LŨKA 11

1Oko mugulu muguma Yesu abya iniakayasabira halebe. Abere abuga erisaba, omuguma g'oko biga buwe mwamubwira ati, Mukama, ũtũkangĩrĩraye erisaba, ngoko Yoane akakangĩrĩraya abiga buwe. 2Yesu mwabwirabo ati, Omugulu mukasaba ĩmwabũga muti: Tata, Erĩna lyawe libye rĩbũyĩrĩre. Obwami bwawe bwase. 3Utuhe obuli kiro akalyo ketu akatutolere. 4Utubuyire ebibi byetu, Kusangwa netu tukabuyira obuli mundu oyukatukola nabi. Sigututwale omw'irengwako. 5Neryo Yesu mwabwira abiga buwe ati, Nindi kwĩnywe amabya n'omwĩra wuwe, neryo akaya ewuwe omo katĩkanene, akamubwira ati, Mwĩra unyibweke mandu asatu. 6Kusangwa omwĩra wage, akalũa oko lugendo akambĩkako, nage singwite eby'erimuha. 7N'oyuli omo nyũmba asyamũsũbĩrya ati, Sũndũhaye; olũyĩ lũkĩngĩre, nage n'abana tuli omo ngyingo; sinditoka erihangana n'erikuha kindu. 8Nyiti nomo atetahangana kusangwa nĩ mwĩra wuwe, nĩkwa busana n'erimuhatikana, asyahangana n'erimuha ebyosĩ ali nabyo bwaga. 9Nage ngabũga nenyũ nyiti, Mũbũlaye, neryo mwasyahabwakyo; mũsonda-sondaye, neryo mwasyabanakyo; mukongote oko lũyĩ, neryo mwasyakingulirwalo. 10Kusangwa oyũkabũlaya, asyangirirakyo, n'oyukasonda-sonda asyabanakyo; n'olũyĩ lwasyakingukala oko yukakongota kulo. 11Nindi kwĩnywe abotata oyo wangaha mugala wuwe y'erĩbwe omugulu akabũlaya obundu kwehĩ? Kutse oyo wangamuha enzoka omugulu akabũlaya erĩhere kwehĩ? 12Kutse oyo wangamuha enge, omugulu akabũlaya eriyi kwehĩ? 13Nomo mune ababi, mũnasĩ eriha abana benyũ b'olũsũnzo lubuya. Tata wenyũ w'elubula syalabĩre aho eriha Omũlĩmũ Abũyĩrĩre oko bakamũbũlaya kwehĩ? 14Yesu abya akahigira embĩnga y'eyĩhya oko yo wabya mũmũ. Neryo embĩnga yabere yabĩmũlũako, omundu oyo mwatsũka erĩbũga. N'esyondeko mosyasweka. 15Nĩkwa abandi b'esyondeko mobabũga bati, Belzebũlĩ, omukama w'esyombĩnga akamuha maka w'erihigasyo. 16N'abandi mobasonda erimulengako, bati akangayebo ekitiko-tiko ekĩkalũa elubula. 17Nĩkwa Yesu mwaminya obũlengekanĩa bwabo, neryo mwabwirabo ati, Obwami obũkayĩrwanaya bukabya kĩhũma, n'ekĩtũnga ekĩkayĩrwanaya kikasambukala. 18Kandi eSatanĩ yamayĩrwanĩa, obwami bwayo bwasyahangana buti kwehĩ? Kusangwa mũkabũga muti, Belzebũlĩ akamba amaka w'erihiga esyombĩnga. 19Kandi ĩngye namabya ngahigira esyombĩnga sy'eyĩhya omo maka wa Belzebũlĩ, abana benyũ, bakahigirasyo eyĩhya omo maka wandi kwehĩ? Neryo abana benyũ basyabya batswerĩ benyũ. 