LŨKA 13

1Oko mugulu oyo habya bandu ababwira Yesu omwatsi w'Abanya Galĩlaya abo Pilato ĩta omugulu babya bakahera ehongo uku Nyamuhanga. 2Yesu mwasũbĩryabo ati, Mũkaganĩraya muti Abanya Galĩlaya aba babya bakolanabi kwilaba abandi Banya Galĩlaya bosĩ, kusangwa bagalĩbawa batya kwehĩ? 3Ngababwira nyiti, Iyihi! Nĩkwa nenyũ, mwamatendibindula emitima yenyũ erireka ebibi, ĩnywe bosĩ mwasyahera ngoko banahera batya. 4Kutse mũkaganĩraya muti abandu erĩkũmĩ n'omunani eSĩloamũ abatererawako n'enyũmba eyĩsũngũlĩkĩre, abahola, muti babya babi kwilaba abandu bosĩ abĩkere eYerũsalema kwehĩ? 5Ngababwira nyiti, Iyihi! Nĩkwa mwamatendibindula emitima yenyũ erireka ebibi, ĩnywe bosĩ mwasyahera ngoko banahera batya. 6Neryo Yesu mwatwĩrabo omũsyo oyũ ati, Omundu abya n'omuti w'omũtĩnĩ owaherawa omw'irima liwe ly'ebĩnyũ. Neryo omundu oyo mwahĩka erisonda kw'ebĩgũma, mwatabana byoko. 7Neryo mwabwira omũlĩmĩ wuwe ati, Talebaya, emyaka ĩsatu nabĩrĩhĩka ngasonda-sonda ebĩgũma oko muti w'omũtĩnĩ oyũ isinditabana byoko. Ukondego! Busana nakĩ akalũhaya ekitaka kwehĩ? 8N'omũlĩmĩ oyo mwamũsũbĩrya ati, Watalekago, Mukama, oko mwaka oyũ nataswatakula hakũhĩ nago n'erĩhĩra omuboga. 9Omuti amahetya ebĩgũma oko gundi mwaka, lyowene. Nĩkwa amatendiheta oko gundi mwaka, iwakondago. 10Oko kiro ky'eSabato Yesu abya akakangĩrĩrya omo nyũmba nguma y'erĩhĩndanamo. 11Omũkalĩ abyaho oyo wabya kw'ekĩrĩmũ kibi ekyamũlwalaya emyaka erĩkũmĩ n'omunani. Omũkalĩ oyo abya akondomĩre isialitoka erĩũnamukala. 12Yesu abere amulolako, mwamubirikira ati, Mũkalĩ, wamaboholwa kw'endwala yawe! 13Neryo Yesu mwamũhĩra kw'ebyala biwe; neryo-neryo mwatũngananĩbwa, neryo mwatsũka eripipa Nyamuhanga. 14Nĩkwa omũtabalĩ w'enyũmba y'erĩhĩndanamo mwahitana, kusangwa Yesu mwalamya abandu oko kiro ky'eSabato, neryo mwabwira abandu ati, Hali biro ndatu by'erikolwamo omũbĩrĩ; mubye mukasa omo biro ebyo mũlamĩbawe, butsira ekiro ky'eSabato! 15Nĩkwa Omukama mwamũsũbĩrya ati, Ĩnywe batebya! Obuli mundu kwĩnywe sialihangula ende yiwe kutse epunda yiwe eyiri omo nyũmba, n'erĩnywĩsyayo oko kiro ky'eSabato kwenĩ? 16N'omũkalĩ oyo, mwali wa Abrahamũ, oyo eSatanĩ yaboha emyaka erĩkũmĩ n'omunani, siritolere akaboholwa omo mũlĩkĩ oyũ, oko kiro ky'eSabato kwehĩ? 17Neryo abere akabũga ebĩ, esyonzĩgũ siwe syosĩ mosyahemuka; n'endeko yosĩ moyatsemera emyatsi yosĩ y'eriswekera eyo Yesu akola. 18Neryo Yesu mwabũga ati, Obwami bwa Nyamuhanga bulingene nakĩ kwehĩ? Kandi nasyalĩngĩrĩranĩabo nakĩ kwehĩ? 