LŨKA 1

1Uku Teofĩlo mubuya! Abandu bangi babirirenga ndeke erisaka emyatsi eyakolawa omo katĩkatĩ ketu. 2Abandu abo mobatubwira emyatsi eyo, ibabiribya balangĩrĩ n'abatũlĩ b'ekĩnywa ekyo erĩtsũka erĩmbere. 3Neryo uwe, Teofĩlo, kyamabya kibuya erikusakira ndeke eritondeka ly'emyatsi eyo nabĩrĩbũlĩrĩrya ndeke erĩtsũka erĩmbere. 4Iwatoka eriminya ndeke ekwenene y'emyatsi eyo wabĩrĩkangĩrĩrĩbwa. 5Omo biro bya Herode, omwami w'eYũdea, habya omũhererĩ oyukahulawa mo Zakarĩa w'ekihanda kya Abĩya. Erĩna lya mũkalĩwe abya iyo Elĩzabetĩ. Naye abya w'ekĩtũnga kya Harũnĩ. 6Kandi ababiri bosĩ babya batunganene embere sya Nyamuhanga, ibakakwama ndeke ebihano byosĩ n'ebilayiro by'Omukama. 7Kandi isibawite bana, kusangwa Elĩzabetĩ abya mugumba, n'ababiri bosĩ ibabirikekeluha. 8Neryo ekiro kiguma Zakarĩa abya akakola omũbĩrĩ w'obũhererĩ embere sya Nyamuhanga omo kĩtũlĩ kiwe. 9Neryo ngoko abahererĩ babya bakakola, Zakarĩa mwayisogwa omo bukanga eriingira omo Hekalũ y'Omukama n'erĩhĩsya obukwa. 10N'endeko yosĩ y'abandu babya ibakasabira eyĩhya oko ndambĩ y'erihera obukwa. 11Neryo omũlaĩka w'Omukama mwabutukira uku Zakarĩa iniahangene oko luhande lw'amali lw'ekiherero ky'obukwa. 12Omugulu Zakarĩa alangira omũlaĩka mwahangya-hangya, kandi mubaha. 13Nĩkwa omũlaĩka mwamubwira ati, Zakarĩa, sigubahe. Nyamuhanga abĩrĩowa erisaba lyawe, n'omũkalĩ wawe asyakubutira omũlwana. Wasyahula erĩna liwe mo Yoane. 14Wasyatsema n'eritsanga, kandi abandu bangi basyatsemera eributwa liwe. 15Kusangwa asyabya mundu mukulu omo meso w'Omukama. Syasyepũlaya bĩnyũ kutse obwabũ bw'omuliro; kandi asyũsũlĩbwa n'Omũlĩmũ Abũyĩrĩre isialiabutwa. 16Kandi abandu bangi ba Ĩsraelĩ asyasũbyabo oko Mukama Nyamuhanga wabo. 17Kandi asyagenda ng'omukwenda wa Nyamuhanga, omo kĩrĩmũ n'obũtokĩ bwa Elĩa. Kandi asyasanganĩa abotata n'abana; nĩkwa asyasũbya abatĩowa oko menge w'abatunganene; asyategekanĩa abandu basĩke busana n'Omukama. 18Neryo Zakarĩa mwabwira omũlaĩka ati, Nasyaminya ebĩ byo ndeke nyiti kwehĩ? Kusangwa indi mũsyakulu, n'omũkalĩ wage ni mukekulu nibya. 19N'omũlaĩka mwamũsũbĩrya ati, Ingye indi Gabrĩelĩ. Oyukahangana embere sya Nyamuhanga, kandi nabiritumwa erikubwira, n'erikuletera Engulu Yowene eyĩ. 20Nĩkwa kusangwa sũlĩtĩkĩrĩrya ebĩnywa byage ebikandisyabererera oko mugulu atolere, ukandibya mũmũ, isiwendisyatoka erĩbũga erĩhĩka oko kiro omwatsi oyũ asyahĩka. 21Nĩkwa abandu ababya bakalindirira Zakarĩa mobasweka busana n'eriamala ndambĩ riwe omo Hekalũ. 22Neryo omugulu ahuluka, mwatatoka erĩbũga nabo. Neryo abandu abo mobaminya ngoko Zakarĩa abere omo bũlĩme omo Hekalũ. Neryo mwakoheryabo omo byala biwe, kusangwa mwabya mũmũ. 23Neryo omugulu ekĩtũlĩ kiwe kyahwa omo Hekalũ, Zakarĩa mwasuba eka wuwe. 24N'enyũma w'ebiro ebĩ mũkalĩwe ye Elĩzabetĩ mwaheka obukule; neryo mwasĩgala omo nyũmba yiwe mo mikera ĩtanu ati, 25Lino Omukama abĩrĩnyĩwatĩkya atya omo biro ebyo anyiganyira. Abĩrĩnyĩlũsya kw'esĩsonĩ emuliro sy'abandu. 