20Nĩkwa ĩngye ngahigira esyombĩnga sy'eyĩhya omo maka wa Nyamuhanga, kundi obwami bwa Nyamuhanga bwabĩrĩbahĩkako. 21Omugulu embangĩ yamabiambala ebindu by'amalwa, akategaya omũyĩ wuwe, ebindu biwe biri n'obuholo. 22Nĩkwa omugulu omundu oyũmũlengĩre amaka akamuhamba n'erĩmũkĩnda, akamũlũsaya kw'ebindu biwe byosĩ by'amalwa, ebyo ayiketere, kandi akagaba ebyo ahũnga. 23Oyute haguma nage, akanyigana, n'oyutegesa haguma nage akapanza-panza. 24Omugulu ekĩrĩmũ kibi kĩkalũa omo mundu, kikalendera ikyalaba ahate magetsi, ikikasonda-sonda ah'eriluhukira; kyamabulaho, kikayibwira kiti, Ngandisuba omo nyũmba yage eyo nasĩga. 25Neryo kyamabĩhĩkaho kĩkeya enyũmba eyo ĩyĩnabĩrĩrye, ĩyĩnakomĩre. 26Neryo kikahuluka ikyaleta ebindi bĩrĩmũ birinda bibi kwilabakyo, neryo ibingiramo n'erĩĩkalamo. Endũlĩ y'omundu oyo ikabya nyibi kwilaba erĩmbere. 27Yesu abere abĩbũga omwatsi oyũ, omũkalĩ muguma g'oko ndeko mwabũga naye ati, Obutseme buli oko mũkalĩ oyo wakubuta n'amabere ago walyako! 28Nĩkwa Yesu mwamũsũbĩrya ati, Ko bite bitya, nĩkwa obutseme buli oko bakowa ekĩnywa kya Nyamuhanga n'erikolakyo. 29Neryo esyondeko babya bakakanĩa, Yesu mwabũga ati, Abandu b'omugulu ono ni babi! Bakasonda-sonda ekitikotiko ng'ekiminyikalo. Nĩkwa sibendisyahabwakyo, kye n'ekitiko-tiko kya Yona. 30Kusangwa ngoko Yona abya kĩmĩnyĩsyo busana n'abandu b'eNĩnawe, litya Omugala w'Omundu asyabya kĩmĩnyĩsyo busana n'abandu b'olulengo olũ. 31Omwami w'Obũkalĩ w'eLutambi lw'eYĩkwa asyahangana oko kiro ky'eritswerwa, n'erĩsĩnga abandu b'olulengo olũ, kusangwa alũa oko ndũlĩ sy'ekihugo busana n'erĩowa amenge wa Solomono; neryo lebaya, oyũlengĩre Solomono ane hano. 32Abandu b'eNĩnawe basyahangana oko kiro ky'eritswerwa n'erĩsĩnga abandu b'olulengo olũ, kusangwa babindula emitima erireka ebibi okw'ĩtũlago lya Yona. Kandi lebaya, oyũlengĩre Yona ane hano! 33Sihali mundu oyũkakaya etala neryo akahĩrayo ahabĩsamĩre, kutse omwisi w'ekitiri, nĩkwa oko mbaniko, neryo abandu abakingira omo nyũmba batoke erilangira ekyakakala. 34Etala y'omubiri rye rĩso. Omugulu erĩso lyawe likalangira, omubiri wawe gosĩ akũsũla n'ekyakakala; nĩkwa erĩso lyawe lyamabya libi, omubiri wawe akũsũla m'omwĩrĩmya. 35Neryo mũtegaye ekyakakala ekiri omwisi wenyũ sikibye mwĩrĩmya. 36Neryo omubiri wawe gosĩ amabya oswĩre n'ekyakakala, isiawite omwanya ali m'omwĩrĩmya, asyabya n'erĩkangabasanĩa ehosĩ, ngoko etala ĩkakoleraya n'erĩhenĩa lyayo. 