LŨKA 2

1Oko mugulu oyo, Omwami mukulu Kaĩsarĩ Augũsto mwahamula ati abandu bosĩ b'obwami buwe bagende oko tsapa. 2Omugulu etsapa y'erĩmbere eyĩ yabya, Kũrenĩo abya mũtabalĩ w'eSũrĩa. 3Neryo abandu bosĩ mobaya oko tsapa eyo, obuli mundu oko wabo. 4Yosefũ naye mwalũa oko mũyĩ w'eNazaretĩ, eGalĩlaya, mwaya eYũdea, oko mũyĩ ahulawa mo Betelehemũ, aho mwami Dawĩdĩ abutawa, kusangwa abya w'ekihanda n'ekĩtũnga kya Dawĩdĩ. 5Ayayo busana n'eriyatsapa haguma na Marĩa, oyo asĩmolaya, inina mukule. 6Omugulu babya eBetelehemũ, endambĩ ya Marĩa y'eributa moyahĩka. 7Neryo mwabuta omũlwana akambere kiwe; mwamuswika olukimba lw'obumekeke, neryo mwamũhĩra omw'ĩtũba eryo esyonde sikaliramo, kusangwa sihabya mwanya bũsana nabo omo nyũmba y'abalalĩrĩrĩ. 8Neryo omo kihugo ekyo habya abalĩsya ababya bakasiba omolĩ ĩbakategaya ebihangulo byabo omo kiro. 9N'omũlaĩka w'Omukama mwahuluka embere syabo, n'erĩkangabasanĩa ly'Omukama molyatĩmba kubo, neryo mobubaha kutsibu. 10N'omũlaĩka mwabwirabo ati, Simubahe! Kusangwa ngabaletera Engulũ Yowene y'obutseme bunene obukasyabya busana n'abandu bosĩ. 11Kusangwa mũnabwĩre oko mũyĩ wa Dawĩdĩ, Omũlamya wenyũ abiributwa, Iye Omukama Kristo. 12Ekĩ kyasyabya kiminyikalo busana nenyũ; mwasyeya omwana ĩnĩanaswĩkĩre esyongimba sy'obumekeke iniagotsere omw'ĩtũba eryo esyonde sikaliramo. 13Neryo-neryo mohahuluka haguma n'omũlaĩka oyo, omulondo munene w'abamalaĩka b'elubula, ibakapipa Nyamuhanga bati, 14Olukengerwa uku Nyamuhanga oyuli ahendata kutsibu! N'obuholo oko kihugo oko bandu bakamũtsemesaya! 15Neryo abamalaĩka babere babĩlũa kubo bakasuba elubula, abalĩsya mobabwirana bati, Lino tuye eBetelehemũ, tũyalebaye omwatsi owabereyo ogo Mukama abĩrĩtũmĩnyĩsya. 16Neryo mobanguha eriyayo, mobeya Marĩa na Yosefũ, kandi mobalangira olumekeke ilunagotsere omw'ĩtũba erikalira mw'esyonde. 17Neryo abalĩsya babere babimulolako mobabwirabo ebĩnywa ebyo babwirawa busana n'omwana oyũ. 18N'abandu bosĩ abowabyo mobaswekera emyatsi eyo babwirawa n'abalĩsya. 19Nĩkwa Marĩa mwibuka emyatsi yosĩ eyĩ ĩnĩakaganĩrayayo omo mutima wuwe. 20Neryo abalĩsya mobasubula, ibakapipa n'erĩsĩkya Nyamuhanga busana n'ebyosĩ bowa n'ebyo bamalolako, ngoko babwirawa n'omũlaĩka. 21Neryo enyũma w'ebiro munani, omugulu w'erĩbanĩa omwana mwahĩka, neryo mwahulwa mo Yesu, erĩna omũlaĩka amuluka omugulu obukule bwabya bute bwahekwa. 22Neryo omugulu mwahĩka ow'erikola ebyo Migambo ya Musa yahana busana n'emitsye y'eriera. Neryo Yosefũ na Marĩa mobatwala Yesu eYerũsalema busana n'erimuha oko Mukama. 23Ngoko bĩsakĩre omo Migambo y'Omukama biti, Obuli kambere k'obulume kasyahigulwa mo kabũyĩrĩre busana n'Omukama. 24Kandi mobayayo busana n'erihera obuhere ngoko Migambo y'Omukama ĩkabũga iti, Ehitungula hibiri, kutse ehyana hy'ehĩrĩkũkũ hibiri. 25Neryo habya omundu eYerũsalema oyukahulawa mo Sĩmeoni. Abya mundu utunganene iniakakenga Nyamuhanga. Abya akalinda erilama ly'eĨsraelĩ; n'Omũlĩmũ Abũyĩrĩre abya haguma naye. 26Kandi, Omũlĩmũ Abũyĩrĩre mwamũkangya kw'atendisyahola ate alola uku Kristo w'Omukama. 