YŨDA 1

1Ĩngye Yũda, omugombe wa Yesu Kristo, n'omugala wabo Yakobo, ngabasakira ĩnywe mwabirikirawa, abanzĩrwe na Nyamuhanga Tata, kandi abakalemberawa busana na Yesu Kristo. 2Eriganyira, n'obuholo, n'olwanzo bikanye ũkw'ĩnywe. 3Abanze betu, nabya ngalenga kutsibu eribasakira omwatsi w'erilama lyetu eryo tũsangĩre. Kandi naganĩraya nyiti litolere inabasakira eribalemba-lemba nyiti, Mulwire erĩkĩrĩrya eryo Nyamuhanga abiriha abandu buwe busana na kera na kera. 4Kusangwa abandi bandu, abatekenga Nyamuhanga, babiringira omo katĩkatĩ ketu mo bũbĩso-bĩso. Abandu aba bakahengemaya olukogo lwa Nyamuhanga wetu omo nzira y'erikwama esyongumbu nyibi, ibakagana Omukama muguma wetu n'Omukulu wetu Yesu Kristo. Kera Amasako mwahula omusango wabo oyũ. 5Nomo mũnasĩ emyatsi yosĩ, lino ngasonda erĩbĩbũkya, ngoko Mukama mwalamya bandu omo kihugo ky'eMĩsĩrĩ, nĩkwa enyũma mwaherya abatĩkĩrĩraya. 6Kandi ngabĩbũkaya ngoko abamalaĩka abayisamambula, abatswa aho wabo, Nyamuhanga abiribikabo omo mwĩrĩmya n'omo mũlĩkĩ w'erikota busana n'Ekiro kikulu ky'eritswera. 7Ng'abandu b'eSodomo n'eGomora, n'emĩyĩ eyo yabya hakũhĩ nayo, mobahalya ng'abamalaĩka abo. Mobayiha okw'ĩsĩngĩra libi, kandi mobakwama esyongumbu sy'esĩsonĩ omo mibiri yabo. Aba babirisuyirwa omo muliro w'erikota, ibakabya kĩmĩnyĩsyo oko bandu bosĩ. 8Kandi abandu aba bakakola batya. Busana n'erilota lyabo bakatsandaya emibiri yabo. Kandi bakagana ehamũlĩ ya Nyamuhanga, ibakatsuma abali n'olukengerwa endata. 9Nĩkwa Mĩkaelĩ omũlaĩka mukulu, ekiro alwa n'eSatanĩ n'erikuba obuhaka nayo busana n'omubiri wa Musa, mwatalĩga eritswera Satanĩ omo bĩnywa by'erimutsuma, nĩkwa mwabwirayo ati, Omwami Mukulu akukunge. 10Nĩkwa kandi abandu aba bakatsuma emyatsi eyo batasĩ. Kandi emyatsi yosĩ eyo basĩ omo mĩbĩrĩ yabo, ng'esyonyama esitawite obũlengekanĩa, emyatsi eyo yo yĩkaherayabo. 11Obũlĩge kubo! Kusangwa babirikwama enzira ya Kaĩna, kandi bakanguha erikwama eritala lya Balama busana n'ebihembo, kandi babirihera omw'iyisamambula lya Kora. 12Abandu aba ni bandu b'emĩtĩndũ omw'irya lyenyũ ly'Abakristo, ibakalya haguma nenyũ butsira eriubaha, ibakayirembera ĩbobene. Bali ng'ebĩtũ ebite mo mbũla, ibakahekawa n'erihunga. Bali ng'emiti eyitawite ebĩgũma oko mugulu atolere. Kandi bali ng'emiti eyũmĩre kabiri, eyabirikulangwa n'emĩrĩhĩ yayo. 13Bali ng'ebisunda by'engetsi ebitekũbĩbawa, abakahũlũkaya emĩbĩrĩ yabo y'esĩsonĩ ng'erĩhũlo. Bali ng'esyongũnũnũ esikagalaganda. Nyamuhanga abiribikirabo omwĩrĩmya w'omũhĩndanĩa w'erikota. 14Kandi Enoka oyo wabya w'olulengo lwa Adamu, mwaminyerera busana n'abandu aba ati, Lebaya, Omukama asyasa haguma n'abamalaĩka babũyĩrĩre buwe maelfu n'amaelfu, 15eritswera abosĩ, n'erĩsĩnga abosĩ abatekenga Nyamuhanga busana n'emĩbĩrĩ yabo eyitekenga Nyamuhanga, eyo bakahalayamo, kandi asyasĩnga abakola-nabi abo abatekenga Nyamuhanga busana n'emyatsi yosĩ eyĩkalĩre eyo babĩrĩbũga omw'imunegmira. 16Abandu aba bakatonga, n'erirega abandi, ibakakwama esyongumbu syabo nyibi. Bakabũga n'erĩyĩhamya, kandi bakapipa abandu busana n'eribana kubo kw'endũndĩ. 17Nĩkwa ĩnywe, abanze betu, mwibuke ebĩnywa byabũgawa erĩmbere n'abakwenda b'Omukama wetu Yesu Kristo. 18Babya bakababwira bati, Oko migulu y'enyũma-nyũma hasyabya abasegemetererya, abakakwama esyongumbu syabo nyibi. 19Aba ni bandu bakaleta erigabana, bakakwama amalengekanĩa w'ekihugo, isibawite Omũlĩmũ wa Nyamuhanga. 20Nĩkwa ĩnywe, abanze betu, mũyĩhĩmbe okw'ĩkĩrĩrya lyenyũ erĩbũyĩrĩre kutsibu; kandi musabe omo bũtokĩ bw'Omũlĩmũ Abũyĩrĩre. 21Muyibike omo lwanzo lwa Nyamuhanga, imukalindirira eriganyira ly'Omukama wetu Yesu Kristo, erikaleta engebe y'erikota. 22Muganyire abandu abakatika-tika. 23Mũlamayebo, imukabakulabo omo muliro. Kandi muganyire abandi, imukubaha, n'eripona esyongimba syabo esĩtũnda-tũndĩre omo mĩtĩndũ y'omubiri. 24Neryo ukw'oyukatoka erĩbateya okw'itoga, kandi akatoka eribaleta omo lukengerwa lw'embere siwe omo butseme bunene, isimuwite eky'erĩhandĩkĩrĩrĩbwa. 25Uku Nyamuhanga muguma musa, Omũlamya wetu, omwisi wa Yesu Kristo Omukama wetu, ukw'iye habye olukengerwa, n'obukulu, n'obũtokĩ bosĩ, n'ehamũlĩ, erĩtsũka oko migulu yosĩ ya kera, na lino-lino, na kera na kera. Amina.

will be added

X\