lume siyendibika ute wanyigana ngendo ĩsatu ko ũtanyasĩ. 35Neryo Yesu mwabwirabo ati, Omugulu nabatuma butsira ĩtũsĩ, kutse ngunza, kutse ngendero, momwabula kindu kwehĩ? Mobamũsũbĩrya bati, Iyihi n'ahake. 36Neryo Yesu mwabwirabo ati, Nĩkwa lino oyuwite erĩtũsĩ n'engunza, ahekebyo. N'oyutawite mũyalĩ, agũlaye ekanzu yiwe, agule omũyalĩ. 37Kusangwa ngababwira nyiti ekĩsakĩre kitolere ikyabererera busana nage kiti, Aganzawa haguma n'abakola-nabi. Kusangwa ekikanyahula kikabererera. 38Neryo abiga mobabũga bati, Lebaya! Mukama, hano hali mĩyalĩ ĩbĩrĩ! Yesu mwasũbĩryabo ati, Ebyo bitolere! 39Neryo Yesu mwalũaho mwaya oko Kitwa ky'eMĩzeĩtũnĩ ngoko anabya akakola; n'abiga mobamukwama. 40Neryo abere ahĩkaho, Yesu mwabwirabo ati, Musabe isimwingira omw'irengwako. 41Neryo mwalũaho mwatambukira aho lutambi kubo, mwakũkama, mwasaba 42ati, Tata, wamanza ũnyĩlũsaye kw'olũtehĩ olũ. Nĩkwa erisonda lyawe, butsira eryage lyo likolawe. 43Neryo omũlaĩka oyũkalũa elubula, mwamubutukirako, mwamuha amaka. 44Neryo mwasaba kutsibu iniakagalawa, n'olũnza luwe lwabya ng'amatondĩ w'omusasi awakatogongera ahisi oko kitaka. 45Neryo omugulu ahangana okw'isaba liwe, mwahĩka oko biga buwe, mweyabo ibaneto busana n'obũlĩge. 46Neryo mwabwirabo ati, Busana nakĩ mukayato kwehĩ? Muhangane, musabe isimwingira omw'irengwako. 47Omugulu abya akĩnabũga nabo, endeko moyasa, n'oyukahulawa mo Yũda, omuguma g'oko biga erĩkũmĩ n'ababiri, mwasondola endeko eyo. Neryo mwahĩka uku Yesu busana n'erimulyatsirira. 48Nĩkwa Yesu mwabũga naye ati, Yũda, ukahotera Omugala w'Omundu omw'imulyatsirira kwehĩ? 49Neryo abiga ababya haguma na Yesu babere balangira ebikandibya, mobabũlya Yesu bati, Mukama, tubandangebo omo mũyalĩ kwehĩ? 50N'omuguma g'oko biga mwabanda omugombe w'omũhererĩ mukulu oko bahererĩ bosĩ, mwatwa okũtũ kuwe kw'amali. 51Nĩkwa Yesu mwasũbĩrya ati, Uleke! Mũmbaye! Neryo mwatũla oko kũtũ kw'omundu oyo mwamũlamya. 52Nĩkwa Yesu mwabwira abahererĩ bakulu n'abakulu b'eHekalũ n'abakulu abayamubambira ati, Mukasa n'emĩyalĩ n'emĩgo nga mukabambira omũnyeyĩ kwehĩ? 53Omugulu nabya haguma nenyũ obuli kiro omo Hekalũ, momutalenga erinyihamba, nĩkwa endambĩ eno nĩ yenyũ n'ey'obũtokĩ b'omwĩrĩmya. 54Neryo mobahamba Yesu, mobamutwala n'erimuleta omo nyũmba y'omũhererĩ mukulu oko bahererĩ bosĩ. Nĩkwa Petero mwakwamabo ĩnĩanayĩsũnĩre. 55Neryo mobakya omuliro omo katĩkatĩ k'omuhana, neryo Petero mwĩkala omo katĩkatĩ kabo. 56Nĩkwa omwana-muto mugombe muguma, mwamulolako ĩnĩanĩkere okw'ĩsĩngo, neryo mwamulangira ndeke mwabũga ati, Omundu oyũ abya haguma naye nibya! 57Nĩkwa Petero mwagana ati, Mũkalĩ, sĩnyĩmwasĩ! 58N'oko kandi katambĩ ogundi mundu mwalangira Petero, neryo mwabũga ati, Nawe uli muguma wa kubo nibya. Nĩkwa Petero mwamũsũbĩrya ati, Tahi, sĩ ĩngye! 59Kandi enyũma w'aho ng'esaa nguma, ogundi mundu mwahatikana ati, Kwenene omundu oyũ abya haguma naye, kusangwa naye ni Mũgalĩlaya nibya. 60Nĩkwa Petero mwabũga ati, Sĩnyasĩ ebyo ũkabũga tahi! Neryo-neryo akĩnabũga engoko-lume moyabika. 61Neryo Omukama mwakeba mwatungerera Petero. Neryo Petero mwibuka ekĩnywa ky'Omukama ngoko amubwira ati, Mũnabwĩre, engoko-lume ite yabika, ukandinyigana ngendo ĩsatu. 62Neryo Petero mwahulukira eyĩhya, mwalira n'obũlĩge! 63Neryo abandu ababya bakateya Yesu mobamũsekererya n'erĩmũswĩrya. 64Kandi mobaswika ameso wa Yesu mobamũbũlya bati, Uminyerere! Nindi yo wamakũswĩrya kwehĩ? 65Kandi mobamubwira eyindi myatsi mingi bakamutsuma. 66Neryo bwabere bwakya, erĩbũgĩro ly'abakulu b'abandu molyahĩndana, abahererĩ bakulu n'abakangĩrĩrya b'Emigambo, neryo mobatwala Yesu omo nyũmba yabo y'erĩbũgĩro, bati, 67Utubwire, uli Kristo kwehĩ? Nĩkwa mwabwirabo ati, Namababwira isimwendinyĩkĩrĩrya. 68Kandi, namababũlya mwatsi, isimwendĩnyĩsũbĩrya. 69Nĩkwa erĩtsũka lino Omugala w'Omundu asyĩkalĩbwa oko luhande lw'amali lwa Nyamuhanga w'obũtokĩ bosĩ. 70Neryo abosĩ mobabũga bati, Uli Mugala wa Nyamuhanga kwehĩ? Yesu mwabwirabo ati, Ĩnywe mũkabũga kw'ali ĩnĩna ngye. 71Nabo mobabũga bati, Tukine n'obwaga bw'abalangĩrĩ kwehĩ? Ĩtwe twabĩrĩowa ebĩnywa biwe.

will be added

X\