LŨKA 12

1Omugulu amaelfu w'abandu babya ĩbabĩrĩhĩndana haguma; kyaleka ibalyatangirirana, Yesu mwatsũka eribwira abiga buwe ati, Mũyĩtegaye busana n'ekĩhamya ky'Abafarĩsayo. Ekyo nĩ 'yĩtendererya. 2Nĩkwa sihali ekĩkũnĩngĩrwe ekitendisyabĩsũlwa, n'ekĩbĩsamĩre ekitendisyamĩnyĩkalĩbwa. 3Neryo omwatsi wahi ogo mwabĩrĩkanĩrya omo mwirĩmya asyowĩrwa omw'itungi, n'ebyo mwabĩrĩbũga omo bihwehwe omo bisenge by'enyũmba byasyatũlwa oko lutwe lw'enyũmba. 4Bĩra bage, ngababwira nyiti, simubahe abakĩta omubiri, n'enyũma w'aho isibawite ebyo bangaswakola. 5Nĩkwa ngandĩbakangya abo mwangubaha: Mubahe Nyamuhanga, oyo amabĩta, iniawite ehamũlĩ erigusa omo Kũlĩmũ. Ega, ngababwira nyiti, mumubahe! 6Ehĩnyonyũ hitanu sĩhyegũlĩbawa oko senge ĩbĩrĩ kwehĩ? Nĩkwa Nyamuhanga sialibirirawa n'akaguma ka kuhyo. 7Kandi esyonzwiri sy'oko mitwe yenyũ sĩnaganzĩrwe esyosĩ. Neryo simubahe, muli b'obũgũlĩ bunene kwilaba obũgũlĩ bw'ehĩnyonyũ hingi. 8Ngababwira, nyiti, obuli mundu ũkanyĩkanganaya embere sy'abandu, Omugala w'Omundu asyamũkanganĩa embere sy'abamalaĩka ba Nyamuhanga. 9Nĩkwa oyukanyigana embere sy'abandu, Omugala w'Omundu asyamugana embere sy'abamalaĩka ba Nyamuhanga. 10Kandi obuli mundu oyo wasyanegulira Omugala w'Omundu, asyabuyirwa; nĩkwa oyukatsuma Omũlĩmũ Abũyĩrĩre, siendisyabuyirwa. 11Omugulu bakabaleta embere sy'amanyũmba w'erĩhĩndanamo, n'abatabalĩ, n'ab'ehamũlĩ, sĩmũhahũkaye emitima nga mwasyasũbĩrya bokĩ, kutse ebyo mwangabũga. 12Kusangwa Omũlĩmũ Abũyĩrĩre asyabakangĩrĩrya oko ndambĩ eyo ebyo mutolere erĩbũga. 13Neryo omundu g'oko ndeko mwabwira Yesu ati, Mũkangĩrĩrya, ubwire mugala wetu uti, tugabe obũsokĩ obo tata wetu atũsĩgĩra. 14Nĩkwa Yesu mwamubwira ati, Uwe mulume, nindi wanyiyira mo mũtswerĩ wenyũ, kutse mo mũgabĩ w'obũsokĩ bwenyũ kwehĩ? 15Neryo Yesu mwabwirabo ati, Mũlebaye, kandi mũyĩtegaye okw'irumwa lyosĩ, kusangwa engebe y'omundu si busana n'obungi bw'ebindu biwe. 16Neryo Yesu mwabwirabo omũsyo oyũ ati, Ekitaka ky'omundu w'ebindu mokyerya bingi. 17Neryo omundu oyo mwatsũka erĩganĩrya omo mutima wuwe ati, Nasyakolakĩ kwehĩ? Kusangwa singwite ah'eribika ebyalya byage byosĩ. 18Neryo mwayibwira ati, Ngandikola ekĩ: ĩnahĩmbũla ebigona byage, ĩnahĩmbabyo mo binene kw'ebĩ, n'eyo, nasyabika ebyalya byage n'ebindu byage. 19Neryo nasyabwira omutima wage nyiti, Mutima, uwite bindu binene bĩbĩkĩre busana n'emyaka mingi. Uhumule, ulye, ũpũlaye, ũyĩtsemesaye. 20Nĩkwa Nyamuhanga mwamubwira ati, Uwe mũkĩrũ, omo kiro ekĩ engebe yawe ikandibirikirwa, n'ebindu ebyo wabiribika byasyabya byandi kwehĩ? 