LŨKA 20

1Neryo kiro kiguma, omugulu Yesu abya omo Hekalũ akakangĩrĩrya abandu, n'erĩtũla Engulu Yowene, abahererĩ bakulu n'abakangĩrĩrya b'Emigambo, n'abakulu, mobamũhĩkako, 2ibakamubwira bati, Utubwire ng'ukakola emyatsi eyĩ n'ehamũlĩ yahi, kandi nindi yo wakuha ehamũlĩ eyĩ kwehĩ? 3Yesu mwasũbĩryabo ati, Nage ngandĩbabũlya omwatsi nenyũ ĩmwanyĩsũbĩrya, 4Erĩbatĩsya lya Yoane lyalũa elubula kutse lyalũa oko bandu kwehĩ? 5Nabo mobakanĩrya haguma bati, Twamabũga tuti, Lyalũa elubula, akandĩbũga ati, Busana nakĩ sĩmwetĩkĩrĩrya Yoane kwehĩ? 6Nĩkwa twamabũga tuti, Lyalũa oko bandu, abandu bosĩ ĩbakandĩtwĩta omo mabwe, kusangwa babiriganza bati Yoane abya mũmĩnyererĩ. 7Neryo mobasũbĩrya bati, Sĩtwasĩ eyo lyalũa. 8Neryo Yesu mwabwirabo ati, Nage sindiendibabwira nga nĩ hamũlĩ yahi ikaleka inakola emyatsi eyĩ. 9Neryo Yesu mwatwĩra abandu b'omũsyo oyũ ati, Omundu mwahera eririma ly'ebĩnyũ, neryo mwahĩramo abalĩmĩ, neryo mwaya oko lugendo omo kindi kihugo. 10Neryo omugulu w'eriera ly'ebĩnyũ mwatuma omugombe oko balĩmĩ abo, atoke eribana oko bĩgũma by'eririma ly'ebĩnyũ; nĩkwa abalĩmĩ abo mobamũswĩrya nibya n'erĩmũsũbũlya byala bisa. 11Neryo mwatuma ogundi mugombe; nĩkwa abalĩmĩ abo mobamũswĩrya nibya n'erimuhemula, mobamuhiga, naye mwasubula byala bisa. 12Kandi mwatuma omugombe w'akasatu. Neryo abalĩmĩ mobamũhũtangalya, mobamuhiga. 13Neryo omwenye eririma ly'ebĩnyũ mwabũga ati, Nasyakolakĩ kwehĩ? Nasyatuma mugala wage mwanze; mbino yo basyakenga. 14Nĩkwa omugulu abalĩmĩ bamulangira mobakanĩranĩa bati, Oyũ ni mugala w'omwenye eririma. Tũmwĩte, neryo eririma lyasyabya lyetu. 15Neryo mobamukurira eyĩhya w'eririma ly'ebĩnyũ, mobamwĩta. Neryo omwenye eririma ly'ebĩnyũ eryo asyayirabo ati kwehĩ? 16Asyasa, asyaherya abalĩmĩ abo, asyaha eririma ly'ebĩnyũ eryo oko bandi balĩmĩ. Neryo abandu babere bowa ebĩnywa ebĩ, mobabũga bati, Iyihi, n'ahake. 17Neryo Yesu mwasamalirabo ati, Nĩkwa ekyasakawa ekĩ nĩkĩ kwehĩ? kiti, Erĩbwe eryo abahĩmbĩ bagana, Lyo lyabere erĩbwe ry'esondo. 18N'oyo wasyatererwako n'erĩbwe erĩ, asyabũnangĩka mo bitswe-bitswe; nĩkwa erĩbwe eryo lyamatogera oko mundu, lyasyamũbũnzũngũla mo lũtũtũ. 19Neryo abakangĩrĩrya b'Emigambo n'abahererĩ bakulu mobasondasonda erihamba Yesu oko ndambĩ eyo, kusangwa mobaminya kw'atwa omũsyo oyo busana nabo; nĩkwa mobubaha abandu. 20Neryo mobamũteya. Kandi mobatuma abalĩngĩ abayĩhambũlaya bati ni bandu batunganene, ibatoka erimutega omo bĩnywa biwe n'erimuhotera oko hamũlĩ n'obũtokĩ bw'omũtabalĩ. 21Abalĩngĩ aba mobabwira Yesu bati, Mũkangĩrĩrya; tũnasĩ ũkabũga n'erĩkangĩrĩrya eky'ekwenene. Kandi sulisombola ebitaga n'ebite bitaga nĩkwa ũkakangĩrĩraya enzira ya Nyamuhanga omo kwenene. 22Emigambo ĩkatũlĩgĩra erisolera Kaĩsarĩ kutse iyihi kwehĩ? 