LŨKA 14

1Oko kiro kiguma ky'eSabato Yesu mwayalira omo nyũmba y'omukulu muguma w'Abafarĩsayo; n'abandu babya bakalebya Yesu yo kutsibu. 2N'eyo, hakũhĩ naye habya omundu oyũkwĩre akabunda. 3Neryo Yesu mwabũlya abakangĩrĩrya b'Emigambo n'Abafarĩsayo; ati, Linatolere omo Migambo erĩlamya oko kiro ky'eSabato kutse iyihi kwehĩ? 4Nĩkwa mobahuna. Neryo Yesu mwahamba omundu oyo, mwamũlamya, mwamũkwamanĩsya. 5Neryo mwabwirabo ati, Nindi kwĩnywe oyuwite mugala kutse ende eyabiritogera omo kyũna kw'amagetsi oko kiro ky'eSabato, ĩsĩendĩlũsyayo omo kyũna ekyo neryo-neryo, oko kiro ky'eSabato kwehĩ? 6Nĩkwa mobatatoka erĩmũsũbĩrya umw'ekyo. 7Kandi Yesu mwalangira ngoko abagenĩ babya bakayisoga ebĩtũmbĩ bibuya by'erĩsĩkĩbwa oko mesa, neryo mwagusa omũsyo oyũ ati, 8Omugulu omundu akakubirikira okw'irya ly'erĩherũkya, sĩwĩkale oko kĩtũmbĩ ky'erĩsĩkĩbwa. Kwamũhwa ogundi mundu omukulu kuwe abiribirikirwa, 9n'oyo wababirikira ĩnywe babiri ĩnĩahĩka akakubwira ati, Ũsĩgĩre omundu oyũ y'omwanya oyo. Neryo iwahemuka ĩwayĩkala omo kĩtũmbĩ ky'enyũma-nyũma. 10Nĩkwa omugulu ukabirikirawa, ugende wĩkale oko kĩtũmbĩ ky'enyũma-nyũma, neryo oyũkakũkokaya ĩnĩahĩkaho iniakubwira ati, Mwĩra wage, wase oko kĩtũmbĩ kyowene kw'aho. Neryo wasyasĩkĩbwa omo meso w'abagenĩ bosĩ abĩkere oko mesa baguma nawe. 11Kusangwa obuli mundu oyũkayĩkamahaya, asyakehĩbwa, n'oyũkayĩkehaya, asyahamĩbwa. 12Neryo Yesu mwabwira omũkokya w'erirya ati, Omugulu ukayira erirya, ly'eritungi kutse ly'erĩgolo-golo, subirikire abĩra bawe kutse abagala benyũ, kutse ab'ekĩtũnga kyawe kutse abalĩkyenyũ b'ebindu, kusangwa basyaswakubirikira nawe, ũkasyatuhwa. 13Nĩkwa omugulu ukayira erirya, ubirikire abera, n'ebirema, n'abakasĩndogera, n'esyondĩmatĩme, 14nawe wasyatsema; kusangwa sibangatoka erĩswakũtũha. Nyamuhanga asyakũtũha okw'ĩlũbũka ly'abatunganene. 15Omundu muguma oyo wabya ĩkere oko mesa haguma na Yesu mowa ebi, neryo mwabwira Yesu ati, Obutseme buli oko buli mundu oyo wasyalya akalyo omo Bwami bwa Nyamuhanga! 16Nĩkwa Yesu mwamubwira ati, Habya omundu oyo wakokotaya erirya ĩnene, neryo mwabĩrikira bandu bangi. 17Endambĩ y'erirya yabere yahĩka mwatuma omugombe wuwe oko bagenĩ buwe ati, Mwase, kusangwa ebyosĩ byamagonera! 18Nĩkwa abosĩ muguma muguma mobatsũka erĩyĩhambũlya. Ow'erĩmbere mwabwira omugombe ati, Nabya nabirigula eririma, nyitolere erĩyalebyalyo; unyibuyire. 19N'ogundi mwabũga ati, Nage nabirigula esyonde ĩkũmĩ esĩbohĩre oko ngomo ĩtanu, nage ngayalebayasyo, unyibuyire. 20N'ogundi mwabũga ati, Nage nabĩrĩherũkya omũkalĩ lino-lino, neryo busana n'omwatsi oyo sindyenditoka erĩhĩka. 21Neryo omugombe oyo mwasubula n'erĩtũlĩrago omukama wuwe emyatsi yosĩ eyo. Neryo omwenye enyũmba eyo mwahitana kutsibu, mwabwira omugombe wuwe ati, Ugende lũba omo mbalu n'omo tuyira tw'omũyĩ, ulete abera, n'ebirema, n'esyondĩmatĩme, n'abakasĩndogera. 22N'omugombe oyo mwabũga ati, Mukama, ebyo wategeka byabirikolwa na lino mukine omwanya. 23N'omukama oyo mwabũga n'omugombe wuwe ati, Ugende omo syombalu n'esyonzira, uhatikane abandu base, enyũmba yage yosũle. 24Kusangwa ngababwira nyiti, Sihali n'omuguma oyo wabirikirawa oyũkandĩsyagerya okw'irya lyage. 25Neryo esyondeko nene mosyagenda haguma na Yesu. Neryo Yesu mwabinduka mwabwirabo ati, 26Omundu amasa kwĩngye atetakwa ĩse wuwe y'ekĩnĩga, na nyĩnya wuwe n'omũkalĩwe, n'abana buwe, n'abagala babo, n'abali babo, naye ĩyowene-wene, isiangatoka eribya mwiga wage. 27Omundu oyuteheka omusalaba wuwe n'erinyikwama, siangatoka eribya mwiga wage. 28Omundu muguma kwĩnywe amasonda erĩhĩmba enyũmba eyĩsũngũlĩkĩre akatsũka erĩĩkala ahisi n'eriganza ebyasyahĩmbayo erĩrebya ng'anawite ebyangabuga enyũmba eyo. 29Bite bitya, amabitakula ekibanza, isialitoka eribugakyo, abosĩ abakasungakyo ĩbatsũka erimuseka, 30bati, Omundu oyũ mwatsũka erĩhĩmba enyũmba, neryo mwalemwa eribugayo. 31Kandi omwami oyuwite abandu elfu ĩkũmĩ, amayalwa n'ogundi mwami oyuwite abandu elfu makũmĩ abiri, asyatsũka erĩĩkala ahisi n'erĩyĩbũlya ng'asyatoka erilwa n'ogundi mwami oyo. 32Bite bitya, omugulu ogundi mwami akine hali, akatuma abakwenda erĩbũlya omusangano w'obuholo. 33Yesu ati, Litya sihali mundu ũkw'ĩnywe oyo wangatoka eribya mwiga wage amatendĩsyasĩganĩa ebyosĩ ebyo awite. 34Omũnyũ owene; nĩkwa omũnyũ amatalya obusi bwago, asyaswabana obusi bwago bo ati kwehĩ? 35Siawite mugaso busana n'ekitaka, kutse busana n'ekyabũ. Akagusawa eyĩhya. Oyuwite amatwĩ, owe.

will be added

X\