26Oko mukera w'endatu w'obukule bwa Elĩzabetĩ, Nyamuhanga mwatuma omũlaĩka ye Gabrĩelĩ oko mũyĩ w'eGalĩlaya owakahulawa mo Nazaretĩ 27Omũlaĩka oyo mwaleta erilayira lya Nyamuhanga oko mumbesa oyo wasĩmolĩbawa n'omundu oyukahulawa mo Yosefũ, w'ekihanda kya Dawĩdĩ. Erĩna ly'omũmbesa oyo abya iyo Marĩa. 28Omũlaĩka oyo mwahĩka uku Marĩa mwamubwira ati, Wabũkĩre, uwe mutsumulwa. Omukama ali haguma nawe. 29Neryo Marĩa mwahanga-hangya omutima busana n'ekĩnywa, ekyo, neryo mwayĩbũlya erĩkerya eryo nga nĩ 'kerya lya mũsindo wahi. 30Neryo omũlaĩka mwamubwira ati, Sigubahe, Marĩa, kusangwa wabiribana olukogo ewa Nyamuhanga. 31Kandi lebaya, wasyaheka obukule n'eributa omũlwana, neryo wasyamwahula mo Yesu. 32Asyabya mukulu, kandi asyahulwa mo Mugala wa Nyamuhanga W'endata Kutsibu. Omukama Nyamuhanga asyamuha ekĩtũmbĩ ky'obwami kya tata-kulu wuwe Dawĩdĩ. 33Kandi asyatabalira ekihanda kya Yakobo kera na kera, n'obwami buwe sibwendisyahwa. 34Marĩa mwabwira omũlaĩka ati, Ĩngye ndawite mulume, k'omwatsi oyũ angabya ati kwehĩ? 35N'omũlaĩka mwamũsũbĩrya ati, Omũlĩmũ Abũyĩrĩre asyakũhĩkako, n'obũtokĩ b'Owendata Kutsibu bwasyakũsũkũlĩrya; busana n'omwatsi oyo, omwana abũyĩrĩre oyo wasyabuta asyahulwa mo Mugala wa Nyamuhanga. 36Neryo, lebaya mwali wenyu, ye Elĩzabetĩ omo bukekulu buwe abiriheka obukule bw'omwana w'obulume. N'oyo wahulawa mo mugumba ali n'obukule bw'emikera ndatu. 37Kusangwa uku Nyamuhanga sihali ekitetokekana. 38Neryo Marĩa mwabũga ati, Ĩngye indi mugombe w'Omukama, kinyibyeko ngoko wabĩrĩbũga. Neryo omũlaĩka oyo mwamũsĩganĩa mwagenda. 39Neryo oko biro ebyo Marĩa mwa-hangana, mwanguha eriya omo kihugo ky'ebitwa, oko mũyĩ w'eYũdea. 40Neryo mwingira omo nyũmba ya Zakarĩa, neryo mwabũkya Elĩzabetĩ. 41Omugulu Elĩzabetĩ owa erĩkerya lya Marĩa, omwana mwayisumba omo nda yiwe; neryo Elĩzabetĩ mũsũlĩbwa n'Omũlĩmũ Abũyĩrĩre. 42Neryo mwabirikira n'omulenge munene ati, Uli mutsumulwa omo katĩkatĩ k'abakalĩ! N'omwana wasyabuta ni mutsumulwa! 43Omwatsi munene oyũ akambĩkako ati kwehĩ? Uti koyo w'Omukama wage akasa erinyibana kwehĩ? 44Kusangwa omugulu ĩndĩowa omulenge w'erĩkerya lyawe, omwana mwakayisumba omo nda yage n'obutseme. 45N'obutseme buli uk'uwe ũkĩkĩrĩraya uti ekĩnywa ekyo Mukama akubwira kikandisyabererera. 46Neryo Marĩa mwabũga ati, Omutima wage akahamaya Omukama, 47Ekĩrĩmũ kyage kikatsemera Nyamuhanga Omũlamya wage. 48Kusangwa abirinyibuka ĩngye omugombe wuwe muke; Lebaya, erĩtsũka lino abandu bosĩ basyanyahula mo g'omũyĩsa. 49Kusangwa Nyamuhanga w'obũtokĩ abirinyikolera emyatsi minene, N'erĩna liwe lĩbũyĩrĩre. 50Eriganyira liwe liri oko bosĩ abakamubaha, Erĩtsũka oko lulengo luguma n'erĩhĩka oko sindi. 