LŨKA 10

1Enyũma w'aho, Omukama mwayisoga abandi bandu makũmĩ alinda, mwatumabo mo babiri babiri embere siwe, eriya oko mĩyĩ yosĩ aho iye asonda erĩhĩka. 2Neryo mwabwirabo ati, Eby'erigesa ni bingi, nĩkwa abahĩngĩ ni bake. Neryo musabe Omukama w'erigesa atume abahĩngĩ omw'igesa liwe. 3Mugende, mũlebaye, ngabatuma ng'ehyana hy'esyombũlĩ omo katĩkatĩ k'esyombwa sy'omolĩ. 4Simuheke erĩtũsĩ, kutse engunza, kutse esyongendero; kandi sĩmũbũkaye mundu omo nzira. 5Omugulu mukingira omo nyũmba, mũtsũke erĩbũga, muti, Obuholo bubye omo nyũmba eyĩ! 6Omundu w'obuholo amabya aneho, obuholo bwenyũ bwasyamubyako; nĩkwa bite bitya, ibwasuba ũkw'ĩnywe. 7Mwĩkale omo nyũmba eyo, imwalya ĩmwapũlya ebyo bakabaha; kusangwa omũhĩngĩ anatolere oluhembo luwe. Simubye mũkahũma-hũmĩra omo wandi manyũmba. 8Omugulu mukaya oko mũyĩ, bamabakokya, mulye ebyo bakabaha. 9Mũlamaye abakonĩ abali oko mũyĩ oyo, mubwire abandu bako muti, Obwami bwa Nyamuhanga bwamahĩka hakũhĩ nenyũ. 10Nĩkwa omugulu mukaya oko mũyĩ, bamatendĩbakokya muye oko syonzira syako n'erĩbũga muti, 11Olũtũtũ lw'omũyĩ wenyũ olukamakirira oko bisando byetu, tukakungutalo eribakunga; nĩkwa muminye ekĩ: obwami bwa Nyamuhanga bwamahĩka hakũhĩ nenyũ. 12Ngababwira nyiti, olubanza lw'eSodomo lwasyabya luke kwilaba olubanza lw'omũyĩ oyo ekiro ky'eritswerwa. 13Obũlĩge uk'uwe Korazĩnĩ! Obũlĩge uk'uwe Betesaĩda! Kusangwa kumbe ebitiko-tiko ebyakolawa omwisi wenyũ, byalikolawa eTĩro n'eSĩdona, kumbe babiribindula emitima n'erireka ebibi kera ibanambite emisarandwe n'erĩĩkala omw'ĩbũ! 14Kusangwa olubanza lw'eTĩro n'eSĩdona lwasyabya luke kwilaba olwenyũ oko kiro ky'eritswera. 15Nawe Kapernaũmũ, wasyahamĩbwa elubula kwehĩ? Wasyandagalĩrĩbwa eKũlĩmũ! 16Yesu mwabwira abiga buwe ati, Oyũkabowa, akanyowa; n'oyukabagana, akanyigana; n'oyukanyigana, akagana oyo wanyituma. 17N'amakũmĩ alinda mobasubula n'obutseme bati, Mukama, esyombĩnga mosyatowĩre omugulu twahanasyo omo lĩna lyawe! 18Yesu mwasũbĩryabo ati, Monalangira eSatanĩ ikatoga ng'erĩpalya ĩkalũa elubula. 19Lebaya, nabiribaha ehamũlĩ y'eriryatangirira esyonzoka, n'esyonge, n'erirenga obũtokĩ bosĩ bw'enzĩgũ, isihali kindu kyangabahũtalya. 20Nĩkwa simutseme kusangwa ebĩrĩmũ bibi byabĩrĩbowa, nĩkwa mutseme kusangwa amena wenyũ abirisakwa elubula. 21Oko ndambĩ eyo Yesu mwatsema kutsibu omo Mũlĩmũ Abũyĩrĩre ati, Ngakupipa uwe Tata, Omukama w'elubula n'ow'ekihugo, wabĩrĩbĩsa emyatsi eyĩ oko b'amenge n'abanyima. Kandi Ega, Tata, kusangwa wabĩrĩbĩsũlĩrayo oko bana balere; ko byakũtsemesaya bitya omo meso wawe. 22Tata wage abirimba emyatsi yosĩ, kandi sihali oyo wasĩ Mugala nga nindi, nina Tata; kandi sihali oyo wasĩ Tata nga nindi, nina Mugala, n'omundu oyo Mugala anzĩre erĩmũbĩsũlĩra. 