27Neryo Omũlĩmũ mwatwala Sĩmeonĩ y'omo Hekalũ. Kandi omugulu Yosefũ na Marĩa baleta Yesu omo Hekalũ, erimukolera ebyo Migambo ĩkabũga. 28Sĩmeonĩ mwawata oko mwana oyo omo byala biwe, mwapipa Nyamuhanga ati, 29Lino Omukama, ũhongokaye omugombe wawe, Agende omo buholo ngoko wabĩrĩbũga. 30Kusangwa namalangira omulamo wawe omo meso wage, 31Ogo wabĩrĩkokotya embere sy'abandu bosĩ, 32Ekyakakala ky'erĩkangya enzira yawe oko Bihanda, N'eriha olukengerwa oko bandu bawe Ĩsraelĩ. 33Neryo Yosefũ na nyĩnya wa Yesu ye Marĩa mobaswekera emyatsi eyo Sĩmeonĩ abũga busana naye. 34Neryo Sĩmeonĩ mwatsumulabo iniakabwira Marĩa nyĩnya wuwe ati, Lebaya, omwana oyũ abiriyisogwa na Nyamuhanga busana n'eriwa n'erilama ly'abandu bangi omo Ĩsraelĩ. Kandi asyabya kiminyikalo ekikandisyaponwa. 35Kandi obũlĩge ng'omũyalĩ bwasyatsimita omutima wawe, amalengekanĩa w'emitima mingi atoke erĩbĩsũlwa. 36Mohabya omũmĩnyererĩ w'obũkalĩ, ye Ana, mwali wa Fanuelĩ, w'ekihanda kya Aserĩ. Abya mukekulu wa kera, ĩnĩabĩrĩkala n'ĩba wuwe emyaka irinda. 37Kandi iniabiribya mũkwakalĩ emyaka makũmĩ munani n'ĩnĩ. Ĩsĩalĩlũa omo Hekalũ, ĩnĩakaramaya Nyamuhanga omo kiro n'omo musibo, haguma n'eritsira ebyalya n'erisaba. 38Oko katambĩ ako Ana mwahĩka n'eriha wasĩngya uku Nyamuhanga, kandi mwatũla omwatsi wa Yesu oko bandu bosĩ ababya bakalinda bati Nyamuhanga akandĩsyalamya eYerũsalema. 39Neryo babere babibuyirira ebyosĩ ebyo Migambo y'Omukama ĩkabũga, mobasuba eGalĩlaya, oko Nazaretĩ eka wabo. 40N'omwana oyo mwakula mwabya n'amaka; kandi, mwabya n'amenge manene, kandi omũyĩsa wa Nyamuhanga abya haguma naye. 41Neryo ababũtĩ ba Yesu babya bakaya eYerũsalema obuli mwaka busana n'Ebiro Bikulu by'Erikiruka. 42Neryo omugulu Yesu abya w'emyaka ĩkũmĩ n'ĩbĩrĩ, mobaya oko biro bikulu ebyo ngoko banabya bakakola, 43Omugulu ebiro bikulu ebyo byahwa, mobatsũka erisuba eka wabo. Nĩkwa omũlwana Yesu mwasĩgala eYerũsalema, ababũtĩ buwe ĩsĩbasĩ. 44Mobaganĩrya bati ane omo ndeko, neryo mobagenda olugendo lw'ekiro kiguma, neryo mobamusonda-sonda omo katĩkatĩ k'abalĩkyabo n'ab'ewabo. 45Neryo babere babimubula mobasuba eYerũsalema bakayamusonda-sonda. 46Neryo enyũma w'ebiro bisatu mobamweya omo Hekalũ, ĩnĩanĩkere omo katĩ-katĩ k'abakangĩrĩrya erihulikirira n'erĩbũlyabo emyatsi. 47Abosĩ abamowa mobasweka busana n'amenge wuwe n'erĩsũbĩrya liwe. 48Ababũtĩ buwe mobasweka omugulu bamulolako, neryo nyĩnya wuwe mwamubwira ati, Uwe mwana, wamatuyira utya busana nakĩ kwehĩ? Talebaya, tata wawe nage twabirikusonda-sonda n'engitsi nene. 49Naye mwasũbĩryabo ati, Ko busana nakĩ mwabya mukanyisonda-sondya kwehĩ? Simwabya mwasĩ ngoko lyabya litolere inabya omo nyũmba ya Tata wage kwehĩ? 50Nabo mobataminya ebyo abũga nabo. 51Neryo Yesu mwasuba eNazaretĩ haguma nabo, neryo mwabya akowa ebyo bamubwira. Neryo nyĩnya wuwe mwabika emyatsi yosĩ eyĩ omo mutima wuwe. 52Neryo Yesu musuka, oko mubiri n'omo menge, ĩnĩakasĩmawa na Nyamuhanga n'abandu.

will be added

X\