23Nĩkwa Yesu mwaminya amatebo wabo, neryo mwabwirabo ati, 24Mũnyĩkangaye edĩnarĩ. Ekĩsosekanĩo n'amasako aya ni byandi kwehĩ? Nabo mobabũga bati, Ni bya Kaĩsarĩ. 25Neryo Yesu mwabwirabo ati, Mulihe Kaĩsarĩ ebindu bya Kaĩsarĩ, kandi mulihe Nyamuhanga ebindu bya Nyamuhanga. 26Nabo mobataluka erimutega omo mwatsi embere sy'abandu. Nĩkwa mobabya bũkũtũ ibakaswekera erĩsũbĩrya liwe. 27Neryo abandi b'oko Basadũkayo mobahĩka uku Yesu. Aba ni bandu bakabũga bati sihali erĩlũbũka oko baholĩ. 28Mobamũbũlya bati, Mũkangĩrĩrya, Musa mwatusakira ati, Omugala wabo mundu amahola akasĩganĩa omũkalĩ wuwe, atawite mwana; mugala wabo mundu oyo asyĩmya omũkalĩ oyo iniabutira mugala wabo y'abana. 29Nĩkwa habya bagala babo balinda; ow'erĩmbere mwahĩkya, neryo mwahola isialitabuta mwana. 30Neryo ow'akabiri mwĩmya omũkalĩ oyo. 31Neryo ow'akasatu mwakola atya; neryo abagala babo bosĩ balinda mobahola batya isibetabuta mwana. 32Neryo enyũma w'abosĩ omũkalĩ oyo naye mwahola. 33Neryo oko kiro ky'erĩlũbũka, omũkalĩ oyo asyabya wandi kwehĩ? Kusangwa abalinda bosĩ babya ĩbabĩrĩmwĩmya. 34Neryo Yesu mwabwirabo ati, Abalume n'abakalĩ b'omugulu ono bakaherũkanaya. 35Nĩkwa abalume n'abakalĩ abakaganzawa nga batolere erĩhĩka oko mugulu oyo, n'erĩlũbũka oko baholĩ, sĩbeherũkanaya. 36Kusangwa sibetoka eriswahola, kandi balingene n'abamalaĩka. Ni bagala ba Nyamuhanga kusangwa babĩrĩlũbũkĩbwa oko baholĩ. 37Nĩkwa Musa mwakanganĩa kw'abaholĩ bakalũbũkĩbawa. Omo masako awakahula ekisaka ekyaka, akahula Omukama, mo Nyamuhanga wa Abrahamũ, na Nyamuhanga wa Ĩsaka, na Nyamuhanga wa Yakobo. 38Neryo iye si Nyamuhanga w'abaholĩ, nĩkwa ni Nyamuhanga w'abaliho busana naye. 39Neryo abandi b'oko Bafarĩsayo mobamũsũbĩrya bati, Mũkangĩrĩrya, wamasĩngana! Neryo abandi bakangĩrĩrya b'Emigambo mobasũbĩrya bati, Mũkangĩrĩrya, wabĩrĩbũga ndeke. 40Neryo mohataswabya mundu oyo wangalenga erĩswabũlya Yesu eyindi myatsi. 41Neryo Yesu mwabũga nabo ati, Bakabũga batĩkĩ, bati, Kristo ni mugala wa Dawĩdĩ kwehĩ? 42Kusangwa Dawĩdĩ akabũga omo kitabu ky'esyonyimbo ati, Omukama akabwira Omukama wage ati, Wĩkale oko byala byage by'amali, 43Erĩhĩka aho nasyahĩrĩra esyonzĩgũ syawe Omwisi w'ebisando byawe. 44Dawĩdĩ mwamwahula mo Mukama, neryo Kristo angatoka eribya mugala wa Dawĩdĩ ati kwehĩ? 45Neryo omugulu endeko yosĩ yabya ikahulikirira uku Yesu, Yesu mwabũga n'abiga buwe ati, 46Mũyĩtegaye busana n'abakangĩrĩrya b'Emigambo abanzĩre erirendera ibanambite esyokanzu syabo nyiri-nyiri, ĩbanzĩre erĩkerĩbwa omo hitale, ibakayisoga ebĩtũmbĩ by'embere omo manyũmba w'erĩhĩndanamo, n'ah'erĩsĩkĩbwa omw'irya ĩnene. 47Kandi bakanũbaya abakwakalĩ n'erinyega amanyũmba wabo, neryo busana n'erilolwako bakasaba erisaba liri-liri! Aba basyasuyirwa kutsibu kw'aho.

will be added

X\