19Bulingene n'embuto y'eharadalĩ eyo mundu ĩmaya n'eribibayo omw'irima liwe; nayo moyakula moyabya muti munene, n'esyonyonyũ sy'ekyanya mosyahĩmba esyonyutu syasyo oko mitahi yago. 20Kandi Yesu mwabũlya ati, Nasyasosekanĩa Obwami bwa Nyamuhanga nakĩ kwehĩ? 21Busosene n'ekĩhamya omũkalĩ ĩmaya; mwabĩsakyo omo hĩrengĩ hisatu hy'eyĩsyano, n'eyosĩ moyahama. 22Kandi Yesu mwalaba omo mĩyĩ n'ehĩyĩ, ĩnĩakakangĩrĩraya, n'erikwama enzira yiwe eriya eYerũsalema. 23Neryo omundu mwamũbũlya ati, Mukama, abakalamĩbawa ni bake kwehĩ? Yesu mwamũsũbĩrya ati, 24Mulenge kutsibu eriingira omo lũkyo luke, kũsangwa ngababwira nyiti, Ni bangi abasyasonda-sonda eriingiramo, isibendisyatoka. 25Omwenye enyũmba amabihangana n'erikinga olũyĩ, nenyũ mũkatsũka erihangana eyĩhya n'erikongota oko lũyĩ, muti, Mukama, utukingulire! Neryo asyabasũbĩrya n'eribabwira ati, Sĩnyasĩ eyo mũkalũa. 26Neryo mwasyatsũka erĩbũga muti, motwalya, motwapũlĩrya embere syawe; kandi mowakangĩrĩrya omo nzira sy'ewetu. 27Naye asyabũga kandi ati, Ngababwira nyiti, Sĩnyasĩ eyo mũkalũa. Mũlũe aho nyiri, ĩnywe bosĩ abakolĩ b'ebibi! 28Eyo hasyabya eririra n'erikeregeta ameno, omugulu mukalangira Abrahamũ na Ĩsaka, na Yakobo, n'abamĩnyererĩ bosĩ omo Bwami bwa Nyamuhanga, nenyũ imukagusawa eyĩhya. 29Abandu basyalũa eyo eryuba likahulukira, n'eyo likalengera, n'oko Lutambi lw'eNdata, n'oko Lutambi lw'eYĩkwa, basyĩkala oko mesa okw'irya omo Bwami bwa Nyamuhanga. 30Neryo lebaya, hali b'enyũma abasyabya b'erĩmbere, kandi hali ab'erĩmbere abasyabya b'enyũma. 31Oko katambĩ ako, abandi Bafarĩsayo mobahĩka bakamubwira bati, Ugende, ũlũe hano, kusangwa Herode anzĩre erĩkwĩta. 32Yesu mwasũbĩryabo ati, Mugende mubwire eboha eyo muti, Lebaya, ngahiga esyombĩnga n'erikola omũbĩrĩ w'erĩlamya mũnabwĩre n'omo ngyakya, n'oko kiro ky'ebisatu nasyabugirira omũbĩrĩ wage. 33Nĩkwa litolere inakwama olugendo lwage mũnabwĩre, n'omo ngyakya, na mwalindi; siritolere omũmĩnyererĩ akakwĩra eyĩhya w'eYerũsalema. 34Uwe Yerũsalema, Yerũsalema! Ũkĩta abamĩnyererĩ n'erĩĩtabo omo mabwe abatumawa uk'uwe! Ngendo singahi nabya nyanzĩre erĩhĩndanĩa abana bawe bo haguma, ng'erĩbũtĩ ko lĩkahĩndanaya emĩpyege yalyo omo bĩpũpa byalyo, nĩkwa simwabya mwanzĩre! 35Mũlebaye, oko wenyũ kwasyasĩgala mo kĩma. Ngababwira nyiti, Simwendisyanyilolako erĩhĩka aho mwasyabũgĩra muti, Nyamuhanga atsumule oyukasa omo lĩna ly'Omukama!

will be added

X\