LŨKA 18

1Neryo Yesu mwatwĩrabo omũsyo oyũ, erĩkangĩrĩryabo ati, Basabe emigulu yosĩ butsira eriluha, 2ati, Habya omũtswerĩ oko mũyĩ muguma oyutyubaha Nyamuhanga, kutse erikenga omundu. 3Kandi habya omũkwakalĩ oko mũyĩ oyo, oyo wabya akamũhĩkako, ati, Ũnyĩrekaye kw'enzĩgũ yage. 4Oko mugulu muli, omũtswerĩ oyo mwatalĩga, nĩkwa mwasala ayibwira ati, Nomo ndeniubaha Nyamuhanga kutse erikenga mundu, 5nĩkwa kusangwa omũkwakalĩ oyũ akanyĩlũhaya ngandĩmũlekerya, bite bitya, akasyandũhya akahĩka ebiro byosĩ. 6Neryo Omukama mwabũga ati, Mowe ebyo mũtswerĩ oyutatunganene abũga. 7Neryo Nyamuhanga naye siendisyaha abayisogawa buwe erĩbanza kwehĩ? Abakamulakira oko musibo n'omo kiro kwehi? Kandi asyamala erĩwatĩkyabo kwehĩ? 8Ngababwira nyiti, Asyahabo erĩbanza lũba. Nĩkwa Omugala w'Omundu omugulu asyasa, asyabana erĩkĩrĩrya omo kihugo kwehĩ? 9Kandi Yesu mwatwa omũsyo busana n'abandu abayihalamba bati batunganene, ibakapona abandi. 10Ati, Abandu babiri mobahetukira omo Hekalũ bakayasaba; omuguma abya Mũfarĩsayo n'ogundi abya mũsolesya. 11Omũfarĩsayo mwahangana n'erisaba omo mutima wuwe ati, Nyamuhanga, ngakuha ewasĩngya kusangwa sinyiri ng'abandi bandu, abanyeyĩ, n'abatatunganene, n'abasĩngĩrĩ, kutse ng'omũsolesya oyũ. 12Ngatsira akalyo ko ngendo ĩbĩrĩ obuli yenga; kandi ngaha ekiguma ky'erĩkũmĩ omo byosĩ ngatunda. 13Nĩkwa omũsolesya mwimana hali, mwatalolya obũsũ buwe bw'elubula, nĩkwa mwahumanga oko kĩkũba kiwe ati, Nyamuhanga, unyiganyire, ĩngye mukola-nabi! 14Neryo Yesu mwabũga ati, Ngababwira nyiti, omundu oyo mwakĩmĩra ewuwe iniamabitunganana kwilaba ogundi oyo, Kusangwa obuli mundu oyũkayĩhamaya, asyakehĩbwa. Nĩkwa oyũkayĩkehaya, asyahamĩbwa. 15Abandi bandu babya bakaletera Yesu abana babo balere, bati ahĩre ebyala biwe byo kubo. Nĩkwa abiga babere balangirabo, mobatsũka erikungabo. 16Nĩkwa Yesu mwabirikira abana abo ati, Muleke abana balere banyĩhĩkeko, sĩmũkakĩrayebo; kusangwa Obwami bwa Nyamuhanga ni bw'abali ng'aba. 17Kwenene ngababwira, oyutyangirira obwami bwa Nyamuhanga ng'omwana mulere, siendisyingira mubo n'ahake. 18Neryo omũtabalĩ muguma mwamũbũlya ati, Mũkangĩrĩrya mubuya, nasyakolakĩ nyibane engebe y'erikota kwehĩ? 19Neryo Yesu mwamubwira ati, Busana nakĩ ukanyahula mo mubuya kwehĩ? Sihali mubuya nina Nyamuhanga ĩyowene. 20Ũnasĩ ebihano biti, Isiwasĩngĩra; ĩsĩwĩta; ĩsĩwĩba; isiwabihira abandi; ũsĩkaye tata wawe na koyo wawe. 21Omundu oyo mwamũsũbĩrya ati, Ebyosĩ ebĩ nabirikolabyo erĩtsũka omo bwana bwage. 