LŨKA 19

1Neryo Yesu mwingira eYerĩko, nĩkwa mwalũa iniatwangana. 2Neryo habya omũsolesya mukulu eyo, oyo wahulawa mo Zakayo, kandi abya w'ebindu bingi. 3Naye abya akasonda-sonda erilola uku Yesu nga nindi, nĩkwa mwatatoka busana n'endeko kusangwa abya mũkũhĩ. 4Neryo mwatibita embere mwasambira omo muti w'omukuyu atoke erilangira Yesu, kusangwa abya iniakalaba omo nzira eyo. 5Neryo Yesu abere ahĩkaho, mwalalamira endata mwabwira Zakayo ati, Zakayo, wanguhe, ũkĩme, kusangwa ngandĩkala omwawe mũnabwĩre. 6Neryo Zakayo mwanguha, mwakĩma n'erĩmũkokya n'obutseme. 7N'abandu bosĩ abamulolako mobatsũka eriyikuna bati, Amabya mũgenĩ w'omundu mukola-nabi. 8Neryo Zakayo mwahangana mwabwira Omukama ati, Lebaya, Mukama, ngaha ekihande ky'ebindu byage oko bera; kandi namabya naliteba mundu kw'ekindu kiwe ngandĩsũbũlyakyo ngendo ĩnĩ. 9Neryo Yesu mwamubwira ati, Mũnabwĩre erilama lyamahĩka omo nyũmba eyĩ, kusangwa naye ni mwana wa Abrahamũ. 10Kusangwa Omugala w'Omundu mwasa erisonda-sonda n'erĩlamya ababya batere. 11Omugulu babya bakahulikirira emyatsi eyĩ, Yesu mwatsũka erĩtwa omũsyo. Neryo kusangwa abya hakũhĩ n'eYerũsalema, kandi abandu mobaganĩrya ambu Obwami bwa Nyamuhanga bũkahĩka neryo-neryo. 12Neryo Yesu mwabũga ati, Omukulu muguma w'obwami mwaya omo kihugo ky'ehali eriyasingirayo obwami, n'eriswasubula. 13Neryo mwabirikira ĩkũmĩ oko bagombe buwe, mwahabo ebibande ĩkũmĩ by'esyamagetsi, mwabwirabo ati, Mũtũndaye ũmw'ebĩ erĩhĩka aho nasyaswasira. 14Nĩkwa abandu buwe mobamũkwa obusu, mobamutumira abakwenda bati, Sĩtwanzĩre omundu oyukatutabalako. 15Neryo omukulu oyo abere abisinga mwasubula, neryo mwategeka abagombe abo asĩgĩra ebibande ebyo ati babirikirawe atoke eriminya nga bamatunda byahi. 16Omugombe w'erĩmbere mwahuluka ati, Mukama, ekibande kyawe ky'esyamagetsi kyamatunda ebindi bibande by'esyamagetsi ĩkumĩ. 17Neryo omukulu oyo mwamubwira ati, Wamakola ndeke uwe mugombe mubuya kusangwa wabiribya butalegula oko kindu kike, ubye n'ehamulĩ oko mĩyĩ ĩkumĩ. 18Neryo omugombe w'akabiri mwasa ati, Mukama, ekibande kyawe ky'esyamagetsi kyamatunda ebindi bibande by'esyamagetsi bitanu. 19Neryo mwamubwira ati, Nawe utabale oko mĩyi ĩtanu. 20N'ogundi mugombe mwasa ati, Mukama, lebaya ekibande kyawe ky'esyamagetsi kyekĩ: ekyo nabika omo lukimba. 21Kandi monakubaha, kusangwa uli mundu oyũkalĩre. Ukaheka ebite byagu, kandi ukagesa ebyo utabiba. 22Omukulu oyo mwamubwira ati, Uwe mugombe mubi! Ngandikutswera omo bĩnywa byawe. Wabya wasĩ ko ndi mundu oyũkalĩre, ngĩmaya ebite byage, n'erigesa ebyo ndabiba kwehĩ? 23Neryo busana nakĩ mũtahĩra ekibande kyage ky'esyamagetsi omo bankĩ, neryo nangabere nanĩka, inahekakyo haguma n'endũndĩ yakyo kwehĩ? 24Neryo mwabwira ababya bimeneho ati, Mumusagule ekibande ky'esyamagetsi ekyo, muhekyo oko yuwite ebibande by'esyamagetsi ĩkũmĩ. 