LŨKA 15

1Neryo abasolesya bosĩ n'abakola-nabi mobahĩka hakũhĩ na Yesu erĩmowa. 2Neryo Abafarĩsayo n'abakangĩrĩrya b'Emigambo mobayikuna bati, Omundu oyũ akakokaya abakola-nabi n'erirya haguma nabo. 3Kyaleka Yesu ĩnĩatwĩrabo omũsyo oyũ ati, 4Omundu ũkw'ĩnywe amabya awite esyombũlĩ ĩgana, amatalya enguma, akakolakĩ, kwehĩ? Akasĩganaya esyombũlĩ amakũmĩ mwenda n'omwenda omo mbwarara, akayakwamirira embũlĩ eyitere erĩhĩka aho asyabanirayo. 5Omugulu akabanayo, akatsema, ĩnĩahĩrayo oko bitigo biwe, 6n'eritwalayo eka wuwe. Neryo akabirikira bĩra buwe n'abalĩkyabo haguma, iniabwirabo ati, Mutseme haguma nage, kusangwa namabana embũlĩ yage eyĩlwe yitere! 7Ngababwira nyiti, Litya obutseme bunene bwasyabya elubula busana n'omukola-nabi muguma oyukabindula omutima n'erireka ebibi kwilaba obutseme busana n'abandu batunganene amakũmĩ mwenda n'omwenda abate n'obwaga bw'eribindula emitima n'erireka ebibi. 8Kutse omũkalĩ oyuwite esyofranka ĩkũmĩ amatalya oluguma, akakolakĩ kwehĩ? Akakaya etala, n'erĩbĩrya enyũmba yiwe, n'erikwesa ndeke erĩhĩka aho akandibaniralo. 9Omugulu akabanalo, akabirikira abĩra buwe n'abalĩkyabo ati, Mutseme haguma nage, kusangwa nabiribana olufranka olo natalaya! 10Ngababwira nyiti litya hali obutseme haguma n'abamalaĩka ba Nyamuhanga busana n'omukola-nabi muguma oyukabindula omutima n'erireka ebibi. 11Kandi Yesu mwabũga ati, Habya omundu oyuwite abagala babiri. 12Omulere mwabwira tata wuwe ati, Tata, gumbe erĩgabo ly'ebindu ebikandisyabya byage. Neryo ĩse wabo mwagabirabo ebindu biwe. 13Neryo enyũma w'ebindi biro, omwana mulere oyo mwasengasenga ebyosĩ abya awite, mwaya omo kihugo mo hali, n'eyo mwapanza-panza ebindu biwe omo migendere mityamitya. 14Kandi omugulu atalaya ebyosĩ, neryo enzala nene moyahĩka omo kihugo ekyo. Neryo omwana oyo mwatsũka eribya n'obwaga. 15Neryo mwayabungira ahali omundu w'ekihugo ekyo, n'omundu oyo mwamutuma omw'irima liwe erĩrĩsya esyongulube. 16Neryo mwasonda erĩũgũta oko bisugu ebyo esyongulube syabya sikalya, kandi sihabya mundu ukamuha kindu. 17Nĩkwa abere ibuka, mwabũga ati, Abagombe ba tata wage ni bangi abawite akalyo akatolere, n'akandi kakasaka, nĩkwa ĩngye ngaholera eno n'enzala! 18Ngandihongoka eriya eyiri tata wage n'erimubwira nyiti, Tata, nabĩrĩhalya embere sya Nyamuhanga n'embere syawe. 19Sinyikitolere eriahulwa mo mwana wawe; unyiyire ng'omuguma g'oko bagombe bawe. 20Neryo mwahongoka mwaya eyiri tata wuwe. Nĩkwa omugulu abya akine ekyaswa, ĩse wuwe mwamulangira, neryo omutima wuwe mwamuganyira, neryo mwatibita eyo ali, mwamubagalira, mwamulyatsirira. 21Neryo omwana oyo mwabũga ati, Tata, nabĩrĩhalya embere sya Nyamuhanga n'embere syawe; sinyikitolere eriahulwa mo mwana wawe. 22Nĩkwa ĩse wuwe mwabwira abagombe buwe ati, Mulete lũba ekanzu eyowene eyĩlabĩre esindi, mũmwambalayeyo, kandi mũhĩre embũka y'oko munwe wuwe, n'esyongendero oko bisando biwe. 23Neryo mulete ekyana ky'ende ekĩnenehĩre; mũsĩnzekyo, tulye, tutsange! 24Kusangwa omwana wage ono abya aholĩre, lino aneho; abya ĩnĩaherĩre, neryo lino abiribanika. Neryo mobatsũka eritsema. 25Nĩkwa omwana wuwe akambere, kabya omw'irima. Omugulu asa, abere ahĩka hakũhi n'enyũmba, mowa esyonanga n'erisata. 26Neryo mwabirikira omuguma g'oko bagombe, mwabũlya ebyabere. 27Naye mwamubwira ati, Mugala wenyũ abĩrĩhĩka, na tata wawe abĩrĩsĩnza ekyana ky'ende ekĩnenehĩre, kusangwa abĩrĩmũkokya n'obuholo ĩnĩanakalĩre. 28Nĩkwa mugala wabo oyo mwahitana, mwagana eriya omo nyũmba. Neryo ĩse wuwe mwahuluka mwamulemba-lemba ati ayemo. 29Nĩkwa mwasũbĩrya ĩse wuwe ati, Lebaya, nabirikukolera emyaka mingi isindinatagana erihana lyawe. Nĩkwa sulitamba n'akahene n'akaguma inatoka eritsanga haguma n'abĩra bage. 30Nĩkwa omwana wawe oyũ amabya ahĩka, oyo wabuga ebindu byawe haguma n'abaragane, wabĩrĩmũsĩnzĩra ekyana ky'ende ekĩnenehĩre! 31Neryo tata wuwe mwamubwira ati, Mwana wage, uli haguma nage ebiro byosĩ, n'ebyosĩ ngwite ni byawe. 32Nĩkwa lĩlwe litolere itwalya n'eritsema, kusangwa mugala wenyũ oyũ abya aholĩre na lino aneho, kandi abya ĩnĩaherĩre, neryo lino abiribanika.

will be added

X\