22Neryo omugulu Yesu owa ekĩ, mwamubwira ati, Ũkĩsĩya erikola mwatsi muguma. Ũgũlaye ebyosĩ ebyo uwite ugabirebyo oko bera, nawe wasyabya n'ebindu elubula; neryo wase unyikwame. 23Nĩkwa omundu oyo abere owa ekĩ, mwakwa obũlĩge bunene, kusangwa abya awite bindu binene. 24Neryo Yesu mwamulangira ngoko abya n'obũlĩge neryo mwabũga ati, Monzo lĩkalĩre busana n'abandu b'ebindu eriingira omo Bwami bwa Nyamuhanga! 25Kusangwa ni ryolo busana n'engamia erilaba omo kyũna ky'esĩndanĩ kwilaba omundu w'ebindu eriingira omo Bwami bwa Nyamuhanga. 26Neryo abandu abowabyo mobabũlya bati, Ko nindi angatoka erĩlamĩbwa kwehĩ? 27Yesu mwasũbĩrya ati, Emyatsi eyitetokekana oko bandu, ikatokekana uku Nyamuhanga. 28Neryo Petero mwabũga ati, Lebaya, twabĩrĩsĩga amanyũmba wetu, twabirikukwama. 29Yesu mwabwirabo ati, Kwenene ngabũga nenyũ nyiti, omundu oyũkasĩga enyũmba, kutse omũkalĩwe, kutse bagala babo, kutse ababũtĩ buwe, kutse abana, busana n'Obwami bwa Nyamuhanga, 30asyangirira ebĩlabĩre aho engendo nyingi oko mugulu ono, n'oko mugulu owakandisyasa, asyangirira engebe y'erikota. 31Neryo Yesu mwatwala abiga ĩkũmĩ n'ababiri aho lutambi, mwabwirabo ati, Lebaya, tukahetukira eYerũsalema. Eyo ebyosĩ ebyasakawa n'abamĩnyererĩ busana n'Omugala w'Omundu byasyabererera. 32Kusangwa asyahoterwa oko Bihanda, kandi asyasekererĩbwa, n'erihemulwa, n'erĩtwĩrwako amatande. 33Kandi basyamũswĩrya emikoba n'erĩmwĩta. Nĩkwa enyũma w'ebiro bisatu asyalũbũka. 34Nĩkwa abiga buwe mobataminya emyatsi eyĩ n'ahake, n'enzumwa y'emyatsi eyĩ moyabĩswa kubo, kandi mobatayiminyira ebyabũgawa. 35Neryo Yesu abere ahĩka hakũhĩ n'eYerĩko, omundu muguma endĩmatĩme abya ĩnĩanĩkere oko mũsĩke w'enzira akasabĩrĩrya eby'erĩmũwatĩkya. 36Neryo omugulu owa endeko ikalaba, mwabũlya ati, Kuti kwehĩ? 37Neryo mobamubwira bati, Yesu w'eNazaretĩ yukalaba. 38Neryo mwabirikira ati, Yesu, mugala wa Dawĩdĩ, unyiganyire! 39Neryo ababya embere omo nzira mobamukunga, bati abye bũkũtũ, nĩkwa endĩmatĩme eyo moyabirikira kutsibu kw'aho iti, Mugala wa Dawĩdĩ, unyiganyire! 40Neryo Yesu mwimana, mwategeka ati bamuletereye; neryo abere abĩhĩka hakũhĩ Yesu mwamũbũlya ati, 41Wanzĩre inakukolerakĩ kwehĩ? Naye mwabũga ati, Mukama, nyanzĩre eriswalangira. 42Neryo Yesu mwamubwira ati, Ubane erilangira lyawe, erĩkĩrĩrya lyawe lyamabĩkũlamya. 43Neryo-neryo mwabana erilangira, neryo mwakwama Yesu, n'eripipa Nyamuhanga. Nĩkwa abandu bosĩ babere balangira ekyo, mobapipa Nyamuhanga.

will be added

X\