37Neryo Yesu abere abibuga erĩtũlago, Omũfarĩsayo mwamũbũlya ati alye haguma naye; neryo Yesu mwayamo mwĩkala okw'irya. 38Omũfarĩsayo mwasweka kusangwa Yesu mwatatsũka erinaba embere w'erirya. 39Nĩkwa Omukama mwamubwira ati, Ĩnywe Bafarĩsayo mũkeraya endambi sy'olũtehĩ n'ekibindi; nĩkwa omwisi moswĩre erinyega n'obubi. 40Ĩnywe bakĩrũ! Nyamuhanga oyo wahangika endambi, mwatahangika n'omwisi nibya kwehĩ? 41Nĩkwa mugabire abandu bera ebiri omwisi w'olũtehĩ n'ekibindi, neryo ebyosĩ byasyera. 42Nĩkwa obũlĩge. kwĩnywe Bafarĩsayo! Kusangwa mukaha Nyamuhanga ekiguma ky'omw'ĩkũmĩ kya munanaa, n'omũchĩcha, n'esindi nyenyĩ syosĩ, nĩkwa ĩmũkasĩganaya erĩbanza n'erianza Nyamuhanga. Kumbe mukakola ebĩ n'erĩtendĩsĩganĩa ebindi. 43Obũlĩge kwĩnywe Bafarĩsayo! Mukanza ebĩtũmbĩ by'embere omo manyũmba w'erĩhĩndanamo, n'erĩkerĩbwa omo hitale. 44Obũlĩge kwĩnywe, kusangwa muli ng'esisinda esitaminyikere, n'abandu bakalaba endata kusyo ĩsĩbasĩsyo. 45Omuguma g'oko bakangĩrĩrya b'Emigambo mwamubwira ati, Mũkangĩrĩrya, omugulu ũkabũga utya ukatutsuma nibya. 46Yesu mwasũbĩrya ati, Obũlĩge kwĩnywe bakangĩrĩrya b'Emigambo nibya! Kusangwa mũkahekaya abandu emiheke eyĩkalĩre erihekwa, nenyũ sĩmwetũlaya oko miheke eyo k'omunwe erĩwatĩkyabo erihekayo. 47Obũlĩge kwĩnywe! Kusangwa mwahĩmba esisinda sy'abamĩnyererĩ, kandi abotata-kulu benyũ bo banĩtabo. 48Kandi muli balangĩrĩ ĩmũkalĩga emĩbĩrĩ y'abotata-kulu benyũ; kusangwa mobĩta abamĩnyererĩ, nenyũ mũkahĩmba esisinda syabo. 49Busana n'omwatsi oyũ, Amenge wa Nyamuhanga mwabũga ati, Nasyatumirabo abamĩnyererĩ n'abakwenda, kandi basyĩta abandi ba kubo n'erĩendererya abandi. 50Neryo abandu ba sesene basyasuyirwa busana n'omusasi w'abamĩnyererĩ bosĩ erĩtsũka omugulu Nyamuhanga ahangika ekihugo, 51erĩtsũka oko musasi wa Abelĩ, erĩhĩka oko musasi wa Zakarĩa oyo wakwĩra omo katĩkatĩ k'ekiherero n'enyũmba ya Nyamuhanga. Ega, ngababwira nyiti, abandu b'omugulu ono basyasuyirwa busana n'abosĩ abo! 52Obũlĩge kwĩnywe, abakangĩrĩrya b'Emigambo! Mwabiritwala olufungula lw'enyũmba y'amenge; nenyũ simwetingira, kandi momwakakĩrya ababya bakasonda eriingiramo. 53Neryo abere alũayo, abakangĩrĩrya b'Emigambo, n'Abafarĩsayo mobatsũka erilwa naye n'erĩmũbũlya nabi busana n'emyatsi mingi, 54ibakamulinda erimutega omo myatsi angabũga.

will be added

X\