21Neryo, omundu oyukayibikira ebindu, kw'ali atya, nĩkwa siawite bindu busana na Nyamuhanga. 22Neryo Yesu mwabwira abiga buwe ati, Busana n'omwatsi oyũ ngababwira nyiti, Simubye n'erĩyĩlũhya n'amaganĩryo busana n'engebe yenyũ, muti mwasyalyakĩ, kutse busana n'omubiri, nga mwasyambalakĩ. 23Kusangwa engebe ĩrengĩre ebyalya, n'omubiri alengĩre esyongimba. 24Mũlebaye ebikororo, kusangwa sibyebiba kutse sibyegesa; sibiwite embĩso kutse ekigona; nĩkwa Nyamuhanga akalĩsayabyo; nenyũ muli b'obũgũlĩ bungi kwilaba esyonyonyũ esyo! 25Nindi kwĩnywe amayĩlũhya busana n'amaganĩryo anganatoka eritomekera emyaka yiwe kwehĩ? 26Neryo mwamataluka oko mwatsi muke, busana nakĩ mũkayĩlũhaya n'amaganĩryo busana n'eyindi myatsi kwehĩ? 27Mũlebaye ebiranga-ranga, ngoko bikalasa; sibyenuba, kutse eriluka esyongimba; nikwa ngababwira nyiti, Solomono n'olukengerwa luwe losĩ mwatambala ndeke ng'omusanga muguma oyũ. 28Nĩkwa Nyamuhanga oyũkambalaya ebiti by'omolĩ, ebikabyaho mũnabwĩre n'omo ngyakya bikagusawa omo lĩko. Siendisyabambalya kwilaba aho kwehĩ? Ĩnywe bandu b'erĩkĩrĩrya ĩke. 29Kandi simusonde ebyo mwasyalya, n'ebyo mwasyapũlya, kandi simuhanga-hangaye emitima. 30Kusangwa ebihanda by'ekihugo bikasonda-sondaya ebindu byosĩ ebyo, nĩkwa Tata wenyũ anasĩ ebibali bwaga. 31Nĩkwa mũtsũke erisonda obwami bwa Nyamuhanga, naye asyabaha ebindu ebĩ. 32Ekĩhyo kike, simubahe kusangwa kikatsemesaya Tata wenyũ yo ndeke, eribaha Obwami. 33Mũgũlaye ebindu byenyũ, muhe esyofranka sy'oko bera. Muyibanire amatũsĩ awatekula, muyibikire ebindu elubula ebitekeha, ahatehĩka mũrahĩ, n'ehinyurugunzu sihyeherayabyo. 34Kusangwa ahali ebindu byenyũ, h'emitima yenyũ yasyabya nibya. 35Mubye imunambite, ĩmũnasĩkĩre, mwakaye esyotala syenyũ. 36Mubye ng'abagombe abakalinda omukama wabo aho asyasubulira okw'irya ly'erĩherũkya. Omugulu asyasa n'erikongota oko lũyĩ, basyamukingulira lũba. 37Obutseme buli oko bagombe abo omugulu omukama wabo akegayabo ibabiribuka ĩbanasĩkĩre! Kwenene ngabũga nenyũ, asyaboha embindi yiwe, ĩnĩkalyabo okw'irya, neryo ĩnĩahĩkaho, n'erikolerabo. 38Obutseme buli n'abagombe abo mukama wabo ameyabo ĩbanasĩkĩre kutse amasa omo kĩsĩsĩmũko ky'akabiri, kutse eky'akasatu. 39Kandi muminye ndeke kumbe omwenye nyũmba alibya asĩ endambĩ yahi omũrahĩ akandĩhĩka, kumbe sĩangalekĩre enyũmba yiwe ikatulwa. 40Nenyũ nibya, mubye ĩmũnasĩkĩre; kusangwa Omugala w'Omundu asyasa oko ndambĩ mũtalengekenĩe. 