23Neryo Yesu mwabindukira abiga buwe mwabwirirabo ahate mundu ati, Obutseme buli oko bakalangira emyatsi eyo mũlangĩre! 24Kusangwa ngababwira nyiti, abamĩnyererĩ bangi n'abami mobasonda erilangira ebyo mukalangira, nĩkwa mobatalangirabyo, n'erĩowa emyatsi eyo mũkowa, nĩkwa mobatowayo. 25Neryo omũkangĩrĩrya w'Emigambo mwahĩkaho n'erimulengako ati, Mũkangĩrĩrya, nyikolekĩ inatoka eribana engebe y'erikota kwehĩ? 26Yesu mwamũsũbĩrya ati, Ebĩsakĩre omo Migambo ni byahi kwehĩ? Ukasomabyo uti kwehĩ? 27Naye mwasũbĩrya ati, Litolere iwanza Omukama Nyamuhanga wawe omo mutima wawe gosĩ, n'ekĩrĩmũ kyawe kyosĩ, n'omo maka wawe gosĩ, n'omo bũlengekanĩa bwawe bosĩ; kandi iwanza mũlĩkyenyũ ngoko ũyanzĩre. 28Yesu mwamũsũbĩrya ati, Wabĩrĩsũbĩrya ndeke; Ukole utya, wasyabyaho. 29Nĩkwa omũkangĩrĩrya w'Emigambo iniakasonda eriyiyira mo mutunganene, mwabũlya Yesu ati, Mũlĩkyetu nindi kwehĩ? 30Yesu mwamũsũbĩrya ati. Habya omundu oyo wabya akandagalira eYerĩko ĩnĩakalũa eYerũsalema. Neryo abanyeyĩ mobamũhũnga kw'ebyosĩ, mobamũhũnza neryo mobamũsĩga hakũhĩ n'erihola. 31Neryo mũhererĩ muguma mwahĩkaho, iniakalaba omo nzira eyo. Omugulu omũhererĩ amulolako, mwayihengeka erilaba. 32Neryo Omũlawĩ abere ahĩkaho, naye mwamusamalira n'eriyihengeka, mwalaba elutambi. 33Nĩkwa Omũsamarĩa, oyo wabya oko lugendo, mwahĩka ahali omundu oyo, neryo abere amulolako, mwamuganyira. 34Neryo mwaya aho ali, mũta amagũta n'ebĩnyũ oko bironda biwe n'erisenga ebironda ebyo; kandi mwamũhĩra oko punda yiwe, mwamutwala oko hotele neryo mwamũtwanira. 35Omo ngyakya mwĩmya esyofranka magana abiri mwahasyo oko mwenye hotele ati, Ũnyĩtwanirireye, neryo ekiro nasyaswasa nasyakuha ebyo ukamulihira kwilaba esĩ. 36Neryo Yesu ati, ũkaganĩraya uti nindi oko basatu aba yo wabya mũlĩkyabo mundu oyo wahambawa n'abanyeyĩ kwehĩ? 37Omũkangĩrĩrya w'Emigambo mwasũbĩrya ati, Oyo wamuganyira. Neryo Yesu mwamubwira ati, Ugende, nawe ukole utya. 38Neryo omugulu Yesu n'abiga buwe babya oko lugendo, mobingira oko kayĩ n'eyo omũkalĩ oyo wahulawa mo Marata mwamũkokya omo nyũmba yiwe. 39Naye abya awite mwali wabo oyukahulawa mo Marĩa, oyo wĩkala hakũhĩ n'ebisando bya Yesu, n'erĩowa ekĩnywa ky'Omukama. 40Nĩkwa Marata mwahanga-hangya omutima omo mĩbĩrĩ mingi yiwe; neryo mwahĩka uku Yesu mwabũga naye ati, Mukama, sulitanyĩkwĩra bũlĩge kusangwa mwali wetu abirinyitekera emĩbĩrĩ yosĩ kwehĩ? Umubwire uti anyĩwatĩkaye! 41Nĩkwa Omukama mwamũsũbĩrya ati, Marata, Marata! Ukayiganyira n'eriganga-ganga busana n'emyatsi mingi; 42nĩkwa omwatsi muguma atolere, kusangwa Marĩa abiriyisoga omwatsi mubuya owate angasagulwa.

will be added

X\