LŨKA 16

1Neryo Yesu mwabũga n'abiga buwe ati, Habya omundu w'ebindu oyo wabya awite omũteya. Neryo abandu mobamubwira bati omũteya oyo anemũtalya ebindu biwe. 2Neryo mwamubirikira ati, Ebĩ nĩ byahi ngowa busana nawe kwehĩ? Ulete emiganzo y'ebindu byage wabere ũkateya, kusangwa siwendisyaswabya mũteya wage. 3Neryo omũteya oyo mwayibwira ati, Nasyayira nyiti kwehĩ, kusangwa omukama wage amanyinyega obũteya bwage. Sindi n'akagala k'eririma, kandi ngakwa esĩsonĩ sy'erihema. 4Nyĩnasĩ ekyo ngandikola, neryo omugulu nasyalũsĩbwa oko bũteya, abandu batoke erĩnyĩkokya omo manyũmba wabo. 5Neryo mwabirikira abandu bosĩ ababya kw'emĩnda y'omukama wuwe. Oko w'erĩmbere mwabũga ati, Uli n'omwĩnda gungahi g'omukama wage kwehĩ? 6Neryo mwasũbĩrya ati, Ehĩrengĩ ĩgana hy'amagũta. Neryo omũteya mwamubwira ati, Wĩmaye akaratasi kawe, wĩkale lũba usake amakũmĩ atanu. 7Neryo mwabwira ogundi ati, Nawe uli n'omwĩnda gungahi kwehĩ? Naye mwasũbĩrya ati, Ebitiri ĩgana by'engano. Neryo omũteya mwamubwira ati, Wĩmaye akaratasi kawe usake amakũmĩ munani. 8Neryo omukama w'omũteya w'amabehĩ oyũ mwamupipa busana n'amenge wuwe; kusangwa bandu b'ekihugo kino ni b'amenge omo myatsi yabo kwilaba abandu b'ekyakakala. 9Neryo Yesu mwabũga ati, Ngababwira nyiti, muyire abĩra busana nenyũ omo bindu bitatunganene, neryo omugulu byasyahwa, mwasyakokĩbwa omo manyũmba w'erikoteramo. 10Oyuteregula omo myatsi mike-mike sialiregula omo myatsi minene-minene; n'oyutatunganene omo myatsi mike-mike, sialitunganana omo myatsi minene-minene. 11Neryo mwamabya mukalegula omo bindu by'ekihugo, nindi wasyababĩkya ebindu by'ekwenene kwehĩ? 12Kandi mwamabya mukalegula omo bindu by'abandi, nindi asyabaha ebindu byenyũ kwehĩ? 13Sihali omugombe oyo wangatoka erikolera abakama babiri; kusangwa asyakwa omuguma y'obusu, n'erianza ogundi; kutse asyabegera oko muguma, iniapona n'ogundi. Simwangatoka erikolera Nyamuhanga n'ebindu. 14Nĩkwa Abafarĩsayo mobowa ebyosĩ ebĩ neryo mobasekererya Yesu, kusangwa babya banzĩre esyofranka. 15Nĩkwa Yesu mwabwirabo ati, Ĩnywe muli abakayĩtũngananaya omo meso w'abandu, nĩkwa Nyamuhanga anasĩ emitima yenyũ. Kusangwa ebyo abandu bakaganĩraya nga ni binene, sibiri na mugaso omo meso wa Nyamuhanga. 16Emigambo ya Musa n'Amasako w'abamĩnyererĩ mobyabyaho erĩhĩka oko mugulu wa Yoane Mũbatĩsya; erĩtsũka oko mugulu oyo Engulu Yowene y'Obwami bwa Nyamuhanga ĩkatũlawa, n'obuli mundu akingiramo n'amaka. 17Kandi ni ryolo busana n'ekyanya ky'endata n'ekihugo erihwaho kwilaba erĩlũaho ly'akatondĩ kaguma k'Emigambo. 18Obuli mundu oyukakomola omũkalĩ wuwe akaswahĩkya ogundi mũkalĩ ĩnĩakasĩngĩra, n'oyũkahĩkaya omũkalĩ oyuliakomolawa n'ĩba wuwe, ĩnĩamabĩsĩngĩra. 19Neryo habya omundu w'ebindu iniakambala esyongimba sy'obũgũlĩ bunene sy'ekĩtanĩ n'esy'omunyama. Kandi iniakalya ebyowenenga. 20Kandi habya n'omundu mwera oyukahulawa mo Lazaro iniatsungene kw'ebironda, ĩnĩakahĩrawa oko lũkyo lw'omundu w'ebindu. 21Lazaro oyũ iniakasonda erirya ebita-hangukira ebikatogongera ahisi bĩkalũa oko mesa y'omundu w'ebindu; kandi esyombwa syabya sĩkahĩkaho n'eriryatsirira oko bironda biwe. 22Omundu mwera oyũ mwahola, mwahekwa n'abamalaĩka oko kĩkũba kya Abrahamũ; n'omundu w'ebindu naye mwahola nibya, mwatabwa. 23Ekũlĩmũ omundu w'ebindu mwabya akagalwa, neryo mwasumba ameso wuwe mwalangira Abrahamũ ehali, na Lazaro iniane oko kĩkũba kiwe. 24Neryo omundu w'ebindu mwabirikira kutsibu ati, Tata Abrahamũ! unyiganyire, utume Lazaro ahĩre omutwemutwe w'omunwe wuwe omo magetsi aholokaye olulimi lwage, kusangwa ngagalawa omo kirimi ekĩ ky'omuliro. 25Nĩkwa Abrahamũ mwamubwira ati, Uwe mwana, wibuke omugulu wabya ukiriho mowabana ebindu bibuya, na Lazaro naye mwabana ebindu bibi; nĩkwa lino Lazaro akakĩranĩbawa hano, nawe ukagalawa. 26N'akandi omo katĩkatĩ ketu nawe, hali kyũna kiri, neryo abakasonda erisokera eyo uli sibetoka, kandi sihali oyukasokera eno akalũa eyo uli. 27Neryo omundu w'ebindu mwabũga ati, Nĩkwa ngakulembalemba Tata, utume Lazaro eka wa tata wage, 28eyo ngwite abagala betu batanu, abwirebo ahanebo, bakasyasyahĩka hano ahali eriagalwa. 29Nĩkwa Abrahamũ mwamubwira ati, Abagala benyũ bawite Musa n'abamĩnyererĩ erihanabo; abagala benyũ bowebo. 30Neryo omundu w'ebindu mwasũbĩrya ati, Iyihi, tata wage Abrahamũ! Nĩkwa omundu amahĩka kubo akalũa oko baholĩ, basyabindula emitima erireka ebibi. 31Nĩkwa Abrahamũ mwamubwira ati, Bamatĩndowa Musa n'abamĩnyererĩ, sibendisyayisinga nomo mundu angalũa oko baholĩ.

will be added

X\