41Neryo Petero mwabũga ati, Mukama, ũkatwa omũsyo oyũ busana netu, kutse busana n'abandu bosĩ kwehĩ? 42Neryo Omukama mwasũbĩrya ati, Omwĩmanĩrĩ oyuteregula ow'amenge nindi kwehĩ? Ni mundu oyo mukama wuwe asyamũhĩra erĩrebya abagombe buwe, erihabo erĩgabo lyabo ly'akalyo oko mugulu atolere. 43Obutseme buli oko mugombe oyo mukama wuwe amamweya akakola atya omugulu akahĩka eka! 44Kwenene ngababwira nyiti, Omukama oyo asyamuyira mo mũteya w'ebindu biwe byosĩ. 45Nĩkwa omugombe oyo amayibwira omo mutima wuwe ati, Omukama wage sialitasa lũba, ĩnĩatsũka erĩswĩrya abagombe b'obulume n'ab'obũkalĩ, n'erirya, n'erĩpũlya n'erĩkũnda, 46omukama w'omugombe oyo asyasa ekiro atemulindirira, n'oko ndambĩ atasĩ; omukama oyo asyamũtsũtsanga mo bitswe-bitswe, n'erimuha omwanya haguma n'abatĩkĩrĩrye. 47Nĩkwa omugombe oyo wabya wasĩ erisonda ly'omukama wuwe mwatayĩtegekanĩa, kutse erikola ebyo mukama wuwe anzĩre, asyaswĩrĩbwa esyonyambĩ nyingi. 48Nĩkwa omugombe oyũtasĩ ebyo mukama wuwe anzĩre, neryo akakola emĩbĩrĩ eyitolere akaswĩrĩbwa, asyaswĩrĩbwa nyike. Omundu oyukahabawa bingi, asyabũlĩbwa bingiĩ n'omundu oyo wabĩkĩbawa bingi, asyabũlĩbwa bingi. 49Nabĩrĩhĩka erĩtwana omuliro oko kihugo; nyanzĩre kumbe abiriaka! 50Nĩkwa ngwite erĩbatĩsya eryo nangabatĩsĩbwamo, kandi ngakwa engitsi eririnda ekiro lyasyabererera. 51Mũkaganĩraya muti nasa erireta obuholo omo kihugo kwehĩ? Nyiti iyihi, nĩkwa erigabana. 52Erĩtsũka lino omo nyũmba nguma hasyabya bandu batanu abagabene. Abasatu basyalwa n'ababiri, n'ababiri basyalwa n'abasatu. 53Basyagabana, tata asyalwa n'omwana; n'omwana asyalwa n'ĩse wuwe; nyĩnya asyalwa na mwali, na mwali asyalwa na nyĩnya; nyĩnyĩ-byala asyalwa na mwalĩana, na mwalĩana asyalwa na nyĩnyĩ-byala. 54Kandi Yesu abya akabwira endeko ati, Omugulu mukalangira ekĩtũ kikahangana ebwanga bw'eyĩkwa, mũkabũga muti, embũla ikandiwa, ko biri bitya. 55N'omugulu mũkowa erihunga ly'eLutambi lw'eYĩkwa likabuhirira, muti, Bukandikya mũnabwĩre; neryo ko biri bitya. 56Ĩnywe batebya! Mũnasĩ eriminyerera erisosa ly'ekihugo n'ery'ekyanya; nĩkwa busana nakĩ sĩmwasĩ eriminyerera omugulu wa sesene kwehĩ? 57Busana nakĩ simwetswera ĩnywebene ekitunganene kwehĩ? 58Omundu amakutsongera akakutwala oko kilondero, ulenge erisangana naye omo nzira, sĩakũkolaye oko mũtswerĩ, n'omũtswerĩ erĩkũhererya omũpolĩsĩ, n'omũpolĩsĩ iniakugusa omo mũlĩkĩ. 59Ngakubwira nyiti, Sĩwendĩsyalũaho ute waliha esenge y'enyũma-nyũma eyikabugirira olubanza olo.

will be added

X\