LŨKA 17

1Yesu mwabwira abiga buwe ati, Emyatsi eyĩkakolesaya abandu b'ebibi ikandisyasa kwenene, nĩkwa obũlĩge oko yukaletayo! 2Kumbe ryowene busana n'omundu oyo oluso lunene ilwaboherwa oko bĩkya biwe, iniaguswa omo ngetsi; kwilaba erireka omuguma g'oko bana balere aba akakola ebibi. 3Mũyĩtegaye! Omugala wenyũ amakola ebibi, umukunge; amabindula omutima erireka ebibi iwamubuyira. 4Kandi amakukola nabi ngendo sirinda oko kiro kiguma, neryo akaswakũhĩkako ati, Namabindula omutima erireka ebibi, litolere iwamubuyira. 5Nĩkwa abakwenda mobabwira Omukama bati, Ũkanyaye erĩkĩrĩrya lyetu! 6Omukama mwasũbĩryabo ati, Kumbe muwite erĩkĩrĩrya ng'embuto y'eharadalĩ, mwangabwira omuti w'omukuyu oyũ muti, Uyikule, uyayihere omo ngetsi, nago ĩnĩabowa. 7Nindi ũkw'ĩnywe oyuwite omugombe oyukalima kutse akalĩsaya esyombũlĩ. Omugombe omugulu akalũa omw'irima ukamubwira uti, Wase lino wĩkale ulye kwehĩ? 8Iyihi, nĩkwa wasyamubwira uti, Ũkokotaye ebyalya byage by'erirya, ubohe embindi, ũhũkũle, unyikolere erĩhĩka aho namabirira n'erĩpũlya, neryo enyũma wasyalya n'erĩpũlya. 9Akaha ewasĩngya oko mugombe oyo kusangwa akola ebyo ahanawa kwehĩ? 10Nenyũ nibya, omugulu mwamabikola ebyosĩ mwategekawa, mũbũge muti, Tuli bagombe abatatolere; twabirikola ebyo tutolere itwakola bisa. 11Neryo Yesu abere akaya eYerũsalema, mwalaba omo katĩkatĩ k'eSamarĩa n'eGalĩlaya. 12Nĩkwa abere, akingira omo mũyĩ muguma, neryo abahaga ĩkũmĩ mobahĩndana naye. Mobahangana ehali n'eribirikira bati, 13Yesu, Omukama, utuganyire! 14Neryo omugulu Yesu alangirabo, mwabwirabo ati, Mugende mũyĩkanganaye oko bahererĩ. Neryo babere banemugenda, mobalamĩbwa. 15Nĩkwa omuguma wa kubo abere abilangira kw'amabĩlamĩbwa, mwasubula iniakapipa Nyamuhanga n'omulenge munene. 16Neryo mwakũkama ahisi embere sy'ebisando bya Yesu, n'erimuha ewasĩngya. Omuhaga oyo abya Mũsamarĩa. 17Neryo Yesu mwabũlya ati, Abosĩ ĩkũmĩ mobatalamĩbwa kwehĩ? Nĩkwa abandi mwenda bali hahi kwehĩ? 18Sihetabanika abakasubula n'eripipa Nyamuhanga yo n'ow'ehandi oyũ musa kwehĩ? 19Neryo Yesu mwamubwira ati, Uhangane, ugende; erĩkĩrĩrya lyawe lyamabĩkũlamya. 20Abandi Bafarĩsayo mobabũlya Yesu Obwami bwa Nyamuhanga nga bwasyasa mugulu wahi. Yesu mwasũbĩryabo ati, Obwami bwa Nyamuhanga sibwendisyasa mo biminyikalo ebikalolawako. 21Kutse sihali mundu oyo wasyabũga ati, Ulangire, Obwami buli hano, kutse, Halya ho buli! Kusangwa lebaya, Obwami bwa Nyamuhanga buli omo katĩkatĩ kenyũ. 22Neryo mwabwira abiga ati, Ebiro byasyasa omugulu mwasyanza erilangira ekiguma ky'ebiro by'Omugala w'Omundu, simwendisyalola kukyo. 23Basyababwira bati, Ulangire halya! kutse, Ulangire hano! Simuyeyo, simutibite eyo bali. 24Kusangwa ngoko akarabyo kakapalaya erĩtsũka oko luhande lw'ekyanya n'erĩhĩka oko lundi luhande, litya Omugala w'Omundu asyabya atya oko kiro kiwe. 25Nĩkwa litolere ĩnĩatsũka eriagalwa omo myatsi mingi n'eriganwa n'abandu ba sesene. 26Ngoko byabya omo biro bya Noa, ko bikandisyabya bitya omo biro by'Omugala w'Omundu. 27Mobalya, mobapũlya, mobahĩkya, mobaherũkanĩa erĩhĩka oko kiro Noa ingira omo bwato, n'erigunga ly'amagetsi molyasa n'erĩherya abosĩ. 28Kandi ngoko byabya omo biro bya Lotĩ, mobalya, mobapũlya, mobagula, mobagũlya, mobabiba, mobahĩmba. 29Nĩkwa oko kiro Lotĩ alũa eSodomo, moyawa omuliro n'eripumuka ly'omuliro bĩkalũa elubula, mobyaherya abandu bosĩ. 30Ko bikandisyabya bitya oko kiro Mugala w'Omundu asyabĩsũlwa. 31Oko kiro ekyo, omundu oyuli endata oko nyũmba yiwe, ĩsĩangasyakĩmĩra omuwe erienda ebindu biwe ebirimo eritwalabyo; kandi oyuli omw'irima siasube enyũma eka wuwe. 32Mwibuke omũkalĩ wa Lotĩ! 33Oyukasonda erĩlamya engebe yiwe, asyatalyayo, nĩkwa oyũkatalaya engebe yiwe asyabikayo ndeke. 34Ngababwira nyiti, Oko kiro ekyo hasyabya abandu babiri ibagotsere oko ngyingo nguma, omuguma asyatwalwa, n'ogundi asyasĩganĩbwa. 35Hasyabya abakalĩ babiri abakaswa eyĩsyano yo haguma, omuguma asyatwalwa, n'ogundi asyasĩganĩbwa. [ 36Abalume babiri basyabya omw'irima omuguma asyatwalwa, n'ogundi asyasĩganĩbwa.] 37Neryo abiga mobamũbũlya bati, Mukama ni hahi kwehĩ? Yesu mwasũbĩryabo ati, Ahali ekĩnda, ho amahungu asyahĩndana.

will be added

X\