51Abirikola emĩbĩrĩ ĩkalĩre omo kuboko kuwe; Abiripanza-panza abakayiheka omo malengekanĩa w'emitima yabo. 52Abĩrĩkĩmya abatabalĩ erĩlũa oko bĩtũ mbĩ byabo by'obwami, Abĩrĩhamya abakayĩkehaya. 53Abĩrĩũgũtya abali n'enzala omo bindu bibuya; N'ab'ebindu abĩrĩsũbũlyabo byala bisa. 54Abĩrĩwatĩkya omugombe wuwe Ĩsraelĩ, Iniakibuka eriganyira liwe. 55Ngoko anabwira abotata wetu, Na Abrahamũ n'abana buwe kera na kera. 56Neryo Marĩa mwĩkala na Elĩzabetĩ nga mikera ĩsatu, neryo mwasuba eka wuwe. 57Neryo omugulu w'eributa lya Elĩzabetĩ mwahĩka, neryo mwabuta omũlwana. 58Neryo abalĩkyabo n'ab'ekĩtũnga kiwe mobowa ngoko Mukama abirimuganyira, neryo abosĩ mobatsema haguma naye. 59Neryo n'oko kiro ky'omunani mobasa erĩbanĩa omwana oyo; neryo mobasonda erimwahula mo Zakarĩa ng'erĩna ly'ĩse wuwe. 60Nĩkwa nyĩnya wuwe mwasũbĩryabo ati, Iyihi, asyahulwa mo Yoane. 61Mobamubwira bati, Sihali oyukahulawa omo lĩna erĩ omo kĩtũnga kyawe. 62Neryo mobakoherya ĩse wuwe, erĩmũbũlya ng'akasonda erimwahula mondi. 63Zakarĩa mwabũlya eky'erisakako, neryo mwasaka ati, Erĩna liwe yo Yoane. Neryo abosĩ mobasweka. 64Neryo-neryo Zakarĩa mwatoka erĩswabũga, n'olulimi luwe molwagobokala, neryo mwatsũka eripipa Nyamũhanga. 65N'eriubaha molyahamba abosĩ ababya bĩkere hakũhĩ nabo; n'engulu y'emyatsi eyĩ moyalaba omo kihugo kyosĩ ky'ebitwa by'eYũdea. 66N'abosĩ abowa omwatsi oyũ mobabikago omo mitima yabo, bati, Omwana oyũ asyabya ati kwehĩ? Kusangwa obũtokĩ bw'Omukama bwabya haguma naye. 67Ĩse wuwe ye Zakarĩa mũsũlĩbwa n'Omũlĩmũ Abũyĩrĩre, mwaminyerera ati, 68Tupipe Omukama Nyamuhanga wa Ĩsraelĩ! Kusangwa abĩrĩhika erĩwatĩkya abandu buwe, n'erihabo obwĩranda 69Abĩrĩtũhanganĩrya Omũlamya w'amaka, Omo kĩtũnga ky'omugombe wuwe Dawĩdĩ. 70Abũga ebĩ byo kera omo buno bw'abamĩnyererĩ buwe babũyĩrĩre. 71Tũlamĩbawe oko nzĩgũ syetu, N'omo byala by'abosĩ abakatũkwa obusu. 72Erĩkangya eriganyira liwe oko botata wetu, N'eribuka endagane yiwe ĩbũyĩrĩre. 73Erĩlahĩrya eryo alahĩrĩraya tata wetu Abrahamũ. 74Atuhe erĩtongolĩbwa omo byala by'esyonzĩgũ syetu, Itwamukolera butsira buba, 75Tubye babũyĩrĩre n'abatunganene embere siwe Omo biro byetu byosĩ. 76Nawe, mwana wage, wasyahulwa mo mũmĩnyererĩ w'Owendata Kutsibu. Kusangwa wasyatangirira embere sy'Omukama erĩowanĩa esyonzira siwe. 77Eriha abandu buwe eriminya ly'erĩlamĩbwa Omo nzira y'eribuyira ebibi byabo. 78Kusangwa Nyamuhanga wetu ni w'omutima w'eriganyira, Lyasyaleka omusakala w'erilama akalũa endata ĩnĩahĩka erĩtũkolerya. 79Erĩkolerya oko bandu abĩkere omo mwĩrĩmya n'omo kyũtũtũ ky'oluholo, Erisondola ebisando byetu omo nzira y'obuholo. 80N'omwana mwakula omo mubiri n'eribya n'amaka omo kĩrĩmũ kiwe; neryo mwasiba omo mbwarara erĩhĩka oko kiro ahũluka embere sya Ĩsraelĩ.

will be added

X\