25Nabo mobamubwira bati, Mukama, awite ebibande by'esyamagetsi ĩkũmĩ! 26Nĩkwa ngababwira nyiti, Oyuwite asyahabwa ebindi, nĩkwa oyutawite, asyalũsĩbwako n'ekyo awite. 27Nĩkwa, esyonzĩgũ syage esyo, abatabya banzĩre ngatabala kubo, muletebo hano, mwĩtĩrebo hano omo meso wage. 28Neryo Yesu abere abĩbũga emyatsi eyĩ, mwahetukira eYerũsalema embere sy'abandi. 29Neryo abere ahĩka hakũbĩ n'eBetefage n'eBetanĩa, hakũhĩ n'ekitwa ekikahulawa mo Mĩzeĩtũnĩ, .mwatuma abiga buwe babiri, 30ati, Mugende oko kayĩ akali embere syenyũ; neryo mukandibya mwabĩhĩkako mukandĩeya ekyana ky'epunda ĩkĩnahangĩre ekitekyataheka mundu. Muhangulekyo, mundeterekyo hano. 31Omundu amababũlya ati, Mukahangulakyo busana nakĩ, imwamubwira muti, Omukama ali n'obwaga bwakyo. 32Neryo abatumawa mobagenda mobeyakyo ngoko Yesu anabwirabo. 33Neryo babere bakahangula ekyana ky'epunda ekyo, abenyekyo mobabũlyabo bati, Busana nakĩ mukahangula ekyana ky'epunda kwehĩ? 34Neryo mobabwirabo bati, Omukama ali n'obwaga bwakyo. 35Neryo mobatwala ekyana ky'epunda ekyo uku Yesu. Kandi mobĩkĩrya kukyo kw'esyongimba syabo, mobahĩra Yesu yo kukyo. 36Neryo abere akagenda kukyo mobasanza esyongimba syabo sy'omo nzira. 37Neryo Yesu abere ahĩka hakũhĩ n'obwandagala bw'ekitwa ky'eMĩzeĩtũnĩ, endeko yosĩ y'abiga mobatsũka eripipa Nyamuhanga ibakatsema n'eripipa Nyamuhanga n'omulenge munene busana n'ebitiko-tiko byosĩ ebyo balolako, 38bati, Nyamuhanga atsumule omwami, oyukasa omo lĩna ly'Omukama! Obuholo omo lubula n'olukengerwa lubye uku Nyamuhanga! 39Neryo abandi b'oko Bafarĩsayo mobabwira Yesu bati, Mũkangĩrĩrya, ukunge abiga bawe. 40Yesu mwasũbĩryabo ati, Ngababwira nyiti, aba bamahuna, amabwe nago asyabirikira n'omulenge munene. 41Neryo abere ahĩka hakũhĩ n'omũyĩ, mwalangirago n'eriririra kugo, 42ati, Kumbe mũnabwĩre nawe ũlwe wasĩ emyatsi eyikaleta obuholo! Nĩkwa lino ĩbĩsamĩre oko meso wawe. 43Kusangwa ebiro byasyasa kwĩnywe, oko mugulu oyo esyonzĩgũ syawe syasyahanganĩa olũhĩmbo embere syenyũ n'erĩbatĩmbako, n'erĩbakakĩrya oko mbande syosĩ. 44Basyabagusa ahisi haguma n'abandu abali omwisi wawe; isibendĩsyasĩga erĩbwe n'eriguma endata oko lindi, kusangwa sulitaminya omugulu Nyamuhanga ahĩka erĩkũlamya. 45Neryo Yesu mwingira omo Hekalũ, mwatsũka erihigira abakagũlaya b'eyĩhya. 46Iniakabwirabo ati, Kĩsakĩre kiti, Enyũmba yage yasyabya enyũmba y'erisabiramo. Nĩkwa ĩnywe mwabiriyirayo mo bwĩkalo bw'abanyeyĩ. 47Kandi Yesu mwabya akakangĩrĩrya omo Hekalũ ebiro byosĩ. Neryo abahererĩ bakulu n'abakangĩrĩrya b'Emigambo n'abandu bakulu omo katĩkatĩ k'abandu mobalenga erĩmwĩta. 48Nĩkwa mobatabana ekyo bangakola, kusangwa abandu bosĩ babya bakahĩra amatwĩ wabo oko bĩnywa biwe.

will be added

X\